Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mac 2017

 TOPIK RANDAU | DEKA NUAN NERIMA PEMERI PETARA TI PEMADU BESAI?

Baka Ni Nuan Deka Beterima Kasih ke Pemeri ti Pemadu Besai Ari Petara?

Baka Ni Nuan Deka Beterima Kasih ke Pemeri ti Pemadu Besai Ari Petara?

‘Pengerindu Kristus mejalka kami, . . . Iya [Jesus] mati ke semua mensia, ngambika orang ke idup ukai idup ke diri empu agi, tang idup ke iya ke udah mati lalu diangkatka idup baru ngarika sida.’​​2 Korint 5:​14, 15.

PEMERI ti besai patut meransang kitai mandangka terima kasih. Jesus madah pasal pekara tu pengudah iya ngeraika sepuluh iku lelaki ke kena penyakit ti enda ulih digeraika maya nya suba. Seiku ari sepuluh iku lelaki nya ‘nikal, lalu muji [ngemuliaka] Petara enggau nyawa ti inggar.’ Jesus nanya: “Ukai enda sepuluh iku digeraika? Kini ke tunga sida ke semilan iku?” (Luke 17:​12-​17) Nama ulih dipelajarka? Kitai jampat endar enda ingatka pemanah ti dikereja orang bukai ke kitai!

Tebus enda sebaka enggau pemeri ke bukai. Nya pemeri ti pemadu besai ke kala diberi. Nya alai, baka ni nuan patut beterima kasih ke utai ti udah digaga Petara ke nuan?

  • Ngelala sapa ke meri. Tebus enda terus mai pengidup ti meruan belama iya ngagai semua mensia. Tang ku Jesus besampi ngagai Petara: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’ (John 17:⁠3) Enti orang madahka, seiku lelaki udah nyelamatka nyawa nuan lebuh nuan agi mit, enda ke nuan deka nemu mayuh agi pasal orang nya sereta kebuah iya nyelamatka nuan? Petara Jehovah, ke meri tebus ti nyelamatka  nyawa, deka nuan ngelala sapa Iya lalu bisi kaul ti rapat enggau Iya. Bup Kudus meransang kitai: ‘Datai semak ngagai Petara, lalu Iya deka datai semak ngagai kita.’​​—James 4:⁠8.

  • Arapka tebus. “Barang sapa arapka Anak, bulih pengidup ti meruan belama iya.” (John 3:​36) Nama reti arapka tebus? Reti nya, arapka tebus begunaka pengawa. (James 2:​17) Nama pengawa nya? Pemeri nya deka diempu nuan enti nuan ngulih sereta nerima iya. Nya alai nuan enda tau enda ngulih sereta nerima tebus. Baka ni? Belajarka chara pengidup ti dikedekaka Petara, lalu nitihka chara nya. * Besampi minta ampun sereta ngembuan ati ti beresi ngagai Petara. Semak ngagai Petara lalu andalka tebus amat ulih nyadika jamin deka mai pemaik, pengelikun, sereta pengelantang ke jemah ila ngagai semua orang ke arapka tebus!​​—Hebrew 11:⁠1.

  • Datai Ngingatka Pemati Jesus. Jesus udah ngepunka siti pengawa ke diintu ninting taun kena ngingatka kitai pasal tebus ti udah disediaka. Bekaul enggau pengawa nya, Jesus madahka: ‘Kereja tu kena ngingatka aku.’ (Luke 22:19) Saksi-Saksi Jehovah deka ngintu pemati Jesus kena Hari Dua, 11 April 2017, pengudah mata panas padam. Pengawa nya ke pengelama kira-kira sejam, deka bisi siti cheramah ke nerangka kebuah pemati Jesus nya beguna bendar, sereta baka ni pemati Jesus deka mai penguntung diatu sereta ke jemah ila. Taun nyin kemari, kira-kira 20 juta iku orang di serata dunya datai Ngingatka Pemati Jesus. Kami enggau ati ti gaga ngelaluka nuan sama enggau kami beterima kasih ke pemeri ti besai ari Petara.

^ per. 7 Chara ti manah kena ngelala Petara sereta datai semak ngagai Iya, iya nya belajarka Bup Kudus. Kena nemu tu, tanya meh Saksi-Saksi Jehovah tauka lawa laman web kami, www.jw.org.