Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga—Edisyen Dikena Belajar  |  Jun 2016

Anang Ngelakka Penyalah Orang Bukai Ngasuh Nuan Enda Nyamai Ati

Anang Ngelakka Penyalah Orang Bukai Ngasuh Nuan Enda Nyamai Ati

“Ampun pangan diri.”—KOL. 3:13.

LAGU: 121, 75

1, 2. Baka ni Bup Kudus madahka penyampau nembiak Jehovah ke nambah?

DI SERATA dunya, bisi orang ke rinduka Jehovah sereta deka nyembah Iya dalam siti gerempung. Sida iya Saksi –Saksi Jehovah. Taja pan sida bisi penyalah tauka ngereja penyalah, Jehovah ngiring sida ngena roh kudus Iya. Aram kitai meda sekeda chara Iya udah merekatka sida.

2 Ba taun 1914, mimit amat orang nyembah Jehovah. Tang Jehovah udah merekatka pengawa nginjil. Asil iya, bejuta iku orang udah belajarka pemendar Bup Kudus, lalu nyadi Saksi Iya. Jehovah nerangka penyampau nambah ti ngalitka ati nya lebuh Iya madahka: ‘Indah suku raban bansa ti pemadu mit, ti pemadu baruh pendiau deh deka besai kuasa, baka bansa ti besai kuasa. Lebuh maya ti ngena datai, Aku deka ngasuh utai tu lengkas nyadi. Aku tu Jehovah!’ (Isa. 60:22) Kemaya hari tu kitai ulih meda, jaku nya udah dikeamatka. Nembiak Jehovah baka raban bansa ti besai. Iya ke amat, bisi mayuh bengkah bansa di serata dunya ke mimit agi penyampau ari semua penyampau nembiak Jehovah.

3. Baka ni nembiak Petara udah ngayanka pengerindu?

 3 Maya hari ti penudi tu, Jehovah udah nulung nembiak Iya ngeringka pengerindu sida ngagai pangan diri. ‘Petara endang pengerindu,’ lalu sida neladan Iya. (1 Jhn. 4:8) Jesus ngasuh bala murid iya “rinduka pangan diri.” Iya mega ngasuh sida: ‘Enti kita rinduka pangan diri, nya baru semua orang deka nemu kita murid aku.’ (Jhn. 13:34, 35) Baru-baru tu, nembiak Jehovah udah ngayanka pengerindu tu ngagai pangan diri indah lebuh raban bansa beperang. Ngambika chunto, ba perang dunya kedua, kira-kira 55 juta iku orang mati. Tang nembiak Jehovah nadai munuh orang ba perang nya. (Bacha Mikah 4:1, 3.) Tu udah nulung sida “enda betanggungjawapka nyawa” orang.—SKR. 20:26.

4. Nama kebuah penyampau nembiak Jehovah ke nambah nya ngalitka ati?

4 Penyampau nembiak Petara majak nambah taja pan sida bisi munsuh ti kering, iya nya Sitan. Sitan nya “petara dunya.” (2 Kor. 4:4) Sitan bekuasa atas gerempung politik ba dunya tu, nyengkaum berita ba media, lalu iya nguji ngena utai tu ngetuka pengawa nginjil. Tang iya enda ulih ngetuka pengawa tu. Taja pia, Sitan nemu timpuh diri nyau deka abis, nya alai iya terus nguji nagang kitai ari nyembah Jehovah.—Pem. 12:12.

KATI NUAN DEKA TETAP TALUK LEBUH ORANG BUKAI NGEREJA PENYALAH?

5. Nama kebuah kekadang orang bukai engka ngemediska ati kitai? (Peda gambar ba pun artikel.)

5 Nembiak Petara nemu, rinduka Petara sereta orang bukai nya beguna bendar. Jesus madahka: “‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ Tu pesan ti keterubah sereta pemadu besai. Lalu pesan ti kedua nya sebaka enggau nya: ‘Rinduka pangan nuan baka nuan ke rinduka diri empu.’” (Mat. 22:35-39) Taja pia, Bup Kudus nunjukka semua mensia enda sempurna kenyau ari ada, ketegal dosa Adam. (Bacha Rome 5:12, 19.) Nya alai kekadang, sekeda orang ba gempuru engka nyebut tauka ngereja utai ti ngemediska ati kitai. Lebuh utai tu nyadi, nama deka digaga kitai? Kati pengerindu kitai ke Jehovah mengkang tegap? Kati kitai deka taluk ngagai Iya sereta ngagai nembiak Iya? Bup Kudus madah ngagai kitai pasal sekeda nembiak Petara ke nyebut tauka ngereja utai ti ngemediska ati orang bukai. Aram kitai belajarka utai ti udah nyadi ba sida.

Enti nuan diau ba menua Israel maya jeman Eli enggau dua iku anak lelaki iya, nama deka digaga nuan? (Peda genteran 6)

6. Nama kebuah Eli enda mujur ngajar dua iku anak lelaki iya?

6 Ngambika chunto, Eli nyadi imam besai di menua Israel, tang dua iku anak lelaki iya enda ngasika adat Jehovah. Bup Kudus madahka: ‘Nyadi anak lelaki Eli ke dua iku nya orang ke jai. Seduai iya enda bebasaka Jehovah.’ (1 Sam. 2:12) Eli nemu seduai iya ngereja utai ti amat jai. Taja pia, iya enda bebendar ngajar seduai iya. Nyau kelama, Jehovah ngukum Eli enggau dua iku anak lelaki iya. Lalu udah nya, Iya enda agi ngemendarka peturun Eli nyadi imam besai. (1 Sam. 3:10-14) Enti nuan idup maya jeman Eli, lalu nemu iya ngelakka dua iku anak lelaki iya ngereja utai ti jai, kati nuan deka enda nyamai ati? Kati utai tu deka ngelemika pengarap nuan ngagai Jehovah, lalu ketegal  tu, kati nuan deka ngetu nyembah Iya?

7. Nama dosa besai ti digaga David, lalu nama digaga Petara?

7 David bisi kualiti ti manah, lalu nya meh kebuah Jehovah balat rinduka iya. (1 Sam. 13:13, 14; SKR. 13:22) Tang David ngereja utai ti balat jai. Lebuh Uriah enggau beperang, David beleman enggau Batseba, bini Uriah, lalu iya ngandung. David enggai orang bukai nemu utai ti udah digaga iya. Nya alai iya ngasuh Uriah betemu enggau iya, lalu udah nya nguji ngasuh iya pulai ke rumah. David ngarapka Uriah beleman enggau Batseba ngambika orang ngumbai Uriah nya apai ke anak mit nya. Tang Uriah enda pulai. Nya alai David nentuka Uriah mati ba perang. Ketegal dosa iya ti besai, David enggau sida sebilik balat tusah. (2 Sam. 12:9-12) Tang Jehovah kasih ke iya, lalu ngampun iya. Iya nemu David deka ngereja utai ti ngena. (1 Raj. 9:4) Enti nuan idup maya jeman nya, baka ni asai ati nuan pasal utai ti digaga David? Kati nuan deka ngetu nyembah Jehovah?

8. (a) Baka ni rasul Peter enda ngamatka jaku iya? (b) Pengudah Peter ngereja penyalah, nama kebuah Jehovah terus ngena iya?

8 Siti agi chunto ari Bup Kudus iya nya rasul Peter. Jesus milih iya nyadi rasul. Taja pia, kekadang Peter nyebut tauka ngereja utai ti enda patut. Ngambika chunto, Peter madahka iya enda  ninggalka Jesus taja pan orang bukai ninggalka Jesus. (Mrk. 14:27-31, 50) Tang pengudah Jesus ditangkap, semua rasul, nyengkaum Peter ninggalka iya. Udah nya, tiga kali ba maya ti enda sama, Peter madahka diri enda ngelala Jesus. (Mrk. 14:53, 54, 66-72) Taja pia, Peter berasai balat tusah ati pasal utai ti udah digaga iya. Nya alai, Jehovah ngampun iya lalu terus ngena iya. Enti sema nuan murid Jesus maya nya, lalu nemu utai ti udah digaga Peter, kati nuan deka terus arapka Jehovah?

Kitai pechaya Jehovah seruran ngereja utai ti ngena sereta lurus

9. Nama kebuah nuan pechaya Petara nya seruran lurus?

9 Ari sekeda chunto tu, kitai nemu sekeda ari nembiak Jehovah udah ngereja utai ti enda manah sereta balat ngemediska ati orang bukai. Enti utai tu nyadi kemaya hari tu, nama deka digaga nuan? Kati nuan deka ngetu enggau begempuru tauka terus ninggalka Jehovah sereta nembiak Iya? Tauka kati nuan nemu Jehovah nya bisi pengasih, lalu Iya nganti orang ke ngereja penyalah nya nesal ati? Tang kekadang bisi maya orang ke ngereja dosa ti besai enda nesal ati ke utai ti udah dikereja diri. Kati nuan pechaya Jehovah nemu pasal utai tu, lalu Iya deka mutarka utai tu ba maya ti patut? Enti orang nya amat enda nesal ati, Iya ulih muai orang nya ari gempuru. Kati nuan pechaya Jehovah seruran deka ngereja utai ti ngena sereta lurus?

MENGKANG TALUK

10. Nama runding Jesus pasal penyalah ke digaga Judas Iskariot enggau Peter?

10 Dalam Bup Kudus, kitai macha pasal mayuh orang ke mengkang taluk ngagai Jehovah sereta nembiak Iya, taja pan orang bukai ke ngelingi sida ngereja penyalah ti besai. Jesus nya chunto ti pemadu manah. Pengudah semalam-malam besampi minta tulung ngagai Apai iya, iya milih 12 iku rasul. Tang seiku ari sida, Judas Iskariot, udah nya nyual Jesus. Pia mega, rasul Peter madahka iya enda ngelala Jesus. (Luk. 6:12-16; 22:2-6, 31, 32) Jesus enda nyalahka Jehovah tauka bala murid ke bukai lebuh sekeda ari sida ngenusahka ati iya. Jesus mengkang semak ngagai Apai iya sereta terus nyembah Iya enggau taluk. Asil iya, Jehovah merekat iya enggau ngangkatka iya ari mati, lalu udah nya milih iya nyadi Raja ba Perintah Petara ti di serega.—Mat. 28:7, 18-20.

11. Nama dipadah Bup Kudus pasal nembiak Petara kemaya hari tu?

11 Chunto Jesus ngajar kitai ngambika taluk ngagai Jehovah sereta nembiak Iya. Lalu kitai bisi kebuah ti manah ngereja nya. Kitai nemu, Jehovah ngiring bala nembiak Iya ba hari ti penudi. Iya nulung sida nusui pemendar di serata dunya, lalu semina sida aja ke ngereja pengawa tu. Sida mega amat beserakup sereta gaga ati ke semua utai ti diajar Jehovah ngagai sida. Jehovah nerangka tu  lebuh Iya nyebut: “Sida deka belagu gaga ati.”—Isa. 65:14.

Endang enda patut kitai ninggalka Jehovah sereta nembiak Iya ketegal seiku aja orang ke bisi ngereja penyalah

12. Nama patut diperundingka kitai pasal penyalah orang bukai?

12 Kitai amat gaga ati laban Jehovah ngiring sereta nulung kitai ngereja mayuh utai ti manah. Tang orang ba dunya Sitan enda lantang sereta nadai pengadang ti bendar ke jemah ila. Endang enda patut kitai ninggalka Jehovah sereta nembiak Iya ketegal seiku orang aja ba gempuru ngereja tauka nyebut utai ti enda manah! Tang, kitai enda tau enda mengkang taluk ngagai Jehovah sereta nitihka iring Iya. Kitai mega patut belajarka chara meda sereta napi penyalah orang bukai.

NAMA PATUT DIGAGA NUAN?

13, 14. (a) Nama kebuah kitai patut sabar enggau pangan diri? (b) Nama semaya ke deka dikingatka kitai?

13 Nama patut digaga nuan enti sema bala menyadi Kristian nyebut tauka ngereja utai ti ngemediska ati nuan? Bup Kudus meri jaku ajar tu: “Anang lengkar. Nuan beli enti nuan bedendam.” (P-jar. 7:9) Semua kitai enda sempurna sereta ngereja penyalah. Nya alai, kitai enda ngarapka bala menyadi Kristian kitai seruran deka nyebut sereta ngereja utai ti ngena. Lalu endang enda manah enti kitai terus berundingka penyalah sida. Enti kitai terus baka nya, kitai enda agi ulih gaga ati lebuh nyembah Jehovah. Ke balat agi, pengarap kitai ngagai Iya ulih nyadi lemi, lalu kitai engka deka ninggalka gerempung Jehovah. Udah nya, kitai enda ulih nyembah Jehovah tauka ngarapka diri ulih idup ba dunya baru Iya.

14 Nya alai, nama ulih nulung nuan mengkang gaga ati nyembah Jehovah lebuh orang bukai ngereja utai ti ngenusahka nuan? Seruran ingatka semaya Iya ti ngelantangka ati: “Aku ngaga langit ti baru enggau dunya ti baru. Semua utai ti lama, enda agi dikingatka.” (Isa. 65:17; 2 Pet. 3:13) Jehovah deka meri nuan berekat tu enti nuan mengkang taluk ngagai Iya.

15. Nitihka Jesus, nama patut digaga kitai lebuh orang bukai ngereja penyalah?

15 Endang amat, kitai bedau agi diau ba dunya baru. Nya alai, enti orang ngemediska ati kitai, kitai patut belematika utai ti diasuh Jehovah gaga kitai. Ngambika chunto, Jesus madahka: “Enti kita ngampun orang ke salah enggau kita, Apai kita ti di serega deka mega ngampun penyalah kita. Tang enti kita enggai ngampun orang ke salah enggau kita, Apai kita pen enggai mega ngampun penyalah kita.” Lalu lebuh Peter nanya Jesus sekalika kitai patut ngampun “tujuh kali” aja, Jesus nyaut: “Ukai tujuh kali, tang tujuh puluh kali tujuh.” Jesus ngajar, kitai patut  seruran deka ngampunka orang bukai.—Mat. 6:14, 15; 18:21, 22.

16. Nama teladan manah ke ditetapka Josep?

16 Chunto Josep ngajar kitai, utai ti patut digaga lebuh orang bukai ngenusahka ati kitai. Josep enggau menyadi iya ke biak agi nya semina anak Jakop seduai Rachel. Jakop bisi sepuluh iku anak lelaki ke bukai, tang iya rindu agi ke Josep ari semua sida. Tu ngasuh sida balat chemburu ke Josep. Iya ke amat, sida balat begedika iya nyentukka sida nyual iya nyadika ulun, lalu iya dibai ke menua Ejip. Pengudah betaun-taun, raja menua Ejip milih Josep nyadi orang ti kedua pemadu bekuasa ba menua nya laban iya rindu enggau pengawa manah ke digaga Josep. Udah nya, bala menyadi Josep datai ke menua Ejip meli pemakai ketegal lapar pungkang. Lebuh sida meda Josep, sida enda ngelala iya, tang Josep ngelala sida. Taja pan sida udah balat jai enggau iya, iya enda ngukum sida. Tang iya nguji sida kena nemu sekalika sida amat udah berubah. Lebuh Josep nemu sida udah berubah, iya madahka diri menyadi sida. Udah nya, iya ngelantangka ati sida lalu ku iya: “Anang takut. Aku deka ngintu kita enggau bala anak kita.”—P-kal. 50:21.

17. Nama deka digaga nuan enti sema orang bukai ngereja penyalah?

17 Kingatka, ketegal semua orang bisi penyalah, nuan mega engka ngasuh orang bukai enda nyamai ati. Nya alai enti nuan nemu diri udah ngenusahka ati orang, titihka jaku ajar Bup Kudus. Minta orang nya ngampun nuan, lalu bebaik enggau iya. (Bacha Matthew 5:23, 24.) Kitai gaga enti orang bukai ngampun kitai. Nya alai, kitai mega patut ngampun orang bukai. Kolosi 3:13 madahka: “Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan ke udah ngampun kita, baka nya mega kita ngampun pangan diri.” Enti kitai amat rinduka bala menyadi Kristian, kitai enda patut terus pedis ati enggau utai ti udah dikereja sida suba. (1 Kor. 13:5) Lalu enti kitai ngampun orang bukai, Jehovah mega deka ngampun kitai. Nya alai lebuh orang bukai ngereja penyalah, awakka kitai bisi pengasih ke sida baka Apai kitai, Jehovah, ti bisi pengasih ke kitai.—Bacha Masmur 103:12-14.