Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Pemadas—Baka Ni Nuan Ulih Ngemansangka Nya?

Pemadas—Baka Ni Nuan Ulih Ngemansangka Nya?

SEMUA kitai deka orang ngumbai kitai orang ti manah. Tang kemayaharitu tusah deka ngayanka pemadas. Mayuh orang “begedika utai ti badas.” (2 Tim. 3:3) Sida nitihka penemu diri pasal utai ti betul enggau utai ti salah. Sida indah “ngumbai utai ti jai manah, lalu utai ti manah jai.” (Isa. 5:20) Pia mega, ketegal kitai enda sempurna lalu utai ke jai kala nyadi ba kitai, kitai tusah deka ngayanka pemadas. Nya alai, kitai engka baka Anne. * Taja pan Anne udah betaun-taun nyembah Jehovah, iya madahka, “Aku tusah deka nyadi orang ti badas.”

Tang ke manah nya, semua kitai ulih ngayanka pemadas! Nya kualiti ari buah roh kudus Petara. Roh kudus ulih ngelaban penanggul ke datai ari orang bukai sereta diri empu. Aram kitai mansik pasal pemadas enggau silik agi lalu belajarka chara kitai ulih ngayanka kualiti nya.

NAMA RETI PEMADAS?

Pemadas nadai kaul enggau utai ti jai. Orang ke badas seruran ngereja utai ti ngena. Sida mega seruran ngiga chara kena nulung lalu ngereja utai ti badas ngagai orang bukai.

Nuan engka kala meda sekeda orang ngereja utai ti badas ngagai diri sebilik sereta bala bakih. Tang kati pemadas ke diayan semina naka nya aja? Amat, nadai seiku kitai ulih ngayanka kualiti tu enggau sempurna. Bup Kudus madahka: “Nadai orang di dunya tu ti nadai kala ngereja utai ti salah.” (P-jar. 7:20) Indah rasul Paul madahka: “Laban aku nemu, nadai utai ti badas diau dalam aku, reti nya, dalam tubuh aku.” (Rom. 7:18) Nya alai enti kitai deka ngemansangka kualiti tu, kitai patut bepanggai ba Petara laban pemadas datai ari Iya.

‘JEHOVAH ENDANG BADAS’

Petara Jehovah netapka standard bekaul enggau utai ti manah. Ku Bup Kudus madah pasal Iya: “Nuan endang badas lalu ngereja utai ti badas; Ajar aku adat Nuan.” (Mas. 119:68) Aram kitai mansik dua iti pekara ke bekaul enggau pemadas Jehovah ba ayat tu.

Jehovah endang badas. Ketegal nya, Iya seruran mujur ngayanka pemadas. Peratika utai ke nyadi lebuh Jehovah madah ngagai Moses: “Aku deka ngasuh [‘pemadas,’ NW] Aku mansa mua nuan.” Lebuh mulia Jehovah nyengkaum pemadas Iya mansa mua Moses, Moses ninga jaku tu: ‘Aku tu Jehovah Petara ti kasih sereta siru, lubah ringat, sereta mandangka penetap ati enggau pengerindu ti besai. Aku deka tetap rinduka beribu-ribu serak lalu ngampun penyai enggau dosa, tang Aku tetap deka ngukum’ orang ke ngereja penyalah. (P-sut. 33:19; 34:6, 7) Nya alai, kitai ulih pechaya Jehovah endang badas ba semua pekara. Taja pan Jesus nya orang ti pemadu badas, tang iya madahka: ‘Nadai siku ti badas, kelimpah ari Petara siku aja.’—Luk. 18:19.

Kitai ulih meda pemadas Jehovah ari utai ti ditempa Iya

Jehovah ngereja utai ti badas. Semua pengawa Jehovah badas magang. “Iya manah enggau semua orang lalu siru enggau semua utai  ti udah digaga Iya.” (Mas. 145:9) Pemadas Jehovah enda bepilih mata. Iya meri semua mensia pengidup sereta utai ti diguna sida ngambika sida ulih terus idup. (SKR. 14:17) Iya mega ngayanka pemadas lebuh Iya ngampun kitai. Ku pemasmur madahka: “Nuan endang manah enggau kami, sereta ngampun.” (Mas. 86:5) Kitai mega pechaya “Iya nadai kala enggai meri utai ti manah ngagai orang ke ngereja utai ti ngena.”—Mas. 84:11.

“BELAJAR NGEREJA UTAI TI NGENA”

Jehovah nempa kitai ngambika ulih neladan Iya. Reti nya kitai ulih nyadi orang ke manah sereta ngereja utai ti manah. (P-kal. 1:27) Tang tu enggai nyadi pia aja. Jehovah madahka, kitai enda tau enda “belajar ngereja utai ti ngena.” (Isa. 1:17) Tang baka ni kitai ulih ngemansangka kualiti tu? Bisi tiga iti chara.

Kesatu, kitai ulih besampi minta roh kudus. Roh kudus ulih nulung orang Kristian nyadi orang ke manah ba mata Petara. (Gal. 5:22) Roh kudus mega ulih nulung kitai rinduka utai ti badas sereta begedika penyai. (Rom. 12:9) Indah Bup Kudus madahka Jehovah ulih “ngeringka ati [kitai] ngereja enggau nyebut semua utai ti manah.”—2 Tes. 2:16, 17.

Kedua, kitai patut macha Bup Kudus. Lebuh kitai ngereja nya, Jehovah ulih nulung kitai “nemu utai ti patut dikereja” lalu nyikap kitai “ngereja genap macham pengawa ti badas.” (J-lam. 2:9; 2 Tim. 3:17) Ati kitai baka peti reta. Lebuh kitai macha Bup Kudus sereta belematika utai ti dibacha, kitai ulih ngisi ati enggau utai ti badas. Tu baka ngisi peti reta kitai enggau utai ti berega ke ulih dikena kitai dudi hari.—Luk. 6:45; Eps. 5:9.

Ketiga, kitai enggau naka ulih ‘nunda utai ti badas.’ (3 Jhn. 11) Kitai ulih tetemuka teladan ari Bup Kudus. Amat, teladan ti pemadu manah nya Jehovah enggau Jesus. Tang kitai mega ulih beratika sida ke bukai ti ngayanka pemadas. Ambika chunto, Tabita enggau Barnabas. (SKR. 9:36; 11:22-24) Nuan tau bulih penguntung ari belajarka teladan seduai iya. Lebuh belajar pasal seduai iya, peratika baka ni chara seduai iya nulung orang bukai. Pikirka baka ni nuan ulih nulung diri sebilik tauka bala menyadi Kristian kitai. Pia mega, peratika utai manah ke nyadi ba Tabita enggau Barnabas ketegal manah enggau orang. Nuan mega tau bulih penguntung enti manah enggau orang.

Kitai mega ulih beratika sekeda teladan kemayaharitu. Ambika chunto, peratika bala tuai gempuru ba eklisia ke “rinduka utai ti badas.” Pikirka mega pasal bala menyadi Kristian indu kitai ke  “ngajar utai ti badas” ari jaku enggau teladan sida. (Tit. 1:8; 2:3) Seiku menyadi indu ke benama Roslyn madahka: “Bakih aku selalu ngiga chara kena nulung sereta meransang orang bukai ba eklisia. Iya mikirka pasal utai ke ditapi sida sereta suah meri hadiah ti mit tauka nulung sida ngena chara bukai. Ba aku, iya orang ke manah.”

Jehovah meransang nembiak Iya “ngereja utai ti ngena.” (Amo. 5:14) Ngereja nya deka nulung kitai rinduka utai ti dikumbai Jehovah ngena. Nya mega deka nulung kitai ngereja utai ti badas.

Kitai bebendar deka nyadi orang ke manah sereta ngereja utai ti badas

Enti kitai deka nyadi orang ke manah, kitai tau enda ibuh ngereja utai ti kelalu ngagai orang bukai tauka meri sida hadiah ti mar rega. Ambika chunto: Enti kitai deka utai ke ditanam tumbuh, kitai enda tau tekala nya manjah iya ngena mayuh ai. Tang, kitai deka mupuk-mupuk manjah iya ngena penyampau ai ke chukup diguna utai tanam nya. Pia mega enggau kitai. Kitai ulih ngayanka pemadas ti patut enti kitai suah nulung orang nengah chara ti mit.

Bup Kudus meransang kitai besedia sereta “sedia” ngereja utai ti badas. (2 Tim. 2:21; Tit. 3:1) Enti kitai beratika utai ke nyadi ba orang bukai, kitai ulih nemu chara ngelantangka ati sida, “kena nulung sida mansang.” (Rom. 15:2) Nya nyengkaum bekunsika utai ti dikemisi enggau sida. (J-lam. 3:27) Kitai ulih mai sida makai tauka meransang sida. Enti bisi orang ke sakit, kitai ulih ngelawa, nganjung mesej, tauka betelefon ngagai iya. Kitai ulih ngiga peluang nyebut “jaku ti manah kena ngemansangka pengarap orang, ba maya ti patut, ngambika jaku nya meri berekat ngagai orang ke ninga.”—Eps. 4:29.

Baka Jehovah, kitai deka manah enggau semua orang. Nya alai, kitai enda bepilih mata lebuh begulai enggau orang bukai. Siti ari chara ti pemadu manah kitai ngayanka diri enda bepilih mata, iya nya kitai nginjil ngagai semua orang. Baka ke diasuh Jesus, kitai indah deka manah enggau orang ke begedika kitai. (Luk. 6:27) Nadai salah enti deka manah enggau semua orang laban “nadai adat ngelaban utai nya.” (Gal. 5:22, 23) Lebuh kitai manah ngagai orang ke jai enggau kitai tauka lebuh kitai napi penusah, kitai ulih narit orang bukai ngagai pemendar lalu ngemuliaka Petara.—1 Pet. 3:16, 17.

BEREKAT KE DIULIH LEBUH NGEREJA PEMADAS

“Orang ke menyana deka diupah ketegal utai ti dikereja sida.” (J-lam. 14:14) Nama sekeda upah nya? Lebuh kitai manah enggau orang bukai, sida pan deka manah enggau kitai. (J-lam. 14:22) Taja pan sida jai enggau kitai, kitai patut terus manah enggau sida. Asil iya, sida engka berubah lalu manah enggau kitai.—Rom. 12:20.

Lebuh kitai ngereja utai ti badas lalu badu ngereja utai ti jai, kitai empu mega bulih penguntung. Tu meh utai ke nyadi ba mayuh bala menyadi Kristian kitai. Peratika utai ke nyadi ba Nancy. Ku iya madah: “Suba, aku udu ngereja utai nitihka peneka ati diri, nadai moral, sereta enda bebasaka orang. Tang, pengudah belajarka Bup Kudus lalu nitihka standard Petara pasal utai ti badas, ati aku berasai lantang agi. Diatu aku bebasa agi ke diri empu.”

Kebuah ti pemadu besai kitai deka ngemansangka pemadas laban nya ngagaka ati Jehovah. Taja pan mayuh orang engka enda meda utai ke dikereja kitai, tang Jehovah ulih meda. Iya nemu enti kitai ngereja tauka berundingka utai ti manah. (Eps. 6:7, 8) Baka ni chara Jehovah merekatka kitai? ‘Jehovah gaga ati ke orang ke menyana.’ (J-lam. 12:2) Nya alai, aram meh semua kitai ngemansangka pemadas. Jehovah madahka, “mulia, basa enggau pemaik deka diberi ngagai genap iku orang ke ngereja pemadas.”—Rom. 2:10.

^ per. 2 Sekeda nama udah diubah.