Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 20

Ngelantangka Ati Sida ke Nyadi Mansa Seksual

Ngelantangka Ati Sida ke Nyadi Mansa Seksual

‘Petara ti pun semua pengelantang, ke merindang kami lebuh kami dituntung semua macham penusah.’—2 KOR. 1:3, 4.

LAGU 134 Bala Anak, Pesaka ari Petara

DALAM ARTIKEL TU *

1-2. (a) Nama chunto ke nunjukka mensia endang begunaka pengelantang sereta ulih ngelantangka ati orang bukai? (b) Baka ni sekeda anak mit dikemediska?

SEMUA mensia endang begunaka jaku ti ulih ngelantangka ati sereta ngembuan penau ulih ngelantangka ati orang bukai. Ambika chunto, lebuh anak mit labuh lalu patung iya telih, iya engka nyabak ngiga apai tauka indai. Apai indai enda ulih nyumanka telih nya, tang sida ulih merindang anak mit nya. Sida engka nanya utai ke nyadi, ngendas ai mata iya, meri iya kue tauka gula batu, lalu ngunsut tauka nampal abi telih iya. Enda lama udah nya, anak mit nya badu nyabak lalu engka berengkah main baru. Nyau kelama, telih nya suman.

2 Kadang-kadang, anak mit dikemediska enggau chara ti balat agi. Sekeda sida nyadi mansa seksual. Anak mit nya engka diayahka sekali tauka suah dalam kandang betaun-taun. Enda ngira ni pengelama tauka pemalat iya, orang ke ngayah balat ngemediska sida lalu pemedis ba ati sida enda nemu lenyau. Ba sekeda kes, orang ke ngayah engka enda ditangkap tauka diukum. Tang taja pan orang ke ngayah diukum tekala nya, anak mit ke nyadi mansa engka agi merinsa indah nyentuk ke iya besai.

3. Nitihka 2 Korint 1:3, 4, nama peneka Jehovah? Nama sekeda tanya ke deka diperatika kitai?

3 Enti menyadi Kristian kala diayah lebuh agi mit lalu agi merinsa ketegal nya, nama ulih nulung sida? (Bacha 2 Korint 1:3, 4.) Endang peneka Jehovah ngambika bedus Iya bulih pengerindu enggau pengelantang. Nya alai, aram kitai beratika tiga iti tanya tu: (1) Nama kebuah mansa seksual begunaka  pengelantang? (2) Sapa ke ulih ngelantangka ati sida? (3) Baka ni kitai ulih ngelantangka ati sida?

NAMA KEBUAH PENGELANTANG BEGUNA BENDAR?

4-5. (a) Nama kebuah nya beguna nemu anak mit enggau orang ke besai tuai enda sebaka? (b) Nama ulih nyadi ngagai anak mit enti iya dikemediska?

4 Sekeda sida ke besai tuai ti kala dikemediska ngena chara seksual lebuh agi mit, agi begunaka pengelantang taja pan utai nya lama udah nyadi. Nama kebuah? Kena nemu tu, kitai enda tau enda dulu nemu sida ke mit enggau ke besai tuai enda sebaka. Pemedis ke diasaika anak mit enda sebaka enggau orang ke besai tuai. Peratika sekeda chunto tu.

5 Anak mit begunaka orang ti semak enggau sida sereta tau dikearapka. Kaul ti baka tu ngasuh anak mit berasai likun lalu ngajar sida pechayaka orang ke sayauka sida. (Mas. 22:9) Tang sinu amat, pengawa ngemedis nya kesuah agi nyadi ba rumah anak mit nya empu. Pia mega, kemayuh agi orang ke ngemedis anak mit nya, sida sebilik empu tauka orang ke rapat enggau sida sebilik. Lebuh anak mit dikemediska orang ke dipechaya iya, tu deka ngasuh anak mit nya tusah deka pechayaka orang bukai, indah betaun-taun udah nya.

6. Nama kebuah pengawa ngayahka anak mit ngena chara seksual nya balat jai sereta ngemediska?

6 Anak mit enda ulih ngelindung diri empu. Pengawa ngayahka sida ngena chara seksual balat jai sereta ngemediska. Mejal anak mit ngereja pengawa seksual betaun-taun sebedau sida sedia tauka chukup tuai meretika pengawa nya, ulih ngenusah sereta ngemediska sida. Pengawa mejal nya ulih ngasuh sida bisi runding ti enda betul pasal seks, diri empu, tauka orang bukai ke deka semak enggau sida.

7. (a) Nama kebuah orang ngumbai nya senang deka nipu sereta ngemediska anak mit? (b) Baka ni orang ke ngayah ngemulaka anak mit? (c) Nama penyadi ketegal pemula nya?

7 Anak mit bedau tentu nemu berunding, ngaga pemutus, tauka ngelala sereta nyeliah ari utai ti tau nganu. (1 Kor. 13:11) Nya alai, senang amat orang ke ngayah deka nipu sereta ngemediska anak mit. Ambika chunto, orang ke ngayah nya madahka utai ti bula. Sida bula madahka anak mit nya ke besalah ketegal diayah, lalu anak mit nya patut ngelalaika utai ti nyadi. Sida madahka nadai orang deka mending tauka ibuhka anak mit nya. Sida mega madahka pengawa seks entara orang ke besai tuai enggau anak mit nya chara kena nunjukka penyayau. Ketegal pemula tu, anak mit nya begunaka awak ti lama kena nemu nya bula magang. Nyentuk ke besai iya ngumbai diri rusak, kamah, enda patut dikesayau, sereta besalah taja pan pengawa ngayah nya ukai ketegal penyalah iya empu.

8. Nama kebuah kitai andalka Jehovah ulih meri pengelantang ngagai sida ke kala diayahka?

8 Penerang ke baka tu nulung kitai nemu kebuah sida ke kala diayah nya agi merinsa betaun-taun. Nya jenayah ti balat jai! Tang sinu amat, pengawa ngayah nyadi ba serata dunya. Tu nunjukka kitai benung idup ba hari ti penudi ke alai orang “nadai penyayau” sereta “orang ke jai enggau orang ke pura-pura ngapa, deka majak jai-sejai.” (2 Tim. 3:1-5, 13, NW) Chara ke dikena Sitan amat jai. Lalu lebuh mensia ngereja utai ti dikedekaka Sitan, nya ngasuh ati kitai balat tusah. Jehovah jauh kering agi ari Sitan tauka sida ke nitihka Sitan. Jehovah seruran nemu utai ke dikereja Sitan. Kitai ulih andalka Jehovah nemu pemedis ke ditatka kitai, lalu Iya ulih meri pengelantang ke diguna kitai. Kitai berasai gaga laban nyembah ‘Petara ti pun  semua pengelantang, ke merindang kitai lebuh kitai dituntung semua macham penusah, ngambika kitai ulih merindang orang bukai ke dituntung [“semua macham,” NW] penusah, ngena tulung ti udah dikena Petara merindang kitai.’ (2 Kor. 1:3, 4) Tang sapa ke dikena Jehovah meri pengelantang?

SAPA ULIH MERI PENGELANTANG NGAGAI SIDA KE NYADI MANSA?

9. Nitihka utai ti dipadah Raja David ba Masmur 27:10, nama deka digaga Jehovah lebuh apai indai enda ngintu anak sida baka ke dikedekaka Iya?

9 Anak mit ke enda dilindung apai indai ari pengawa ngayah tauka sida ke kala diayah orang ke semak enggau sida, begunaka pengelantang. Raja David nemu kitai ulih andalka Jehovah deka seruran ngelantangka ati kitai. (Bacha Masmur 27:10.) David pechaya Jehovah deka nyadi Apai ke sida ti diayahka diri sebilik. Baka ni Jehovah ngereja nya? Iya ngena sida ke nyembah Iya enggau tetap ati. Bala menyadi Kristian kitai nya baka diri sebilik. Ambika chunto, Jesus madahka sida ke sama nyembah Jehovah enggau iya nya menyadi lelaki, menyadi indu, sereta indai iya.—Mat. 12:48-50.

10. Baka ni rasul Paul nerangka pengawa iya ke nyadi tuai gempuru?

10 Ba genteran tu enggau genteran ke nangkanka iya, kitai deka beratika kebuah eklisia nya tau dikumbai baka ruang bilik. Rasul Paul nya tuai gempuru ti bagas sereta tetap ati. Iya netapka teladan ti manah, lalu nengah iring roh kudus, iya meransang orang bukai neladan iya baka iya ke udah neladan Jesus. (1 Kor. 11:1) Peratika baka ni Paul nerangka pengawa iya ke nyadi tuai gempuru: “Kami nelap lebuh kami begulai enggau kita, baka indai ke siru enggau anak diri.” (1 Tes. 2:7) Tuai gempuru ti tetap ati ulih ngena jaku ti nelap sereta siru lebuh sida ngena Bup Kudus ngelantangka ati sida ti begunaka tulung.

Menyadi Kristian indu ti kering ba pengarap kesuah iya landik ngelantangka ati orang bukai (Peda genteran 11) *

11. Nama nunjukka ukai semina tuai gempuru aja ke ulih ngelantangka ati orang bukai?

11 Kati semina tuai gempuru aja ke ulih ngelantangka ati orang ke diayah? Enda. Semua  kitai bisi tanggung pengawa ‘meransang pangan diri.’ (1 Tes. 4:18) Menyadi Kristian indu ke kering ba pengarap kelebih agi ulih meransang menyadi Kristian indu ke bukai ti begunaka pengelantang. Nya kebuah Petara Jehovah nyemaka diri baka indai ke merindang anak diri. (Isa. 66:13) Bup Kudus mega bisi chunto pasal sida ke indu ke ngelantangka ati orang bukai ke bisi penusah. (Jop 42:11) Jehovah gaga ati lebuh meda menyadi Kristian indu kemayaharitu ngelantangka ati menyadi Kristian indu ke bukai ti napi penusah ba emosi! Ba sekeda kes, tuai gempuru engka ngasuh sida nulung menyadi Kristian indu ke bukai ti bisi dituntung penusah ke baka nya. *

BAKA NI KITAI ULIH NGELANTANGKA ATI ORANG BUKAI?

12. Nama utai ke patut diseliahka kitai?

12 Lebuh kitai nguji nulung menyadi Kristian, kitai enda patut nanya iya pasal utai ke enggai dikerandauka iya. (1 Tes. 4:11) Tang nama ulih digaga kitai kena nulung sida ke deka sereta begunaka tulung enggau pengelantang? Aram kitai beratika lima iti chara ari Bup Kudus ke ulih nulung orang bukai.

13. Baka ke dipadah ba 1 Raja 19:5-8, nama digaga melikat Jehovah kena nulung Elijah? Baka ni kitai ulih neladan melikat nya?

13 Ngereja utai ke ulih nulung sida ke tusah ati. Lebuh nabi Elijah ngerarika diri ari orang ke deka munuh iya, iya balat lemi semengat lalu ngajihka diri mati. Jehovah ngirumka seiku melikat ti kering kena meransang iya. Melikat nya meri Elijah utai ke diguna iya maya nya. Iya meri Elijah pemakai lalu ngasuh iya makai. (Bacha 1 Raja 19:5-8.) Cherita nya ngajar kitai siti utai ke beguna bendar: Kadang-kadang pengawa ti mit ke dikereja kitai ulih meransang sereta mantu orang bukai. Kitai ulih nunjukka diri rinduka menyadi Kristian ke dituntung penusah lebuh makai begulai enggau iya, ngusung iya, tauka nulis kad ke bisi jaku peransang. Kitai ulih ngereja tu enti kitai tusah deka bejaku enggau iya pasal asai ati iya.

14. Nama ulih dipelajarka kitai ari cherita pasal Elijah?

14 Nulung sida berasai likun sereta lantang. Kitai ulih belajarka utai bukai ari cherita pasal Elijah. Nengah pengawa ajih, Jehovah meri Elijah bantu ke diguna iya lebuh bejalai jauh ngagai Bukit Sinai. Elijah engka berasai likun ba endur nya laban Jehovah kala ngaga sempekat enggau nembiak Iya dia. Elijah mega engka ngasaika diri udah jauh ari sida ke deka munuh iya. Nama dipelajarka kitai ari chunto tu? Enti kitai deka nulung orang ke diayah, kitai patut dulu nulung sida berasai likun. Ambika chunto, tuai gempuru patut ingat, menyadi Kristian ke indu engka berasai likun agi berandau ba rumah iya empu. Tang menyadi Kristian ke bukai engka deka berandau ba Palan Gempuru.

Kitai ulih nulung nyumanka ati sida enggau chara ningaka sida enggau sabar, bebendar besampi enggau sida, sereta milih jaku ti ngelantangka ati (Peda genteran 15-20) *

15-16. Nama reti nyadi peninga ti manah?

15 Nyadi peninga ti manah. Bup Kudus meri lalau tu: “Genap iku orang enda tau enda jampat mending, lubah mansutka jaku.” (Jas. 1:19) Kati kitai peninga ti manah? Kitai engka ngumbai enti deka nyadi peninga ti manah, kitai semina patut beratika aja, lalu enda ibuh bejaku. Tang peninga ti manah ngereja lebih ari nya. Ambika chunto, pengujung iya Elijah madahka penusah ati diri ngagai Jehovah lalu Jehovah mendingka iya. Elijah berasai takut, kediri, sereta ngumbai semua pengawa ke digaga iya nadai guna. Jehovah nemu semua tu. Jehovah enggau bepengerindu nulung iya mutarka asai  ati iya. Jehovah nunjukka Diri amat udah mendingka Elijah.—1 Raj. 19:9-11, 15-18.

16 Lebuh kitai mendingka menyadi Kristian kitai ke dituntung penusah, baka ni kitai ulih nunjukka diri sinu, siru sereta rinduka iya? Kadang-kadang jaku ti manah sereta engkeman ulih nunjukka asai ati kitai. Nuan engka nyebut: “Kasih amat! Nya enda patut nyadi ba anak mit!” Engka nuan ulih nanya iya sekeda tanya kena nentuka nuan meretika utai ti dipadah iya. Nuan ulih nanya: “Ulih nuan nulung aku meretika utai ku nuan?” tauka “Lebuh nuan nyebut munyi nya, aku ngumbai . . . Kati nya reti utai ku nuan?” Jaku ke baka tu nulung iya nemu, nuan amat ningaka iya sereta nguji meretika asai ati iya.—1 Kor. 13:4, 7.

17. Nama kebuah kitai patut sabar sereta “lubah mansutka jaku”?

17 Taja pia, kitai patut bejimat ngambika “lubah mansutka jaku.” Anang nyelepak enggau jaku ajar tauka ngemetulka runding orang ke tusah ati lebuh iya madahka asai ati diri. Lalu, sabar meh! Ba pengujung iya, lebuh Elijah besebana ngagai Jehovah, iya benung tusah ati lalu bejaku enggau ati ti balat tusah. Pengudah Jehovah ngeringka pengarap Elijah, nabi nya nyebut utai ti sama baru. (1 Raj. 19:9, 10, 13, 14) Nama ulih dipelajarka kitai? Kadang-kadang orang ke tusah ati patut madahka asai ati diri lebih ari sekali. Baka Jehovah, kitai deka mendingka iya enggau sabar. Ari ke nguji madah ngagai iya chara mutarka penanggul, kitai nunjukka diri sinu, siru sereta rinduka iya.—1 Pet. 3:8.

18. Nama utai ke ulih disebut lebuh besampi enggau orang ke tusah ati?

18 Bebendar besampi enggau sida ke tusah ati. Sida ke balat tusah ati nya engka ngasaika diri enda ulih tauka enda layak besampi ngagai Jehovah. Siti chara kitai ulih ngelantangka ati sida iya nya, besampi enggau sida lalu nyebut nama sida dalam sampi nya. Dalam sampi, kitai ulih madah ngagai Jehovah  pasal bala menyadi Kristian ba eklisia ke balat sayauka sida ke tusah ati nya. Kitai ulih minta Jehovah nulung nembiak Iya ti berega nya berasai lantang. Sampi ke baka nya amat ulih ngelantangka ati sida.—Jas. 5:16.

19. Nama ulih nulung kitai nyediaka diri kena ngelantangka ati orang bukai?

19 Pilih jaku ti manah sereta ngelantangka ati. Berunding dulu sebedau bejaku. Jaku ti disebut enggau enda berunding, ngemediska ati. Tang jaku ti disebut enggau bejimat, ‘ulih nyumanka ati.’ (J-lam. 12:18) Nya alai, besampi minta tulung ari Jehovah kena ngiga leka jaku ti manah ke ngelantang sereta ngenyamaika ati. Kingatka meh, jaku ke pemadu manah dikena nulung orang iya nya jaku Petara ba Bup Kudus.—Heb. 4:12.

20. (a) Nama engka dirunding sekeda menyadi Kristian pasal diri empu ketegal sida kala diayah? (b) Kitai patut ngingatka sida pasal utai nama?

20 Sekeda menyadi Kristian ke kala diayah engka ngumbai diri kamah, nadai guna tauka ngasaika diri enda chukup manah dikerinduka orang bukai. Tu utai ti bula! Nya alai, kena meh ayat Bup Kudus ngambika sida nemu Jehovah sayau bendar ke sida. (Peda kutak “ Ayat Bup Kudus ke Ngelantangka Ati.”) Kingatka baka ni seiku melikat ngeringka nabi Daniel lebuh iya berasai lemi sereta tusah ati. Jehovah deka Daniel nemu, Iya rinduka Daniel. (Dan. 10:2, 11, 19) Pia mega, Jehovah rinduka menyadi Kristian kitai ke tusah ati!

21. Nama deka nyadi ngagai orang ke ngayah ti enda nesal ati?

21 Lebuh kitai ngelantangka ati orang bukai, kitai nulung sida nemu Jehovah sayauka sida. Lalu kitai anang enda ingat, Jehovah mega Petara ti lurus. Iya nemu pasal tiap iku orang ke diayah, taja pan nadai orang bukai ke nemu. Iya meda semua utai, lalu Iya deka nentuka semua orang ke ngayah ti enda nesal ati diukum. (P-pau. 14:18) Tang, naka ke diatu, aram meh semua kitai enggau naka ulih ngayanka pengerindu ngagai orang ke kala nyadi mansa seksual. Nambahka nya, endang ngelantangka ati lebuh nemu Jehovah deka muai abis pemedis sida ke kala nyadi mansa seksual ba dunya Sitan tu! Enda lama agi, pemedis tu enda dikingatka agi.—Isa. 65:17.

LAGU 109 Rinduka Pangan Diri enggau Pengabis Ati

^ per. 5 Sida ke kala nyadi mansa seksual lebuh agi mit engka agi napi mayuh penanggul indah betaun-taun udah nya. Artikel tu deka nulung kitai meretika kebuah nya. Kitai mega deka berandau pasal sapa ke ulih ngelantangka ati sida ke nyadi mansa tu. Lalu ke penudi iya, kitai deka bejuraika sekeda chara kitai ulih ngelantangka ati sida.

^ per. 11 Orang ke kala nyadi mansa seksual ulih minta bantu ari lutur pakar enti iya deka.

^ per. 76 PENERANG PASAL GAMBAR: Menyadi Kristian indu ti kering ba pengarap ngelantangka ati seiku menyadi Kristian indu ke bukai ti napi penusah ba emosi.

^ per. 78 PENERANG PASAL GAMBAR: Dua iku tuai gempuru ngabas seiku menyadi Kristian indu ke benung tusah ati. Menyadi indu nya mai seiku menyadi Kristian indu ti kering ba pengarap enggau iya.