Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mei 2017

Apai Indai Ke “Orang Kampar” Tulung Meh Bala Anak Kita

Apai Indai Ke “Orang Kampar” Tulung Meh Bala Anak Kita

“Nadai utai bukai ulih ngasuh ati aku lebih agi gaga ari ke ninga bala anak aku diau dalam pemendar.”—3 JHN. 4.

LAGU: 88, 41

1, 2. (a) Nama penanggul ke ditapi bala anak ke datai ari menua bukai? (b) Nama tanya ti deka dikerandau ba artikel tu?

JOSHUA madahka: “Kenyau ari mit, aku ngena jaku ke dikena apai indai aku ke datai ari menua bukai ba rumah sereta ba eklisia. Tang pengudah berengkah besekula, aku rindu agi ngena jaku di menua nya. Dalam beberapa taun, aku semina bejaku ngena jaku di menua nya. Aku enda ulih meretika utai ke dikerandau ba gempuru, lalu aku ngasaika gaya pengidup aku enda sebaka enggau enggi apai indai aku.” Peneleba Joshua nya ukai utai ti baru.

2 Kemaya hari tu, lebih ari 240,000,000 iku orang enda diau di menua asal sida. Enti nuan nya apai indai ke datai ari menua bukai, baka ni nuan ulih meri bala anak nuan peluang ti pemadu manah belajar rinduka Jehovah sereta “diau dalam pemendar”? (3 Jhn. 4) Lalu baka ni orang bukai ulih nulung?

APAI INDAI, TETAPKA CHUNTO TI MANAH

3, 4. (a) Baka ni apai indai ulih netapka chunto ti manah ke bala anak? (b) Nama utai ke enda patut dikearapka apai indai ari bala anak?

3 Apai indai, chunto nuan endang beguna bendar enti deka  bala anak nuan bisi kaul ti rapat enggau Jehovah, lalu idup belama iya. Lebuh bala anak meda nuan ‘ngiga dulu Perintah Petara,’ sida belajar bepanggai ba Jehovah bekaul enggau utai ke diguna sida besehari-hari. (Mat. 6:33, 34) Kemeratka pengawa nuan ke Jehovah, ukai ngiga mayuh agi reta. Idup enggau pengumbas iya lalu nguji nyeliah ari berutang. Giga “pengaya di serega,” iya nya deka diterima Jehovah, ukai ngiga duit tauka deka “dipuji mensia.”—Bacha Mark 10:21, 22; Jhn. 12:43.

4 Anang kelalu kisuk nyentukka nuan nadai awak ke bala anak. Awakka sida nemu nuan temegah ati ke sida lebuh sida mutus deka ngenuluka Jehovah, ukai ngiga nama tauka duit ke sida empu tauka ke nuan. Seliahka penemu ti salah ke ngumbai bala anak patut nyediaka utai ke ngasuh apai indai idup lantang. Kingatka, “ukai anak ke patut besimpanka utai ke apai indai, tang apai indai ke patut besimpanka utai ke anak.”—2 Kor. 12:14.

APAI INDAI, UJI PUTARKA PENANGGUL BA JAKU

5. Nama kebuah apai indai enda tau enda betanduka pesan pasal Jehovah?

5 Baka ke dipadah, orang “ari bansa bukai” datai ngagai gerempung Jehovah. (Sek. 8:23) Tang enti bala anak enda entu nemu jaku ke dikena nuan, nuan tusah deka ngajar sida pemendar. Sida nya pelajar Bup Kudus nuan ti pemadu berega, lalu enti sida “ngelala” Jehovah, sida deka bulih pengidup ti meruan belama iya. (Jhn. 17:3) Ngambika anak nemu utai ti diajar Jehovah, nuan enda tau enda “betanduka pesan nya.”—Bacha Ulang Adat 6:6, 7.

Bala anak nuan nya pelajar Bup Kudus nuan ti pemadu berega

6. Baka ni bala anak tau bulih penguntung ari belajarka jaku ke dikena nuan? (Peda gambar ba pun artikel.)

6 Bala anak nuan tentu belajarka jaku di menua nya ba sekula sereta ari orang bukai. Tang sida belajarka jaku nuan lebuh nuan suah bejaku enggau sida. Lebuh sida bejaku ngena jaku ke dikena nuan, sida deka senang agi bejaku sereta madahka asai ati diri. Lalu bisi penguntung ti bukai. Enti bala anak bejaku ngena lebih ari siti jaku, tu ngemansangka penau sida berunding sereta nulung sida meretika runding orang bukai. Tu mega meri sida peluang ngereja mayuh agi ba pengawa nginjil. Ku Carolina, ke bisi apai indai ti datai ari menua bukai: “Enggau eklisia ke ngena jaku ari menua bukai ngerinduka ati. Lalu ngagitka ati ulih nulung ba endur ke begunaka mayuh agi penginjil.”

7. Nama ulih digaga nuan enti jaku nyadi penanggul ba kita sebilik?

7 Tang, seraya bala anak ke datai ari menua bukai belajarka adat sereta jaku di menua nya, sekeda ari sida engka lenyau pengingin sereta penau bejaku ngena jaku apai indai sida. Apai indai, enti tu nyadi ba bala anak nuan, ulih nuan belajar mimit jaku ke dikena di menua nya? Nuan deka senang agi ngemesaika bala anak nyadi orang Kristian enti nuan nemu randau, pemerindang, sereta kereja sekula sida, tauka enti nuan ulih betemu sereta bejaku enggau bala pengajar sida.  Amat, belajarka jaku ti baru begunaka awak, pengeran, sereta ati ti baruh. Tang tu meri asil ti manah. Ngambika chunto, enti sema anak nuan nya bengal, endaka nuan deka nguji belajarka jaku bengal-bisu ngambika ulih bejaku enggau iya? Anak ke landik bejaku ngena jaku bukai mega patut dikeibuhka, endaka nuan setuju? *—Peda nota kaki.

8. Baka ni nuan ulih nulung bala anak enti nuan enda entu nemu bejaku ngena jaku di menua nya?

8 Sekeda apai indai ke datai ari menua bukai engka tusah deka landik ba jaku baru ke dikena bala anak. Tu tau ngasuh apai indai tusah deka nulung bala anak nemu “Bup Kudus.” (2 Tim. 3:15) Enti nuan napi penanggul tu, nuan agi ulih nulung bala anak ngelala sereta rinduka Jehovah. Seiku tuai gempuru ke benama Shan madahka: “Indai kami ke nyadi indai tunggal semina nemu mimit aja jaku ke dikena kami, lalu aku enggau bala menyadi indu aku enda entu nemu bejaku ngena jaku ke dikena indai kami. Tang lebuh kami meda iya belajar, besampi, sereta enggau naka ulih ngiring ba pengawa belajarka Bup Kudus ba diri sebilik ninting minggu, kami nemu, ngelala Jehovah nya utai ti beguna bendar.”

9. Baka ni apai indai ulih nulung bala anak ke patut belajar ngena dua bengkah jaku?

9 Sekeda bala anak engka patut belajar pasal Jehovah ngena dua bengkah jaku. Nama kebuah? Laban sida ngena sebengkah jaku ba sekula, lalu sebengkah agi dikena ba rumah. Ketegal nya, sekeda apai indai ngena litaricha, audio ke dirikut, sereta video dalam dua bengkah jaku. Amat, apai indai ke datai ari menua bukai patut bebendar ngambika ulih nulung bala anak semak ngagai Jehovah.

NI BAGI JAKU EKLISIA KE PATUT ALAI NUAN DATAI?

10. (a) Sapa ke patut milih bagi jaku eklisia ke patut alai datai? (b) Nama patut digaga tuai bilik sebedau ngaga pemutus?

10 Lebuh “orang kampar” diau jauh ari bala Saksi bukai ke ngena jaku ti sama enggau sida, sida patut enggau eklisia ke ngena jaku di menua nya. (Mas. 146:9) Tang enti bisi eklisia ti semak ke ngena jaku asal sida empu, tuai bilik patut nentuka bagi jaku eklisia ti pemadu manah ke sida sebilik. Sebedau ngaga pemutus, iya patut berunding enggau dalam sereta besampi pasal utai nya. Iya mega patut bejaku enggau bini sereta bala anak pasal utai nya. (1 Kor. 11:3) Nama deka diperundingka iya? Nama prinsip Bup Kudus ke ulih nulung iya ngaga pemutus?

Tuai bilik patut nentuka bagi jaku eklisia ti pemadu manah ke sida sebilik

11, 12. (a) Baka ni jaku bekaul enggau penguntung ke diulih anak ari gempuru? (b) Nama kebuah sekeda bala anak enggai belajarka jaku ke dikena apai indai?

11 Apai indai patut berundingka utai ti amat diguna bala anak. Ngambika ulih meretika pemendar Bup Kudus enggau manah, belajarka Bup Kudus beberapa jam aja ba gempuru ninting minggu enda chukup ba bala anak. Tang perundingka tu: Ba gempuru ke dipejalaika ngena jaku  ke ulih dimereti, bala anak deka bulih mayuh agi penguntung, lalu engka belajar mayuh agi ari ke dijangka apai indai. Tang bala anak nadai bulih penguntung enti sida enda entu nemu jaku nya. (Bacha 1 Korint 14:9, 11.) Lalu jaku asal ke dikena anak engka enda seruran nyadi jaku ke ulih ngubah chara berunding sereta asai ati sida. Amat, sekeda bala anak ulih belajar meri komen, lakun, sereta cheramah dalam jaku ke dikena apai indai, tang enda entu ulih mansutka runding sereta asai ati diri.

12 Pia mega, ati anak ulih dikuingka lebih ari sebengkah jaku. Nya meh utai ke nyadi ba Joshua ke disebut ba pun tadi. Menyadi indu iya, Esther, madahka: “Enti bala anak bejaku ngena jaku apai indai, sida mega deka rinduka adat sereta jalai pengarap apai indai.” Enti bala anak enda ngasaika diri sama enggau gaya pengidup apai indai, sida engka enggai belajarka jaku sereta jalai pengarap apai indai. Nama ulih digaga apai indai ke datai ari menua bukai?

13, 14. (a) Nama kebuah sepasang laki bini ke datai ari menua bukai mai sida sebilik pindah ngagai eklisia ke ngena jaku di menua nya? (b) Baka ni apai indai ngetanka kaul ti teguh enggau Jehovah?

13 Apai indai ke Kristian ngenuluka utai ti diguna bala anak lebih agi ari enggi sida empu. (1 Kor. 10:24) Samuel, apai Joshua seduai Esther, madahka: “Aku enggau bini aku beratika bagi jaku ke ulih negu ati bala anak lebuh belajarka pemendar, lalu kami duai besampi minta penemu-dalam. Saut ngagai sampi nya ukai utai ti senang diterima. Tang lebuh meda bala anak enda entu bulih mayuh penguntung ari gempuru dalam jaku ke dikena kami, kami duai mutuska runding deka pindah ngagai eklisia ke ngena jaku di menua nya. Kami sebilik bejarit datai begempuru sereta nginjil. Kami mega mai bala pangan ke diau mendam enggau kami beserumpu makai sereta bemain. Semua tu udah nulung bala anak kami duai ngelala bala menyadi Kristian sereta ngelala Jehovah nya ukai semina nyadi Petara sida, tang mega nyadi Apai sereta Pangan sida. Kami duai beratika tu beguna agi ari ke ngasuh sida landik ba jaku ke dikena kami duai.”

14 Samuel nambah: “Ngambika aku enggau bini aku bisi kaul ti teguh enggau Jehovah, kami duai mega datai ngagai gempuru ke ngena jaku kami duai empu. Pengidup kami duai amat kisuk, lalu kami duai berasai lelak. Tang kami duai beterima kasih ngagai Jehovah laban merekatka pengeran sereta utai ke dilengkaka kami duai. Kesemua tiga iku anak kami duai gawa penuh jam ke Jehovah.”

UTAI TI ULIH DIKEREJA ORANG KE NEMBIAK

15. Nama kebuah seiku menyadi Kristian indu ke benama Kristina ngasaika diri ulih ngaga pemansang ba eklisia ke ngena jaku di menua nya?

15 Lebuh bala anak mansang besai, sida nemu sida ulih nyembah Jehovah enggau manah agi ba eklisia ke ngena jaku ti ditemu sida enggau manah. Enti pia, apai indai enda patut ngumbai bala anak enda sayauka sida. Ku Kristina ngenang: “Aku nemu mimit aja jaku ke dikena apai indai aku, tang jaku ke dikena bagempuru kelalu tusah ba aku. Lebuh aku beumur 12 taun, aku datai ngagai konvensyen ke ngena jaku ti dipelajarka aku ba sekula. Baru terubah iya, aku meretika utai ti didinga  aku nya pemendar! Bisi utai manah ke nyadi lebuh aku berengkah besampi ngena jaku ke dipelajarka aku ba sekula. Aku ulih bejaku enggau Jehovah ari ati!” (SKR. 2:11, 41) Lebuh Kristina beumur 18 taun, iya berandauka pekara nya enggau apai indai iya, lalu mutus deka pindah ngagai eklisia ke ngena jaku di menua nya. Ku iya madahka: “Belajar pasal Jehovah ngena jaku ke dipelajarka aku ba sekula meransang aku ngereja pengawa ke patut.” Enda lama udah nya, Kristina nyadi pengerintis biasa lalu iya gaga amat ati.

16. Nama kebuah Nadia berasai gaga ati ulih mengkang ba eklisia ke ngena jaku ari menua bukai?

16 Kita ke nembiak, kati kita ngasaika diri deka agi enggau eklisia ke ngena jaku di menua nya? Enti ka, tanya diri empu kebuah iya. Kati nya ketegal pindah ngagai eklisia nya deka nulung nuan semak agi ngagai Jehovah? (Jas. 4:8) Tauka kati nya ketegal nuan enggaika apai indai beratika tiap iti pengawa ke dikereja nuan tauka ketegal nuan enggai bebendar ngaga pemansang? Ku Nadia, ke gawa ba Betel diatu, madahka: “Lebuh aku enggau bala menyadi aku manggai umur bebelas taun, kami deka pindah ngagai eklisia ke ngena jaku di menua nya.” Tang apai indai Nadia nemu, pindah ngagai eklisia nya ulih ngachau kaul bala anak seduai iya enggau Jehovah. “Diatu kami berasai beterima kasih laban apai indai kami bebendar ngajar kami ngena jaku ke dikena seduai iya sereta ngasuh kami mengkang ba eklisia ke ngena jaku ari menua bukai. Nya udah ngelantangka pengidup kami sereta meri peluang ti besai agi ngagai kami kena nulung orang bukai ngelala Jehovah.”

CHARA ORANG BUKAI ULIH NULUNG

17. (a) Ngagai sapa Jehovah meri tanggung pengawa ngemesaika bala anak? (b) Baka ni apai indai ulih minta bantu ba pengawa ngajar bala anak pasal pemendar?

17 Jehovah udah meri apai indai tanggung pengawa ngajar bala anak sida pemendar. Iya enda meri tanggung pengawa nya ngagai aki ini tauka orang bukai. (Bacha Jaku Dalam 1:8; 31:10, 27, 28.) Tang, apai indai ke enda nemu jaku di menua nya engka begunaka bantu ba pengawa ngajar Bup Kudus kena negu ati bala anak sida. Lebuh apai indai nya minta bantu, tu ukai reti sida nguji deka nyeliahka tanggung pengawa ngemesaika bala anak. Tang, tu siti ari chara ngemesaika bala anak ‘dalam disiplin enggau ajar Jehovah.’ (Eps. 6:4) Ngambika chunto, apai indai engka minta penemu ari bala tuai gempuru ba eklisia pasal chara ngiring pengawa belajarka Bup Kudus ba diri sebilik sereta minta bantu ngiga bala bakih ti manah ke bala anak.

Apai indai enggau bala anak bela bulih penguntung lebuh begulai enggau bala menyadi Kristian (Peda genteran 18, 19)

18, 19. (a) Baka ni bala menyadi Kristian ke bukai ulih nulung bala nembiak? (b) Nama pengawa ke patut diteruska apai indai?

18 Kena nulung bala anak, kekadang apai indai ulih mai ruang bilik ke bukai sama enggau belajarka Bup Kudus ba diri sebilik. Pia mega, mayuh orang ke nembiak belajar ari menyadi Kristian ke bukai lebuh sida sama nginjil sereta ngereja pengawa bukai. (J-lam. 27:17) Ku Shan madahka: “Aku agi ingatka bala menyadi Kristian lelaki ke ibuhka aku. Lebuh sida nulung aku ngaduka cheramah pelajar ke dikena ba gempuru, aku seruran belajarka mayuh utai. Lalu aku rindu enggau pengawa ti merindang ati ke digaga kami begulai.”

 19 Amat, sida ke dipilih apai indai kena nulung bala anak patut seruran meransang bala anak nya bebasaka apai indai. Sida ulih ngereja tu enggau nyebut pemanah ke dikembuan apai indai ngagai bala anak nya, lalu enda ngerebut tanggung pengawa ngemesaika bala anak ari apai indai. Pia mega, sida ke nulung patut nyeliahka sebarang ulah ke tau ngasuh sekeda orang ba dalam tauka ba luar eklisia ngumbai ulah nya enda bemoral. (1 Pet. 2:12) Taja pan apai indai engka minta bantu ari orang bukai, tang ngajar pemendar ngagai bala anak agi nyadi tanggung pengawa apai indai. Sida patut beratika bantu ti diberi bala menyadi Kristian ke bukai.

20. Baka ni apai indai ulih nulung bala anak nyadi nembiak ke tetap ati ngagai Jehovah?

20 Apai indai, besampi meh minta tulung ngagai Jehovah lalu bebendar meh nulung bala anak. (Bacha 2 Bansa Israel 15:7.) Kenuluka kaul anak nuan enggau Jehovah lebih ari utai ti diguna nuan empu. Enggau naka ulih nentuka Jaku Petara tama ba ati anak nuan. Terus pechayaka anak nuan ulih nyadi nembiak Jehovah. Lebuh bala anak nitihka Jaku Petara sereta chunto manah nuan, nuan deka ngasaika utai ti diasaika rasul John lebuh iya nulung orang bukai: “Nadai utai bukai ulih ngasuh ati aku lebih agi gaga ari ke ninga bala anak aku diau dalam pemendar.”—3 Jhn. 4.

^ per. 7 Peda artikel “Anda Pasti Bisa Belajar Bahasa Lain!”-IN ba Sedarlah! kena Mac 2007, lambar 10-12.