Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 12

Mandangka Diri Ibuhka Asai Ati Orang

Mandangka Diri Ibuhka Asai Ati Orang

“Semua kita enda tau enda . . . siruka pangan diri.”—1 PET. 3:8.

LAGU 90 Meransang Pangan Diri

DALAM ARTIKEL TU *

1. Nitihka 1 Peter 3:8, nama kebuah kitai rindu begulai enggau orang ti ibuhka asai ati sereta pengelantang kitai?

KITAI rindu begulai enggau orang ti ibuhka asai ati sereta pengelantang kitai. Sida nguji deka nemu asai ati sereta utai ti dirunding kitai. Sida mega beratika utai ti diguna kitai lalu nulung kitai indah sebedau kitai minta tulung. Nya alai, kitai beterima kasih ngagai orang ti “siruka” * kitai.—Bacha 1 Peter 3:8.

2. Nama kebuah kitai patut bebendar mandangka penyiru?

2 Semua kitai deka mandangka penyiru. Tang, kitai engka patut bebendar agi ngereja nya. Nama kebuah? Siti kebuah nya, kitai enda sempurna. (Rom. 3:23) Nya alai kitai patut ngelaban ulah ti berundingka diri empu. Sekeda ari kitai mega engka tusah deka mandangka penyiru ketegal chara kitai dibesaika tauka ketegal utai ke udah nyadi ba pengidup kitai. Tu ulih ngujungka kitai nitihka ulah orang ke ngelingi kitai. Ba hari ti penudi tu, mayuh orang enda berundingka asai ati orang bukai. Sida “berundingka diri empu.” (2 Tim. 3:1, 2) Nama ulih nulung kitai mutarka penanggul ke ngasuh kitai tusah deka mandangka penyiru?

3. (a) Baka ni kitai ulih siru agi ke orang? (b) Nama deka dipejuraika kitai ba artikel tu?

3 Enti kitai neladan Jehovah enggau Jesus, kitai ulih siru  agi ke orang. Jehovah nya Petara ti pengerindu. Iya netapka teladan ti pemadu badas bekaul enggau mandangka pengibuh ngagai orang. (1 Jhn. 4:8) Jesus neladan Apai iya. (Jhn. 14:9) Lebuh ba bumi, Jesus nunjukka chara mensia mandangka penyinu ngagai pangan diri. Ba artikel tu, kitai deka bejuraika baka ni Jehovah enggau Jesus mandangka pengibuh ngagai orang. Udah nya, kitai deka bejuraika baka ni kitai ulih neladan seduai iya.

JEHOVAH IBUHKA ORANG

4. Baka ni Sekariah 2:8 nunjukka Jehovah ibuhka asai ati nembiak Iya?

4 Bup Kudus madahka, Jehovah ibuhka asai ati nembiak Iya. Ambika chunto, pikirka asai ati Jehovah lebuh Iya meda orang Israel balat merinsa. Bup Kudus madahka: “Lebuh sida merinsa, Iya mega merinsa.” (Isa. 63:7-9, NW) Udah nya, nengah nabi Sekariah, Jehovah madahka lebuh nembiak Iya napi utai ti enda lurus, Iya ngasaika utai nya nyadi ba Iya. (Bacha Sekariah 2:8.) Jehovah amat ibuhka nembiak Iya!

Jehovah enggau penyinu ngelepaska orang Israel ke nyadi ulun ari menua Ejip (Peda genteran 5)

5. Padahka siti chunto pasal baka ni Jehovah nulung nembiak Iya ke merinsa.

5 Jehovah ukai semina sinuka nembiak Iya. Tang Iya deka nulung sida. Ambika chunto, lebuh orang Israel idup merinsa nyadi ulun ba menua Ejip, Jehovah ulih ngasaika pemedis sida lalu deka nulung sida. Ku Jehovah madah ngagai Moses: “Aku udah meda pemedis bala nembiak Aku . . . Aku udah ninga sida ngangau minta diri dilepaska . . . Aku nemu pemalat sida kena perinsa, nya alai Aku nurun laban Aku deka ngelepaska sida ari jari orang Ejip.” (P-sut. 3:7, 8) Ketegal Jehovah sinuka nembiak Iya, Iya ngelepaska sida ari menua Ejip. Beratus-ratus taun udah nya, orang Israel diserang bala munsuh lebuh sida ba Menua ti Udah Disemaya. Nama digaga Jehovah? Iya “kasihka sida, laban sida bedemuh natka pemerinsa ditekanka orang.”  Sekali agi, penyiru meransang Jehovah nulung nembiak Iya. Iya nganjung bala hakim kena ngelepaska orang Israel ari munsuh sida.—P-ulu. 2:16, 18.

6. Beri siti chunto baka ni Jehovah nunjukka diri berundingka asai ati orang ke bisi runding ti enda betul.

6 Jehovah berundingka asai ati nembiak Iya indah lebuh sida bisi runding ti enda betul. Peratika pasal Jonah. Jehovah ngasuh iya mansang ngagai Nineweh lalu madahka orang ke diau ba nengeri nya deka dirusak. Tang lebuh sida nesal ati, Petara enda nyadi ngerusak sida. Taja pia, utai tu enda ngagaka ati Jonah. Iya “ringat” ketegal utai ke dipadah iya enda nyadi. Tang, Jehovah sabar enggau Jonah lalu nulung ngubah runding iya. (Jon. 3:10–4:11) Nyau kelama, Jonah ulih meretika utai ti diajar Jehovah. Jonah indah dikena Jehovah nulis utai ke nyadi nya ke penguntung kitai.—Rom. 15:4. *

7. Nama ulih ditemu kitai pasal Jehovah ari chara Iya ngatur nembiak Iya?

7 Chara Jehovah ngatur nembiak Iya nunjukka Iya siruka sida. Iya nemu pemedis enggau pemerinsa ke diasaika kitai seiku-seiku. Jehovah “nemu runding enggau ati mensia.” (2 Ban. 6:30) Iya nemu runding, emosi, sereta pengurang kitai. Lalu “Iya enda nejuka [kitai] diuji lebih ari ti ulih ditatka [kitai].” (1 Kor. 10:13) Tu utai ti ngelantangka ati kitai!

JESUS IBUHKA ORANG

8-10. Nama tiga iti kebuah ke ngasuh Jesus ibuhka orang?

8 Lebuh ba bumi, Jesus balat ibuhka orang. Bisi tiga iti kebuah ke ngasuh Jesus ibuhka orang. Kesatu, Jesus enggau sempurna neladan Apai iya, Jehovah. Baka Apai iya, Jesus rinduka orang. Taja pan iya gaga ati ketegal udah nulung Jehovah ngaga semua utai, tang iya lebih agi rinduka mensia. (J-lam. 8:31) Pengerindu meransang Jesus ibuhka asai ati orang.

9 Kedua, Jesus nemu utai ti dalam ati mensia. Iya nemu tuju ati sereta asai ati orang. (Mat. 9:4; Jhn. 13:10, 11) Nya alai, lebuh Jesus meda orang tusah ati, iya ibuhka sida lalu meransang sida.—Isa. 61:1, 2; Luk. 4:17-21.

10 Ketiga, Jesus empu kala ngasaika utai ke ditapi orang. Ambika chunto, Jesus dibesaika dalam ruang bilik ti seranta. Lebuh bekereja enggau apai ambu iya, Josep, Jesus belajar ngereja pengawa berat. (Mat. 13:55; Mrk. 6:3) Josep engka udah nadai sebedau Jesus berengkah nginjil. Nya alai, Jesus ulih ngasaika pemedis lebuh lenyau orang ti dikesayau. Lalu Jesus nemu baka ni asai enti diri sebilik enda sepenemu ba pengarap. (Jhn. 7:5) Utai ke nyadi ba Jesus nulung iya meretika penanggul sereta asai ati orang.

Jesus enggau siru ngeraika seiku lelaki ke bengal jauh ari orang mayuh (Peda genteran 11)

11. Ni maya pengibuh Jesus nyata dipeda? Terangka. (Peda gambar ba kulit majalah.)

11 Pengibuh Jesus nyata dipeda lebuh iya ngereja pengawa ajih. Iya ukai semina ngereja nya ketegal iya patut. Tang, iya ngereja nya ketegal iya “sinu ati” ke orang ti merinsa. (Mat. 20:29-34; Mrk. 1:40-42) Ambika chunto, gambarka asai ati Jesus lebuh iya mai seiku lelaki ke bengal jauh ari orang mayuh lalu ngeraika iya. Tauka lebuh iya ngangkatka idup baru anak tunggal seiku indu balu. (Mrk. 7:32-35; Luk. 7:12-15) Jesus sinuka sida lalu deka nulung sida.

12. Baka ni John 11:32-35 nunjukka Jesus siruka Marta enggau Maria?

 12 Jesus nunjukka diri siruka Marta enggau Maria. Lebuh meda seduai iya tusah ati nyabakka menyadi seduai iya, Lasarus, Jesus “balat sinu sereta tusah.” (Bacha John 11:32-35.) Iya ukai nyabak ketegal enda ulih agi begulai enggau Lasarus, laban iya nemu diri endang deka ngangkatka Lasarus idup baru. Tang iya nyabak ketegal iya mereti sereta berasai sinu meda pemedis ke diasaika Marta enggau Maria.

13. Nama kebuah kitai berasai diperansang lebuh belajar pasal penyiru Jesus?

13 Kitai berasai diperansang lebuh belajar pasal penyiru Jesus ke orang. Amat, kitai ukai mensia ti sempurna baka Jesus. Tang, kitai rinduka iya ketegal iya kasihka orang. (1 Pet. 1:8) Kitai berasai diperansang laban iya udah nyadi Raja ba Perintah Petara. Enda lama da agi, iya deka muai semua pemerinsa. Ketegal Jesus kala diau ba bumi, iya meh ke pemadu engkeman ti ulih ngelepaska mensia ari pemedis sereta pemerinsa ke dibai perintah Sitan. Kitai gaga ati laban bisi Raja ke “sinu ati ke pengelemi kitai.”—Heb. 2:17, 18; 4:15, 16.

NELADAN JEHOVAH ENGGAU JESUS

14. Bepelasarka Epesus 5:1, 2, nama patut digaga kitai?

14 Lebuh beratika teladan Jehovah enggau Jesus, kitai mega deka ngayanka penyiru. (Bacha Epesus 5:1, 2.) Kitai enda nemu utai ti dalam ati orang. Taja pia, kitai ulih meretika emosi sereta utai ti diguna orang. (2 Kor. 11:29) Enda baka orang ba dunya tu, kitai enggai “semina berundingka diri empu aja, tang berunding mega ke orang bukai.”—Plp. 2:4.

(Peda genteran 15-19) *

15. Sapa kelebih agi patut ngayanka penyiru?

15 Kelebih agi, bala tuai gempuru patut ngayanka penyiru. Sida udah diasuh Jehovah ngibun nembiak Iya. Nyadi, sida deka betanggungjawap ngagai Jehovah enti enda ngibun nembiak Iya enggau manah. (Heb. 13:17) Ngambika ulih nulung bala menyadi Kristian, sida patut ngembuan penyiru. Baka ni bala tuai gempuru ulih nunjukka diri siru?

16. Nama utai ti digaga tuai gempuru ke siru? Nama kebuah nya beguna?

16 Tuai gempuru ke siru ngena awak begulai enggau bala menyadi Kristian. Iya ngena tanya lalu mendingka sida enggau sabar. Tu beguna amat kelebih agi lebuh menyadi Kristian deka madahka asai ati diri tang tusah deka mansutka jaku. (J-lam. 20:5) Enti tuai gempuru meri awak ke bala menyadi Kristian, sida deka arap agi ke bala tuai gempuru. Indah kaul sida deka rapat agi, lalu pengerindu sida enggau pangan diri pan deka dalam agi.—SKR. 20:37.

17. Nama dipadah bala menyadi Kristian pasal utai ti dikerinduka sida ba tuai gempuru? Padahka siti chunto.

17 Mayuh bala menyadi Kristian madahka, sida rindu agi enti tuai gempuru ibuhka asai ati orang. Nama kebuah? Ku Adelaide madahka: “Tu ngasuh senang agi bejaku enggau sida laban nuan nemu sida deka meretika nuan. Nuan ulih beratika sida ibuhka nuan ari utai ke digaga sida lebuh nuan bejaku enggau sida.” Seiku menyadi Kristian ke lelaki madahka: “Aku meda seiku tuai gempuru nyabak lebuh iya nguji meretika utai ke ditapi aku. Aku seruran ngenang tu.”—Rom. 12:15.

18. Baka ni kitai ulih ngayanka diri siruka orang?

18 Ukai semina tuai gempuru aja ke patut  ngayanka penyiru. Semua kitai mega ulih ngemanahka agi kualiti tu. Baka ni chara iya? Uji meretika utai ke ditapi diri sebilik sereta bala menyadi Kristian. Pandangka diri ibuhka sida ke nembiak, ke sakit, ke tuai, sereta sida ke udah lenyau orang ti dikesayau. Nanyaka berita sida. Pendingka lebuh sida madahka asai ati diri. Pandangka diri amat meretika utai ke ditapi sida. Enggau naka ulih nulung sida. Enggau nya, kitai ngayanka pengerindu ti bendar.—1 Jhn. 3:18.

19. Nama kebuah kitai patut bejimat lebuh nulung orang?

19 Kitai patut bejimat lebuh nulung orang. Nama kebuah? Laban chara orang napi penusah enda sama. Bisi orang deka madahka penanggul diri, tang bisi nya enggai. Nya alai, kitai patut nyeliah ari nanya utai ke tau ngasuh orang malu tauka enda nyamai ati. (1 Tes. 4:11) Lebuh sida madahka asai ati diri ngagai kitai, engka maya nya kitai enda tentu setuju enggau utai ke disebut sida. Tang kitai patut nemu, nya meh asai ati sida. Kitai deka jampat mending, lalu lubah mansutka jaku.—Mat. 7:1; Jas. 1:19.

20. Nama deka dipejuraika kitai ba artikel pengudah tu?

20 Kelimpah ari mandangka pengibuh ba eklisia, kitai deka ngayanka kualiti tu lebuh nginjil. Baka ni kitai ulih ngayanka penyiru lebuh ngaga orang nyadi murid? Kitai deka bejuraika nya ba artikel pengudah tu.

LAGU 130 Deka Ngampun

^ per. 5 Jehovah enggau Jesus ibuhka asai ati orang. Artikel tu deka bejuraika utai ke ulih dipelajarka kitai ari teladan seduai iya. Kitai mega deka berandauka kebuah kitai patut mandangka penyiru lalu baka ni kitai ulih ngereja nya.

^ per. 1 PENERANG JAKU: Mandangka penyiru reti iya kitai nguji meretika asai ati orang lalu nguji ngasaika utai ti diasaika sida. (Rom. 12:15)

^ per. 6 Jehovah mega ngayanka penyinu ngagai nembiak Iya ke berasai takut tauka ke lemi semengat. Pikirka pasal Hanah (1 Sam. 1:10-20), Elijah (1 Raj. 19:1-18), enggau Ebetmelek (Jer. 38:7-13; 39:15-18).

^ per. 65 PENERANG PASAL GAMBAR: Kitai bisi mayuh peluang mandangka penyiru ngagai bala menyadi Kristian ba Palan Gempuru. Kitai meda (1) seiku tuai gempuru berandau manah enggau seiku penginjil ke agi biak sereta indai iya, (2) seiku apai enggau anak indu iya ngiring seiku menyadi Kristian indu ke tuai ngagai kerita, lalu (3) dua iku tuai gempuru mendingka seiku menyadi Kristian indu ke begunaka tulung.