Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mac 2017

Kati Kitai Deka Beratika Utai Ti Ditulis?

Kati Kitai Deka Beratika Utai Ti Ditulis?

“Semua utai tu . . . dituliska kena ngajar kitai, laban pengujung dunya udah datai ba kitai.”—1 KOR. 10:11.

LAGU: 11, 61

1, 2. Nama kebuah kitai deka berandauka pasal chunto ari empat iku raja ari menua Judah?

ENTI nuan meda orang tekelinchir lalu labuh ba jalai, nuan tentu deka bejimat lebuh nengah jalai ti sama. Baka nya mega, enti beratika penyalah ke udah dikereja orang bukai ba pengidup sida, kitai ulih nyeliahka penyalah ti sama. Ngambika chunto, kitai ulih belajar ari penyalah ti dikereja orang ke disebut ba Bup Kudus.

2 Empat iku raja ari menua Judah ke dibacha kitai ba artikel sebedau tu nyembah Jehovah enggau pengabis ati. Tang sida agi ngereja penyalah ti besai. Cherita pasal sida ditulis ba Bup Kudus ngambika kitai ulih belemati sereta belajarka utai ti beguna ari cherita nya. Nama ulih dipelajarka kitai ari utai ke nyadi ba sida, lalu baka ni kitai ulih nyeliah ari ngereja penyalah ti sama?​​—Bacha Rome 15:⁠4.

BEPANGGAI BA PENEMU-DALAM MENSIA NGUJUNGKA PENUSAH

3-5. (a) Taja pan Asa mengkang nyembah Jehovah enggau pengabis ati, nama penyalah ti dikereja iya? (b) Nama kebuah Asa bepanggai ba mensia lebuh beperang ngelaban Baasa?

3 Aram kitai berandau pasal Asa dulu. Iya bepanggai ba Jehovah lebuh sejuta iku orang Etiopia nyerang menua Judah. Taja pia, iya enda bepanggai ba Jehovah lebuh beperang ngelaban Baasa, raja ari menua Israel. Asa deka nagang Baasa ari nguta nengeri Ra mah, nengeri ti beguna ba menua Israel semak adan perintah menua Judah. (2 Ban. 16:​1-3) Asa mutus deka meri suap ngagai raja Siria ngambika nulung iya. Lebuh orang Siria nyerang nengeri ba menua Israel, Baasa “badu agi nguta Ramah, lalu ngelengkaka pengawa nya.” (2 Ban. 16:⁠5) Terubah iya, Asa engka ngumbai diri udah ngaga pemutus ti betul.

4 Tang baka ni asai ati Jehovah? Jehovah enda lantang ati laban Asa enda bepanggai ba Iya, lalu Iya ngasuh nabi Hanani ngerara Asa. (Bacha 2 Bansa Israel 16:​7-9.) Ku Hanani madah ngagai Asa: “Kenyau ari diatu nuan deka seruran beperang.” Asa bekuasa atas nengeri Ramah, tang sepemanjai pengidup iya, iya enggau rayat iya seruran beperang.

5 Ba artikel sebedau tu, kitai belajar pasal Jehovah ke lantang ati ngagai Asa. Taja pan Asa enda sempurna, Petara ulih meda Asa mengkang nyembah Iya enggau pengabis ati. (1 Raj. 15:14) Taja pia, lebuh Asa ngaga pemutus ti enda manah, iya enda ulih nyeliah ari penusah ke datai ari pemutus ti enda manah. Nama kebuah Asa bepanggai ba diri empu sereta ba orang bukai, tang ukai ba Jehovah? Asa engka ngumbai diri ulih menang beperang enti ngena chara beperang ke badas. Tauka iya engka mendingka jaku ajar ti enda manah ari orang bukai.

6. Nama ulih dipelajarka kitai ari penyalah Asa? Beri siti chunto.

6 Nama ulih dipelajarka kitai ari penyalah Asa? Ba semua pekara, kitai enda tau enda bepanggai ba Jehovah, ukai bepanggai ba runding diri empu. Kitai patut minta Iya nulung kitai, enda ngira penusah kitai nya besai tauka mit. Endang manah enti berundingka tu: Kati kitai kekadang bepanggai ba diri empu lebuh nguji mutarka penusah ngena chara ke dikumbai kitai pemadu badas? Tauka kati kitai seruran mikirka dulu utai ti dipadah Bup Kudus, lalu nguji ngena penerang nya mutarka penusah kitai? Ngambika chunto, orang ke sebilik enggau nuan engka nagang nuan datai ngagai gempuru tauka gempuru besai. Deka nuan minta Jehovah nulung nuan nemu utai ke patut dikereja lebuh napi penanggul nya? Tauka pengudah lama nadai bulih kereja, nuan tetemuka orang ke deka ngambi nuan bekereja. Deka nuan madah ngagai iya pasal nuan ke patut datai ngagai gempuru ninting minggu lalu enda takut enti enda diterima bekereja? Enda ngira nama nyadi, kitai enda tau enda ingatka jaku ari pemasmur: ‘Serahka pengidup nuan ngagai Jehovah. Panggaika pengarap nuan ba Iya, lalu Iya deka nulung nuan.’​​—Mas. 37:⁠5.

NAMA ULIH NYADI ENTI KITAI MILIH PANGAN TI SALAH?

7, 8. Nama penyalah ti dikereja Jehosapat, lalu nama nyadi? (Peda gambar ba pun artikel.)

7 Aram kitai diatu berandau pasal chunto anak Asa, Jehosapat. Iya ngembuan mayuh kualiti manah ti ngelantangka ati Jehovah. Lalu lebuh iya bepanggai ba Jehovah, iya ngereja mayuh utai ti manah. Tang iya mega ngaga sekeda pemutus ti enda manah. Ngambika chunto, iya ngatur anak lelaki iya jadi enggau anak indu Raja Ahap, raja ti jai. Udah nya, Jehosapat setanah enggau Ahap lebuh beperang ngelaban orang Siria, taja pan nabi Mikaiah udah nangkan iya ari setanah enggau Ahap. Lebuh beperang, orang Siria nyerang Jehosapat, lalu nguji deka munuh iya. (2 Ban. 18:​1-​32) Lebuh iya pulai ngagai Jerusalem, nabi Jehu nanya iya: ‘Kati nuan ngumbai diri ngereja utai ti ngena nulung orang ke jai, lalu setanah enggau orang ke begedika Jehovah?’​​—Bacha 2 Bansa Israel 19:​1-3.

8 Kati Jehosapat belajar ari utai ke udah nyadi ba iya sereta ari jaku tangkan nabi  nya? Sayau amat, iya enda. Taja pan Jehosapat agi rindu sereta deka ngelantangka ati Jehovah, iya sekali agi bepangan enggau orang ke eenda nyembah Jehovah. Orang nya anak Ahap, Raja Ahasiah. Jehosapat enggau Ahasiah begulai ngaga kapal. Tang semua kapal nya pechah magang sebedau ulih dikena seduai iya belayar.​​—2 Ban. 20:​35-​37.

9. Nama deka nyadi enti kitai milih pangan ti salah?

9 Nama ulih dipelajarka kitai ari utai ke udah nyadi ba Jehosapat? Jehosapat udah ngereja utai ti ngena, sereta ‘enggau naka ulih betuaika Jehovah.’ (2 Ban. 22:⁠9) Tang iya milih ngena awak iya begulai enggau orang ke enda rinduka Jehovah, lalu tu ngujungka penusah ti besai ba pengidup iya. Amat, iya nyauka kena bunuh. Kingatka jaku dalam ba Bup Kudus: “Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.” (J-lam. 13:20) Kitai deka madah ngagai orang bukai pasal Jehovah. Tang, kitai deka bulih penusah enti nyadi pangan rapat orang ke enda nyembah Iya.

10. (a) Enti kitai deka kawin, nama ulih dipelajarka kitai ari Jehosapat? (b) Nama patut dikingatka kitai?

10 Ngambika chunto, enti kitai deka kawin, nama ulih dipelajarka kitai ari Jehosapat? Kitai engka berengkah bisi asai ati ti romantik ngagai orang ke enda rinduka Jehovah. Kitai engka ngumbai diri enda ulih tetemuka nembiak Jehovah ke tau enggau jadi. Tauka sekeda kaban belayan engka majak ngasuh kitai kawin sebedau kitai majak tuai. Endang amat, Jehovah nempa kitai enggau pengingin deka rinduka sereta dikerinduka. Taja pia, enti kitai enda ulih  tetemuka orang ke patut enggau jadi, nama patut digaga kitai? Siti utai ke ulih nulung kitai, iya nya belematika utai ke udah nyadi ba Jehosapat. Iya selalu minta iring ari Jehovah. (2 Ban. 18:​4-6) Tang lebuh Jehosapat nyadi pangan Ahap ke enda rinduka Jehovah, iya enda bedulika jaku tangkan ari Jehovah. Jehosapat patut ingat, ‘Jehovah ngemataka semua dunya, lalu meri pengering ngagai orang ke taluk ngagai Iya.’ (2 Ban. 16:⁠9) Kitai mega patut ingat, Jehovah deka nulung kitai. Iya nemu penanggul kitai sereta rinduka kitai. Kati nuan pechaya Jehovah deka meri pengerindu sereta pangan rapat ke diguna nuan? Anang enda ingat, Iya deka!

Anang begulai rapat enggau orang ke enda nyembah Jehovah (Peda genteran 10)

ANANG NEJUKA ATI NUAN NYADI SUMBUNG

11, 12. (a) Nama utai ti dikereja Hesekiah ke ngayanka utai ke bisi dalam ati iya? (b) Nama kebuah Jehovah ngampun Hesekiah?

11 Nama ulih dipelajarka kitai ari Hesekiah? Jehovah nulung Hesekiah nemu utai ke amat bisi ba ati iya. (Bacha 2 Bansa Israel 32:31.) Lebuh Hesekiah balat sakit, Jehovah madahka iya deka gerai, lalu meri siti tanda kena ngamatka nya. Jehovah ngasuh ayuk ba tangga surut sepuluh iti tangkal. Udah nya, bala pemesai ari menua Babilon deka nemu mayuh agi pasal tanda nya, lalu sida nganjung orang ngagai Hesekiah betanyaka pasal pekara nya. (2 Raj. 20:​8-​13; 2 Ban. 32:24) Jehovah nadai madah ngagai Hesekiah chara ngelaluka sida. Bup Kudus madahka, Jehovah “nejuka Hesekiah ngereja utai nitihka peneka ati iya empu.” Hesekiah ngayanka semua pengaya ti dikembuan iya ngagai orang ari Babilon. Tu ngayanka utai ke bisi dalam ati Hesekiah. Baka ni?

12 Sayau amat, Hesekiah nyadi sumbung. Ketegal nya, iya ‘enda meri terima kasihka utai ti udah dikereja Jehovah ba iya.’ Bup Kudus nadai madahka kebuah ulah iya berubah. Tu engka ketegal iya udah menang ngalahka orang Asiria tauka ketegal Jehovah udah ngeraika iya. Tauka engka ketegal iya udah nyadi kaya sereta tebilang. Taja pan Hesekiah udah nyembah Jehovah enggau pengabis ati, tang bisi sekali, iya nyadi sumbung lalu Jehovah enda lantang ati. Tang udah nya, Hesekiah “ngemaruhka diri,” lalu Petara ngampun iya.​​—2 Ban. 32:​25-​27; Mas. 138:⁠6.

13, 14. (a) Ni maya kitai ngayanka utai ke bisi dalam ati kitai? (b) Nama patut digaga kitai lebuh orang bukai muji kitai?

13 Nama ulih dipelajarka kitai ari Hesekiah sereta penyalah ke dikereja iya? Kingatka, Hesekiah nyadi sumbung enda lama pengudah Jehovah nulung iya ngalahka orang Asiria sereta ngeraika penyakit iya. Nya alai lebuh bisi utai manah nyadi ba kitai tauka lebuh orang bukai muji kitai, nama deka digaga kitai? Chara kitai nimbal ngayanka utai ke bisi dalam ati kitai. Ngambika chunto, seiku menyadi Kristian lelaki udah bebendar nyediaka cheramah, lalu ngenataika cheramah nya ba mua orang mayuh ke datai. Mayuh orang muji iya. Nama digaga iya pengudah dipuji?

14 Kitai patut seruran ingatka jaku Jesus: ‘Lebuh kita udah ngereja semua utai ti diasuh kereja kita, sebut, “Kami tu ulun ke nadai guna. Kami semina udah ngereja pengawa ti patut dikereja kami.”’ (Luk. 17:10) Kingatka, lebuh Hesekiah nyadi sumbung, iya enda beterima kasih ke tulung ti udah diberi Jehovah. Nya alai, lebuh orang bukai muji cheramah ke diberi kitai, nama deka nulung kitai mengkang baruh ati? Kitai ulih belematika utai ti udah digaga Jehovah ke kitai. Lalu kitai ulih bejaku pasal Iya sereta chara Iya udah nulung kitai. Nambahka nya, Iya ke meri kitai Bup Kudus enggau roh kudus ngambika ulih ngenataika cheramah.

 AWAKKA JEHOVAH NGIRING NUAN LEBUH NGAGA PEMUTUS

15, 16. Nama utai ti dikereja Josiah ke ngujungka pemati iya?

15 Pengujung iya, nama ulih dipelajarka kitai ari Josiah? Taja pan Josiah nya raja ti manah, tang iya ngereja penyalah ti ngujungka pemati iya. (Bacha 2 Bansa Israel 35:​20-​22.) Nama nyadi? Josiah ngepunka perang enggau Neko, raja ari menua Ejip, taja pan nadai kebuah patut beperang. Indah, Neko empu madah ngagai Josiah, iya enggai beperang. Bup Kudus madahka, jaku Neko nya ‘jaku ti disebut Petara.’ Tang Josiah mansang beperang, lalu iya mati ba perang nya. Nya alai, nama kebuah Josiah beperang ngelaban Neko? Bup Kudus nadai madahka kebuah.

16 Josiah patut mansik dulu sekalika utai ti disebut Neko nya amat ari Jehovah tauka enda. Baka ni? Iya ulih nanya Jeremiah, seiku ari nabi Jehovah. (2 Ban. 35:​23, 25) Pia mega, Josiah patut beratika fakta. Neko mansang ngagai Karkemis nyerang bansa bukai, ukai deka nyerang menua Jerusalem. Lalu Neko enda bejai Jehovah tauka nembiak Iya. Josiah enda berundingka pasal utai tu enggau manah sebedau iya ngaga pemutus. Nama ulih dipelajarka kitai? Lebuh kitai napi siti-siti penanggul lalu patut ngaga pemutus, kitai patut mikirka dulu utai ke diasuh Jehovah kereja kitai.

17. Lebuh kitai napi penusah, baka ni kitai ulih nyeliah ari ngereja penyalah baka ke dikereja Josiah?

17 Lebuh kitai patut ngaga siti-siti pemutus, kitai patut mikirka dulu ni bagi prinsip Bup Kudus ke ulih nulung kitai sereta baka ni kitai ulih nitihka prinsip nya. Ba sekeda pekara, kitai engka patut ngaga mayuh agi pansik ba litaricha kitai tauka minta jaku ajar ari tuai gempuru. Tuai gempuru ulih nulung kitai beratika prinsip Bup Kudus ke bukai. Uji pikirka tu: Seiku menyadi Kristian indu jadi enggau orang ke ukai Saksi. Iya deka enggau nginjil ba siti-siti hari. (SKR. 4:​20) Tang ba hari nya, laki iya enda ngasuh iya enggau nginjil. Laki iya madahka, seduai iya jarang bisi awak begulai enggau pangan diri, lalu laki iya deka mai iya bejalai. Nya alai, menyadi Kristian indu nya beratika ayat Bup Kudus ke ulih nulung iya ngaga pemutus ti manah. Iya nemu, iya enda tau enda ngasika Petara sereta nemu Jesus ngasuh kitai nyadika orang murid. (Mat. 28:​19, 20; SKR. 5:​29) Tang iya mega nemu, bini patut nunduk ngagai laki, lalu nembiak Petara patut nemu berunding. (Eps. 5:​22-​24; Plp. 4:⁠5) Kati laki iya nguji nagang iya nginjil, tauka kati iya semina deka begulai enggau bini iya ba hari nya? Kitai ke nyadi nembiak Jehovah deka ngaga pemutus ke patut sereta ngelantangka ati Jehovah.

MENGKANG NYEMBAH JEHOVAH ENGGAU PENGABIS ATI SERETA GAGA ATI

18. Nama ulih dipelajarka kitai ari belematika chunto empat iku raja ari menua Judah?

18 Kekadang, kitai mega engka ngereja siti ari penyalah ti dikereja empat iku raja ari menua Judah. Kitai engka (1) bepanggai ba runding diri empu, (2) milih pangan ti salah, (3) ngembuan ulah ti sumbung, tauka (4) ngaga pemutus enggau enda mikirka dulu peneka Petara. Taja pia, nadai kebuah kitai ngumbai diri enda ulih ngelantangka ati Jehovah. Iya meda pemanah ke bisi ba kitai, baka Iya meda pemanah ke bisi ba empat iku raja nya. Jehovah mega meda penalam pengerindu kitai ke Iya sereta pengeran kitai deka nyembah Iya. Nya alai, Iya udah nyediaka chunto ke ulih nulung kitai nyeliah ari ngereja penyalah ti besai. Aram meh kitai belematika cherita Bup Kudus nya sereta beterima kasih ngagai Jehovah ke udah nyediaka cherita nya ke kitai!