Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 18

Jehovah Ngayanka Pengerindu enggau Pengelurus ba Eklisia Kristian

Jehovah Ngayanka Pengerindu enggau Pengelurus ba Eklisia Kristian

“Besaup mai ma pangan diri; nya meh jalai kita ngamatka adat Kristus.”—GAL. 6:2.

LAGU 12 Jehovah, Petara ti Pemadu Mulia

DALAM ARTIKEL TU *

1. Nama dua iti pekara ke ditemu kitai pasal Jehovah?

PETARA JEHOVAH seruran lalu deka rinduka nembiak Iya. Iya mega rinduka pengelurus. (Mas. 33:5) Nya alai, kitai ulih nemu dua iti pekara pasal Jehovah: (1) Iya balat tusah ati lebuh nembiak Iya napi pengawa ti enda lurus. (2) Iya besemaya deka ngukum sida ke enda lurus, lalu nadai agi pengawa ti enda lurus ke deka ninggang nembiak Iya. Ba begian kesatu ari empat iti artikel nya, * kitai udah belajar pasal Adat Moses ke diberi Petara ngagai orang Israel. Adat nya bepelasarka pengerindu. Adat nya mega meransang orang ngereja utai ti lurus ngagai semua orang, indah ngagai orang ke enda ulih ngelindung diri empu. (U-dat. 10:18) Adat nya nunjukka Jehovah balat ibuhka nembiak Iya.

2. Nama sekeda tanya ke deka disaut kitai?

2 Adat Moses bepelasarka pengerindu enggau pengelurus. Tang Adat tu enda agi dikena pengudah eklisia Kristian ditumbuhka ba taun 33 M. Ketegal Adat Moses enda agi dikena, kati reti nya orang Kristian nadai agi bulih penguntung? Enda! Laban orang Kristian bisi adat ti baru, adat Kristus. Ba artikel tu, kitai deka berandauka nama adat ti baru nya. Udah nya kitai deka nyaut tanya tu: Nama kebuah kitai ngumbai adat nya bepelasarka pengerindu? Nama kebuah kitai ngumbai iya ngemansangka pengelurus? Di baruh adat tu, baka ni orang ke diberi kuasa patut nunjukka pengerindu enggau pengelurus lebuh ngintu orang bukai?

 NAMA “ADAT KRISTUS” NYA?

3. Nitihka Galatia 6:2, nama disengkaum ba “adat Kristus”?

3 Bacha Galatia 6:2. Orang Kristian di baruh “adat Kristus.” Jesus enda nulis mayuh adat ti nyemetak ke bala murid iya. Tang iya bisi meri iring, pesan, sereta prinsip kena ngiring sida. “Adat Kristus” nya semua utai ke diajar sereta diasuh Jesus kereja kitai. Ba genteran ke nangkanka tu, kitai deka belajar mayuh agi pasal adat nya.

4-5. Baka ni Jesus ngajar orang? Kemaya Jesus ngajar?

4 Baka ni Jesus ngajar orang? Iya ngajar orang nengah jaku. Jaku Jesus bisi kuasa laban jaku iya madahka pemendar pasal Petara, ngajar tuju ti bendar ba pengidup, sereta madahka semina Perintah Petara aja ke ulih muai pemerinsa mensia. (Luk. 24:19) Jesus mega ngajar nengah teladan. Ari pengidup iya empu, Jesus nunjukka chara bala murid iya patut idup.—Jhn. 13:15.

5 Kemaya Jesus ngajar? Iya ngajar lebuh iya bejalaika pengawa nginjil ba dunya. (Mat. 4:23) Iya mega ngajar nembiak iya enda lama pengudah iya diangkatka idup baru. Ambika chunto, iya pegari ba mua lebih ari 500 iku murid iya lalu meri pesan ngasuh sida ngaga orang nyadi murid. (Mat. 28:19, 20; 1 Kor. 15:6) Jesus ke nyadi kepala eklisia, terus ngiring murid iya pengudah iya niki ke serega. Ambika chunto, kira-kira ba taun 96 M., Jesus ngasuh rasul John meri pesan sereta jaku lalau ngagai orang Kristian ti dipilih ke serega.—Kol. 1:18; Pem. 1:1.

6-7. (a) Dini endur utai ke diajar Jesus ditulis? (b) Baka ni kitai nunjukka diri ngasika adat Kristus?

6 Dini endur utai ke diajar Jesus ditulis? Ba empat iti bup Injil. Mayuh utai ke disebut enggau digaga Jesus bisi dipadah ba bup nya. Bup mit ke bukai dalam Sempekat Baru, ulih nulung kitai nemu runding Jesus pasal siti-siti pekara laban orang ke nulis bup nya diiring roh kudus Petara sereta ngembuan “runding Kristus.”—1 Kor. 2:16.

7 Utai ti dipelajar: Ajar ke dibai Jesus ulih dikena ba semua pekara dalam pengidup  kitai. Nya alai, adat Kristus bisi kaul enggau semua utai ke digaga kitai ba rumah, endur gawa, sekula, enggau eklisia. Kitai ulih nemu adat nya lebuh macha lalu belematika Sempekat Baru. Kitai ngasika adat nya lebuh kitai idup sejalai enggau iring, pesan, sereta prinsip ke bisi ba Sempekat Baru. Lebuh kitai ngasika adat Kristus, kitai ngasika Jehovah laban semua utai ke diajar Jesus datai ari Iya magang.—Jhn. 8:28.

ADAT KE BEPELASARKA PENGERINDU

8. Adat Kristus bepelasarka nama?

8 Rumah ti manah ke ngembuan pugu ti tegap ngasuh orang ke diau dia berasai likun. Pia mega, adat ke ngembuan “pugu” ti tegap ngasuh orang ke ngasika adat nya berasai likun. Adat Kristus bepelasarka “pugu” ti pemadu tegap, iya nya pengerindu. Nama kebuah kitai ngumbai baka nya?

Kitai ngasika “adat Kristus” lebuh kitai ngintu orang enggau pengerindu (Peda genteran 9-14) *

9-10. Nama chunto ke nunjukka pengawa ke dikereja Jesus nya ketegal pengerindu? Baka ni kitai ulih neladan iya?

9 Kesatu, pengerindu meransang Jesus ngereja semua pengawa. Penyinu tauka penyiru nya siti chara kena ngayanka pengerindu. Ketegal sinu, Jesus ngajar orang mayuh, ngeraika orang sakit, meri pemakai ngagai orang ke lapar, sereta ngangkatka orang mati idup baru. (Mat. 14:14; 15:32-38; Mrk. 6:34; Luk. 7:11-15) Taja pan ngereja semua nya begunaka mayuh jam enggau pengering, Jesus sanggup ngenuluka utai ti diguna orang bukai. Chara ti pemadu besai iya mandangka pengerindu iya nya, lebuh iya nyerahka nyawa diri ke semua orang.—Jhn. 15:13.

10 Utai ti dipelajar: Kitai ulih neladan Jesus lebuh ngenuluka utai ti diguna orang bukai. Kelimpah ari nya, kitai mega ulih ngemansangka penyiru ngagai sida ke ditemu kitai lebuh nginjil. Kitai ngasika adat Kristus lebuh penyiru meransang kitai nginjil sereta ngajar orang pasal berita manah.

11-12. (a) Nama nunjukka Jehovah balat ibuhka kitai? (b) Baka ni kitai ulih neladan pengerindu Jehovah?

11 Kedua, Jesus mandangka pengerindu Apai iya. Lebuh Jesus nginjil, iya nunjukka penalam pengibuh Jehovah ngagai nembiak Iya. Jesus mega ngajar kitai pekara tu: Ba Jehovah, tiap iku kitai berega magang. (Mat. 10:31) Jehovah keran deka nerima orang ke udah nesal ati, lebuh sida pulai baru ngagai eklisia. (Luk. 15:7, 10) Jehovah nunjukka pengerindu Iya ngagai kitai lebuh Iya meri Anak Iya nyadika tebus semua kitai.—Jhn. 3:16.

12 Utai ti dipelajar: Baka ni kitai ulih neladan pengerindu Jehovah? (Eps. 5:1, 2) Kitai ngumbai tiap iku menyadi Kristian kitai nya berega, lalu kitai gaga ati nyambut “bedus ti tesat” ke pulai baru ngagai Jehovah. (Mas. 119:176) Kitai nunjukka diri rinduka bala menyadi Kristian kitai lebuh kitai ngena awak enggau pengering nulung sida, kelebih agi lebuh sida begunaka nya. (1 Jhn. 3:17) Lebuh kitai ngayanka pengerindu ngagai orang bukai, kitai ngasika adat Kristus.

13-14. (a) Nitihka John 13:34, 35, nama pemanah ke patut diayanka bala murid Jesus? (b) Nama kebuah tu pesan ti baru? (c) Baka ni kitai ngasika pesan ti baru tu?

13 Ketiga, Jesus ngasuh murid iya ngayanka pengerindu ti enda berundingka diri empu. (Bacha John 13:34, 35.) Pesan Jesus nya baru laban pesan nya ngasuh kitai nunjukka pengerindu enggau chara ti enda sama ke bisi ba Adat Moses: Kitai enda tau enda rinduka bala menyadi Kristian kitai baka Jesus ke rinduka kitai. Tu begunaka pengerindu ti enda berundingka diri empu. * Kitai patut rinduka  sida lebih agi ari rinduka diri empu. Kitai enda tau enda balat rinduka sida nyentukka kitai sanggup meri nyawa diri ke sida, baka ke digaga Jesus.

14 Utai ti dipelajar: Baka ni kitai ngasika pesan ti baru tu? Kitai ulih meri awak, pengering sereta bekunsika utai enggau bala menyadi Kristian kitai. Kitai ukai semina sanggup meri nyawa diri ke sida tang sanggup mega ngelengkaka utai ti mit. Ambika chunto, kitai ulih nulung ngambi menyadi Kristian ke tuai ngagai gempuru, tauka kitai sanggup ngelengkaka utai ke dikerindu diri ketegal deka ngagaka ati bala menyadi. Kitai mega ulih minta chuti ari tuke ngambika tau nulung sida ke ditinggang penusah ngenyit. Tu nunjukka kitai ngasika adat Kristus. Kitai mega nulung nyadika eklisia kitai endur ti likun ke tiap iku orang ti datai.

ADAT KE NGEMANSANGKA PENGELURUS

15-17. (a) Baka ni pengawa Jesus nunjukka iya beberatka pengelurus? (b) Baka ni kitai ulih neladan Jesus?

15 Dalam Bup Kudus, leka jaku “pengelurus” mai reti ngereja utai ke dikumbai Petara ngena, lalu ngereja nya enggau enda bepilih mata. Nama kebuah kitai ngumbai adat Kristus ngemansangka pengelurus?

Jesus ngayanka basa sereta manah enggau sida ke indu, nyengkaum sida ke dikumbai orang nadai guna (Peda genteran 16) *

16 Kesatu, peratika baka ni pengawa Jesus nunjukka iya beberatka pengelurus. Maya jeman Jesus, bala tuai pengarap orang Judah begedika orang ke ukai bansa Judah. Sida ngumbai diri manah agi ari orang Judah ke bukai ke enda nerima latih ba sekula jalai pengarap orang Judah, sereta nadai ngayanka basa ngagai sida ke indu. Tang, Jesus enda baka sida. Iya seruran manah sereta enda bepilih mata enggau semua orang. Iya enda nulak orang ke ukai bansa Judah ti arapka iya. (Mat. 8:5-10, 13) Iya nginjil ngagai semua orang, enda ngira sida nya kaya tauka seranta. (Mat. 11:5; Luk. 19:2, 9) Jesus enda kala kasar tauka jai adat enggau sida ke indu. Iya ngayanka basa sereta manah enggau sida, indah ngagai sida ke dikumbai orang nadai guna.—Luk. 7:37-39, 44-50.

17 Utai ti dipelajar: Kitai ulih neladan Jesus lebuh kitai lurus enggau orang bukai sereta nginjil ngagai semua orang ke deka ninga enda ngira jalai pengarap, kaya tauka seranta. Lelaki ke Kristian nitihka teladan Jesus lebuh sida ngayanka basa ngagai sida ke indu. Lebuh kitai ngereja nya, kitai ngasika adat Kristus.

18-19. Nama diajar Jesus pasal pengelurus? Nama dipelajarka kitai ari utai ke diajar Jesus?

18 Kedua, peratika utai ke diajar Jesus pasal pengelurus. Iya ngajar prinsip ke ulih nulung bala murid iya lurus enggau orang bukai. Uji berunding pasal prinsip Bup Kudus ke bisi ba Matthew 7:12. Semua kitai deka orang lurus enggau kitai. Nya alai kitai pan patut lurus enggau sida. Enti kitai ngereja nya, sida engka deka lurus enggau kitai. Tang baka ni enti orang enda lurus enggau kitai? Jesus ngajar bala murid iya arapka Jehovah “deka nulung bala nembiak Iya, ke nyabak ngangauka Iya siang malam.” (Luk. 18:6, 7) Ayat nya siti semaya: Petara kitai ti lurus nemu pengawa ti enda lurus ke ditapi kitai ba hari ti penudi tu. Iya deka mutarka penanggul nya ba maya ti ngena.—2 Tes. 1:6.

19 Utai ti dipelajar: Lebuh kitai nitihka prinsip ke diajar Jesus, kitai deka lurus enggau orang bukai. Lalu enti kitai merinsa ketegal orang enda lurus enggau kitai, kitai tau bulih pengelantang lebuh nemu Jehovah deka mutarka penanggul nya.

 BAKA NI ORANG KE DIBERI KUASA PATUT NGINTU ORANG BUKAI?

20-21. (a) Baka ni orang ke diberi kuasa patut ngintu orang bukai? (b) Baka ni laki ngayanka pengerindu ti enda berundingka diri empu? (c) Baka ni apai patut ngintu anak iya?

20 Di baruh adat Kristus, baka ni orang ke diberi kuasa patut ngintu orang bukai? Ketegal adat tu bepelasarka pengerindu, sida ke diberi kuasa enda tau enda ngintu orang enggau basa sereta bepengerindu. Sida patut ingat, Jesus deka kitai ngayanka pengerindu ba semua pengawa ke dikereja kitai.

21 Ba ruang bilik. Laki patut rinduka bini “baka Kristus ke rinduka eklisia.” (Eps. 5:25, 28, 29) Laki ke rinduka bini enggau chara nya neladan pengerindu Kristus ke enda berundingka diri empu lebuh iya ngenuluka utai ti diguna bini iya. Sekeda lelaki engka tusah deka mandangka pengerindu ti baka tu laban sida engka dibesaika ba ruang bilik ke bepilih mata sereta nadai ngayanka pengerindu. Sida mega engka tusah deka muai ulah ke enda manah tu. Tang sida patut ngaga ubah ngambika ulih ngasika adat Kristus. Bini deka bebasaka laki iya ti ngayanka pengerindu baka Jesus. Apai ke rinduka anak enda ngemediska anak nengah jaku tauka pengawa. (Eps. 4:31) Tang, apai ngayanka pengerindu lalu temegah ati ke sida. Anak deka berasai likun lalu rindu sereta arapka apai ke baka nya.

22. Baka ke dipadah ba 1 Peter 5:1-3, “bedus” nya enggi sapa? Baka ni “bedus” nya patut diintu?

22 Ba eklisia. Bala tuai gempuru anang enda ingat, “bedus” ke diibun sida ukai enggi sida. (Jhn. 10:16; bacha 1 Peter 5:1-3.) Rambai jaku ‘bala nembiak Petara,’ enggau “orang ke diibun kita” ngingatka bala tuai gempuru, bedus ke diibun sida nya enggi Jehovah. Iya deka bedus Iya diintu enggau pengerindu sereta nelap. (1 Tes. 2:7, 8) Jehovah temegah ati ke bala tuai gempuru ke ngibun bedus Iya  enggau chara ti bepengerindu. Bala menyadi Kristian mega rindu sereta bebasaka bala tuai gempuru ke baka nya.

23-24. (a) Nama tanggung pengawa bala tuai gempuru lebuh mutarka pekara ti bekaul enggau penyalah ti besai? (b) Lebuh mutarka pekara nya, nama utai ke patut diperatika bala tuai gempuru?

23 Nama tanggung pengawa bala tuai gempuru lebuh mutarka pekara ti bekaul enggau penyalah ti besai? Tanggung pengawa sida enda sama enggau bala pengulu sereta bala tuai di baruh Adat Moses. Di baruh Adat nya, sida lelaki ke dipilih ukai semina mutarka pekara ti bekaul enggau sembah ngagai Jehovah. Sida mega mutarka pekara ke bekaul enggau orang mayuh sereta jenayah. Tang di baruh adat Kristus, bala tuai gempuru semina mutarka pekara ti bekaul enggau sembah ngagai Jehovah. Sida nemu Jehovah ngemendarka piak ti bekuasa mutarka pekara ti bekaul enggau orang mayuh sereta jenayah. Tu nyengkaum hak netapka ukum baka mayar denda tauka dijil.—Rom. 13:1-4.

24 Nama tanggung pengawa bala tuai gempuru lebuh bisi menyadi Kristian kitai ke ngereja penyalah ti besai? Sida ngena ayat Bup Kudus mansik pekara nya lalu ngaga pemutus. Sida seruran ingat, adat Kristus bepelasarka pengerindu. Pengerindu meransang sida beratika pekara tu: Nama patut digaga kena nulung bala menyadi Kristian ke nyadi mansa pengawa ti salah? Pengerindu meransang bala tuai gempuru beratika sekeda pekara pasal iya ke ngereja penyalah nya: Kati iya udah nesal ati? Ulih kitai nulung iya ngemanahka baru kaul iya enggau Jehovah?

25. Nama deka dikerandauka kitai ba artikel pengudah tu?

25 Kitai amat beterima kasih laban di baruh adat Kristus! Lebuh semua kitai bebendar ngasika adat nya, kitai ulih nulung eklisia kitai nyadi endur alai tiap iku orang ke datai berasai dikesayau, berega, sereta likun. Taja pia, kitai agi diau ba dunya ke alai “orang ke jai, . . . majak jai se-jai.” (2 Tim. 3:13) Kitai enda tau enda mengkang bejaga. Baka ni eklisia Kristian ulih ngayanka pengelurus Petara lebuh mutarka pekara ke bekaul enggau ngemediska anak mit ngena chara seksual? Artikel ke nangkanka tu deka nyaut tanya nya.

LAGU 15 Aram Muji Kristus!

^ per. 5 Artikel tu enggau dua iti artikel ke nangkanka tu sebagi ari 4 iti artikel ke deka berandauka kebuah kitai andal Jehovah nya Petara ti bepengerindu sereta rinduka pengelurus. Iya enggai nembiak Iya napi pengawa ti enda lurus. Iya mega deka meri pengelantang ngagai sida ti napi utai ke enda lurus ba dunya ti jai tu.

^ per. 13 PENERANG JAKU: Pengerindu ti enda berundingka diri empu meransang kitai ngenuluka utai ti diguna orang bukai lebih agi ari utai ti diguna diri empu. Kitai sanggup ngelengkaka sekeda utai ngambika ulih nulung sida.

^ per. 61 PENERANG PASAL GAMBAR: Jesus beratika seiku indu balu ke mati anak lelaki tunggal. Ketegal sinu, Jesus ngangkatka anak iya idup baru.

^ per. 63 PENERANG PASAL GAMBAR: Jesus makai ba rumah seiku Parisi ke benama Simon. Seiku indu, ke engka indu sundal, baru udah nuchi kaki Jesus ngena ai mata iya, ngendas kaki Jesus ngena buk iya, lalu nuangka minyak wangi ngagai kaki Jesus. Simon begedi meda indu nya, tang Jesus nanahka indu nya.