Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 21

Anang Ditesatka “Penemu-dalam Mensia”

Anang Ditesatka “Penemu-dalam Mensia”

‘Penemu-dalam mensia nya utai ti beli ba Petara.’—1 KOR. 3:19.

LAGU 98 Bup Kudus—Bepun ari Petara

DALAM ARTIKEL TU *

1. Nama utai ke diajar Bup Kudus ngagai kitai?

KITAI tau bulih chara kena mutarka sebarang penanggul ke ditapi ketegal Jehovah nya Pengajar ti Pemadu Tinggi. (Jop 36:22) Jaku Iya ba Bup Kudus meri sebarang utai ke diguna kitai ngambika “chukup disikap ngereja genap macham pengawa ti badas.” (2 Tim. 3:17) Lebuh kitai nitihka ajar Bup Kudus ba pengidup, kitai nyadi orang ke bepenemu agi ari orang ke nitihka “penemu-dalam mensia.”—1 Kor. 3:19; Mas. 119:97-100.

2. Nama deka dipansik kitai ba artikel tu?

2 Baka ke deka dikerandauka kitai, penemu mensia kesuah agi ngenuluka pengingin diri empu. Nya alai, kitai engka tusah deka nyeliahka runding enggau ulah ti datai ari sida ke nitihka chara dunya. Ketegal tu, Bup Kudus madahka: “Anang nejuka orang nipu kita ngena penemu enggau kelakar ti nadai reti, ti datai ari ajar mensia.” (Kol. 2:8) Ba artikel tu, kitai deka meda kebuah orang berengkah pechayaka dua iti pemula ke dibai Sitan. Ari dua iti pemula tu, kitai deka meda kebuah penemu mensia nya utai ti beli ba Petara lalu baka ni penemu-dalam ba Bup Kudus nya jauh manah agi ari sebarang penemu ba dunya tu.

UBAH BA PENEMU BEKAUL ENGGAU SEKS

3-4. Nama ubah ba runding pasal seks ke nyadi ba Amerika Serikat entara taun 1920 enggau 1929?

3 Di Amerika Serikat, ba pun abad ke-20 bisi ubah ti besai ba penemu pasal utai ti ngena enggau salah bekaul enggau standard moral pasal seks. Suba, mayuh orang ngumbai topik pasal seks nya semina ke orang ti udah kawin lalu enda ulih  dikerandauka ba mua orang mayuh. Tang standard tu majak lenyau, lalu majak mayuh orang enda nitihka standard tu agi.

4 Entara taun 1920 enggau 1929, orang majak beberatka pemerindang enggau pengawa begigaka duit. Tu balat agi nyadi pengudah sida merinsa lebuh Perang Dunya I. Seiku pemansik madahka: “Cherita wayang, lakun atas pentas, lagu, bup, enggau iklan berengkah ngundan mayuh utai ke bisi kaul enggau seks.” Maya nya mega, stail betanda enggau begari majak ngasuh orang berunding pasal seks. Baka ke dipadah Bup Kudus pasal hari ti penudi, orang deka majak “ngelantangka diri.”—2 Tim. 3:4.

Nembiak Jehovah enda ditesatka standard dunya ti kelalu lunggar (Peda genteran 5) *

5. Nama penyadi enggau runding dunya pasal standard moral kenyau ari taun 1960?

5 Ba taun-taun pengudah 1960, majak mayuh orang ke empai jadi melaki-bini diau begulai. Ulah homoseksual, enggau pengawa sarak nya utai ke suah nyadi. Nama penyadi ketegal semua pengawa tu? Seiku penulis madahka, mayuh utai ke enda manah nyadi lebuh orang badu nitihka standard moral ti manah. Ambika chunto, apai indai enda agi begulai enggau pangan diri, tauka seiku ari apai indai udah rari ninggalka ruang bilik, lalu orang napi penanggul ba emosi tauka gian meda pornografi. Pia mega, majak mayuh penyakit ke datai ari pengawa seks ti kamah, baka AIDS. Semua tu nunjukka chara pengidup ke dikumbai manah ba dunya nya amat beli.—2 Pet. 2:19.

6. Baka ni runding dunya pasal seks sebaka enggau utai ti dikedekaka Sitan?

6 Runding dunya pasal seks sebaka enggau utai ti dikedekaka Sitan. Sitan tentu rindu meda orang salah nguna pengawa seks lalu enda nitihka atur ke udah ditetapka Petara. Tu mega enda bebasaka atur pasal tikah ke udah diberi Petara ngagai mensia. (Eps. 2:2) Enti orang ngereja pengawa seks ti enda bemoral, sida nunjukka diri enda bebasaka penau mensia ke ulih ngadaka anak ti diberi Jehovah. Sida mega engka lenyau peluang idup belama iya.—1 Kor. 6:9, 10.

PENEMU BUP KUDUS PASAL SEKS

7-8. Nama kebuah runding Bup Kudus pasal seks jauh manah agi ari runding dunya?

7 Orang ke nerima penemu dunya ngemaruhka standard moral ari Bup Kudus. Sida ngumbai standard nya enda ulih dikena agi. Sida engka berunding, ‘Nama kebuah Petara nempa kitai ngambika ngembuan pengingin  seks tang udah nya ngasuh kitai nagang pengingin nya?’ Sida nanya tu ketegal sida ngembuan runding ti salah. Ku sida madahka: “Enti aku deka ngereja siti-siti utai, sapa nuan nya ke deka nagang aku?” Tang Bup Kudus madahka, kitai enda patut nitihka semua pengingin ke dikembuan kitai. Taja pia, kitai bisi penau kena ngelaban pengingin ti deka ngereja utai ti salah. (Kol. 3:5) Nambahka nya, Jehovah udah ngatur pengawa jadi melaki-bini. Semina laki bini aja ke ulih ngemuaska pengingin seks pangan diri. (1 Kor. 7:8, 9) Enggau tu, laki bini enda ibuh irau tauka nangi ba pengawa seks, laban sida enda napi penusah baka orang ke ngereja ulah seks ti kamah.

8 Bup Kudus madahka runding ti patut pasal seks. Bup Kudus mega madahka pengawa seks ulih ngemuaska laki bini. (J-lam. 5:18, 19) Taja pia, Petara madah ngagai kitai: ‘Kita patut nemu nagang pengingin tubuh diri ngena jalai ti kudus sereta menyana, ukai ngembuan pengingin ti kamah baka orang bansa bukai ke enda nemu Petara.’—1 Tes. 4:4, 5.

9. (a) Kenyau ari 100 taun ti udah, baka ni nembiak Jehovah diperansang nitihka penemu-dalam ti tinggi ari Bup Kudus? (b) Nama jaku lalau ke bisi ba 1 John 2:15, 16? (c) Baka ke dipadah ba Rome 1:24-27, nama bansa ulah seks ke patut diseliahka kitai?

9 Kenyau ari 100 taun ti udah, nembiak Jehovah enda ditesatka runding dunya ke “enda nemu malu agi.” (Eps. 4:19) Sida bebendar nitihka standard Jehovah. Majalah Menara Jaga kena 15 Mei 1926 madahka, “lelaki tauka indu patut tuchi ba runding enggau ulah, kelebih agi lebuh begulai enggau sida ke enda sama penempa.” Enda ngira utai ke nyadi ba dunya, nembiak Jehovah nitihka penemu-dalam ti tinggi ari Bup Kudus. (Bacha 1 John 2:15, 16.) Kitai amat beterima kasih ke Bup Kudus! Kitai mega beterima kasih ngagai Jehovah ke nyediaka utai kena negapka pengarap kitai ba maya ti ngena ngambika enda ditesatka penemu dunya. *Bacha Rome 1:24-27.

UBAH BA PENEMU BEKAUL ENGGAU ULAH TI BERUNDINGKA DIRI EMPU

10-11. Nitihka Bup Kudus, nama utai ke deka nyadi ba hari ti penudi?

10 Bup Kudus madahka, ba hari ti penudi orang deka “semina berundingka diri empu aja.” (2 Tim. 3:1, 2) Kitai enda tekenyit lebuh meda mensia majak berundingka diri empu. Siti bup pansik madahka, ba urung 1970-an bup ke meri jaku lalau pasal chara idup ti mujur majak mayuh. Sekeda ari bup tu madahka, orang enda ibuh ngubah diri tauka ngumbai bisi utai kurang ba diri empu. Ambika chunto, siti ari bup ke baka nya madahka, “Rinduka diri empu laban nuan nya orang ti pemadu bajik, sigat, sereta ngalitka ati ke kala idup ba dunya tu.” Bup nya mega madahka, orang patut mutus kediri empu chara iya patut idup, lalu ngereja nama-nama utai ke dikumbai iya ngena sereta patut.

11 Kala nuan ninga penemu ke baka tu? Sitan meransang Hawa ngereja utai ti sama. Iya madahka Hawa ulih ‘nyadi sebaka enggau Petara, nemu ngelala bida entara utai ti manah enggau utai ti jai.’ (P-kal. 3:5) Kemayaharitu, mayuh orang ngasaika diri manah agi ari orang bukai nyentukka sida enda begunaka Petara madah ngagai sida pasal utai ti betul enggau utai ti salah. Ambika chunto, ulah ke baka tu nyata dipeda ari runding orang pasal tikah.

Nembiak Kristian ngenuluka utai ti diguna orang bukai, kelebih agi kaling pengidup iya (Peda genteran 12) *

12. Nama runding dunya pasal tikah?

12 Bup Kudus ngajar, laki bini patut bebasaka pangan diri sereta ngetanka semaya lebuh seduai iya jadi suba. Bup Kudus meransang  laki bini mengkang begulai enggau pangan diri. Pemungkal 2:24 madahka: “Lelaki ninggalka apai indai iya, lalu begulai enggau bini iya, lalu seduai iya nyadi siku.” Tang orang ke dikuingka penemu dunya ngembuan runding ti enda sebaka. Sida madahka, laki bini patut ngenuluka utai ti diguna diri empu. Peratika utai ti dipadah siti bup pasal sarak. Ba sekeda menua, lebuh orang jadi melaki-bini, sida ngaga semaya ba mua orang mayuh madahka diri deka meruan begulai enggau pangan diri. Mayuh orang nukar jaku ba semaya nya lalu madahka sida deka begulai enggau pangan diri seagi-agi sida rinduka pangan diri. Ketegal orang enda ngumbai tikah nya patut ditanka, ruang bilik bepechah-belah lalu mayuh ari sida balat pedis sereta tusah ati. Tu endang terang nunjukka runding dunya pasal tikah nya, beli.

13. Nama kebuah Jehovah begedika orang ke sumbung?

13 Bup Kudus madahka: ‘Jehovah begedika semua orang ke sumbung.’ (J-lam. 16:5) Nama kebuah Jehovah begedika sida? Siti kebuah nya laban orang ke sumbung neladan Sitan. Jesus udah dikena Jehovah nempa semua utai. Uji gambarka, Sitan ngumbai Jesus deka meremi lalu nyembah iya. (Mat. 4:8, 9; Kol. 1:15, 16) Orang ke ngumbai diri manah agi ari orang bukai endang terang nunjukka penemu dunya nya utai ti beli ba Petara.

PENEMU BUP KUDUS PASAL RUNDING KE NGUMBAI DIRI PAMA AGI ARI ORANG BUKAI

14. Baka ni Rome 12:3 nulung kitai ngembuan runding ti patut pasal diri empu?

14 Bup Kudus nulung kitai ngembuan runding ti patut pasal diri empu. Bup Kudus madahka kitai tau rinduka diri empu, tang bisi tatak. Ba Matthew 19:19, Jesus madahka: “Rinduka pangan nuan baka nuan ti rinduka diri empu.” Tu nunjukka kitai ulih beratika utai ti diguna diri empu, tang enda tau kelalu. Bup Kudus mega enda ngasuh kitai ngumbai diri pama agi ari orang bukai. Ku Bup Kudus madah: “Anang ngereja utai semina berundingka diri empu aja, tauka beduduk ba ati ti deka ngenyumbungka diri, tang enggau ati ti  baruh, seruran ngumbai orang bukai pama agi ari kita.”—Plp. 2:3; bacha Rome 12:3.

15. Nama kebuah nuan ngumbai jaku lalau ari Bup Kudus ke enda ngasuh kitai madahka diri empu pama agi ari orang bukai nya jaku lalau ti manah?

15 Kemayaharitu, mayuh orang, indah orang ke patut dikumbai pintar, ngumbai jaku lalau ari Bup Kudus nya beli. Sida madahka, orang deka ngambi ulih ari nuan enti nuan ngumbai orang bukai pama agi ari nuan. Tang, nama nyadi ketegal ulah enggau runding ke dikemansangka dunya Sitan? Nama udah diperatika nuan? Kati orang ke berundingka diri empu amat gaga? Kati sida sebilik idup lantang? Kati sida bisi bala bakih ti tau dikearapka? Kati sida bisi kaul ti rapat enggau Petara? Ari utai ke udah diperatika nuan, ni bagi penemu ti meri asil ti badas? Penemu dunya tauka penemu ari Bup Kudus?

16-17. Nama utai ke ngasuh kitai beterima kasih?

16 Orang ke nitihka lalau ari sida ke dikumbai pintar ba dunya tu baka seiku temuai ke tesat nanya seiku agi temuai ke bela tesat enggau iya, pasal penunga siti-siti endur. Bekaul enggau tu, ku Jesus madah pasal orang ke dikumbai “pintar” maya jeman iya: “Sida nya malin ke buta. Lalu enti malin ke buta ngiring orang ke buta, seduai iya deka sama labuh ngagai lubang kebung.” (Mat. 15:14) Amat, penemu dunya tu utai ti beli ba Petara.

Nembiak Petara ngenang baru pengaga ati lebuh ngena pengidup sida gawa ke Jehovah (Peda genteran 17) *

17 Jaku lalau ari Bup Kudus endang seruran “beguna kena ngajar, kena ngerara, kena ngaduka utai ti salah, enggau kena matihka orang diau lurus.” (2 Tim. 3:16) Kitai beterima kasih ngagai Jehovah laban Iya udah ngena gerempung Iya ngelindung kitai ari penemu dunya! (Eps. 4:14) Utai ti diguna ba pengarap ke udah disediaka Iya meri kitai pengering ngambika terus nitihka standard Bup Kudus. Endang manah amat laban Jehovah udah meri kitai penemu-dalam enggau iring ti tau dikearapka ari Bup Kudus!

LAGU 54 ‘Tu meh Jalai’

^ per. 5 Artikel tu deka nulung kitai arapka Jehovah nya Pun penatai iring ti tau dikeandalka. Artikel tu mega deka nunjukka nitihka penemu-dalam mensia ulih ngenataika penusah ti besai. Tang nitihka penemu-dalam ba Bup Kudus ngenataika penguntung.

^ per. 9 Ambika chunto, peda Pertanyaan Kaum Muda—Jawaban yang Praktis, Jilid 1, pasal 24-26, enggau Jilid 2, pasal 4-5, dalam jaku Indonesia; sereta Saut Ngagai 10 Tanya Ari Bala Nembiak, tanya 7, lambar 21-23.

^ per. 50 PENERANG PASAL GAMBAR: Kitai meda sekeda utai ke nyadi ba pengidup sepasang laki bini ke Saksi-Saksi Jehovah. Seduai iya nginjil ba ujung urung taun 1960-an

^ per. 52 PENERANG PASAL GAMBAR: Ba urung taun 1980-an, laki nyaga bini iya ke benung sakit lalu anak seduai iya malik ngagai apai iya.

^ per. 54 PENERANG PASAL GAMBAR: Diatu, laki bini nya ngenang baru pengaga ati seduai iya lebuh ngena pengidup sida gawa ke Jehovah. Anak indu seduai iya, menantu, sereta uchu sama gaga ati.