Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Jun 2016

Beterima Kasih ngagai Jehovah ti Nyadi Tukang Periuk Kitai

Beterima Kasih ngagai Jehovah ti Nyadi Tukang Periuk Kitai

‘Jehovah, . . . Nuan baka tukang periuk. Nuan udah nempa kami.’—ISA. 64:8.

LAGU: 89, 26

1. Nama kebuah Jehovah nya Tukang Periuk ti pemadu besai?

KENA November 2010, sigi pasu lama ari menua China udah dililung enggau rega ti tinggi, iya nya kira-kira 70 juta dolar ba England. Endang ngalitka ati laban tukang periuk ulih nempa tanah liat ke biasa sereta murah rega nyadi sigi pasu ke manah sereta mar rega. Jehovah, Tukang Periuk kitai, nya besai agi ari tukang periuk mensia. Bup Kudus madahka, Jehovah ngaga seiku mensia ti sempurna “ari amau tanah.” (P-kal. 2:7) Mensia nya, Adam, dikumbai ‘anak Petara’ lalu ditempa ngambika ulih neladan kualiti Petara.—Luk. 3:38.

2, 3. Baka ni kitai ulih neladan ulah orang Israel ke nesal ati?

2 Lebuh Adam ngelaban Penempa iya, iya enda agi nyadi anak Petara. Tang mayuh ari peturun Adam udah milih Jehovah nyadika Pemerintah sida. (Heb. 12:1) Enggau baruh ati ngasika Penempa sida, sida udah nunjukka diri dekaka Iya, ukai Sitan, nyadika Apai sereta Tukang Periuk sida. (Jhn. 8:44) Penaluk sida ngagai Petara ngingatka kitai pasal utai ti disebut orang Israel ke nesal ati: ‘Jehovah, endang  Apai kami. Kami tu baka tanah liat, lalu Nuan baka tukang periuk. Nuan udah nempa kami.’—Isa. 64:8.

3 Penyembah Jehovah ti bendar kemaya hari tu mega patut bebendar baruh ati sereta ngasi. Sida ngumbai nya basa ulih ngangauka Jehovah Apai sida, lalu sida deka Iya nyadi Tukang Periuk sida. Kati kitai deka baka tanah liat ti lembut ngambika ulih ditempa Petara nyadi perengka ti berega? Kati kitai meda tiap iku bala menyadi Kristian kitai baka perengka ke agi benung ditempa Petara? Kena nulung kitai bisi runding ti betul, kitai deka berandauka chara Jehovah milih orang ke ditempa Iya, kebuah Iya nempa sida, lalu chara Iya ngereja nya.

JEHOVAH MILIH ORANG KE DITEMPA IYA

4. Baka ni Jehovah milih orang ngambika datai ngagai Iya Empu? Beri chunto.

4 Jehovah enda meda orang ngena chara mensia meda. Tang, Iya meresa ati sereta meda sapa tiap iku kitai ke bendar. (Bacha 1 Samuel 16:7b.) Jehovah nunjukka tu lebuh Iya numbuhka gempuru Kristian. Iya mai mayuh orang ke dikumbai sekeda orang enda berega ngagai Iya Empu sereta ngagai Anak Iya. (Jhn. 6:44) Ngambika chunto, seiku ari orang nya orang Parisi ke benama Saul, ke ‘bejaku busung ngelaban iya [Jesus], lalu udah merinsaka iya.’ (1 Tim. 1:13) Tang Jehovah meresa ati Saul, lalu enda ngumbai iya tanah liat ti enda beguna. (J-lam. 17:3) Jehovah meda Saul ulih ditempa nyadi “perengka” ke deka dikena nginjil “ngagai orang bansa bukai, ngagai raja, enggau ngagai orang Israel.” (SKR. 9:15) Jehovah mega milih orang bukai ke ulih ditempa “dikena tiap hari,” nyengkaum orang ke kala nyadi pemabuk, orang ke ngereja ulah ti kamah sereta penchuri. (Rom. 9:21; 1 Kor. 6:9-11) Seraya sida belajarka Bup Kudus, sida ngeringka pengarap sida ngagai Jehovah sereta ngawakka Iya nempa sida.

Kitai enda patut ngakim orang bukai ba kandang endur kitai tauka ba gempuru kitai

5, 6. Baka ni ulah kitai ke arapka Jehovah nyadi Tukang Periuk kitai bekaul enggau runding kitai ngagai (a) orang ba kandang endur kitai? (b) bala menyadi Kristian kitai?

5 Kitai pechaya, Jehovah ulih milih sereta mai orang ke patut ngagai Iya. Nya kebuah kitai enda patut ngakim orang bukai ba kandang endur kitai tauka ba gempuru kitai. Ngambika chunto, peratika utai ke digaga seiku lelaki ke dikangau ngena nama Michael lebuh Saksi-Saksi Jehovah nginjil ngagai iya. Ku iya madahka: “Aku nyeliahka diri sereta enda pedulika sida. Aku jai amat enggau sida! Enda lama udah nya, ba maya ti bukai, aku betemu enggau siti ruang bilik ke ngerinduka ati aku ketegal ulah sida ti manah. Tang udah nya, aku tekenyit ati—sida iya Saksi-Saksi Jehovah! Ulah sida ngasuh aku deka meresa kebuah aku enda manah enggau Saksi-Saksi Jehovah. Udah nya aku nemu, ulah aku baka nya laban aku enda entu ngelala Saksi-Saksi Jehovah sereta ninga cherita  ke enda betul pasal sida.” Michael deka nemu mayuh agi, lalu belajarka Bup Kudus. Enda lama udah nya, iya dibaptisa lalu nyadi penyembah ke semina gawa ke Jehovah aja.

6 Enti kitai ngaku Jehovah nyadi Tukang Periuk kitai, runding kitai ngagai bala menyadi Kristian mega deka berubah. Kitai meda tiap iku sida baka perengka ke benung ditempa. Tu meh chara Jehovah meda sida. Iya meda ati sida sereta nemu, pengurang ke dikembuan sida semina enda lama aja. Iya mega nemu tiap iku sida deka nyadi orang ke baka ni. (Mas. 130:3) Kitai ulih neladan Jehovah enti kitai bisi runding manah ti sama ngagai bala menyadi Kristian kitai. Kitai indah ulih sama gawa enggau Tukang Periuk kitai ngambika ulih nulung bala menyadi Kristian kitai ngaga pemansang. (1 Tes. 5:14, 15) Bala tuai gempuru patut nyadi chunto ti manah ba pekara tu.—Eps. 4:8, 11-13.

NAMA KEBUAH JEHOVAH NEMPA KITAI?

7. Nama kebuah nuan beterima kasih ke disiplin ari Jehovah?

7 Sekeda orang engka madahka: ‘Sebedau aku bisi anak kediri empu, aku enda kala beterima kasih ke disiplin ti diberi apai indai ngagai aku.’ Seraya kitai mansang tuai, kitai deka beterima kasih ke disiplin laban kitai nemu nya chara ke dikena ngayanka pengerindu. (Bacha Hebrew 12:5, 6, 11.) Amat, Jehovah rinduka kitai ke nyadi anak Iya, nya kebuah Iya disiplin tauka nempa kitai enggau sabar. Iya deka kitai bepenemu-dalam, gaga ati sereta rinduka Iya ke nyadi Apai kitai. (J-lam. 23:15) Iya enggai meda kitai merinsa tauka mati nyadi orang bedosa ke enda nesal ati.—Eps. 2:2, 3.

Jehovah rinduka kitai ke nyadi anak Iya, nya kebuah Iya sabar disiplin tauka nempa kitai

8, 9. Baka ni Jehovah ngajar kitai kemaya hari tu, lalu baka ni pengawa ngajar tu deka diteruska jemah ila?

8 Sebedau kitai ngelala Jehovah, kitai engka bisi mayuh kualiti ti enda manah. Tang Jehovah nempa kitai sereta nulung kitai berubah, lalu asil iya, kitai diatu bisi sekeda kualiti ti manah. (Isa. 11:6-8; Kol. 3:9, 10) Kitai diau ba paradais rohani. Tu endur ti dikena Jehovah nempa kitai kemaya hari tu. Dia kitai berasai selamat sereta likun, taja pan dunya ke ngelingi kitai jai. Orang ke nadai pengerindu ba ruang bilik lebuh sida mansang besai, diatu ulih ngasaika pengerindu ti bendar ari bala menyadi Kristian sida ba paradais rohani. (Jhn. 13:35) Lalu kitai udah belajar chara ngayanka pengerindu ngagai orang bukai. Tang keberat agi, kitai udah ngelala Jehovah lalu diatu ngasaika pengerindu Iya.—Jas 4:8.

9 Ba dunya baru, kitai deka bulih mayuh penguntung ari paradais rohani. Kitai mega deka ngasaika pengidup ba paradais ti nyata di baruh Perintah Petara. Maya nya, Jehovah deka terus nempa kitai sereta ngajar kitai ngena chara ti tusah digambarka kitai diatu. (Isa. 11:9)  Jehovah mega deka nempa runding enggau ngaga tubuh kitai nyadi sempurna. Tu deka ngasuh kitai senang agi meretika sereta ngasika iring Iya enggau pengabis ati. Nya alai, aram kitai terus ngawakka Jehovah nempa kitai, lalu nunjukka diri beterima kasih ke pengerindu Iya ngagai kitai.—J-lam. 3:11, 12.

CHARA JEHOVAH NEMPA KITAI

10. Baka ni Jesus ngayanka pengeliat ati sereta pengelandik Tukang Periuk ti Besai?

10 Baka tukang periuk ti landik ke nemu bansa tanah liat ti ditempa iya, Tukang Periuk kitai, Jehovah, ngelala kitai enggau manah. Iya nemu pengelemi, tatak, sereta pemansang ke udah digaga kitai, lalu Iya beratika utai tu lebuh Iya nempa tiap iku kitai. (Bacha Masmur 103:10-14.) Kitai ulih nemu chara Jehovah meda kitai ari gaya Jesus begulai enggau bala rasul iya ke enda sempurna. Kekadang, bala rasul bekelikuh pasal sapa ke pemadu besai. Enti nuan bisi dia, nama runding nuan pasal ulah bala rasul nya? Nuan engka ngumbai sida ukai baka tanah liat ti lembut. Taja pia, Jesus nemu sida ulih ditempa enti sida mendingka jaku lalau iya ti siru sereta nelap tauka enti sida neladan pemaruh ati iya. (Mrk. 9:33-37; 10:37, 41-45; Luk. 22:24-27) Pengudah Jesus diangkat idup baru, bala rasul nerima roh kudus ari Petara, lalu sida enda agi berundingka sapa ke pemadu besai. Tang, sida beberatka pengawa ke diberi Jesus ngagai sida.—SKR. 5:42.

11. Baka ni chara David nunjukka diri baka tanah liat ti lembut, lalu baka ni kitai ulih nunda iya?

11 Kemaya hari tu, Jehovah nempa kitai ngena Bup Kudus, roh kudus Iya sereta gempuru. Baka ni Bup Kudus ulih nempa kitai? Kitai patut macha iya, belematika utai ti dibacha kitai, lalu minta Jehovah nulung kitai ngena utai ti udah dipelajarka kitai. Raja David nulis: “Lebuh aku gali, aku ngingatka Nuan. Semalam-malam aku berundingka Nuan.” (Mas. 63:6) Iya mega nulis: ‘Aku muji Jehovah, laban Iya ngiring aku, lalu lebuh malam hari ati aku empu ngajar aku.’ (Mas. 16:7) Amat, David belematika jaku lalau Jehovah lalu ngawakka iya nempa runding enggau asai ati iya, indah lebuh jaku lalau nya tusah diterima. (2 Sam. 12:1-13) David netapka siti chunto ti manah pasal pemaruh ati sereta ulah ti ngasi ngagai kitai. Nya alai tanya diri empu: ‘Lebuh aku macha Bup Kudus, kati aku bisi belematika iya, lalu ngelakka jaku lalau Petara negu ati sereta runding aku? Ulih aku ngereja nya enggau mayuh agi?’—Mas. 1:2, 3.

12, 13. Baka ni Jehovah nempa kitai ngena roh kudus enggau gempuru Kristian?

12 Roh kudus ulih nempa kitai ngena sekeda chara. Ngambika chunto, roh kudus ulih nulung kitai belajar nunda kualiti Jesus sereta mandangka mayuh bengkah buah roh kudus. (Gal. 5:22, 23) Siti ari buah roh kudus nya pengerindu. Kitai rinduka Petara, lalu deka ngasika Iya sereta ditempa Iya laban kitai nemu pesan Iya mai penguntung ke kitai. Nambahka nya, roh kudus ulih meri kitai pengering kena nyeliahka diri ari ditempa dunya ti jai tu. (Eps. 2:2) Lebuh rasul Paul agi biak, iya nyadi sumbung ketegal iya begulai enggau bala tuai pengarap orang Judah ke sumbung. Tang roh kudus nulung iya berubah. Udah nya, iya nulis: ‘Aku ulih ngereja semua utai ulih iya [Jesus]  ke meri aku pengering.’ (Plp. 4:13) Kitai mega patut minta roh kudus, laban nemu Jehovah deka nyaut sampi kitai ke ari ati.—Mas. 10:17.

Jehovah ngena bala tuai gempuru Kristian nempa kitai, nya alai kitai enda tau enda nitihka jaku lalau sida (Peda genteran 12, 13)

13 Jehovah mega ngena gempuru sereta bala tuai gempuru nempa tiap iku kitai. Ngambika chunto, enti bala tuai gempuru nemu kitai bisi pengelemi, sida nguji deka nulung kitai. Taja pia, sida enda meri jaku lalau nitihka runding sida empu. (Gal. 6:1) Tang, sida baruh ati besampi minta runding sereta penemu-dalam ari Jehovah. Udah nya, sida ngaga pansik ngena Bup Kudus sereta litaricha Kristian kitai ngambika nemu penerang ke ulih dikena nulung kitai. Enti bala tuai gempuru datai lalu meri jaku lalau ti ngembuan penyiru sereta pengerindu ngagai nuan, ngambika chunto pasal chara nuan begari, kingatka, jaku lalau nya nunjukka pengerindu Petara ke nuan. Enti nuan nitihka jaku lalau nya, nuan deka baka tanah liat ti lembut ke ulih ditempa Jehovah, lalu nuan deka bulih penguntung.

14. Taja pan bekuasa atas tanah liat, baka ni Jehovah nunjukka basa ngagai peluang kitai ke bibas milih?

14 Enti kitai nemu chara Jehovah nempa kitai, tu ulih nulung kitai bisi kaul ti manah enggau bala menyadi Kristian kitai. Pia mega, kitai deka bisi runding ti manah pasal orang ba kandang endur kitai diau, nyengkaum pelajar Bup Kudus kitai. Sebedau tanah liat ditempa, tukang periuk patut meresi, muai batu, sereta utai bukai ke bisi ba tanah liat nya. Tukang Periuk ti Besai, Jehovah, nulung orang ke deka ditempa. Iya enda ngansak sida berubah, tang Iya nunjukka ngagai sida standard Iya ti beresi. Udah nya sida patut mutus sekalika sida patut ngaga ubah.

15, 16. Baka ni pelajar Bup Kudus nunjukka diri deka ditempa Jehovah? Terangka.

15 Peratika utai ti nyadi ba Tessie,  seiku menyadi Kristian indu di menua Australia. Iya senang belajarka utai ti dipadah Bup Kudus. Taja pia, iya enda ngaga mayuh pemansang, lalu iya enda datai begempuru. Menyadi Kristian indu ke belajar enggau iya udah besampi ngagai Jehovah, lalu mutuska runding deka badu belajar enggau iya. Udah nya, utai ti ngalitka ati nyadi. Lebuh seduai iya belajar, Tessie madah ngagai pengajar iya kebuah iya enda ngaga pemansang. Iya madahka diri baka orang ke pepura laban iya rindu bejudi. Tang diatu iya udah mutuska runding deka badu bejudi.

16 Enda lama udah nya, Tessie berengkah datai begempuru sereta ngayanka kualiti Kristian, taja pan sekeda orang ke kala nyadi kawan iya ngeleseka iya. Nyau kelama, Tessie dibaptisa, lalu nyadi pengerintis biasa taja pan iya bisi bala anak ke agi mit. Endang amat, lebuh pelajar Bup Kudus berengkah ngaga ubah ti ngerinduka ati Petara, Iya deka mai orang nya datai semak ngagai Iya, lalu deka nempa sida nyadi perengka ti berega.

17. (a) Nama utai ke narit ati nuan pasal Jehovah ke nyadi Tukang Periuk nuan? (b) Nama chara nempa ti deka dikerandauka kitai?

17 Kemaya hari tu, sekeda tukang periuk agi bejimat nempa tanah liat nyadi perengka ti manah ngena jari. Pia mega, Jehovah enggau sabar nempa kitai ngena jaku lalau Iya, lalu Iya meda chara kitai deka nerima utai nya. (Bacha Masmur 32:8.) Ulih nuan meda Jehovah ibuhka nuan? Kati nuan meda Jehovah nya bejimat nempa nuan? Enti pia, nama kualiti ke deka nulung nuan mengkang baka tanah liat ti lembut ngambika ulih ditempa Jehovah? Nama ulah ke patut diseliahka nuan ngambika nuan enda nyadi tanah liat ti kering ke enda ulih ditempa? Lalu baka ni apai indai ulih sama bekereja enggau Jehovah nempa bala anak sida? Artikel pengudah tu deka nyaut tanya nya.