Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 24

Nuan Ulih Ngubah Chara Nuan Berunding!

Nuan Ulih Ngubah Chara Nuan Berunding!

‘Kami ngerusak kelikuh enggau semua utai ti ngelaban penemu pasal Petara.’—2 KOR. 10:5.

LAGU 124 Seruran Tetap Ati

DALAM ARTIKEL TU *

1. Nama jaku tangkan ke ditulis Paul ngagai orang Kristian ti dipilih niki ke serega?

“ANANG nitihka chara dunya,” ku rasul Paul nangkan. (Rom. 12:2) Jaku tangkan tu ditulis Paul ngagai orang Kristian ba abad keterubah. Nama kebuah iya meri jaku tangkan ti berat nya ngagai sida ke lelaki enggau sida ke indu ti udah nyerahka diri ngagai Petara sereta dipilih niki ke serega?—Rom. 1:7.

2-3. Baka ni Sitan nguji ngasuh kitai ngelaban Jehovah? Baka ni kitai ulih muai utai ke udah beurat ba runding kitai?

2 Paul irau laban sekeda orang Kristian benung dikelimpangka penemu ti tau ngenusah ba dunya ke dipegai Sitan. (Eps. 4:17-19) Tu ulih nyadi ba semua kitai. Dunya tu diperintah Sitan, lalu iya ulih ngena mayuh macham chara ngelimpangka runding kitai. Ambika chunto, enti kitai deka nyadi orang ti tebilang, Sitan deka ngena chara nya nguji nguingka kitai ari Jehovah. Sitan mega engka nguji ngena pekara ke udah dipelajarka kitai ba rumah, ba sekula, sereta ari orang ke ngelingi kitai ngambika kitai berunding nitihka chara ti dikedekaka iya.

3 Kati ulih kitai muai utai ke udah beurat ba runding kitai? (2 Kor. 10:4) Peratika saut Paul: ‘Kami ngerusak kelikuh enggau semua utai ti ngelaban penemu pasal Petara, lalu nangkap semua runding lalu ngasuh sida ngasika Kristus.’ (2 Kor. 10:5) Au, enggau saup ari Jehovah kitai ulih muai runding ti salah. Baka ubat ti ulih muai empas ke datai ari rachun, jaku Petara ba Bup Kudus pan ulih muai empas ke datai ari dunya Sitan tu.

 “NGUBAH CHARA KITA BERUNDING”

4. Nama ubah ke patut digaga kitai lebuh baru belajarka pemendar?

4 Uji kenang baru ubah ke patut digaga lebuh nuan baru belajarka pemendar ba Bup Kudus lalu berunding deka nyembah Jehovah. Ngambika ulih nyembah Jehovah, mayuh ari kitai patut badu ngereja utai ti salah. (1 Kor. 6:9-11) Kitai amat beterima kasih laban Jehovah nulung kitai badu ngereja utai ti jai!

5. Nitihka Rome 12:2, nama dua iti utai ke patut dikereja kitai?

5 Taja pia, kitai enda tau ngumbai diri enda ibuh agi ngaga ubah. Taja pan kitai udah badu ngereja penyalah ti besai ke kala digaga kitai sebedau dibaptisa, kitai patut terus bebendar nyeliahka sebarang utai ke tau ngujungka kitai bisi pengingin deka ngereja penyalah ti besai nya baru. Baka ni kitai ulih ngereja nya? Ku Paul nyaut: ‘Anang nitihka chara dunya, tang awakka Petara ngubah chara kita berunding.’ (Rom. 12:2) Nya alai kitai enda tau enda ngereja dua iti utai tu. Kesatu, kitai “anang nitihka chara dunya,” tauka dikelimpangka dunya. Kedua, kitai patut “ngubah” chara kitai berunding.

6. Nama dipelajarka kitai ari jaku Jesus ke bisi ba Matthew 12:43-45?

6 Ubah ke dipadah Paul nya ukai ba luar aja. Nya nyengkaum semua utai ke bekaul enggau kitai. (Peda kutak “Ngubah tauka Nyaru?”) Kitai patut berubah abis ba runding, asai ati, sereta pengingin. Nya alai, semua kitai patut nanya diri empu: ‘Kati ubah ke digaga aku kena neladan Kristus nya ketegal minta dipeda orang bukai tauka kati aku amat ngubah ati enggau runding aku?’ Ba Matthew 12:43-45, Jesus madahka utai ke patut digaga. (Bacha.) Jaku ba ayat nya  ngajar siti utai ti beguna: Semina muai runding ti salah aja enda chukup; kitai patut nganti iya enggau runding ti dikedekaka Petara.

“NGELAKKA RUNDING ENGGAU ATI KITA DIUBAH NYADI BARU”

7. Baka ni kitai ulih ngubah runding enggau ati kitai?

7 Kati ulih kitai ngubah runding enggau ati kitai? Bup Kudus madahka: ‘Ngelakka runding enggau ati kita diubah nyadi baru, lalu kita nyadi mensia ti baru, ditempa neladan gamal Petara lalu nyadi amat lurus sereta kudus.’ (Eps. 4:23, 24) Au, kitai ulih ngubah runding enggau ati kitai. Tang nya enda senang dikereja. Kitai ukai semina nulak pengingin sereta pengawa ti salah. Kitai patut “ngubah runding enggau ati” kitai. Nya nyengkaum ngubah pengingin, pengeran, enggau tuju ati kitai. Lalu tu patut seruran digaga kitai.

8-9. Baka ni cherita pasal seiku menyadi Kristian lelaki nunjukka kitai patut ngubah runding enggau ati kitai?

8 Peratika siti chunto pasal seiku menyadi Kristian lelaki ke kala ngembuan ulah ti kasar suba. Enti iya udah kelalu balat ngirup, iya deka belaya enggau orang. Taja pia iya badu agi baka nya, lalu iya pan ulih dibaptisa. Tu meri saksi ti manah ngagai orang ke berimbai pendiau enggau iya. Tang bisi sekali maya lemai hari, enda lama pengudah dibaptisa, iya napi penguji ti enda disadang. Seiku lelaki ke mabuk datai ke rumah iya lalu nyakap iya. Keterubah, iya enggai belaya. Tang lebuh lelaki ke mabuk nya nyau bejaku jai pasal Jehovah, menyadi Kristian lelaki nya pan pedis ati lalu enda ulih tetagangka diri agi. Iya pansut lalu mukut lelaki nya. Nama kebuah iya baka nya? Taja pan belajarka Bup Kudus udah nulung iya ngelaban pengingin ke deka belaya, tang iya bedau agi ulih ngubah runding enggau ati iya.

9 Taja pia, menyadi Kristian lelaki nya enda badu ngaga ubah. (J-lam. 24:16) Enggau bantu ari bala tuai gempuru, iya majak ngaga pemansang. Nyau kelama, iya ulih nyadi tuai gempuru. Tang bisi sekali maya lemai hari, lebuh ba luar Palan Gempuru, iya napi penanggul ti sama baru. Seiku lelaki ke mabuk nyauka mukut seiku ari tuai gempuru. Nama digaga menyadi Kristian lelaki nya? Iya enda pedis ati lalu nunjukka basa lebuh bejaku enggau lelaki ke mabuk nya. Iya nulung lelaki nya enda nyida. Lalu iya indah nulung nganjung lelaki ke mabuk nya pulai ke rumah diri. Nama kebuah ulah menyadi Kristian lelaki nya enda sebaka enggau ulah iya keterubah tadi? Iya udah ngubah runding enggau ati iya. Iya amat udah nyadi orang ke rindu bebaik sereta baruh ati. Tu ngenataika puji ngagai Jehovah!

10. Nama patut digaga kitai ngambika ulih ngaga ubah nya?

10 Ubah ke baka nya enda ulih digaga enggau jampat. Kitai patut “enggau naka ulih” ngaga ubah nya betaun-taun. (2 Pet. 1:5) Ubah ke baka nya ukai nyadi ketegal kitai udah lama nyembah Jehovah. Kitai patut nguji enggau naka ulih ngubah runding enggau ati kitai. Bisi sekeda chara ke ulih nulung kitai ngaga ubah. Aram kitai mansik chara nya.

CHARA NGUBAH RUNDING ENGGAU ATI KITAI

11. Baka ni sampi nulung kitai ngaga ubah ba runding enggau ati kitai?

11 Utai keterubah ti beguna ke patut digaga kitai iya nya besampi. Kitai patut besampi baka ke digaga pemasmur: “Gaga ati aku tuchi, O Petara, lalu simpan chara  berunding ti baru sereta taluk, dalam aku.” (Mas. 51:10, NW) Kitai patut nunjukka diri deka ngubah runding enggau ati kitai, lalu minta Jehovah nulung kitai. Nama kebuah kitai ulih andalka Jehovah deka nulung? Kitai ulih diperansang enggau utai ti deka digaga Jehovah ke orang Israel ti kieh maya jeman Esekiel. Jehovah besemaya: “Aku deka meri sida ati ti baru, enggau runding ti baru. Aku deka muai ati sida ke keras baka batu, lalu meri sida ati ti ngasi,” iya nya, ati ke deka nitihka iring Petara. (Esk. 11:19) Jehovah deka nulung orang Israel nya ngaga ubah, lalu Iya mega deka nulung kitai.

12-13. (a) Nitihka Masmur 119:59, nama utai ke patut dibelematika kitai? (b) Nama sekeda tanya ke patut ditanya kitai?

12 Utai kedua ti patut digaga kitai iya nya belemati. Lebuh kitai ninting hari macha Bup Kudus, kitai patut ngena awak belemati, tauka berunding enggau dalam pasal utai ti dibacha. Enggau tu, kitai ulih nemu bagi runding enggau asai ati ke patut diubah. (Bacha Masmur 119:59; Heb. 4:12; Jas. 1:25) Kitai enda tau enda nemu sebarang runding enggau asai ati ke dikelimpangka penemu dunya. Kitai patut baruh ati nerima pengelemi diri lalu bebendar mutarka iya.

13 Ambika chunto, tanya diri empu: ‘Kati aku agi ngembuan ati ti kepapas, taja pan mimit aja?’ (1 Pet. 2:1) ‘Kati aku ngasaika diri pama agi ari orang bukai ketegal chara idup, pelajar tauka pengaya ke dikemisi aku?’ (J-lam. 16:5) ‘Kati aku ngemaruhka orang ke enda sama tikas sosial enggau aku?’ ‘Kati aku ngemaruhka orang ari bansa bukai?’ (Jas. 2:2-4) ‘Kati aku rinduka utai ti bisi ba dunya ke diperintah Sitan?’ (1 Jhn. 2:15-17) ‘Kati aku rinduka pemerindang ti ngayanka ulah seks ti kamah sereta ulah ti kasar?’ (Mas. 97:10; 101:3; Amo. 5:15) Saut ngagai semua tanya tu ulih nulung nuan nemu utai ke patut diubah nuan. Lebuh kitai ngubah utai ke udah beurat ba runding kitai, kitai deka ngagaka ati Jehovah.—Mas. 19:14.

14. Nama kebuah milih bakih ti manah nya beguna bendar?

14 Utai ketiga ti patut digaga kitai iya nya, milih bala bakih ti manah. Sekalika kitai nemu tauka enda, bala bakih ulih ngubah chara kitai berunding. (J-lam. 13:20) Ba endur gawa tauka ba sekula, kitai dikelingi orang ke enda meransang kitai berunding baka ti dikedekaka Petara. Taja pia, kitai tau bulih bala bakih ti manah ba gempuru Kristian kitai. Kitai diperansang ngayanka “pengerindu lalu ngereja pengawa ti badas” lebuh dia.—Heb. 10:24, 25.

NYADI “TEGAP DALAM PENGARAP”

15-16. Baka ni Sitan nguji ngubah runding kitai?

15 Taja pia, anang enda ingat, Sitan keran deka ngubah runding kitai. Iya ngena semua bansa penemu ngerusak chara berunding kitai ke udah dilatih ngena jaku Petara dalam Bup Kudus.

16 Sitan terus ngena tanya ti sama ke dikena iya nanya Hawa lebuh ba Kebun Eden: ‘Kati amat Petara . . . ?’ (P-kal. 3:1) Ba dunya ke dikuasa Sitan, kitai suah ninga tanya ke baka tu: ‘Kati amat Petara enda ngemendarka orang jadi enggau sama penempa? Kati amat Petara nagang nuan ngintu hari Krismas enggau hari pengada? Kati amat Petara deka nuan nulak pengawa nerima darah? Kati amat Petara ti bepengerindu enda ngasuh nuan begulai enggau kaban belayan sereta bala bakih nuan ti udah dibuai ari gerempung Iya?’

17. (a) Nama patut digaga kitai lebuh bisi tanya ke bekaul enggau utai ti dipechayaka kitai? (b) Nitihka Kolosi 2:7, nama asil iya enti kitai ngereja nya?

 17 Kitai patut andalka utai ti dipechayaka kitai. Enti kitai enda tetemuka saut ngagai tanya pasal utai ti dipechayaka kitai, nya tau ngujungka kitai berengkah kakang ati enggau utai ti dipechayaka kitai. Ati ti kakang ulih ngelimpangka runding lalu ngerusak pengarap kitai. Nya alai, nama patut digaga kitai? Bup Kudus ngasuh kitai ngubah runding, ngambika nemu “utai ti badas, ti ngerinduka ati Iya [Petara], ti pemadu menyana.” (Rom. 12:2) Enti kitai seruran belajarka Bup Kudus enggau litaricha ari gerempung kitai, kitai ulih pechaya utai ke dipelajarka kitai nya betul. Lalu kitai mega pechaya standard Jehovah nya ngena. Udah nya, baka pun kayu ke bisi urat ti kering, kitai deka nyadi “tegap dalam pengarap.”—Bacha Kolosi 2:7.

18. Nama deka nulung kitai nyaga diri empu sereta muai utai ti enda manah ba dunya Sitan?

18 Semina kitai empu aja ke ulih negapka pengarap diri. Nya alai, terus ngelakka runding enggau ati kitai diubah nyadi baru. Seruran besampi lalu minta tulung ari roh kudus Jehovah. Belemati lalu terus meresa runding enggau tuju ati nuan. Milih bala bakih ti manah ke deka nulung nuan ngubah runding. Seraya nuan ngereja nya, nuan deka nyaga diri empu sereta muai utai ti enda manah ba dunya Sitan. Lalu nuan mega ulih mujur ngerusak ‘kelikuh enggau semua utai ti ngelaban penemu pasal Petara.’—2 Kor. 10:5.

LAGU 50 Sampi Deka Nyerahka Diri

^ per. 5 Chara kitai berunding kesuah agi nitihka chara idup, adat bansa, sereta pelajar kitai. Kitai engka nemu sekeda runding ti salah ke udah nyadi sebagi ari pengidup kitai, lalu runding ti baka nya tusah deka dibuai. Artikel tu deka nunjukka baka ni kitai ulih muai semua runding ti salah ke engka bisi ba kitai.