Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 25

Bepanggai ba Jehovah Lebuh Napi Pengirau sereta Penusah ba Ati

Bepanggai ba Jehovah Lebuh Napi Pengirau sereta Penusah ba Ati

“Buai pengirau ari ati aku lalu bai aku pansut ari semua penusah aku.”—MAS. 25:17.

LAGU 30 Apaiku, Petaraku enggau Panganku

DALAM ARTIKEL TU *

1. Nama kebuah kitai patut mendingka jaku tangkan Jesus?

LEBUH nyebut pasal hari ti penudi, Jesus madahka: “Bejaga kita, ngambika kita enda gian ngirup, lalu mabuk, lalu selalu irauka pengidup.” (Luk. 21:34) Kitai patut mendingka jaku tangkan nya. Nama kebuah? Laban diatu kitai benung napi mayuh penanggul ti sebaka enggau orang bukai.

2. Nama sekeda penanggul ti ngirauka ati ke ditapi bala menyadi Kristian kitai?

2 Kadang-kadang, kitai engka napi beberapa iti penanggul serentak ke ngasuh kitai irau. Peratika sekeda chunto. Seiku menyadi lelaki ke benama John, * napi penyakit multiple sclerosis, iya nya penyakit urat ke ngasuh iya lemi ba tubuh lalu tau ngujungka perengka tubuh enda tentu ulih dikena. Iya berasai tekenyit sereta tusah ati lebuh dilengkaka bini ke udah enggau iya jadi 19 taun. Udah nya dua iku anak indu iya badu nyembah Jehovah. Sepasang laki bini ke benama Bob enggau Linda mega bisi napi penanggul. Seduai iya bela lenyau kereja, lalu enda tebayarka rumah seduai iya agi. Kelimpah ari nya, Linda ditemu kena penyakit jantung ke ulih nabanka nyawa. Iya mega napi penyakit bukai iya nya bengkak buku tulang.

3. Nama dipadah Pilipi 4:6, 7 pasal Jehovah?

3 Kitai pechaya Jehovah nemu asai ati kitai lebuh napi pengirau sereta penusah ba ati. Lalu Iya deka nulung kitai mutarka nya. (Bacha Pilipi 4:6, 7.) Bup Kudus ngundan mayuh chunto pasal penanggul enggau penusah ke ditatka nembiak  Iya. Bup Kudus mega madahka baka ni Jehovah nulung sida mutarka nya. Aram kitai beratika beberapa iti chunto nya.

ELIJAH—“ENDANG MENSIA KE BISI ASAI ATI BAKA KITAI”

4. Nama penanggul ke ditapi Elijah? Nama asai ati iya pasal Jehovah?

4 Elijah nyembah Jehovah ba maya ti tusah lalu napi penanggul ti besai. Raja Ahap nya raja menua Israel ke enda taluk. Iya jadi enggau Jesebel, iya nya seiku indu ke jai ti nyembah Baal. Seduai iya ngemenuhka menua Israel enggau pengawa nyembah Baal lalu munuh mayuh nabi Jehovah. Tang, Elijah ulih ngerarika diri ari dibunuh. Nengah tulung ari Jehovah, Elijah ulih napi penusah lapar pungkang ke balat nyadi. (1 Raj. 17:2-4, 14-16) Kelimpah ari nya, iya mega ulih ngelaban bala nabi enggau bala penyembah Baal ketegal iya bepanggai ba Jehovah. Elijah indah meransang orang Israel nyembah Jehovah. (1 Raj. 18:21-24, 36-38) Enggau tu, Elijah udah meda tauka ngasaika chara Jehovah nyaga sereta nulung iya lebuh napi penusah.

Jehovah ngirumka seiku melikat kena ngeringka Elijah baru (Peda genteran 5-6) *

5-6. Nitihka 1 Raja 19:1-4, baka ni asai ati Elijah? Baka ni Jehovah nunjukka Diri agi sayauka Elijah?

5 Bacha 1 Raja 19:1-4. Taja pia, Elijah nyau takut lebuh Kuin Jesebel ngemba deka munuh iya. Nya alai, Elijah rari ngagai endur ke dikumbai Beer-seba. Iya balat lemi semengat nyentukka iya “ngajihka diri mati.” Nama ngasuh iya berasai baka nya? Elijah enda sempurna. Iya mega “endang mensia  ke bisi asai ati baka kitai.” (Jas. 5:17, NW) Engka iya kelalu balat irau sereta berasai lelak. Elijah engka ngumbai utai ke digaga iya kena meransang orang nyembah Jehovah nya nadai guna, lalu gaya utai ba menua Israel nadai berubah. Iya mega ngumbai semina seiku iya aja ke agi nyembah Jehovah. (1 Raj. 18:3, 4, 13; 19:10, 14) Kitai engka tekenyit enggau ulah nabi ke tetap ati nya. Tang Jehovah meretika asai ati iya.

6 Jehovah enda nganu Elijah ketegal mansutka asai ati ke baka nya. Tang, Iya nulung Elijah ngulihka pengering baru. (1 Raj. 19:5-7) Udah nya, Jehovah enggau siru nulung ngemetulka runding Elijah. Jehovah ngereja nya enggau mandangka kuasa Iya ngena chara ti ngalitka ati. Jehovah mega madahka, Iya agi bisi 7,000 iku orang ke enggai nyembah Baal di menua Israel. (1 Raj. 19:11-18) Ari chara Jehovah nulung Elijah, Iya nunjukka Diri agi sayauka Elijah.

CHARA JEHOVAH NULUNG KITAI

7. Nama ulih dipechaya kitai ari chara Jehovah nulung Elijah?

7 Kati nuan benung napi utai ti ngasuh ati irau sereta tusah? Endang ngelantangka ati lebuh nemu Jehovah meretika asai ati Elijah! Tu ngasuh kitai pechaya, Iya mega meretika asai ati sereta utai ke dirunding kitai. Iya nemu utai ke ulih enggau ke enda ulih dikereja kitai. (Mas. 103:14; 139:3, 4) Enti kitai bepanggai ba Jehovah baka ke digaga Elijah, Iya deka nulung kitai mutarka penanggul ke ngasuh kitai berasai irau sereta tusah.—Mas. 55:22.

8. Baka ni Jehovah deka nulung nuan mutarka pengirau?

8 Ati ti irau ulih ngasuh nuan ngumbai penanggul ke ditapi enda ulih diputarka. Tu ngasuh nuan berasai lemi semengat. Enti sema tu nyadi ba nuan, kingatka meh, Jehovah deka nulung mutarka pengirau ke ditapi nuan. Baka ni chara Iya deka nulung nuan? Iya meransang nuan madahka penanggul sereta asai ati diri nengah sampi, lalu Iya deka nulung nuan. (Mas. 5:3; 1 Pet. 5:7) Nya alai, suah meh besampi madah ngagai Jehovah pasal penanggul ke ditapi nuan. Jehovah enda bejaku enggau nuan baka ke digaga Iya ngagai Elijah. Tang Iya deka ngereja nya nengah Bup Kudus sereta gerempung Iya. Chunto ari Bup Kudus ke dibacha nuan ulih ngelantangka ati sereta meri pengadang ke jemah ila ngagai nuan. Pia mega, bala menyadi Kristian ulih meransang nuan.—Rom. 15:4; Heb. 10:24, 25.

9. Baka ni bakih ke tau dikearapka ulih nulung kitai?

9 Jehovah ngasuh Elijah magi sekeda pengawa ke dipegai iya ngagai Elisha. Enggau chara tu, Jehovah meri Elijah seiku bakih ke ulih nulung iya lebuh iya berasai lemi. Pia mega, lebuh kitai madahka asai ati diri ngagai bakih kitai, iya ulih nulung lebuh kitai berasai lemi. (2 Raj. 2:2; J-lam. 17:17) Enti sema nuan nadai tetemuka orang ke tau alai nuan madahka penusah diri, besampi meh ngagai Jehovah ngambika nulung nuan tetemuka menyadi Kristian ti kering ba pengarap ke ulih meransang nuan.

10. Baka ni cherita Elijah meri kitai pengadang ke jemah ila? Baka ni semaya ba Isaiah 40:28, 29 ulih nulung kitai?

10 Jehovah nulung Elijah mutarka pengirau lalu gawa ke Iya betaun-taun enggau tetap ati. Cherita Elijah meri kitai pengadang ke jemah ila. Kadang-kadang kitai engka kelalu irau nyentukka kitai lelak ba tubuh enggau emosi. Tang, enti kitai bepanggai ba Jehovah, Iya deka meri kitai pengering ke  diguna kitai ngambika ulih terus nyembah Iya.—Bacha Isaiah 40:28, 29.

HANAH, DAVID, ENGGAU SEIKU PEMASMUR BEPANGGAI BA JEHOVAH

11-13. Baka ni ati ti balat tusah ngachau tiga iku nembiak Jehovah menya?

11 Bisi mega chunto bukai ba Bup Kudus pasal orang ke balat irau sereta tusah ati. Ambika chunto, Hanah balat tusah ati laban iya maluka diri enda ulih beranak. Tang bini kedua laki Hanah, ulih beranak lalu iya balat ngeleseka Hanah. (1 Sam. 1:2, 6) Hanah balat tusah ati nyentukka iya nyabak lalu enggai makai.—1 Sam. 1:7, 10.

12 Kadang-kadang, Raja David balat tusah ati. Pikirka penusah ke ditapi iya. Iya balat berasai besalah ketegal mayuh penyalah ke udah digaga iya. (Mas. 40:12) Absalom, anak ke dikesayauka iya, angkat ngelaban iya. Lalu udah nya Absalom mati dibunuh. (2 Sam. 15:13, 14; 18:33) Lalu seiku ari bakih rapat David, mudi iya. (2 Sam. 16:23–17:2; Mas. 55:12-14) Mayuh ari masmur ke ditulis David madahka asai ati iya ti asa sereta ulah iya ti seruran bepanggai ba Jehovah.—Mas. 38:5-10; 94:17-19.

Nama nulung pemasmur nya gaga ati gawa ke Jehovah baru? (Peda genteran 13-15) *

13 Enda lama udah nya, seiku pemasmur berengkah ngining orang jai ke nyamai diau. Iya engka bansa Lewi ari peturun Asap ke gawa ba rumah sembiang Jehovah di Jerusalem. Pemasmur nya balat tusah ati. Tu ngasuh iya enda gaga sereta puas ati. Iya indah berengkah ngumbai berekat ke diulih ari gawa ke Jehovah enda chukup.—Mas. 73:2-5, 7, 12-14, 16, 17, 21.

14-15. Nama ulih dipelajarka kitai ari chunto tiga iku nembiak Jehovah ke bepanggai ba tulung ari Iya?

 14 Tiga iku nembiak Jehovah ke disebut tadi bepanggai ba tulung ari Jehovah. Sida madahka pengirau diri ngagai Iya nengah sampi. Sida enda kakang madahka kebuah sida balat tusah ati. Lalu sida enda ngetu ngagai endur nyembah Jehovah.—1 Sam. 1:9, 10; Mas. 55:22; 73:17; 122:1.

15 Jehovah enggau siru nulung sida seiku-seiku. Hanah bulih pengelantang ba ati. (1 Sam. 1:18) David nulis: ‘Orang ke badas natka mayuh macham penusah, tang Jehovah ngelepaska sida ari semua penusah nya.’ (Mas. 34:19) Lalu pemasmur udah nya ngasaika Jehovah udah “megai jari [iya],” iya nya ngiring iya ngena jaku ajar. Pemasmur nya belagu: ‘Aku empu, naka meh pengelantang aku diau semak Petara, dijaga Jehovah ti Pemadu Tinggi.’ (Mas. 73:23, 24, 28) Nama ulih dipelajarka kitai ari sekeda chunto tu? Kadang-kadang, kitai deka napi penanggul ti besai ke ngasuh ati kitai balat tusah. Tang kitai ulih mutarka penanggul nya enti kitai belematika chara Jehovah nulung orang bukai, bepanggai ba Iya nengah sampi, sereta ngasika Iya enggau chara ngereja utai ti diasuh Iya.—Mas. 143:1, 4-8.

 BEPANGGAI BA JEHOVAH LALU MUJUR MUTARKA PENGIRAU SERETA PENUSAH BA ATI

Terubah iya, seiku menyadi indu deka ngenyauhka diri, tang utai ke diasai iya berubah manah lebuh iya ngiga chara kena nulung orang bukai (Peda genteran 16-17)

16-17. (a) Nama kebuah kitai enda patut ngenyauhka diri ari Jehovah sereta nembiak Iya? (b) Baka ni kitai tau bulih pengering baru?

16 Chunto ari tiga iku nembiak Jehovah nya tadi ngajar kitai siti agi utai ti beguna, iya nya kitai enda patut ngenyauhka diri ari Jehovah sereta nembiak Iya. (J-lam. 18:1) Nancy balat tusah ati lebuh ditinggalka laki iya. Ku iya: “Aku lama bendar enggai betemu tauka bejaku enggau orang bukai. Tang aku balat agi tusah ati lebuh aku majak ngenyauhka diri ari orang bukai.” Utai ke diasai Nancy berubah lebuh iya ngiga chara kena nulung orang bukai ke benung napi penanggul. Ku iya agi: “Aku mendingka sida lebuh sida madahka penanggul diri. Lebuh aku betatika sida sereta penanggul sida, aku nyau kurang agi betatika diri empu sereta penanggul aku.”

17 Kitai tau bulih pengering baru lebuh datai begempuru. Lebuh ba gempuru, kitai meri Jehovah peluang “merindang sereta nulung” kitai. (Mas. 86:17) Ba gempuru, Iya ngeringka kitai nengah roh kudus, Bup Kudus, sereta nembiak Iya. Lebuh dia, kitai “sama diperansang ulih pengarap pangan diri.” (Rom. 1:11, 12) Seiku menyadi indu ke benama Sophia madahka: “Jehovah enggau bala menyadi Kristian nulung aku betan. Utai ke beguna ba aku iya nya pengawa begempuru kitai. Aku ngasaika bendar agi aku enggau eklisia sereta pengawa nginjil, senang agi aku mutarka pengirau sereta asai ati aku ti balat tusah.”

18. Lebuh kitai berasai asa, baka ni Jehovah ulih nulung kitai?

18 Lebuh kitai berasai asa, kingatka meh, Jehovah ukai semina besemaya deka muai penanggul kitai dudi hari, tang Iya mega besemaya deka nulung mutarka asai ati kitai ti balat tusah sereta irau diatu. Iya nulung kitai “deka sereta ulih” mutarka asai ati ti asa sereta putus pengarap.—Plp. 2:13.

19. Nama semaya ke dipadah ba Rome 8:37-39?

19 Bacha Rome 8:37-39. Rasul Paul deka kitai pechaya, nadai utai ulih nyeraraka kitai ari pengerindu Petara. Baka ni kitai ulih nulung bala menyadi Kristian ke benung nguji mutarka penusah? Artikel pengudah tu deka mansik chara kitai ulih neladan Jehovah lebuh mandangka penyiru sereta nulung bala menyadi Kristian kitai lebuh sida napi penusah.

LAGU 44 Sampi Orang ke Lemi Semengat

^ per. 5 Kelalu balat irau tauka kelalu lama irau ulih ngachau pengerai tubuh enggau emosi kitai. Baka ni Jehovah ulih nulung kitai? Kitai deka berandauka chara Jehovah nulung Elijah mutarka pengirau sereta penusah ba ati. Chunto bukai ari Bup Kudus deka nunjukka utai ke patut digaga kitai ngambika bulih tulung ari Jehovah.

^ per. 2 Sekeda nama dalam artikel tu udah diubah.

^ per. 53 PENERANG PASAL GAMBAR: Melikat Jehovah ngerak Elijah lalu meri iya roti enggau ai irup.

^ per. 55 PENERANG PASAL GAMBAR: Seiku pemasmur ke engka ari peturun Asap rindu nulis masmur sereta belagu enggau orang Lewi.