Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 19

Ngayanka Pengerindu sereta Ngetanka Pengelurus Lebuh Penyai Nyadi

Ngayanka Pengerindu sereta Ngetanka Pengelurus Lebuh Penyai Nyadi

‘Nuan ukai Petara ti rinduka penyai . . . Nuan begedika semua orang ke ngereja penyai.’—MAS. 5:4, 5.

LAGU 142 Bepegai Teguh ba Pengadang Kitai

DALAM ARTIKEL TU *

1-3. (a) Nitihka Masmur 5:4-6, baka ni asai ati Jehovah pasal penyai? (b) Nama kebuah kitai ngumbai pengawa ngemediska anak mit belaban enggau “adat Kristus”?

PETARA JEHOVAH begedika semua bansa penyai. (Bacha Masmur 5:4-6.) Iya balat begedika pengawa ngemediska anak mit ngena chara seksual. Nya penyalah ti amat besai! Ketegal kitai neladan Jehovah, kitai begedika pengawa ti jai nya lalu enggai ngelakka nya nyadi ba eklisia.—Rom. 12:9; Heb. 12:15, 16.

2 Sebarang pengawa ti ngemediska anak mit endang belaban enggau “adat Kristus”! (Gal. 6:2) Nama kebuah? Ba artikel sebedau tu kitai belajar, adat Kristus nya semua utai ti diajar Kristus ngena jaku enggau teladan. Adat nya bepelasarka pengerindu sereta seruran lurus. Ketegal Saksi-Saksi Jehovah ngasika adat nya, sida ngintu anak ngambika anak berasai likun sereta dikesayau. Tang ngemediska anak mit ngena chara seksual nya pengawa ti salah sereta berundingka diri empu. Nya ngasuh anak berasai enda likun sereta enda dikesayau.

3 Tang sinu amat, pengawa ngemediska anak mit ngena chara seksual balat nyadi ba serata dunya. Lalu nya mega ngachau Saksi-Saksi Jehovah. Nama kebuah? Nya ketegal “orang ke jai, enggau orang ke pura-pura ngapa” majak mayuh, lalu sekeda ari sida engka nguji tama ngagai eklisia kitai. (2 Tim. 3:13) Pia mega, sekeda menyadi Kristian kitai udah nejuka pengingin ti jai nya bekuasa atas sida lalu ngujungka sida ngemediska anak mit ngena chara seksual. Aram kitai berandauka kebuah pengawa nya dosa ti balat jai. Udah nya kitai deka berandauka  chara tuai gempuru mutarka dosa ti besai ke nyengkaum ngemediska anak mit ngena chara seksual, lalu chara apai indai ulih nyaga anak sida. *

DOSA TI BALAT JAI

4-5. Nama kebuah ngemediska anak mit nya dosa ngagai mansa?

4 Pengawa ngemediska anak mit mai empas ke ngasuh mansa nya lama merinsa. Tu ngemediska sida ke nyadi mansa, diri sebilik mansa, sereta bala menyadi Kristian. Pengawa tu endang dosa ti amat jai.

5 Dosa ngagai mansa. * Ngemedis sereta ngasuh orang merinsa nya pengawa ti bedosa. Artikel pengudah tu madahka, ngemediska anak mit ngena chara seksual ngeruga pendiau anak mit dalam mayuh chara. Ketegal sida ngereja pengawa ti jai nya, anak mit enda ulih arapka sida lalu ngasaika diri enda likun. Anak mit patut dilindung ari pengawa ti jai tu, lalu sida ke nyadi mansa begunaka bantu sereta jaku ti ngelantangka ati.—1 Tes. 5:14.

6-7. Nama kebuah pengawa ngemediska anak mit ngena chara seksual nya “dosa” ngagai eklisia sereta perintah menua?

6 Dosa ngagai eklisia. Menyadi Kristian ke ngereja penyalah tu ngenyaika nama eklisia. (Mat. 5:16; 1 Pet. 2:12) Endang enda patut ngumbai eklisia ngelakka pengawa tu laban bejuta iku bala menyadi Kristian ke tetap ati bebendar deka ngemuliaka Jehovah! (Jud. 3) Kitai enda ngelakka sida ke ngereja penyai sereta ke enda nesal ati agi terus begulai enggau bala menyadi Kristian ba eklisia.

7 “Dosa” ngagai perintah menua. Orang Kristian patut “nunduk ngagai perintah ti megai menua.” (Rom. 13:1) Kitai nunjukka diri nunduk lebuh kitai bebasa sereta ngasika undang-undang menua. Enti menyadi Kristian bisi ngereja penyalah ke ngelanggar undang-undang menua, baka ngemediska anak mit ngena chara seksual, iya “bedosa” ngagai perintah menua. (Banding Kereja Rasul 25:8.) Tuai gempuru nadai kuasa ngukum orang ke ngelanggar undang-undang menua. Tang, sida enda ngelindung orang ke ngemediska anak mit ari diukum perintah menua nya. (Rom. 13:4) Orang ke salah nya deka diukum ketegal penyalah ke digaga iya.—Gal. 6:7.

8. Nama runding Jehovah pasal orang ke ngereja dosa ngagai pangan diri?

8 Kelebih agi, pengawa nya dosa ngagai Petara. (Mas. 51:4) Lebuh orang bedosa ngagai pangan diri, iya mega bedosa ngagai Jehovah. Peratika chunto ari Adat Moses ti diberi Petara ke orang Israel. Adat nya madahka, orang ke ngenchuri tauka nipu nya ‘bedosa ngelaban Jehovah.’ (Lew. 6:2-4) Nya alai, menyadi Kristian ke ngemediska anak mit nunjukka diri enda tetap ati ngagai Petara laban iya nipu anak mit nya. Anak mit nya arapka iya tang iya ngambi ulih ari peluang nya. Tu ngujungka anak mit nya enda berasai likun agi. Orang ke nyembah Jehovah ti ngemediska anak mit ngenyaika nama Iya. Nya kebuah pengawa nya dosa ngagai Petara.

9. Nama penerang ti bepelasarka Bup Kudus ke udah disediaka gerempung Jehovah? Nama kebuah kitai nitihka chara ti pemadu baru kena mutarka penyalah nya?

9 Betaun-taun ti udah, gerempung Jehovah  nyediaka mayuh penerang ti bepelasarka Bup Kudus bekaul enggau topik ngemediska anak mit ngena chara seksual. Ambika chunto, mayuh artikel ba Menara Jaga sereta Sedarlah! berandauka chara mutarka pemedis ke lama ditapi sida ke nyadi mansa lalu chara orang bukai ulih nulung sereta ngelantangka ati sida. Artikel nya mega madahka chara apai indai ulih nyaga anak sida. Gerempung kitai udah meri iring ti nyemetak bepelasarka Bup Kudus ngagai tuai gempuru pasal utai ke patut digaga lebuh orang ngereja penyalah ti jai tu. Gerempung kitai seruran beratika chara ti pemadu baru kena nulung eklisia mutarka pekara nya. Nama kebuah? Tu kena nentuka chara kitai mutarka pekara nya sejalai enggau adat Kristus.

MUTARKA PENYALAH TI BESAI

10-12. (a) Lebuh tuai gempuru mutarka pekara ti bekaul enggau penyalah ti besai, nama dikingatka sida? Nama utai ti pemadu dikemeratka sida? (b) Nama deka digaga tuai gempuru nitihka James 5:14, 15?

10 Lebuh tuai gempuru mutarka pekara ti bekaul enggau penyalah ti besai, sida ingatka adat Kristus ke ngasuh sida ngintu nembiak Petara enggau pengerindu lalu ngereja utai ti dikumbai Petara ngena sereta lurus. Ketegal tu, sida patut berundingka sekeda pekara lebuh nemu menyadi Kristian ba eklisia bisi ngereja penyalah ti besai. Utai ti pemadu dikemeratka tuai gempuru iya nya, meri basa ngagai Jehovah sereta nyaga nama Iya. (Lew. 22:31, 32; Mat. 6:9) Siti agi utai ti dikemeratka sida iya nya, nulung bala menyadi Kristian ke tetap ati mengkang semak enggau Jehovah lalu nulung sida ke nyadi mansa.

11 Pia mega, enti orang ke ngereja penyalah nya menyadi Kristian kitai, tuai gempuru patut nguji ngemanahka baru kaul iya enggau Jehovah. (Bacha James 5:14, 15.) Menyadi Kristian ke ngereja penyalah ti besai ketegal deka ngemuaska pengingin diri ti salah nya baka orang ke sakit. Reti nya, kaul iya enggau Jehovah lemi. * Lalu tuai gempuru nya baka lutur. Sida bebendar nguji “deka ngeraika orang ke sakit [orang ke ngereja penyalah].” Sida ngena jaku lalau ari Bup Kudus nulung ngemanahka baru kaul iya enggau Jehovah. Tang tu semina ulih digaga enti iya nesal ati.—SKR. 3:19; 2 Kor. 2:5-10.

12 Amat, tuai gempuru bisi tanggung pengawa ti berat. Sida amat rinduka bala menyadi Kristian ketegal Petara udah meri sida tanggung pengawa ngintu nembiak Iya enggau pengerindu sereta pengelurus. (1 Pet. 5:1-3) Sida deka bala menyadi Kristian nemu, eklisia nya endur ti likun. Nya alai, sida mutarka penanggul nya enggau lengkas enti sida nemu menyadi Kristian bisi ngereja penyalah ti besai, ke nyengkaum ngemediska anak mit ngena chara seksual. Peratika tanya ke bisi ba pun  genteran 13,  15, enggau  17.

13-14. Kati tuai gempuru nitihka undang-undang menua lebuh ngeriput pekara ke bekaul enggau ngemediska anak mit? Terangka.

 13 Kati tuai gempuru nitihka undang-undang menua lebuh ngeriput pekara ke bekaul enggau ngemediska anak mit? Au, bisi. Sekeda menua bisi undang-undang ke baka nya lalu tuai gempuru ngasika undang-undang nya. (Rom. 13:1) Undang-undang nya enda ngelanggar adat Petara. (SKR. 5:28, 29) Nya alai, lebuh orang madah ngagai tuai gempuru pasal anak mit ke engka diayahka, sida enggau lengkas betanya ngagai pampang opis pasal utai ke patut digaga nitihka undang-undang ba menua nya.

 14 Lebuh tuai gempuru berandau enggau mansa sereta apai indai mansa nya, tauka enggau sapa-sapa ke nemu pasal anak mit ke engka diayah, tuai gempuru ngingatka sida pasal sida bisi hak ngeriput pekara nya ngagai piak ti bekuasa. Tang baka ni enti riput nya bekaul enggau menyadi Kristian kitai lalu pekara tu ditemu orang mayuh? Patut menyadi Kristian ke ngeriput pekara nya ngumbai diri ngenyaika nama Jehovah? Enda. Orang ke ngereja penyalah nya meh ke ngenyaika nama Petara.

15-16. (a) Nitihka 1 Timoti 5:19, nama kebuah tuai gempuru begunaka abis nadai dua iku saksi sebedau numbuhka komiti pechara? (b) Nama digaga tuai gempuru lebuh sida nemu bisi menyadi Kristian udah dituduh ngemediska anak mit ngena chara seksual?

 15 Nama kebuah tuai gempuru begunaka abis nadai dua iku saksi kena nunjukka orang nya udah ngereja dosa ti besai? Atur tu sebagi ari standard Bup Kudus ti tinggi pasal pengelurus. Lebuh orang ke dituduh ngereja penyalah ti besai madahka diri nadai ngereja penyalah nya, tuai gempuru begunaka dua iku saksi kena nukuka pekara nya sebedau sida ulih numbuhka komiti pechara. (U-dat. 19:15; Mat. 18:16; bacha 1 Timoti 5:19.) Kati dua iku saksi patut bisi sebedau orang ulih ngeriput ngagai piak ti bekuasa pasal orang ke engka ngereja penyalah ngemediska anak mit enggau chara seksual? Enda. Tuai gempuru tauka orang bukai enda begunaka dua iku saksi enti deka ngeriput pasal jenayah nya ngagai piak ti bekuasa.

16 Lebuh tuai gempuru nemu bisi menyadi Kristian dituduh ngereja penyalah nya, sida nitihka undang-undang menua ngeriput pekara nya. Udah nya, sida mansik pekara nya nitihka prinsip Bup Kudus. Tuai gempuru dulu nanya orang ke dituduh. Enti iya madahka diri nadai ngereja penyalah nya, tuai gempuru patut ninga ari orang bukai ke engka nemu pasal pekara nya. Enti orang ke nuduh enggau abis nadai seiku saksi madahka orang ke dituduh amat bisi ngereja penyalah nya ngagai anak mit nya tauka ngagai anak mit ke bukai ba maya bukai, nya baru tuai gempuru bisi chukup bukti kena numbuhka komiti pechara. * Taja pan nadai dua iku saksi ke ulih nukuka orang nya besalah, tu ukai reti orang ke nuduh nya bula. Tuai gempuru nemu orang ke dituduh nya engka udah ngereja pengawa jai ke ngemediska orang bukai. Tuai gempuru deka terus nulung sapa-sapa ke engka nyadi mansa. Nambahka nya, sida deka bebendar agi beratika pekara nya ngambika ulih ngelindung bala menyadi Kristian ari orang ke engka bisi ngereja penyalah nya.—SKR. 20:28.

17-18. Terangka utai ti digaga raban ba komiti pechara.

 17 Nama digaga raban ba komiti pechara? Sida nentuka sekalika orang ke ngereja dosa ti besai nya ulih mengkang ba eklisia tauka enda. Sida enda mutus sekalika orang ke ngereja penyalah nya patut diukum ketegal ngelanggar undang-undang menua. Sida ngawakka perintah nentuka chara orang nya diukum.—Rom. 13:2-4; Tit. 3:1.

18 Lebuh tuai gempuru enggau komiti pechara, sida semina ngakim pekara ti bekaul enggau pengarap. Sida ngena Bup Kudus nentuka sekalika orang ke ngereja penyalah nya nesal ati tauka enda. Enti iya enggai nesal ati, tuai gempuru madahka iya deka dibuai ari gerempung. Lalu jaku gerah pasal pekara nya deka dipadah ba eklisia. (1 Kor. 5:11-13) Enti iya nesal ati, iya tau mengkang ba eklisia. Taja pia, tuai gempuru deka madahka iya enda ulih  megai sebarang tanggung pengawa ba eklisia betaun-taun tauka sepemanjai idup iya. Ketegal tuai gempuru ibuhka pengelikun bala anak mit, sida empu deka madah ngagai apai indai ba eklisia pasal sida ke patut bejimat lebuh anak sida bisi semak enggau orang nya. Lebuh ngereja tu, sida patut bejimat ngambika enda nyebut utai ke tau ngasuh orang nemu sapa mansa nya.

CHARA NYAGA ANAK NUAN

Apai indai nyaga anak sida ari dikemediska ngena chara seksual. Sida bekunsika penerang pasal seks bepanggai ba umur anak sida. Apai indai ngena penerang ke udah disediaka gerempung Jehovah lebuh ngereja nya. (Peda artikel dipelajar 19, genteran 19-22)

19-22. Nama ulih digaga apai indai kena nyaga anak? (Peda gambar ba kulit majalah.)

19 Sapa ke patut nyaga anak ari utai ti tau ngemedis? Kita ke apai indai. * Anak kita nya ‘pesaka ti datai ari Jehovah.’ (Mas. 127:3) Jehovah udah meri kita tanggung pengawa nyaga anak. Baka ni kita ulih nyaga anak ari dikemediska?

20 Kesatu, belajar pasal pekara ke bekaul enggau ngayahka anak mit. Belajar pasal orang ke ngemediska anak mit sereta chara ke dikena sida nipu anak mit. Bejimat enggau orang ke engka deka ngereja pengawa nya. (J-lam. 22:3; 24:3) Kingatka, kesuah agi, orang ke ngereja pengawa nya orang ke dikelala sereta dikearapka anak mit nya.

21 Kedua, apai indai enggau anak bejaku terus-terang enggau pangan diri. (U-dat. 6:6, 7) Tu reti iya nuan patut ningaka sida enggau manah. (Jas. 1:19) Kingatka, kesuah agi, anak ke diayah takut madah pasal utai ke nyadi. Sida engka irau orang enda pechayaka sida tauka sida engka takut dikemediska orang ke ngayahka sida enti sida ngeriput pasal pekara nya. Enti nuan ngasaika bisi utai ke enda manah nyadi ba anak nuan, tanya sida enggau manah lalu enggau sabar mendingka sida.

22 Ketiga, ajar anak kita. Padahka penerang pasal seks nitihka umur sida. Ajar sida utai ke patut disebut sereta digaga enti orang nguji deka megai sida enggau chara ti enda patut. Kena penerang ke udah disediaka gerempung Jehovah pasal chara nyaga anak.—Peda kutak “ Ajar Diri Empu sereta Anak Nuan.”

23. Nama runding Saksi-Saksi Jehovah pasal pengawa ngemediska anak mit ngena chara seksual?

23 Saksi-Saksi Jehovah ngumbai pengawa ngemediska anak mit ngena chara seksual nya dosa ti balat jai sereta jenayah ti chukup besai. Ketegal nitihka adat Kristus, kitai enda ngelindung sida ke ngereja penyalah nya ari diukum. Tang, enti menyadi Kristian kitai kala nyadi mansa, baka ni kitai ulih nulung sida? Artikel pengudah tu deka nyaut tanya nya.

LAGU 103 Tuai Gempuru—Pemeri ari Petara

^ per. 5 Artikel tu deka bejuraika chara kitai ulih nyaga anak mit ari dikemediska ngena chara seksual. Kitai deka belajarka chara tuai gempuru ngelindung bala menyadi kitai ba eklisia sereta chara apai indai ulih nyaga anak sida.

^ per. 3 PENERANG JAKU: Ngemediska anak mit ngena chara seksual nyadi lebuh orang ke besai tuai ngena anak mit ngemuaska pengingin seksual sida. Tu nyengkaum ngereja ulah seks enggau anak mit; seks oral; seks burit enggau anak mit; megai tauka murus organ seks enggau chara ti enda patut; megai tusu; megai burit anak mit; ulah seks ti kamah ke bukai. Kemayuh agi sida ke nyadi mansa nya indu, tang bisi mega mayuh anak mit ke lelaki nyadi mansa. Taja pan kemayuh agi orang ke ngayah nya lelaki, bisi mega sida ke indu ngereja tu.

^ per. 5 PENERANG JAKU: Ba artikel tu enggau ke nangkanka tu, leka jaku “mansa” ditujuka ngagai orang ke kala dikemediska ngena chara seksual lebuh sida agi mit. Leka jaku nya nunjukka anak mit nya dikemediska lalu orang ngambi ulih ba sida. Anak mit nya merinsa ba tubuh enggau emosi. Tu ukai salah sida lebuh sida diayahka ngena chara nya.

^ per. 11 Enti orang ngereja dosa ti besai ketegal ngembuan kaul ti lemi enggau Jehovah, iya enda ulih rari ari diakim. Jehovah deka ngakim nitihka penyalah ti udah dikereja iya.—Rom. 14:12.

^ per. 16 Anak mit ke nyadi mansa enda diansak enggau lebuh tuai gempuru betanya pasal penyalah nya enggau orang ke dituduh. Apai tauka indai tauka orang bukai ke dikearapka mansa nya ulih madah ngagai tuai gempuru pasal utai ke udah nyadi. Enggau chara tu, mansa nya enda ibuh merinsa agi.

^ per. 19 Utai ke disebut pasal apai indai mega dituju ngagai sida ke nyaga tauka orang bukai ke diberi tanggung pengawa nyaga anak mit nya.