Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 27

Ari Diatu Nyikap Diri Kena Napi Pemerinsa ti Deka Datai

Ari Diatu Nyikap Diri Kena Napi Pemerinsa ti Deka Datai

“Semua orang ke keran deka diau kudus dalam Jesus Kristus, deka kena perinsaka magang.”—2 TIM. 3:12.

LAGU 129 Terus Betan

DALAM ARTIKEL TU *

1. Nama kebuah kitai patut nyikap diri napi pemerinsa?

BA MALAM sebedau Jesus mati, iya madahka semua orang ke milih nyadi murid iya deka dipegedika. (Jhn. 17:14) Nyentuk ke diatu, Saksi-Saksi Jehovah ke tetap ati udah diperinsa orang ke enda nyembah Jehovah. (2 Tim. 3:12) Seraya pengujung dunya tu nyau majak semak, bala munsuh deka majak agi nyakal kitai.—Mat. 24:9.

2-3. (a) Nama kebuah asai ati ti takut ulih ngenusahka? (b) Nama deka dikerandauka kitai ba artikel tu?

2 Baka ni kitai ulih nyikap diri napi pemerinsa ari diatu? Kitai enda ibuh ngambarka semua utai ke engka nyadi ba kitai, laban nya deka ngasuh kitai kelalu takut sereta irau. Lalu tu tau ngujungka kitai ngetu nyembah Jehovah indah sebedau kitai napi sebarang pemerinsa ti balat. (J-lam. 12:25; 17:22) Asai ati ti takut nya senyata ti besai ke dikena Sitan ngelaban kitai. (1 Pet. 5:8, 9) Nama ulih digaga kitai ari diatu kena nyikap diri ngambika ulih tan napi pemerinsa?

3 Ba artikel tu, kitai deka beratika chara kitai ulih negapka kaul enggau Jehovah sereta kebuah kitai patut ngereja nya ari diatu. Kitai mega deka berandauka utai ke ulih digaga kena ngemansangka pemerani. Lalu ke penudi iya, kitai deka mansik utai ke ulih digaga lebuh orang begedika kitai.

CHARA NEGAPKA KAUL ENGGAU JEHOVAH

4. Nama dipadah Hebrew 13:5, 6 ngagai kitai? Nama kebuah kitai enda tau enda pechayaka tu?

4 Pechaya meh, Jehovah rinduka nuan lalu Iya enda kala ngelengkaka nuan. (Bacha Hebrew 13:5, 6.) Betaun-taun ti udah,  majalah Menara Jaga madahka: “Orang ke ngelala Petara enggau manah deka bepanggai ba Iya enggau pengabis ati lebuh napi pemerinsa.” Tu endang amat! Ngambika ulih tan napi pemerinsa, kitai enda tau enda rinduka Jehovah sereta bepanggai ba Iya enggau pengabis ati. Anang kakang ati enggau pengerindu Iya ke kitai.—Mat. 22:36-38; Jas. 5:11.

5. Nama deka nulung nuan ngasaika pengerindu Jehovah?

5 Tegapka kaul enggau Jehovah nengah pengawa macha Bup Kudus ninting hari. (Jas. 4:8) Lebuh nuan macha Bup Kudus, peratika pemanah ke dikembuan Jehovah. Asaika pengerindu ke diayanka Iya ari utai ke disebut sereta digaga Iya. (P-sut. 34:6) Sekeda orang engka tusah deka pechaya Petara rinduka sida laban sida enda kala ngasai baka ni dikerinduka orang. Enti nuan ngasaika tu, uji tulis pasal chara Jehovah mandangka penyinu enggau pengasih ngagai nuan ninting hari. (Mas. 78:38, 39; Rom. 8:32) Lebuh nuan mikirka peneleba nuan empu lalu belematika utai ke udah dibacha nuan ba Bup Kudus, nuan tentu ulih nulis mayuh utai ke udah digaga Jehovah ke nuan. Enti nuan amat beterima kasih ke semua utai ti udah digaga Jehovah, kaul nuan enggau Iya deka tegap agi.—Mas. 116:1, 2.

6. Nitihka Masmur 94:18, 19, baka ni sampi ari ati ulih nulung nuan?

6 Seruran besampi. Uji gambarka, seiku apai ti bepengerindu merap anak iya. Anak iya berasai likun nyentukka iya enda nangi madahka utai ti manah tauka jai ke nyadi ba iya sehari nya. Nuan mega ulih ngembuan kaul ti sama enggau Jehovah enti nuan besampi ngagai Iya ninting hari. (Bacha Masmur 94:18, 19.) Lebuh nuan besampi ngagai Jehovah, ‘bantaika semua utai ari ati nuan ngagai Iya’ lalu padahka ngagai Iya pasal semua utai ke ngasuh nuan berasai takut tauka irau. (Sab. 2:19) Nama asil iya? Bup Kudus madah, nuan deka bulih ‘pemaik Petara, ti ngelui peragam mensia.’ (Plp. 4:6, 7) Bendar agi nuan besampi enggau chara tu, semak agi nuan enggau Jehovah.—Rom. 8:38, 39.

Kitai nyadi berani enti pengarap kitai ba Jehovah enggau pesan pasal Perintah Petara nya tegap

Stanley Jones negapka pengarap diri ba Perintah Petara (Peda genteran 7)

7. Nama kebuah nuan patut arapka semaya Jehovah pasal Perintah Iya deka dikeamatka?

7 Pechaya meh, berekat ari Perintah Petara endang deka dikeamatka. (P-pau. 23:19) Enti nuan enda tentu pechayaka semaya ari Jehovah nya, Sitan enggau nembiak iya deka senang agi ngenakutka nuan. (J-lam. 24:10; Heb. 2:15) Baka ni nuan ulih negapka pengarap nuan ngagai Perintah Petara ari diatu? Kena awak nuan mansik semaya Petara pasal Perintah Iya lalu kebuah nuan ulih pechaya semaya nya endang deka dikeamatka. Baka ni tu ulih nulung nuan? Peratika chunto pasal Stanley Jones ke diukum jil sepengelama tujuh taun ketegal pengarap iya. * Nama nulung iya betan enggau tetap ati? Ku iya madah:  “Pengarap aku tegap laban aku nemu pasal Perintah Petara sereta utai ti deka dijapai Perintah nya. Aku enda kala kakang pasal tu. Nya kebuah nadai orang ulih ngasuh aku ninggalka Jehovah.” Enti nuan amat arapka semaya Jehovah, nuan deka semak agi ngagai Iya lalu nuan enda ngelakka asai ati ti takut ngasuh nuan badu nyembah Iya.—J-lam. 3:25, 26.

8. Nama kebuah kitai patut beberatka pengawa datai begempuru? Terangka.

8 Seruran datai begempuru. Gempuru Kristian kitai nulung kitai semak agi ngagai Jehovah. Nya alai, kitai patut beberatka pengawa datai begempuru ari diatu, laban nya ulih nulung kitai nemu sekalika kitai ulih mujur tauka enda lebuh napi pemerinsa dudi hari. (Heb. 10:24, 25) Nama kebuah? Enti kitai ngelakka penanggul ti mit nekul kitai datai begempuru diatu, nama deka nyadi dudi hari enti sema perintah nagang kitai begempuru enggau bala menyadi Kristian kitai? Tang, enti kitai keran datai begempuru, kitai enda beduli lebuh bala penyakal nguji nagang kitai ari begempuru. Diatu meh maya ngemansangka pengerindu kitai ngagai pengawa begempuru. Enti kitai rindu datai begempuru, nadai utai ke ulih nagang kitai ari ngasika Petara. Indah sida ke nyakal tauka perintah mensia pan enda ulih nagang kitai.—SKR. 5:29.

Ngingatka ayat Bup Kudus sereta lagu Perintah Petara deka nulung nuan lebuh napi pemerinsa (Peda genteran 9) *

9. Nama kebuah ngingatka ayat Bup Kudus nya chara ti manah kena nyikap diri napi pemerinsa?

9 Ngingatka ayat Bup Kudus ti dikerinduka nuan. (Mat. 13:52) Ketegal nuan enda sempurna, nuan engka tusah deka ngingatka ayat Bup Kudus. Tang, Jehovah ulih ngena roh kudus Iya nulung nuan. (Jhn. 14:26) Peratika utai ti dipadah seiku menyadi Kristian lelaki ke dijil kediri ba Jerman Timur. Ku iya madah: “Aku amat gaga ati laban udah ngingatka lebih ari 200 iti ayat Bup Kudus! Taja pan aku kediri, aku ulih majak belematika mayuh pekara ari Bup Kudus.” Ayat Bup Kudus nya nulung menyadi kitai tu mengkang semak enggau Jehovah sereta nulung iya betan enggau tetap ati.

(Peda genteran 10) *

10. Nama kebuah kitai patut ngingatka lagu ke disediaka gerempung kitai?

10 Ngingatka lalu nanyi lagu puji ngagai Jehovah. Lebuh dijil ba Pilipi, Paul seduai Silas belagu muji Petara ngena lagu ke dikingatka seduai iya. (SKR. 16:25) Pia mega, lebuh bala menyadi kitai ba menua Soviet Union suba dibuai ngagai menua Siberia, baka ni sida ngeringka pangan diri? Menyadi Kristian indu ke benama Maria Fedun madah: “Kami nanyi semua lagu  ke ditemu kami ari bup lagu ke disediaka gerempung kitai.” Iya madahka semua lagu nya meransang semua sida, lalu nulung sida semak agi ngagai Jehovah. Kati nuan berasai dikeringka lebuh nuan nanyi lagu ke dikerinduka nuan ari bup lagu sereta laman web kitai? Enti pia, ingatka lagu nya ari diatu!—Peda kutak “Beri meh Aku Pemerani.”

CHARA ULIH NGEMANSANGKA PEMERANI

11-12. (a) Nitihka 1 Samuel 17:37, 45-47, nama kebuah David berani? (b) Nama dipelajarka kitai ari chunto David?

11 Nuan begunaka pemerani kena napi pemerinsa. Enti nuan ngasaika diri enda tentu berani, nama ulih digaga nuan? Kingatka meh, pemerani ti bendar ukai bepanggai ba pemesai tubuh, pengering, tauka pengelandik. Peratika chunto David ke agi biak lebuh iya belaban enggau Goliat ke besai gamal. Enti dibandingka enggau Goliat, David jauh mit, lemi, sereta nadai senyata ti manah. David indah nadai pedang. Tang David chukup berani. Iya enggau berani mansang ngelaban Goliat ke sumbung nya.

12 Nama kebuah David berani? Iya pechaya Jehovah endang enggau iya. (Bacha 1 Samuel 17:37, 45-47.) Iya enda beratika pemesai Goliat. Iya beratika pemesai Jehovah enti dibandingka enggau Goliat. Nama ulih dipelajarka kitai ari cherita tu? Kitai deka berani enti kitai andalka Jehovah endang enggau kitai. Lalu sida ke nyakap kitai endang mit enti dibandingka enggau Petara Jehovah ti Pemadu Bekuasa. (2 Ban. 20:15; Mas. 16:8) Sebedau pemerinsa datai, baka ni kitai ulih ngemansangka pemerani ari diatu?

13. Baka ni kitai ulih ngemansangka pemerani? Terangka.

13 Kitai ulih ngemansangka pemerani ari diatu nengah pengawa nusui berita manah pasal Perintah Petara ngagai orang bukai. Nama kebuah pia? Laban lebuh kitai nginjil, kitai belajar bepanggai ba Jehovah sereta mutarka asai ati ti takut ke mensia. (J-lam. 29:25) Baka pengawa sesais ulih ngeringka tubuh, pemerani kitai ulih ditegapka lebuh kitai nginjil ari rumah ke rumah, ba endur orang mayuh, nginjil ngena chara ti enda formal, sereta ba endur bedagang. Enti kitai ngemansangka pemerani kena nginjil ari diatu, kitai deka terus ngereja pengawa nginjil taja pan ditagang perintah mensia.—1 Tes. 2:1, 2.

Nancy Yuen enggai badu nusui berita manah (Peda genteran 14)

14-15. Nama ulih dipelajarka kitai ari Nancy Yuen enggau Valentina Garnovskaya?

 14 Kitai ulih belajarka mayuh utai ari dua iku menyadi Kristian indu ti tetap ati ke ngayanka pemerani. Nancy Yuen ke kurang ari 5 kaki peninggi (1.5 m), enda mudah diemba orang. * Iya enggai ngetu nusui berita manah pasal Perintah Petara. Ketegal nya, iya dijil sepengelama 20 taun ba menua China. Bala pegawai [ari perintah Komunis] ke nasat iya madahka iya nya orang ke “pemadu kieh” ba menua sida.

Valentina Garnovskaya pechaya Jehovah endang enggau iya (Peda genteran 15)

15 Pia mega, Valentina Garnovskaya dijil 3 kali ba menua Soviet Union. Penyampau semua ukum jil nya sepengelama 21 taun. * Nama kebuah iya dijil ngelama nya? Laban iya keran deka terus nginjil. Nya alai iya dikumbai “penjenayah ti balat jai.” Nama kebuah dua iku menyadi Kristian indu kitai nya berani amat? Seduai iya pechaya Jehovah endang enggau seduai iya.

16. Nama resia kena bulih pemerani ti bendar?

16 Baka ke udah dikerandauka kitai, kena ngemansangka pemerani, kitai anang bepanggai ba pengering tauka pengelandik diri. Tang kitai patut pechaya Jehovah, endang enggau kitai lalu Iya ke belaban ngarika kitai. (U-dat. 1:29, 30; Sek. 4:6) Tu meh resia pemerani ti bendar.

UTAI KE ULIH DIGAGA LEBUH ORANG BEGEDIKA KITAI

17-18. Baka ke dipadah ba John 15:18-21, nama tangkan ke diberi Jesus ngagai kitai? Terangka.

17 Kitai gaga ati lebuh orang bebasaka kitai. Tang kitai enda patut ngumbai diri nadai guna enti orang enda rinduka kitai. Ku Jesus madahka: ‘Gaga ati meh kita lebuh orang begedika kita, lebuh sida nulak kita, ngeleseka kita, lalu bejai kita ketegal Anak Mensia!’ (Luk. 6:22) Nama reti ku Jesus nya?

18 Jesus ukai madahka orang Kristian rindu dipegedika orang. Tang iya nangkan kitai pasal utai ke deka nyadi ngagai kitai. Kitai ukai enggi dunya tu. Kitai nitihka ajar Jesus ba pengidup sereta nusui pesan ke dibai iya ngagai orang. Ketegal tu, dunya begedika kitai.  (Bacha John 15:18-21.) Kitai deka ngagaka ati Jehovah. Enti orang begedika kitai ketegal rinduka Iya, kitai enda ibuh kelalu irauka nya.

19. Baka ni kitai ulih neladan bala rasul?

19 Anang nejuka sebarang utai ke disebut sereta digaga mensia ngasuh nuan berasai malu nyadi seiku ari Saksi-Saksi Jehovah. (Mik. 4:5) Kitai ulih belajar ngalahka asai ati ti takut ke mensia enggau berundingka pasal utai ti digaga bala rasul ba Jerusalem pengudah Jesus dibunuh. Sida nemu bala tuai pengarap orang Judah balat begedika sida. (SKR. 5:17, 18, 27, 28) Taja pia, ninting hari sida enda ngetu ngagai Rumah Sembiang lalu madahka diri nembiak Jesus. (SKR. 5:42) Sida enggai alah laban asai ati ti takut. Kitai mega ulih ngalahka asai ati kitai ti takut ke mensia enti kitai seruran madahka diri Saksi-Saksi Jehovah sekalika ba endur gawa, sekula, tauka ba genturung alai kitai diau.—SKR. 4:29; Rom. 1:16.

20. Nama kebuah bala rasul gaga ati taja pan sida dipegedika orang?

20 Nama kebuah bala rasul gaga ati? Laban sida nemu kebuah sida dipegedi, lalu ngumbai nya basa lebuh diperinsa ketegal ngereja peneka Jehovah. (Luk. 6:23; SKR. 5:41) Rasul Peter udah nya nulis: ‘Enti sema kita kena perinsa ketegal kita ngereja utai ti ngena, kita deka gaga ati.’ (1 Pet. 2:19-21; 3:14) Pia mega, enti kitai nemu kebuah kitai dipegedika orang ketegal ngereja utai ti ngena, tu meransang kitai terus nyembah Jehovah.

NUAN DEKA BULIH PENGUNTUNG ENTI NYIKAP DIRI

21-22. (a) Nama deka digaga nuan kena nyikap diri napi pemerinsa? (b) Nama deka dikerandauka kitai ba artikel pengudah tu?

21 Kitai enda nemu kemaya kitai deka diperinsa tauka sembah kitai ngagai Jehovah deka ditagang perintah mensia. Taja pia, kitai nemu kitai ulih nyikap diri ari diatu enggau negapka kaul enggau Jehovah, ngemansangka pemerani kitai, sereta belajarka utai ti patut digaga lebuh orang begedika kitai. Semua tu deka nulung kitai terus nyembah Jehovah nyentuk ke jemah ila.

22 Tang, baka ni enti sema sembah kitai ngagai Jehovah ditagang? Ba artikel pengudah tu, kitai deka berandauka prinsip Bup Kudus ke ulih nulung kitai terus nyembah Jehovah taja pan kitai ditagang.

LAGU 118 “Tambahka Pengarap Kami”

^ per. 5 Kitai enggai orang begedika kitai. Tang, enda ngira diatu tauka dudi hari, semua kitai deka napi pemerinsa. Artikel tu deka nulung kitai napi pemerinsa enggau berani.

^ per. 7 Peda The Watchtower, 15 Disember 1965, lamb. 756-767, dalam jaku English.

^ per. 14 Peda The Watchtower, 15 Julai 1979, lamb. 4-7, dalam jaku English. Peda mega video Nama Jehovah Deka Dikelala Orang, ba Berita JW. Peda ba begian INTERBIU ENGGAU PENGALAMAN.

^ per. 15 Peda Buku Tahunan Saksi-Saksi Jehovah 2008, lambar 191-192, dalam jaku Indonesia.

^ per. 67 PENERANG PASAL GAMBAR: Lebuh belajarka Bup Kudus ba diri sebilik, apai indai ngena kad nulung anak ngingatka ayat Bup Kudus.

^ per. 70 PENERANG PASAL GAMBAR: Lebuh mansang ngagai gempuru, siti ruang bilik belatihka lagu Perintah Petara dalam kerita