Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 11

Pendingka Jehovah

Pendingka Jehovah

‘Tu Anak ke dikesayauka Aku. Pendingka iya!’—MAT. 17:5.

LAGU 89 Dinga, Ngasi enggau Diberekat

DALAM ARTIKEL TU *

1-2. (a) Baka ni chara Jehovah bejaku enggau mensia? (b) Nama deka dikerandauka kitai ba artikel tu?

JEHOVAH rindu bejaku enggau kitai. Kelia menya, Jehovah madahka runding Iya ngagai kitai nengah bala nabi, melikat, sereta Jesus. (Amo. 3:7; Gal. 3:19; Pem. 1:1) Kemayaharitu, Jehovah bejaku enggau kitai nengah Bup Kudus. Iya meri kitai Bup Kudus ngambika kitai ulih nemu runding Iya sereta meretika chara Iya ngereja siti-siti utai.

2 Lebuh Jesus ba bumi, Jehovah tiga kali bejaku ari serega. Aram kitai berandauka utai ke disebut Jehovah maya nya, utai ke ulih dipelajarka kitai, sereta penguntung ke diulih kitai ari jaku Iya.

“NUAN TU ANAK TI DIKESAYAUKA AKU”

3. Baka ke dibacha kitai ba Mark 1:9-11, nama utai ke disebut Jehovah lebuh Jesus dibaptisa? Nama tiga iti pekara ti beguna bendar ditemu kitai ari ayat nya?

3 Mark 1:9-11 bisi nyebut pasal kali keterubah Jehovah bejaku ari serega. (Bacha.) Ku Iya: ‘Nuan tu Anak ti dikesayauka Aku. Aku rindu bendar ke nuan.’ Ati Jesus tentu berasai ditegu lebuh ninga nyawa Apai iya madahka Diri sayau sereta andalka iya! Jaku Jehovah nunjukka tiga iti pekara ti beguna bendar pasal Jesus. Kesatu, Jesus nya Anak Iya. Kedua, Jehovah sayauka Anak Iya. Lalu ketiga, Jesus dikerinduka tauka diterima Jehovah. Aram kitai beratika tiap iti pekara tu.

4. Lebuh Jesus dibaptisa, nama kebuah Jehovah nyebut: ‘Nuan tu Anak Aku?’

 4 ‘Nuan tu Anak Aku.’ Nama kebuah Jehovah nyebut munyi nya? Lebuh Jesus ba serega, iya melikat. Tang lebuh iya dibaptisa, iya diiri ngena roh kudus. Maya nya, Petara nunjukka Jesus, Anak ti udah dipilih Iya, bisi peluang pulai baru ngagai serega nyadi Raja enggau Imam Besai. (Luk. 1:31-33; Heb. 1:8, 9; 2:17) Nya alai, lebuh Jesus dibaptisa, Apai iya bisi kebuah madahka: ‘Nuan tu Anak Aku.’—Luk. 3:22.

Kitai patut muji sereta meransang orang bukai (Peda genteran 5) *

5. Lebuh Jehovah madahka Diri sayau sereta nerima Jesus, baka ni kitai ulih neladan Iya ba pekara tu?

5 “Nuan . . . dikesayauka Aku.” Lebuh Jehovah madahka Diri sayau sereta nerima Jesus, Jehovah nyadi teladan ke kitai. Kitai patut ngiga peluang meransang orang bukai. (Jhn. 5:20) Kitai berasai diperansang lebuh orang ke dikesayauka kitai mandangka pengerindu sereta muji pengawa manah ke digaga kitai. Pia mega, bala menyadi Kristian kitai ba eklisia enggau diri sebilik begunaka pengerindu sereta jaku peransang ari kitai. Lebuh kitai muji orang bukai, kitai negapka pengarap sida sereta nulung sida taluk nyembah Jehovah. Kelebih agi, apai indai patut meransang anak sida. Lebuh apai indai muji anak sereta mandangka penyayau, sida nulung anak tegap ba pengarap.

6. Nama kebuah kitai ulih andalka Jesus?

6 ‘Aku rindu bendar ke nuan.’ Jaku tu nunjukka Jehovah nerima Jesus lalu Iya andalka Jesus deka ngamatka peneka Iya. Nya alai, baka Jehovah, kitai mega andalka Jesus deka ngamatka semua semaya Petara. (2 Kor. 1:20) Lebuh kitai beratika teladan  Jesus, kitai keran agi deka belajar ari iya lalu nitihka singkang iya. Baka Jehovah ke andalka Jesus, Jehovah mega andalka nembiak Iya deka terus belajar ari Anak Iya.—1 Pet. 2:21.

‘PENDINGKA IYA!’

7. Nitihka Matthew 17:1-5, ni maya Jehovah bejaku ari serega? Nama disebut Iya?

7 Bacha Matthew 17:1-5. Kali kedua Jehovah bejaku ari serega nya lebuh Jesus berubah gamal. Jesus mai Peter, James, enggau John ngagai siti bukit. Lebuh dia, sida meda genera ti ngalitka ati. Mua Jesus manchar baka mata hari, lalu gari iya bebali beperenching burak. Dua iku melikat ke ngarika Moses enggau Elijah, bejaku enggau Jesus pasal pemati enggau pengangkat iya ari mati. Taja pan tiga iku rasul nya udah “jenak amat tinduk,” tang sida meda genera ke ngalitka ati nya lebuh sida udah dani. (Luk. 9:29-32) Udah nya, sida dibalut siti remang ti terang, lalu sida ninga nyawa Petara bejaku ari dalam remang nya! Sama baka lebuh Jesus dibaptisa, Jehovah madahka Diri sayau sereta nerima Anak Iya. Ku Jehovah: ‘Tu Anak ke dikesayauka Aku. Aku rinduka iya.’ Tang maya tu Jehovah bisi nyebut: ‘Pendingka iya!’

8. Baka ni genera nya meransang Jesus enggau bala murid iya?

8 Genera nya ngambarka mulia enggau kuasa Jesus ke deka nyadi Raja ba Perintah Petara jemah ila. Nya tentu meransang sereta ngeringka Jesus ngambika ulih tan napi pemerinsa enggau pemati ke deka datai. Genera nya mega ngeringka pengarap bala murid iya. Tu nulung nyikap sida napi penguji ti deka datai sereta bejalaika pengawa ti deka digaga sida. Kira-kira 30 taun udah nya, rasul Peter nyebut baru pasal genera nya. Tu nunjukka Peter agi ingatka genera pasal Jesus.—2 Pet. 1:16-18.

9. Nama jaku lalau ke diberi Jesus ngagai bala murid iya?

9 ‘Pendingka iya!’ Jehovah enggau terang nunjukka Iya deka kitai mending sereta ngasika jaku Anak Iya. Nama dipadah Jesus lebuh iya ba bumi? Jesus madah pasal mayuh utai ti patut dipendingka kitai! Ambika chunto, Jesus ngajar bala murid iya chara nusui berita manah, sereta suah ngasuh sida mengkang bejaga. (Mat. 24:42; 28:19, 20) Jesus mega ngasuh sida enggau naka ulih tama nengah pintu ti sempit, sereta meransang sida ngambika enda lemi semengat. (Luk. 13:24) Kelimpah ari nya, Jesus mega nerangka kebuah sida patut rinduka pangan diri, mengkang beserakup, sereta nitihka pesan iya. (Jhn. 15:10, 12, 13) Jaku lalau ke diberi Jesus ngagai bala murid iya endang badas! Jaku lalau iya agi ulih dikena nyentuk ke diatu.

10-11. Baka ni chara kitai ulih nunjukka diri mendingka Jesus?

10 Jesus madahka: ‘Semua nembiak pemendar mendingka nyawa aku.’ (Jhn. 18:37) Kitai mendingka Jesus lebuh kitai ‘sabar enggau pangan diri, lalu ngampun pangan diri.’ (Kol. 3:13; Luk. 17:3, 4) Kitai mega mendingka iya lebuh kitai enggau ransing madahka berita manah “nemuka maya nya ngena tauka enda.”—2 Tim. 4:2.

11 Jesus madahka: ‘Bedus aku mendingka nyawa aku.’ (Jhn. 10:27) Bala murid Jesus mega nunjukka diri mendingka iya lebuh sida nitihka utai ti didinga sida. Sida enda dikelimpangka pengirau ba pengidup. (Luk. 21:34) Taja pia, sida patut ngenuluka pesan  Jesus, taja pan tusah deka ngereja nya. Mayuh bala menyadi Kristian kitai betan lebuh napi penguji ti besai, baka diserang bala penyakal, balat seranta, sereta napi pengerusak alam. Taja pan balat merinsa lebuh napi semua utai nya, tang sida mengkang tetap ati ngagai Jehovah. Ba sida, Jesus udah besemaya: ‘Orang ke nerima lalu ngasika pesan aku, nya meh orang ke rinduka aku. Lalu orang ke rinduka aku deka dikerinduka Apai aku.’—Jhn. 14:21.

Pengawa nginjil nulung kitai ngenuluka Jehovah sereta sembah ngagai Iya ba pengidup kitai (Peda genteran 12) *

12. Nama siti agi chara kitai mendingka Jesus?

12 Siti agi chara kitai mendingka Jesus, iya nya sama bekereja enggau orang ke udah dipilih ngiring kitai. (Heb. 13:7, 17) Beberapa taun ti udah, mayuh ubah udah digaga gerempung Jehovah. Ubah ke digaga nya baka ngena perengka sereta chara baru ba pengawa nginjil, chara gempuru tengan minggu dipejalaika, sereta chara niri, ngadu, enggau ngintu Palan Gempuru kitai. Kitai amat beterima kasih ke iring ti manah tu! Kitai pechaya Jehovah deka merekatka pengawa kitai ke bebendar deka nitihka iring ari gerempung Iya.

13. Nama penguntung enti kitai mendingka Jesus?

13 Kitai bulih penguntung enti mendingka semua utai ti diajar Jesus. Jesus madah ngagai bala murid iya pasal ajar iya ke ulih ngelantangka ati sida. Ku Jesus madahka: ‘[“Kita deka bulih pengering baru,” NW]. Laban tangkun aku mudah, lalu ma aku lempung.’ (Mat. 11:28-30) Jaku Petara, ke nyengkaum empat iti bup Injil pasal pengidup enggau pengawa nginjil Jesus, ngelantangka ati kitai, ngeringka pengarap kitai, sereta ngasuh kitai bepenemu. (Mas. 19:7; 23:3) Jesus madahka: ‘Beberekat agi orang ke ninga lalu ngasika jaku Petara!’—Luk. 11:28.

‘AKU DEKA MULIAKA NAMA AKU!’

14-15. (a) Nitihka John 12:27, 28, ni maya kali ketiga Jehovah bejaku ari serega? (b) Nama kebuah jaku Jehovah ngelantangka ati sereta ngeringka Jesus?

14 Bacha John 12:27, 28. Bup Injil ke ditulis John nyebut pasal kali ketiga Jehovah bejaku ari serega. Beberapa hari sebedau Jesus mati, iya ngintu pengerami Paska ke penudi ba Jerusalem. Ku Jesus madahka: ‘Ati aku balat tusah.’ Udah nya ku iya  agi: “Apai, muliaka nama Nuan!” Ku Apai iya nyaut ari serega: “Aku udah ngemuliaka iya, lalu Aku deka ngemuliaka iya baru.”

15 Ati Jesus balat tusah ketegal iya bebendar deka ngetanka penetap ati ngagai Apai iya, Jehovah. Jesus nemu diri deka balat disipat sereta dibunuh enggau chara ti chukup merinsa. (Mat. 26:38) Tang keberat agi, Jesus deka ngemuliaka nama Apai iya. Jesus dituduh bejaku busung ngelaban Petara, lalu iya irau enggaika pemati iya ngenyaika nama Petara. Jaku Apai iya tentu ngeringka pengarap Jesus! Jesus pechaya, nama Apai iya deka dimuliaka. Jaku Apai iya tentu ngelantangka ati sereta ngeringka iya ngambika ulih tan napi pemerinsa ti deka datai. Taja pan maya nya semina Jesus aja ke ulih meretika utai ti disebut Apai iya, tang Jehovah nentuka jaku Iya ditulis ke semua kitai.—Jhn. 12:29, 30.

Jehovah deka ngemuliaka nama Iya sereta nyelamatka nembiak Iya (Peda genteran 16) *

16. Nama utai ke kadang-kadang ngasuh kitai irau?

16 Baka Jesus, kitai mega irau pasal utai ke ulih ngenyaika nama Jehovah. Kitai engka irau enti orang ngereja utai ti enda lurus ba kitai. Tauka kitai engka tusah ati lebuh ninga cherita bula ke ditusui orang ke nyakal kitai. Cherita bula nya ulih ngenyaika nama Jehovah sereta gerempung Iya. Lebuh napi utai tu, jaku Jehovah ulih ngelantangka ati kitai. Nya alai kitai enda ibuh kelalu irau. Kitai  pechaya, ‘pemaik Petara, ti ngelui peragam mensia, deka nyaga ati enggau runding [kitai] dalam Jesus Kristus.’ (Plp. 4:6, 7) Jehovah seruran mujur ngemuliaka nama Iya. Nengah Perintah Iya ti di serega, Iya deka muai semua penyai ke dibai Sitan, lalu orang ke jai mega deka nadai agi.—Mas. 94:22, 23; Isa. 65:17.

PENGUNTUNG KE DIULIH ENTI MENDINGKA JEHOVAH

17. Nitihka Isaiah 30:21, baka ni chara Jehovah bejaku enggau kitai kemayaharitu?

17 Jehovah agi bejaku enggau kitai nyentuk ke diatu. (Bacha Isaiah 30:21.) Amat, kitai enda ulih ninga Iya bejaku enggau kitai ari serega. Taja pia, Iya nyediaka Bup Kudus kena ngiring kitai. Kelimpah ari nya, roh kudus Jehovah ngiring “ulun ke tetap ati” ngambika seruran nyediaka utai ke dikena negapka pengarap nembiak Iya. (Luk. 12:42) Gerempung kitai nyediaka mayuh litaricha ke dichelak sereta ke ba online. Kitai mega bisi video enggau audio ke dirikut. Semua utai nya ulih nulung negapka pengarap kitai.

18. Baka ni jaku Jehovah ngemansangka pengarap sereta meri pemerani ngagai nuan?

18 Kingatka utai ti disebut Jehovah lebuh Jesus ba bumi! Arapka jaku Jehovah ke ditulis dalam Bup Kudus, meransang kitai andalka Jehovah ulih mutarka semua penanggul kitai. Tu mega deka meransang kitai andalka Iya ulih muai semua penyai ke dibai Sitan enggau orang ke jai. Lalu arapka kitai keran agi deka mendingka Jehovah. Enti kitai ngereja nya, kitai ulih tan napi penanggul kemayaharitu sereta penanggul ke deka datai. Bup Kudus madah ngagai kitai: ‘Kita begunaka ati ti tan, ngambika lebuh kita udah ngereja peneka Petara, kita nerima utai ti udah disemaya.’—Heb. 10:36.

LAGU 4 Jehovah Nya Pengibun Aku

^ per. 5 Lebuh Jesus ba bumi, Jehovah tiga kali bejaku ari serega. Bisi sekali lebuh maya nya, Jehovah ngasuh murid Jesus mendingka Jesus. Kemayaharitu, Jehovah bejaku enggau kitai nengah Bup Kudus, ke nyengkaum ajar ti dibai Jesus, sereta nengah gerempung Iya. Artikel tu deka berandauka penguntung ke diulih lebuh mendingka Jehovah enggau Jesus.

^ per. 52 PENERANG PASAL GAMBAR: Seiku tuai gempuru beratika seiku penulung gempuru nulung ngintu Palan Gempuru sereta gawa ba begian litaricha. Tuai gempuru nya muji iya.

^ per. 54 PENERANG PASAL GAMBAR: Sepasang laki bini ba Sierra Leone meri surat mai datai begempuru ngagai seiku orang berikan.

^ per. 56 PENERANG PASAL GAMBAR: Bala Saksi ke diau ba menua ke alai pengawa nginjil kitai disekat begempuru ba rumah. Sida ngena gari biasa ngambika enda ditemu orang begempuru.