‘Gaga ati ke Jehovah, lalu Iya deka meri nuan utai ti dikinginka nuan.’—MAS. 37:4.

LAGU: 135, 81

1. Nama patut diperundingka orang ke biak pasal pengidup sida dudi hari? Nama ulih nulung sida ngambika enda kelalu irau? (Peda gambar ba pun artikel.)

KITA ke biak tentu setuju, sebedau berengkah bejalai jauh, endang manah enti kita merambu dulu tuju pejalai kita. Pengidup baka pejalai ti jauh, lalu maya kena merambu tuju pejalai iya nya lebuh nuan agi biak. Endang amat, enda senang deka ngaga pelan nya. Seiku indu ke benama Heather madahka: “Endang ngirauka ati. Nuan patut berundingka utai ti deka dikereja enggau pengidup nuan.” Enti nuan ngasaika baka tu, kingatka, Jehovah madahka: “Anang irau, laban Aku tu Petara kita. Aku deka nyaga kita, Aku deka nulung kita.”—Isa. 41:10, NW.

2. Baka ni nuan nemu Jehovah deka nuan merambu pengidup ti ngagaka ati ke dudi hari?

2 Jehovah meransang nuan merambu pengidup nuan ke dudi hari enggau manah. (P-jar. 12:1; Mat. 6:20) Iya deka nuan gaga ati. Tu nyata lebuh nuan meda, ninga, sereta  ngasaika utai ti ditempa Iya. Jehovah mega ibuhka kitai enggau chara bukai. Iya meri kitai jaku ajar sereta ngajar kitai chara idup ti pemadu badas. Nya alai, lebuh orang nulak jaku ajar Iya ti manah, Iya enda lantang ati. Ku Iya madah ngagai orang ke enda nitihka iring ari Iya: “Kita endang sengaja enggai ngasika Aku . . . Sida deka diau lantang, tang kita deka dipechat. Sida deka belagu gaga ati.” (Isa. 65:12-14) Lebuh kitai ngaga pilih ti manah ba pengidup, kitai ngenataika mulia ngagai Jehovah.—J-lam. 27:11.

PELAN KE DEKA NGASUH NUAN GAGA ATI

3. Nama pelan ke udah disendiaka Jehovah ke nuan?

3 Nama pelan ke udah disendiaka Jehovah ke nuan? Ngambika ulih lantang ati, nuan patut ngelala Jehovah sereta nyembah Iya. Tu meh tuju Jehovah nempa mensia. (Mas. 128:1; Mat. 5:3) Jelu semina nemu makai, ngirup, sereta ngembuan anak aja. Tang Jehovah deka nuan merambu pengidup nuan enggau chara ti ulih ngagaka ati sereta bisi reti. Penempa nuan nya ‘Petara ti pun pengerindu,’ “Petara ti gaga ati,” ke ngaga mensia “neladan gamal Iya Empu.” (2 Kor. 13:11; 1 Tim. 1:11, NW; P-kal. 1:27) Nuan deka gaga ati enti nuan neladan Petara kitai ti ngembuan pengerindu. Bup Kudus madahka: “Lantang agi orang ke meri, ari orang ke nerima.” (SKR. 20:35, NW) Kati nuan bisi ngasaika tu? Tu meh batang pemendar pasal pengidup. Nya alai Jehovah deka nuan ngaga pelan ke dudi hari bepelasarka pengerindu ke orang bukai sereta ke Iya.—Bacha Matthew 22:36-39.

4, 5. Nama ngasuh Jesus gaga ati?

4 Jesus Kristus netapka chunto ti badas ngagai kita ke biak. Lebuh iya agi mit, iya tentu bisi bemain sereta ngelantangka ati diri. Baka ke dipadah Jaku Petara, bisi “maya gaga” sereta “maya betanda.” (P-jar. 3:4) Jesus mega semak ngagai Jehovah enggau belajarka Bup Kudus. Lebuh iya beumur 12 taun, bala pengajar ba Rumah Sembiang alit ati ‘ninga penalam penemu enggau saut iya.’—Luk. 2:42, 46, 47.

5 Lebuh Jesus udah besai tuai, ngereja utai ti diasuh Petara ngagaka ati iya. Ngambika chunto, Petara deka iya “nusui Berita Manah ngagai orang ke seranta” sereta ‘ngeraika orang ke buta.’ (Luk. 4:18) Masmur 40:8 ngambarka asai ati Jesus: ‘Naka meh pengerindu ati aku ngereja peneka Nuan, O Petara aku!’ Jesus rindu ngajar orang pasal Apai iya. (Bacha Luke 10:21.) Bisi sekali, pengudah bejaku enggau seiku indu pasal sembah ti bendar, Jesus madah ngagai bala murid iya: ‘Pemakai aku nya ngereja peneka Iya ke ngirumka aku, lalu nembuka pengawa Iya.’ (Jhn. 4:31-34) Jesus gaga ati laban iya ngayanka pengerindu ngagai Petara sereta ngagai orang bukai. Enti nuan ngereja utai ti sama, nuan mega deka gaga ati.

6. Nama kebuah nya manah bejaku enggau orang bukai pasal pelan nuan ke dudi hari?

 6 Mayuh orang Kristian berengkah nyadi pengerintis lebuh sida agi biak, lalu tu ngasuh sida gaga ati. Ulih nuan bejaku enggau sekeda ari sida pasal pelan nuan? “Enggau naka ulih giga semua jaku lalau, nya baru nuan deka mujur. Enti nuan nadai bulih jaku lalau, pengawa nuan deka puntan.” (J-lam. 15:22) Bala menyadi Kristian tu engka deka madahka pengawa ngerintis meri nuan pelajar ke deka nulung sepemanjai pengidup nuan. Jesus belajarka mayuh utai ari Apai iya lebuh iya di serega. Lalu lebuh iya bejalaika pengawa nginjil ba dunya, iya agi terus belajar. Iya ngasaika pengaga ba ati seraya iya bekunsika berita manah enggau orang bukai sereta ngetanka integriti lebuh bisi penanggul. (Bacha Isaiah 50:4; Heb. 5:8; 12:2) Aram kitai meda kebuah gawa penuh jam ulih ngagaka ati.

KEBUAH NGAGA ORANG NYADI MURID JESUS PENGAWA TI BADAS

7. Nama kebuah mayuh orang ke biak rindu ngaga orang nyadi murid?

7 Jesus ngasuh kitai ngaga orang “nyadi murid” iya sereta ngajar orang. (Mat. 28:19, 20) Enti nuan merambu pengawa tu nyadika kereja nuan, nuan deka bisi pengidup ti ngemuaska ati ke ngemuliaka Petara. Baka kereja bukai, nuan begunaka awak ngambika tau landik. Seiku menyadi Kristian lelaki ke benama Timothy berengkah ngerintis lebuh agi nembiak madahka: “Aku rindu gawa penuh jam ke Jehovah, laban nya chara aku ngayanka pengerindu ngagai Iya. Terubah-rubah, aku nadai pelajar Bup Kudus, tang udah nya aku pindah ngagai endur bukai, lalu dalam kandang sebulan aku bisi beberapa iku pelajar Bup Kudus. Seiku pelajar berengkah datai ngagai Palan Gempuru. Pengudah aku enggau Sekula Bup Kudus ke Menyadi Lelaki ti Bujang pengelama dua bulan, aku nerima siti pengawa ti baru ke alai aku berengkah bisi empat iku pelajar Bup Kudus. Aku rindu ngajar orang, laban aku ulih meda roh kudus ngubah sida.” * (Peda nota kaki.)—1 Tes. 2:19.

8. Nama udah digaga sekeda orang ke biak ngambika ulih nginjil ngagai mayuh agi orang?

8 Sekeda orang ke biak udah belajarka jaku bukai. Ngambika chunto, Jakob, ari Amerika Utara, nulis: “Lebuh aku beumur tujuh taun, mayuh orang ke sekelas enggau aku nya orang Vietnam. Aku deka madah ngagai sida pasal Jehovah, nya alai aku berunding deka belajarka jaku sida. Kesuah agi, aku belajar enggau mandingka The Watchtower edisi jaku English enggau jaku Vietnam. Aku mega begulai enggau eklisia ke ngena jaku Vietnam. Lebuh aku beumur 18 taun, aku berengkah nyadi pengerintis. Udah nya, aku ngagai Sekula Bup Kudus ke Menyadi Lelaki ti Bujang. Tu nulung aku ba pengawa ngerintis ke diatu, lalu semina aku aja ke nyadi tuai gempuru ba raban ke ngena jaku Vietnam. Mayuh orang Vietnam alit ati laban aku belajarka jaku sida. Sida ngelaluka aku ngagai rumah sida, lalu kesuah iya aku ulih belajarka Bup Kudus enggau sida. Sekeda ari sida udah dibaptisa.”—Banding Kereja Rasul 2:7, 8.

9. Nama dipelajarka kitai ari pengawa nyadika orang murid?

 9 Pengawa nyadika orang murid ngajar nuan pasal tebiat gawa ti manah, baka ni bejaku enggau manah, sereta baka ni tau andal sereta bejimat. (J-lam. 21:5; 2 Tim. 2:24) Tang pengawa tu kelebih agi ngagaka ati laban nuan belajarka chara kena nunjukka utai ti dipechaya nuan ari Bup Kudus. Nuan mega belajarka chara deka bekereja enggau Jehovah.—1 Kor. 3:9.

10. Baka ni nuan tau bulih pengaga ati ba pengawa nyadika orang murid taja pan tusah deka bulih orang?

10 Nuan tau bulih pengaga ati ba pengawa nyadika orang murid, taja pan beberapa iku aja orang ke deka belajarka Bup Kudus. Kena nulung orang nyadi murid, semua menyadi Kristian patut besaup. Taja pan semina seiku aja menyadi Kristian ke tetemuka orang ti deka nyadi murid, semua kitai gaga ati laban bela bisi enggau pengawa nya. Ngambika chunto, Brandon, ke ngerintis semilan taun ba endur ke mimit orang belajarka Bup Kudus, madahka: “Aku rindu nusui berita manah, laban nya utai ti diasuh Jehovah kereja kitai. Aku berengkah ngerintis sepengudah aku abis sekula. Aku rindu meransang bala menyadi Kristian lelaki ke biak ba eklisia kami sereta meda sida mansang ba pengarap. Pengudah enggau Sekula Bup Kudus ke Menyadi Lelaki ti Bujang, aku nerima pengawa ngerintis ti baru. Endang amat, aku bedau agi tetemuka orang ke ngaga pemansang sereta ulih dibaptisa, tang pengerintis bukai bisi. Aku gaga ati laban udah bebendar enggau ba pengawa nyadika orang murid.”—P-jar. 11:6.

ASIL ARI UTAI KE DIPERAMBU NUAN

11. Nama bansa pengawa ke Jehovah ti ngagaka ati mayuh orang ke biak?

11 Bisi mayuh peluang ulih gawa ke Jehovah. Ngambika chunto, mayuh orang ke biak nulung ba pengawa nirika bengunan. Kitai begunaka beratus buah Palan Gempuru ke baru. Palan tu ngemuliaka Jehovah, nya alai nulung nirika bengunan nya ulih ngagaka ati nuan. Nuan mega tau bulih pengaga ba ati gawa enggau bala menyadi Kristian. Lalu nuan ulih belajarka mayuh utai, baka chara ngereja pengawa enggau likun sereta chara besaup enggau bala ke ngemataka pengawa nya.

Orang ke gawa penuh jam deka bulih mayuh berekat (Peda genteran 11-13)

12. Baka ni pengawa ngerintis mai ngagai sekeda agi peluang?

12 Seiku menyadi Kristian lelaki ke benama Kevin madahka: “Kenyau ari mit aku deka gawa ke Jehovah penuh jam. Lebuh aku beumur 19 taun, aku berengkah ngerintis. Aku gawa part-time ke seiku menyadi Kristian lelaki ke nyadi tukang kena melanja diri empu. Aku belajar masang atap, jenila, sereta pintu. Udah nya, pengelama dua taun aku enggau tim ke nulung ba penusah kabut, nirika baru Palan Gempuru sereta rumah ke bala menyadi Kristian. Lebuh aku ninga pasal pengawa nirika bengunan di Afrika Selatan begunaka orang, aku minta  lalu dikangauka datai. Lebuh di Afrika, aku mindah ngagai siti projek ke siti projek nirika Palan Gempuru tiap-tiap beberapa minggu. Raban kami baka siti ruang bilik. Kami diau begulai, sama belajarka Bup Kudus, sereta sama bekereja. Aku mega rindu nginjil enggau bala menyadi ke diau mendam di menua nya ninting minggu. Pelan ke diperambu lebuh agi mit udah ngagaka ati aku.”

“Pelan ke diperambuka lebuh agi mit udah ngagaka ati aku”

13. Nama kebuah mayuh orang ke biak gaga ati gawa ke Jehovah ba Betel?

13 Sekeda orang ke kala nyadi pengerintis diatu gawa ba Betel. Gawa ba Betel nya chara pengidup ti ngagaka ati laban semua utai ti dikereja nuan dia nya ke Jehovah. Ruang bilik Betel nulung nyendiaka Bup Kudus sereta litaricha ngambika orang ulih belajarka pemendar. Seiku raban Betel ke benama Dustin madahka: “Aku nyadika pengawa penuh jam nya juluk ati lebuh aku beumur semilan taun, lalu aku berengkah ngerintis pengudah abis sekula. Pengudah setaun setengah, aku dikangau ke Betel, alai aku belajar bejalaika mesin chelak lalu udah nya aku enggau ngaduka program komputer. Ba Betel aku rindu mending pasal pemansang pengawa nyadika orang murid di serata dunya. Aku rindu gawa ditu laban utai ke dikereja kami nulung orang semak ngagai Jehovah.”

 NAMA PELAN KE DEKA DIGAGA NUAN DUDI HARI ILA?

14. Nama ulih digaga nuan diatu kena nyendiaka diri gawa penuh jam?

14 Baka ni nuan ulih nyendiaka diri empu ke pengawa penuh jam? Ngambika ulih gawa ke Jehovah, nuan patut ngemansangka kualiti Kristian. Belajarka Jaku Petara enggau tetap, belematika iya, sereta uji ayanka pengarap nuan ba gempuru Kristian. Lebuh nuan agi besekula, nuan ulih ngemansangka penau bejaku pasal berita manah ngagai orang bukai. Belajar ngayanka diri bisi minat ngagai orang enggau bejimat lebuh nanyaka runding sereta mendingka saut sida. Pia mega, nuan ulih madahka diri deka nulung ba eklisia, baka meresi sereta nyeruri Palan Gempuru. Jehovah lantang ati ngena sida ke baruh ati sereta sanggup gawa. (Bacha Masmur 110:3; SKR. 6:1-3) Rasul Paul mai Timoti gawa nyadi pengerintis seberai tasik laban bala menyadi madahka utai ti manah pasal Timoti.—SKR. 16:1-5.

15. Nama ulih digaga nuan ngambika bulih kereja ti ulih nulung nuan nyadi pengerintis?

15 Mayuh nembiak ke gawa penuh jam begunaka kereja. (SKR. 18:2, 3) Nuan engka deka ngambi kus sekula ti pandak ke ulih nulung nuan bulih kereja part-time ke bisi ba kandang endur nuan diau. Bejaku enggau tuai ti ngabas sereta enggau bala pengerintis ke bukai pasal pelan nuan, lalu minta penemu sida. Udah nya, baka ke dipadah Bup Kudus, ‘serahka utai ti dikereja nuan ngagai Jehovah, nya baru pelan nuan deka mujur.’—J-lam. 16:3; 20:18.

16. Baka ni gawa penuh jam ulih nyendiaka nuan ngereja tanggung pengawa ke bukai dudi hari?

16 Nuan ulih pechaya, Jehovah deka nuan “bulih” pengidup ti ngagaka ati dudi hari. (Bacha 1 Timoti 6:18, 19.) Pengawa penuh jam nulung nuan nyadi orang Kristian ke tegap ba pengarap seraya nuan gawa enggau sida ke gawa penuh jam ti bukai. Pia mega, mayuh ari sida ngasaika gawa penuh jam maya agi biak nulung sida ba rumah tangga. Kesuah agi, orang ke ngerintis sebedau sida berumah-tangga deka terus ngerintis enggau kaling pengidup sida pengudah berumah-tangga.—Rom. 16:3, 4.

17, 18. Baka ni pelan ke diperambu bekaul enggau ati nuan?

17 Ku Masmur 20:4 madah pasal Jehovah: “Awakka Iya meri ngagai nuan utai ti dikinginka nuan lalu ngasuh semua pelan nuan mujur magang.” Seraya nuan merambu ke dudi hari, pikirka utai ti amat deka digaga enggau pengidup nuan. Pikirka utai ti benung digaga Jehovah kemaya hari tu sereta utai ke ulih digaga nuan ba pengawa ke Iya. Udah nya, kereja utai ti ngerinduka ati Iya.

18 Lebuh nuan semina ngena pengidup nuan gawa ke Jehovah aja sereta ngemuliaka Iya, nuan deka gaga amat ati. Nuan deka ‘gaga ati ke Jehovah, lalu Iya deka meri nuan utai ti dikinginka nuan.’—Mas. 37:4.

^ per. 7 Sekula tu udah diganti enggau Sekula Penginjil Perintah Petara.

Nuan deka gaga ati enti nuan ngayanka pengerindu

Lebuh nuan agi besekula, nuan ulih ngemansangka penau bejaku pasal berita manah ngagai orang bukai