Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Ogos 2016

Bisi Nuan Beratika Kebuah Nuan Patut Ngelatih Orang Bukai?

Bisi Nuan Beratika Kebuah Nuan Patut Ngelatih Orang Bukai?

“Utai ti diajar aku ngagai nuan endang utai ti manah.”—J-lam. 4:2.

LAGU: 93, 96

1, 2. Nama kebuah kitai enda tau enda ngelatih orang bukai bejalaika pengawa teokratik?

JESUS bebendar nusui pasal Perintah Petara. Iya mega ngena mayuh jam ngelatih bala murid iya. Iya nunjukka sida chara ngajar sereta chara ngibun nembiak Petara. Bala murid belajar nyadi pengibun ke ngintu bedus sida. (Mat. 10:5-7) Philip mega kisuk enggau pengawa nginjil, taja pia iya ngelatih bala anak indu iya ngereja pengawa ti sama. (SKR. 21:8, 9) Kemaya hari tu kitai mega patut ngelatih orang bukai. Nama kebuah?

2 Ba gempuru di serata dunya, bisi mayuh orang ke baru ke bedau dibaptisa. Orang ke baru tu patut dilatih. Kitai enda tau enda nulung sida meretika kebuah macha sereta belajarka Bup Kudus kediri empu nya manah ke sida. Lalu kitai mega patut ngelatih sida nginjil sereta ngajar orang berita manah. Bala menyadi Kristian lelaki ke baru udah dibaptisa begunaka latih ngambika nyau kelama sida ulih nyadi penulung gempuru sereta tuai gempuru. Semua orang ba gempuru ulih ngereja mayuh utai kena nulung orang ke baru.—J-lam. 4:2.

 NGAJAR ORANG KE BARU CHARA BELAJARKA BUP KUDUS

3, 4. (a) Baka ni Paul nunjukka kaul entara belajarka Bup Kudus enggau pemujur ba pengawa nginjil? (b) Sebedau kitai meransang pelajar kitai belajarka Bup Kudus kediri empu, nama enda tau enda dikereja kitai?

3 Tiap iku nembiak Jehovah patut macha sereta belajarka Bup Kudus ngambika nemu peneka Petara. Rasul Paul nerangka tu ngagai bala menyadi Kristian ba Kolosi lebuh iya madahka: ‘Kami enda ngetu besampika kita, minta kita dipenuhka enggau penemu pasal peneka Petara.’ Nama kebuah sida enda tau enda macha sereta belajarka Bup Kudus? Laban tu deka meri sida penemu-dalam sereta nulung sida meretika chara sida ulih ‘idup nitihka jalai Jehovah, ngerinduka ati Iya.’ Tu mega deka nulung sida ngereja “semua pengawa ti manah” ke dikedekaka Jehovah kereja sida, kelebih agi nusui berita manah. (Kol. 1:9, 10) Nya alai enti kitai belajar enggau orang, kitai patut nulung iya meretika, macha sereta belajarka Bup Kudus enggau tetap ulih nulung iya gawa ke Jehovah.

4 Kitai enda ulih nulung pelajar Bup Kudus kitai meretika kebuah belajarka Bup Kudus kediri empu nya beguna enti kitai empu enda belajarka Bup Kudus. Endang amat, enti kitai enggau tetap macha sereta belematika Bup Kudus, tu deka nulung kitai ba pengidup sereta ba pengawa nginjil. Ngambika chunto, lebuh kitai enggau pengawa nginjil, lalu orang bisi nanya kitai pasal utai ke tusah disaut, kitai ulih ngena Bup Kudus nyaut tanya nya. Pia mega lebuh kitai macha pasal Jesus, Paul sereta orang bukai ke enda lemi semengat ba pengawa nginjil, kitai deka diperansang sereta deka terus nginjil indah lebuh iya tusah dikereja. Lebuh kitai madah ngagai orang bukai pasal utai ti udah dipelajarka kitai sereta baka ni utai nya udah nulung kitai, kitai ulih meransang sida belajarka Bup Kudus enggau dalam agi ngambika sida mega bulih penguntung ti sama.

5. Padahka siti chara dikena nulung orang ke baru ngambika deka belajarka Bup Kudus enggau tetap.

5 Nuan ulih nanya diri empu, ‘Baka ni aku ulih ngelatih pelajar aku belajarka Bup Kudus enggau tetap?’ Nuan ulih nunjukka iya chara nyediaka saut ke bisi dalam litaricha ke dipelajarka nuan enggau iya. Nuan ulih ngasuh iya beratika ayat Bup Kudus ke dikena sereta macha Penerang ke bekaul enggau utai ti dipelajarka iya dalam bup Nama Utai ti Bendar Diajar Bup Kudus. Udah nya, nuan ulih nunjukka  iya chara nyediaka utai ti dikena begempuru ngambika iya ulih meri komen. Peransang iya macha tiap iti majalah Menara Jaga enggau Awake! Lalu nuan ulih nunjukka iya chara ngiga saut ngagai tanya Bup Kudus, ngambika chunto ngena Watchtower Library tauka Watchtower ONLINE LIBRARY. Lebuh iya nguji chara ti enda sama maya belajarka Bup Kudus kediri empu, iya deka rindu sereta deka belajar mayuh agi.

6. (a) Baka ni nuan ulih nulung pelajar nuan ngambika iya rinduka Bup Kudus? (b) Nama deka digaga pelajar Bup Kudus enti iya ngemansangka pengerindu ti dalam ke Bup Kudus?

6 Lebuh kitai belajar enggau orang, kitai deka iya nemu, Bup Kudus nya bup ti beguna laban ulih nulung iya ngelala Jehovah enggau manah agi. Ari ke ngansak iya belajar, kitai ulih nunjukka iya chara ke ulih ngasuh iya rindu deka belajar. Mayuh agi utai ti dipelajarka iya ari Bup Kudus, suah agi iya deka ngasaika utai ti diasaika pemasmur ke belagu: ‘Naka meh pengelantang aku diau semak Petara, dijaga Jehovah ti Pemadu Tinggi.’ (Mas. 73:28) Roh kudus Jehovah tentu deka nulung orang ke keran deka semak agi ngagai Iya.

NGELATIH ORANG KE BARU NGINJIL SERETA NGAJAR

7. Baka ni Jesus ngelatih bala penginjil berita manah? (Peda gambar ba pun artikel.)

7 Kitai ulih belajarka mayuh utai ari chara Jesus ngelatih bala rasul iya. Jesus mai sida lebuh iya nginjil, lalu sida beratika chara iya ngajar orang. Iya mega meri sida iring ti nyemetak pasal chara sida patut nginjil. (Matthew, bab 10) [1] (Peda nota penutup.) Enda lama udah nya, bala rasul belajar ari Jesus chara ngajar orang pemendar. (Mat.11:1) Aram kitai berandauka dua iti chara ke ulih dikena kitai ngelatih orang ke baru lebuh sida nginjil.

8, 9. (a) Baka ni Jesus berandau enggau orang lebuh iya nginjil? (b) Baka ni kitai ulih nulung penginjil ke baru berandau enggau orang baka ke digaga Jesus?

8 Berandau enggau orang. Jesus enda seruran bejaku pasal Perintah Petara ba mua orang mayuh. Iya suah bejaku ngagai seiku-seiku orang, lalu iya ngereja tu enggau chara ti manah. Ngambika chunto, iya bisi randau ti ngerinduka ati enggau seiku indu ke datai nyauk ai ari telaga semak nengeri Saikar. (Jhn. 4:5-30) Jesus mega bejaku enggau Matthew Lewi, seiku pengumpul chukai, lalu mai Matthew Lewi nyadi murid iya. Matthew Lewi deka nyadi murid Jesus, lalu udah nya mai Jesus enggau orang bukai makai ba rumah iya. Lebuh dia, Jesus bejaku enggau mayuh orang.—Mat. 9:9; Luk. 5:27-39.

Lebuh kitai bejaku ngagai orang enggau chara ti manah sereta nelap, sida deka agi mendingka utai ke dipadah kitai

9 Jesus mega bejaku ngagai Natanel enggau chara ti manah, taja pan Natanel nyebut utai ke enda manah pasal orang ari nengeri Nasaret. Ketegal Jesus bejaku ngagai iya enggau chara ti manah, Natanel ngubah runding iya pasal Jesus, ke datai ari nengeri Nasaret. Lalu Natanel deka belajar mayuh agi ari Jesus. (Jhn. 1:46-51)  Ari teladan Jesus, kitai nemu lebuh kitai bejaku ngagai orang enggau chara ti manah sereta nelap, sida deka agi mendingka utai ke dipadah kitai. [2] [Nota penutup.] Lebuh kitai ngelatih orang ke baru bejaku ngena chara tu, sida deka rindu agi ba pengawa nginjil.

10-12. (a) Baka ni Jesus ngemansangka minat ke diayanka orang pasal berita manah? (b) Baka ni kitai ulih nulung penginjil ke baru ngemansangka pengelandik sida nyadi pengajar Bup Kudus?

10 Ngajar orang ke deka ninga. Jesus nadai mayuh awak kena bejalaika pengawa nginjil. Tang lebuh orang deka mendingka iya, iya meri awak begulai enggau sida sereta ngajar sida mayuh utai. Ngambika chunto, bisi sekali mayuh amat orang begelumu mendingka Jesus ba tebing danau. Nya kebuah, Jesus nepan perau enggau Peter, lalu ngajar orang ari perau nya. Udah nya, iya mega ngajar Peter. Jesus ngaga kereja ajih enggau nyediaka mayuh ikan ngambika Peter ulih nangkap ikan nya. Udah nya, ku iya madah ngagai Peter: “Berengkah ari diatu nuan deka ngulihka mensia.” Tekala nya Peter sereta orang ke sama enggau iya “narit perau dua buah nya ke tebing, sida ninggalka semua utai” lalu nitihka Jesus.—Luk. 5:1-11.

11 Nikodimus mega deka belajar mayuh agi ari Jesus. Tang ketegal Nikodimus nya seiku ari raban Kunsil, iya nangika jaku orang enti sida meda iya bejaku enggau Jesus. Nya kebuah, iya betemu enggau Jesus maya malam hari. Jesus enda muru Nikodimus, tang ngena jam enggau iya sereta nerangka pemendar ngagai iya. (Jhn. 3:1, 2) Jesus seruran deka ngena jam iya ngajar orang pasal pemendar sereta ngeringka pengarap sida. Pia mega, kitai patut datai ngabas orang ba maya ti dikedekaka sida, lalu ngena jam kitai nulung sida meretika Bup Kudus.

12 Lebuh kitai bekereja enggau orang ke baru ba pengawa nginjil, kitai ulih ngajar sida chara datai ngabas orang ke bisi minat. Kitai mega ulih mai orang ke baru enggau kitai ngereja pengawa datai ngabas sereta belajarka Bup Kudus. Enggau tu, sida ulih belajarka chara ngajar orang bukai sereta ulih ngasaika nulung orang belajarka pemendar pasal Jehovah nya utai ti ngerinduka ati. Udah nya, sida deka gagit ati datai ngabas orang sereta belajarka Bup Kudus enggau orang nya. Sida mega deka belajar nyadi penginjil ke sabar sereta enda jampat lemi semengat lebuh sida nadai tetemuka orang ba rumah.—Gal. 5:22; peda ba kutak “ Iya Enda Lemi Semengat.”

NGELATIH ORANG KE BARU NGINTU BALA MENYADI KRISTIAN SIDA

13, 14. (a) Nama runding nuan pasal teladan orang ke bisi dalam Bup Kudus ke udah ngelengkaka mayuh utai ketegal orang bukai? (b) Nama chara ke ulih dikena nuan ngelatih penginjil baru enggau orang ke biak ngayanka pengerindu sida ngagai bala menyadi Kristian sida?

13 Jehovah dekaka nembiak Iya rinduka pangan diri baka diri menyadi sereta ngintu pangan diri. (Bacha Luke 22:24-27; 1 Peter 1:22.) Bup Kudus madahka, Jesus meri semua utai, nyengkaum nyawa diri, dikena nulung orang bukai. (Mat. 20:28) Dorkas “endang seruran ngereja utai ti manah, sereta nulung orang ke seranta.” (SKR. 9:36, 39) Maria “bebendar amat bekereja” ke bala menyadi Kristian ba menua Rome. (Rom. 16:6) Baka ni kitai ulih nulung orang ke baru meretika kebuah  nya beguna ngereja utai ti manah ngagai bala menyadi Kristian sida?

Ngelatih orang ke baru rinduka sereta ngintu bala menyadi Kristian sida (Peda genteran 13, 14)

14 Kitai ulih mai orang ke baru sama enggau kitai lebuh ngabas sida ke tuai tauka sida ke sakit. Lalu lebuh apai indai ngabas orang ke baka nya, enti ulih sida tau mai bala anak sida. Bala tuai gempuru ulih mai orang ke biak tauka orang ke baru sama bekereja enggau sida enti sida bisi mai pemakai ke sida ti tuai tauka ngaduka rumah sida. Lebuh orang ke biak sereta orang ke baru meda chara bala menyadi Kristian kitai ngintu pangan diri, sida deka belajar ngereja utai ti sama. Ngambika chunto, lebuh nginjil ba menua pesisir, seiku tuai gempuru enggau tetap ngabas bala menyadi Kristian ke diau dia ngambika ulih nemu baka ni gaya sida. Seiku menyadi Kristian lelaki ke biak ke suah enggau tuai gempuru nya belajar ari teladan manah tuai gempuru nya pasal utai ke ulih digaga iya kena nulung bala menyadi Kristian.—Rom. 12:10.

15. Nama kebuah bala tuai gempuru enda tau enda beminat enggau pemansang bala menyadi Kristian lelaki ba gempuru?

15 Jehovah udah meri sida ke lelaki tanggung pengawa ngajar Jaku Petara ngagai bala menyadi Kristian. Nya alai, bala menyadi Kristian lelaki enda tau enda nemu chara ngajar ti manah lebuh sida meri cheramah. Enti nuan nya seiku tuai gempuru, nuan engka ulih mendingka penulung gempuru lebuh iya belatih meri cheramah sereta nulung iya ngaga pemansang. (Neh. 8:8) [3]—Peda nota penutup.

16, 17. (a) Nama digaga Paul ngambika Timoti ngaga pemansang? (b) Baka ni tuai gempuru ulih ngelatih orang ke ulih nyadi pengibun ba gempuru?

16 Endang patut ngelatih mayuh agi bala menyadi Kristian lelaki nyadi pengibun ba gempuru. Paul ngelatih Timoti lalu meransang iya ngelatih orang bukai. Paul madahka: “Anang enda ngeringka diri dalam pengasih Jesus Kristus, lalu jaku ti udah didinga nuan ari aku di mua orang mayuh, serahka jaku nya ngagai orang ke tetap ati, ke ulih ngajar orang bukai.” (2 Tim. 2:1, 2) Timoti belajarka mayuh utai ari Paul, ke nyadi tuai gempuru sereta rasul, baka ngemanahka chara iya nginjil sereta chara kena nulung orang bukai ba gempuru.—2 Tim. 3:10-12.

17 Paul ngena mayuh jam enggau Timoti laban iya deka nentuka Timoti dilatih enggau manah. (SKR. 16:1-5) Bala tuai gempuru ulih neladan Paul enggau mai bala penulung gempuru sama enggau ngaga sekeda pengawa datai meransang. Enggau tu, bala penulung gempuru deka belajar ari bala tuai gempuru chara ngajar orang  bukai, chara ngambika sabar sereta bepengerindu, enggau chara bepanggai ba Jehovah lebuh ngibun nembiak Iya.—1 Pet. 5:2.

PENGAWA NGELATIH ENDANG BEGUNA

18. Nama kebuah ngelatih orang bukai gawa ke Jehovah nya patut nyadi pengawa ti beguna ba kitai?

18 Ba pengujung dunya tu, mayuh orang ke baru patut dilatih ngambika ulih ngemanahka agi pengelandik sida ba pengawa nginjil. Bisi mega bala menyadi Kristian lelaki ke patut belajar chara ngibun bala menyadi Kristian. Jehovah dekaka semua nembiak Iya dilatih enggau manah, lalu Iya udah meri kitai peluang ngambika ulih nulung orang ke baru. Nya alai kitai patut bebendar ngelatih orang bukai, baka ke digaga Jesus enggau Paul. Kitai patut ngelatih mayuh agi orang ke baru, laban agi mayuh utai ke patut digaga ba pengawa nginjil sebedau pengujung datai.

19. Nama kebuah nuan patut pechaya pemagas nuan ngelatih orang bukai gawa ke Jehovah ulih mujur?

19 Ngelatih orang ke baru begunaka jam sereta patut digaga enggau bebendar. Tang kitai ulih pechaya, Jehovah enggau Jesus deka nulung kitai nemu baka ni ngelatih orang bukai enggau chara ti pemadu manah. Kitai deka gaga ati seraya kitai meda orang ke dilatih kitai “bebendar bekereja” ba gempuru tauka ba pengawa nginjil. (1 Tim. 4:10) Pia mega, kitai patut terus enggau naka ulih ngaga pemansang ba rohani, ngemanahka kualiti Kristian kitai sereta majak semak agi ngagai Jehovah.

^ [1] (genteran 7) Ngambika chunto, Jesus ngasuh bala murid iya (1) nusui pasal Perintah Petara; (2) bepanggai ba Petara ngambika nyediaka pemakai enggau gari ke diguna sida; (3) nyeliahka diri ari bekelikuh enggau orang; (4) bepanggai ba Petara lebuh orang merinsaka sida; lalu (5) enda takut enggau utai ti deka dikereja orang ngagai sida.

^ [2] (genteran 9) Memperoleh Manfaat dari Pendidikan Sekolah Pelayanan Teokratis-IN, lambar 62-65, bisi chara ti badas baka ni bejaku enggau orang lebuh nginjil.

^ [3] (genteran 15) Memperoleh Manfaat dari Pendidikan Sekolah Pelayanan Teokratis-IN, lambar 52-61, nerangka chara bala menyadi Kristian lelaki ulih ngemansangka chara sida meri cheramah ba gempuru.