Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mac 2017

Asa, Jehosapat, Hesekiah, Josiah

Nyembah Jehovah Enggau Pengabis Ati!

Nyembah Jehovah Enggau Pengabis Ati!

‘Jehovah, aku minta Nuan ingatka aku ti udah tetap ati sereta taluk betuaika Nuan.’—2 RAJ. 20:3.

LAGU: 52, 65

1-3. Nama reti nyembah Jehovah enggau “pengabis ati”? Beri siti chunto.

SEMUA kitai enda sempurna sereta ngereja penyalah. Tang kitai beterima kasih ngagai Jehovah laban Iya udah nyediaka tebus sereta sedia deka ngampun kitai. Nya alai, enti kitai baruh ati sereta nesal ati, kitai ulih minta ampun ari Iya. Kitai tau arap Jehovah enda ngukum kitai “nitihka dosa kitai.” (Mas. 103:10) Taja pia, kitai enda tau enda “betuaika Iya enggau enda bebagi ati.” (1 Ban. 28:⁠9) Baka ni kitai ulih ngereja nya taja pan kitai enda sempurna?

2 Kena nulung kitai, kitai ulih mandingka pengidup Raja Asa enggau pengidup Raja Amasiah. Kedua-dua iku raja nya ngereja utai ti manah, tang seduai iya mega ngereja penyalah ketegal seduai iya enda sempurna. Tang Bup Kudus madahka, Asa ‘mengkang tetap ati ngagai Jehovah sepemanjai umur iya.’ (2 Ban. 15:​16, 17; 25:​1, 2; J-lam. 17:⁠3) Iya seruran nguji deka ngelantangka ati Jehovah sereta betuaika Jehovah enggau enda bebagi ati. (1 Ban. 28:⁠9) Taja pia, Amasiah enda nyembah Jehovah enggau pengabis ati. Pengudah iya ngalahka munsuh Pe tara, iya mai engkeramba munsuh pulai lalu berengkah nyembah engkeramba nya.​​—2 Ban. 25:​11-​16.

3 Orang ke nyembah Jehovah enggau “pengabis ati” rinduka Iya, lalu deka nyembah Iya belama iya. Ba Bup Kudus, leka jaku “ati” suah nunjukka utai ba dalam runding sereta ati orang nya. Tu nyengkaum chara kitai berunding, utai ti dikerindu kitai, utai ti deka digaga kitai enggau pengidup, sereta kebuah kitai ngereja siti-siti utai. Taja pan kitai enda sempurna, kitai ulih nyembah Jehovah enggau pengabis ati. Kitai nyembah Iya laban kitai amat keran, ukai ketegal kitai patut tauka ketegal kitai udah lama nyembah Iya.​​—2 Ban. 19:⁠9.

4. Nama deka dikerandauka kitai diatu?

4 Kitai ulih nemu enggau terang agi reti nyembah Petara enggau pengabis ati, enti beratika pengidup Asa enggau pengidup tiga iku raja Judah ke tetap ati ti bukai. Sida nya Jehosapat, Hesekiah, enggau Josiah. Taja pan empat iku raja tu ngereja penyalah, sida agi ngelantangka ati Jehovah. Iya nemu sida nyembah Iya enggau pengabis ati. Nama kebuah Petara ngumbai sida nyembah Iya enggau pengabis ati, lalu baka ni kitai ulih nunda sida?

ASA ‘TETAP ATI NGAGAI JEHOVAH’

5. Nama digaga Asa lebuh iya nyadi raja?

5 Asa nya raja menua Judah ti ketiga pengudah bansa Israel bepechah nyadi perintah menua Israel sereta perintah menua Judah. Lebuh Asa nyadi raja menua Judah, iya keran deka muai sembah ti pelesu sereta ulah seks ti kamah ari perintah iya. Iya ngerusak engkeramba ke disembah orang Judah sereta muru orang ke bekereja nyadi sundal ba palan alai orang kapir nyembah petara sida. Asa indah “muai ini iya Maakah ari pangkat iya ti nyadi indai raja, laban iya udah ngaga engkeramba ke petara ti ngasuh peridi.” (1 Raj. 15:​11-​13) Asa mega meransang rayat iya ‘ngereja utai ti dikedekaka Jehovah’ sereta “ngasika ajar [Adat] enggau pesan Iya.” Asa enggau naka ulih nulung orang bukai nyembah Jehovah.​​—2 Ban. 14:⁠4.

6. Nama digaga Asa lebuh orang Etiopia nyerang menua Judah?

6 Dalam kandang sepuluh taun ti keterubah Asa merintah, perintah menua Judah nadai beperang. Udah nya, sejuta iku bala soldadu enggau tiga ratus buah kerita perang orang Etiopia datai ngelaban orang Judah. (2 Ban. 14:​1, 6, 9, 10) Nama digaga Asa? Iya tentu pechaya Jehovah ulih nulung nembiak Iya. Nya alai, iya besampi ngagai Jehovah ngambika nulung sida menang ba perang. (Bacha 2 Bansa Israel 14:11.) Kekadang, Jehovah nulung nembiak Iya menang ngelaban munsuh sida, indah lebuh bala raja nya enda tetap ati ngagai Iya. Iya ngereja tu kena nunjukka Diri Petara ti bendar. (1 Raj. 20:​13, 26-​30) Tang sekali tu, Jehovah nulung nembiak Iya laban Asa bepanggai ba Iya. Jehovah nyaut sampi Asa, lalu sida menang beperang. (2 Ban. 14:​12, 13) Tang Asa udah nya ngereja siti penyalah ti besai lebuh iya minta tulung ari raja Siria, ukai ari Jehovah. (1 Raj. 15:​16-​22) Taja pia, Jehovah ulih meda Asa rinduka Iya. Asa ‘mengkang tetap ati ngagai Jehovah sepemanjai umur iya.’ Baka ni kitai ulih nunda chunto manah Asa?​​—1 Raj. 15:⁠14.

7, 8. Baka ni nuan ulih nunda Asa?

7 Baka ni kitai nemu sekalika kitai nyembah Jehovah enggau pengabis ati tauka enda? Kitai ulih nanya diri empu: ‘Kati aku deka ngasika Jehovah taja pan tusah ngereja nya? Kati aku amat keran deka nyaga eklisia Jehovah ngambika mengkang tuchi?’  Uji pikirka, Asa tentu begunaka pemerani ti besai ngambika ulih muai ini iya ari pangkat nyadi indai raja! Kekadang, nuan engka patut berani baka Asa. Ngambika chunto, baka ni enti seiku ari kita sebilik tauka pangan rapat bedosa, enggai nesal ati, lalu udah nya dibuai ari eklisia? Kati nuan deka nyeliah ari begulai enggau orang nya? Nama deka digaga nuan?

8 Baka Asa, kekadang kitai engka ngasaika semua orang ngelaban kitai. Orang ke sama sekula tauka bala pengajar engka ngeleseka nuan ketegal nuan Saksi Jehovah. Tauka orang ke sama gawa engka ngumbai nuan beli laban nuan ngambi chuti deka ngagai gempuru besai tauka suah enda gawa overtime. Ba pekara tu, bepanggai meh ba Petara baka ke digaga Asa. Besampi ngagai Jehovah, anang takut, sereta mengkang ngereja utai ti ngena. Anang enda ingat, Petara ngeringka Asa, lalu Iya mega deka ngeringka nuan.

9. Baka ni kitai ulih ngagaka ati Jehovah lebuh kitai nginjil?

9 Asa enda berunding pasal diri empu aja; iya meransang orang bukai ‘ngereja utai ti dikedekaka Jehovah.’ Kitai mega nulung orang nyembah Jehovah. Iya meda lebuh kitai bejaku enggau orang bukai pasal Iya. Iya tentu gaga lebuh Iya meda kitai ngereja pengawa nya ketegal kitai rinduka Iya, lalu ketegal kitai ibuhka orang bukai sereta pengidup sida ke jemah ila!

JEHOSAPAT NGIGA JEHOVAH

10, 11. Baka ni kitai ulih nunda Jehosapat?

10 Jehosapat “baka apai iya [Asa] ke dulu ari iya.” (2 Ban. 20:​31, 32) Baka ni? Baka apai iya, Jehosapat meransang rayat iya terus nyembah Jehovah. Iya nganjung bala pemesai ngagai semua nengeri di menua Judah ngajar orang ari ‘Bup Adat Jehovah.’ (2 Ban. 17:​7-​10) Iya indah ngagai perintah ti di utara menua Israel, ngagai orang di menua Epraim ti bebukit, ‘mai orang mayuh pulai baru ngagai Jehovah.’ (2 Ban. 19:⁠4) Jehosapat nya raja ‘ke udah enggau naka ulih betuaika Jehovah.’​​—2 Ban. 22:⁠9.

11 Kemaya hari tu, Jehovah deka orang di serata dunya belajar pasal Iya, lalu semua kitai ulih nulung ba pengawa tu. Kati nya juluk ati nuan deka enggau pengawa tu ninting bulan? Kati nuan deka ngajar orang bukai pasal Bup Kudus ngambika sida mega ulih berengkah nyembah Jehovah? Bisi nuan besampi ke utai tu? Enti nuan bebendar, Jehovah ulih nulung nuan ngepunka pengawa belajarka Bup Kudus. Enti orang deka belajarka Bup Kudus lebuh nuan patut belelak, kati deka nuan belajar enggau iya? Lalu sama baka Jehosapat ke nguji nulung orang bukai berengkah nyembah Jehovah baru, kitai ulih nguji nulung orang ke enda aktif agi. Pia mega, bala tuai gempuru ngatur pengawa ngabas sereta meri bantu ngagai orang ke udah dibuai ari eklisia sida ke engka udah ninggalka ulah lama ti bedosa.

12, 13. (a) Lebuh Jehosapat berasai takut, nama digaga iya? (b) Nama kebuah kitai patut nitihka chunto Jehosapat?

12 Baka apai iya, Asa, Jehosapat bepanggai ba Jehovah lebuh seraban bala soldadu ti besai datai nyerang menua Judah. (Bacha 2 Bansa Israel 20:​2-4.) Iya takut, lalu minta tulung ari Jehovah. Dalam sampi, iya ngaku sida enda ulih ngalahka munsuh. Iya mega madahka, iya enggau rayat iya enda nemu utai ke patut dikereja. Jehosapat tentu pechaya Jehovah deka nulung sida. Ku iya madahka: “Kami minta Nuan nulung kami.”​​—2 Ban. 20:⁠12.

13 Baka Jehosapat, kekadang kitai engka  enda nemu baka ni deka mutarka siti-siti penanggul, lalu kitai indah engka takut. (2 Kor. 4:​8, 9) Tang kingatka utai ti digaga Jehosapat. Di mua semua orang, iya besampi lalu madah ngagai Jehovah, iya enggau rayat iya berasai lemi semengat. (2 Ban. 20:​5) Bala tuai bilik ulih nunda chunto Jehosapat. Minta Jehovah nulung nuan enggau diri sebilik mutarka penanggul sereta nemu utai ke patut digaga. Anang malu enti diri sebilik ningaka sampi ke baka tu. Sida deka nemu nuan amat arapka Jehovah. Jehovah nulung Jehosapat, lalu Iya mega deka nulung nuan.

HESEKIAH MENGKANG NGEREJA UTAI TI NGENA

14, 15. Baka ni Hesekiah bepanggai ba Petara enggau pengabis ati?

14 Hesekiah nya seiku agi raja ke ‘tetap ati ngagai Jehovah.’ Iya tetap ati taja pan apai iya nyadi chunto ti enda manah sereta nyembah engkeramba. Hesekiah “ngerusak endur alai orang kapir nyembah petara sida, ngeredakka tiang batu, lalu nebang engkeramba petara indu Aserah. Iya mega ngeredakka ular temaga ti udah digaga Moses,” laban orang Israel nyembah ular tembaga nya. Hesekiah nyembah Jehovah enggau pengabis ati. Iya ‘[‘terus,’ NW ] ngereja semua pesan ti udah diberi Jehovah ngagai Moses.’​​—2 Raj. 18:​1-6.

15 Lebuh Hesekiah nyadi raja, bala soldadu Asiria ke kering ngalahka menua Judah lalu ngemba deka ngerusak menua Jerusalem. Raja Asiria, Senakerip, ngeleseka Jehovah lalu nguji ngasuh Hesekiah nyerahka diri. Ba maya ti balat tusah nya, Hesekiah arap bendar ke Jehovah lalu besampi minta tulung ari Iya. Iya nemu, Petara kering agi ari orang Asiria lalu ulih nyelamatka nembiak Iya. (Bacha Isaiah 37:​15-​20.) Petara nyaut sampi Hesekiah enggau chara ngirumka seiku melikat ngambika munuh 185,000 iku bala soldadu Asiria.​​—Isa. 37:​36, 37.

16, 17. Baka ni nuan ulih nunda Hesekiah?

16 Udah nya, Hesekiah sakit lalu nyauka mati. Ba maya ti tusah nya, Hesekiah minta Jehovah ingatka penetap ati iya sereta nulung iya. (Bacha 2 Raja 20:​1-3.) Jehovah ningaka sampi Hesekiah lalu ngeraika iya. Ari Bup Kudus kitai nemu, kemaya hari tu kitai enda ulih ngarapka kereja ajih ari Petara ngeraika penyakit kitai tauka ngasuh kitai idup lama agi. Tang baka Hesekiah, kitai ulih bepanggai ba tulung ari Jehovah. Kitai ulih madahka: ‘Jehovah, aku minta Nuan ingatka aku ti udah tetap ati sereta taluk betuaika Nuan.’ Kati nuan pechaya Jehovah deka seruran nyaga nuan, indah lebuh nuan sakit?​​—Mas. 41:⁠3.

17 Nama agi chara kitai ulih nunda Hesekiah? Engka bisi utai ke ngachau kaul kitai enggau Jehovah tauka ngambi jam ke dikena kitai nyembah Iya. Ngambika chunto, mayuh orang kemaya hari tu nyadika mensia idola sida. Sida temegahka bala selebriti sereta orang bukai ke enda dikelala sida. Mayuh orang ngena mayuh jam macha pasal bala selebriti sereta meda gambar sida. Tauka sida suah ngena media sosial tauka ngena perengka elektronik ke bukai bejaku enggau orang ba internet. Endang amat, kitai engka rindu berandau enggau diri sebilik tauka pangan rapat ngena perengka elektronik. Tang, kitai engka masau mayuh jam ba media sosial. Kitai engka mega temegah lebuh mayuh orang madahka diri rindu ke gambar tauka komen ke ditepu kitai ba internet. Tauka, lebuh kitai nemu sekeda orang nyau ngetu meda gambar tauka komen nya, kitai engka pedis ati. Kitai ulih belajar ari chunto rasul Paul, Akuila, eng gau Prisila. Ba runding nuan, kati sida ngena jam ti dikemisi sida ninting hari deka nemu tiap iti utai ti dikereja orang, kelebih agi orang ke enda nyembah Jehovah? Bup Kudus madahka, Paul “nadai ngereja pengawa bukai tang semina madahka jaku Tuhan.” Lalu Prisila enggau Akuila ngena jam seduai iya nginjil sereta nerangka ‘penemu ti betul agi pasal Jalai Petara.’ (SKR. 18:​4, 5, 26) Kitai ulih nanya diri empu: ‘Kati aku nyeliah ngambika enda nyadika mensia idola? Kati aku nyeliah ari ngena mayuh jam ngereja utai ke enda entu beguna?’​​—Bacha Epesus 5:​15, 16.

JOSIAH NGASIKA PESAN JEHOVAH

18, 19. Baka ni kitai ulih baka Josiah?

18 Raja Josiah mega ngasika pesan Jehovah “enggau pengabis ati.” (2 Ban. 34:31) Josiah nya ichit Hesekiah. Lebuh iya agi nembiak, iya ‘belabuh nyembah Petara aki iya Raja David.’ Lalu lebuh iya beumur 20 taun, iya belabuh muai engkeramba ari menua Judah. (Bacha 2 Bansa Israel 34:​1-3.) Josiah bebendar agi deka ngelantangka ati Jehovah enti dibanding enggau raja menua Judah ti bukai. Lalu bisi sekali, imam besai tetemuka bup Adat Petara ba rumah sembiang. Tu engka bup ke udah ditulis Moses kediri empu! Lebuh sekretari macha bup nya ngagai Josiah, iya nemu diri patut bebendar agi nyembah Jehovah enggau pengabis ati. Iya mega meransang orang bukai ngereja utai ti sama. Ketegal nya, orang ‘semampai nitihka Jehovah’ lebuh Josiah agi idup.​​—2 Ban. 34:​27, 33.

19 Enti nuan nya orang ke biak, nuan ulih nunda Josiah sereta ngelala Jehovah enggau mayuh agi. Josiah engka udah belajar ari aki iya ke udah nesal ati, Raja Manaseh, pasal Jehovah ke deka ngampun. Nuan mega ulih belajar ari orang ke tuai agi ba diri sebilik sereta ba eklisia. Sida ulih madah ngagai nuan pasal mayuh utai manah ti udah digaga Jehovah ke sida. Pia mega, kingatka baka ni asai ati Josiah pengudah iya nemu utai ti dipadah ari bup Adat Petara. Iya keran deka ngelantangka ati Jehovah, lalu jejampat ngaga ubah. Ari macha Bup Kudus, nuan mega deka keran agi ngasika Jehovah. Asil iya, kaul nuan enggau Iya deka tegap agi, lalu nuan deka lantang agi ati. Udah nya, nuan deka madah ngagai orang bukai pasal Jehovah. (Bacha 2 Bansa Israel 34:​18, 19.) Lebuh nuan belajarka Bup Kudus, nuan mega engka tetemuka chara nuan ulih ngemansangka sembah nuan ngagai Petara. Enti pia, enggau naka ulih meh ngaga ubah tu, baka ke digaga Josiah.

NYEMBAH JEHOVAH ENGGAU PENGABIS ATI!

20, 21. (a) Nama utai ti sama ba empat iku raja ke dikerandauka kitai? (b) Nama deka dikerandauka kitai ba artikel pengudah tu?

20 Nama ulih dipelajarka kitai ari empat iku raja ari menua Judah ke nyembah Jehovah enggau pengabis ati? Sida ke­ran deka ngelantangka ati Jehovah sereta nyembah Iya sepemanjai pengidup sida. Sida bepanggai ba Iya lebuh bala munsuh ti kering datai nyerang sida. Keberat agi, sida nyembah Jehovah laban sida rinduka Iya.

21 Taja pan empat iku raja tu enda sempurna sereta ngereja penyalah, Jehovah lantang ati ngagai sida. Iya meda ati sida, lalu nemu sida amat rinduka Iya. Kitai mega enda sempurna sereta ngereja penyalah. Tang, Jehovah deka lantang ati ngagai kitai lebuh Iya meda kitai nyembah Iya enggau pengabis ati. Ba artikel pengudah tu, kitai deka berandauka utai ke ulih dipelajarka kitai ari penyalah ti dikereja empat iku raja tu.