Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 4

Pengawa ti Senang Diintu Ngajar Kitai pasal Raja ti Di Serega

Pengawa ti Senang Diintu Ngajar Kitai pasal Raja ti Di Serega

“Tu tubuh aku. . . . ‘Tu darah aku kena nanggam sempekat baru Petara.’”—MAT. 26:26-28.

LAGU 16 Puji meh Jehovah enggau Anak ke Dipilih Iya

DALAM ARTIKEL TU *

1-2. (a) Nama kebuah kitai nemu Jesus meri chara ti senang kena ngingatka pemati iya? (b) Nama bansa kualiti Jesus ti deka dikerandauka kitai?

ULIH nuan ngambarka utai ke nyadi maya Makai Malam Tuan? Mayuh ari kitai tentu ulih ingatka utai ke digaga maya nya. Nama kebuah? Laban pengawa nya senang diintu. Tang nya pengawa ti beguna bendar. Nya alai kitai engka berunding: ‘Nama kebuah pengawa nya nadai ngena mayuh utai?’

2 Lebuh ba bumi, Jesus bejalaika pengawa nginjil. Iya tebilang ketegal ngajar pemendar ngena chara ti senang, terang, sereta mudah dimeretika. (Mat. 7:28, 29) Pia mega, iya meri kitai chara ti senang kena ngingatka * pemati iya. Nya alai, aram kitai berandau pasal pengawa Makai Malam Tuan enggau sekeda utai ti disebut sereta digaga Jesus. Enggau tu kitai ulih nemu Jesus nya amat baruh ati, berani, sereta ngembuan pengerindu, lalu kitai deka belajarka chara neladan iya enggau manah agi.

JESUS BARUH ATI

Roti enggau wain ke dikena lebuh Ngingatka Pemati Jesus ngingatka kitai pasal Jesus ke meri pengidup iya kena nebus kitai sereta pasal iya ke merintah nyadi Raja di serega diatu (Peda genteran 3-5)

3. Nitihka Matthew 26:26-28, baka ni kitai nemu pengawa Ngingatka Pemati Jesus nadai ngena mayuh utai? Lalu nama reti roti enggau wain?

3 Jesus enggau 11 iku rasul ke tetap ati ngepunka pengawa Ngingatka Pemati Jesus. Iya ngena laluh utai ti dikena ngintu Pengerami Paska, lalu pengawa nya enda tusah  digaga. (Bacha Matthew 26:26-28.) Jesus semina ngena roti ti enda beragi sereta wain ke udah bisi dia. Jesus madahka roti ngambarka tubuh iya ti sempurna, lalu wain ngambarka darah iya. Iya deka ngena tubuh enggau darah iya nebus bala rasul iya. Sida enda tekenyit lebuh pengawa nya nadai ngena mayuh utai. Nama kebuah?

4. Ari chara Jesus ngerara Marta, baka ni kitai nemu Jesus dekaka pemati iya diintu ngena chara ti senang?

4 Peratika utai ke nyadi beberapa bulan ti udah, ba taun ketiga Jesus nginjil. Jesus nemuai ngagai pangan iya, Lasarus, Marta, enggau Maria. Lebuh semua orang diau jenuh, Jesus berengkah ngajar. Marta bisi dia. Tang iya beberat agi ke pengawa nyediaka mayuh bansa pemakai ketegal deka masa temuai. Lebuh meda Marta kisuk, Jesus ngerara iya. Jesus nulung iya nemu, iya enda ibuh nyediaka mayuh pemakai. (Luk. 10:40-42) Enda lama udah nya, beberapa jam sebedau mati, Jesus empu nitihka utai ti diajar iya. Iya nentuka makai malam kena ngingatka pemati iya, nadai ngena mayuh utai. Nama ditemu kitai pasal Jesus ari utai tu?

5. Nama ulih ditemu kitai pasal Jesus bekaul enggau pengawa ngingatka pemati iya ti senang diintu? Baka ni tu sejalai enggau Pilipi 2:5-8?

5 Jesus nunjukka diri baruh ati ari semua utai ti disebut sereta digaga iya. Nya kebuah iya ngayanka ati ti baruh ba malam kepenudi iya nyadi mensia ba bumi. (Mat. 11:29) Jesus nemu, iya deka meri diri nyadika genselan ti pemadu mar rega dalam sejarah mensia. Lalu Jehovah deka ngangkatka iya idup baru nyadi raja di serega. Tang Jesus enda minta diri dikemesaika ngena mayuh macham utai kena ngingatka pemati iya. Iya ngasuh bala murid iya ngintu pengawa nya setaun sekali ngena mimit aja utai. (Jhn. 13:15; 1 Kor. 11:23-25) Pengawa ke senang diintu nya nunjukka Jesus enda temegahka diri empu. Kitai gaga ati laban ngembuan Raja ti di serega ke baruh ati.—Bacha Pilipi 2:5-8 ari nota kaki. *

6. Baka ni kitai ulih neladan pemaruh ati Jesus lebuh kitai napi penguji?

 6 Baka ni kitai ulih neladan pemaruh ati Jesus? Iya nya lebuh kitai ngenuluka orang bukai. (Plp. 2:3, 4) Pikirka pasal malam kepenudi Jesus idup ba bumi. Iya nemu, enda lama agi iya deka napi pemati ti balat ngemediska. Lalu bala rasul iya ke tetap ati deka tusah ati laban ditinggalka iya. Tu ngasuh iya balat irauka sida. Nya alai ba malam kepenudi, iya ngajar, meransang, sereta ngasuh ati sida andal. (Jhn. 14:25-31) Jesus enggau baruh ati nunjukka diri ngenuluka orang bukai. Nya endang teladan ti manah ke kitai!

JESUS BERANI

7. Baka ni Jesus nunjukka pemerani enda lama pengudah iya ngepunka pengawa Makai Malam Tuan?

7 Enda lama pengudah ngepunka pengawa Makai Malam Tuan, Jesus ngayanka pemerani ti besai. Baka ni kitai nemu? Iya ngereja peneka Apai iya, taja pan iya dituduh bejaku busung ngelaban Petara lalu dibunuh ngena chara ti ngemaluka. (Mat. 26:65, 66; Luk. 22:41, 42) Jesus ngetanka penaluk kena masa nama Jehovah, nyukung hak Iya merintah, sereta muka peluang idup belama ke mensia ti udah nesal ati. Jesus mega nyikap bala murid iya napi utai ti deka nyadi.

8. (a) Nama dipadah Jesus ngagai bala rasul iya? (b) Betaun pengudah Jesus mati, baka ni bala murid iya neladan pemerani iya?

8 Jesus mega ngayanka pemerani lebuh iya enda berundingka pengirau diri, tang beberatka utai ti diguna bala rasul. Pengawa Makai Malam Tuan dipunka Jesus pengudah Judas ninggalka sida. Pengawa nya deka ngingatka bala rasul pasal penguntung ke diulih ari genselan darah Jesus sereta peluang niki ke serega.  (1 Kor. 10:16, 17) Ngambika sida mengkang tetap ati lalu ulih merintah enggau Jesus ba serega, Jesus madahka utai ti diasuh iya enggau Apai iya gaga sida. (Jhn. 15:12-15) Jesus mega madah pasal penguji ke deka ditapi bala rasul. Nya alai iya meransang sida nitihka teladan iya, lalu ngasuh sida berani! (Jhn. 16:1-4a, 33) Betaun udah nya, bala murid iya agi nitihka teladan iya. Taja pan sida engka tusah, sida betulungka pangan diri lebuh napi mayuh penguji.—Heb. 10:33, 34.

9. Baka ni kitai ulih ngayanka pemerani baka Jesus?

9 Pia mega kemayaharitu, kitai neladan pemerani Jesus. Ambika chunto, kitai patut berani nulung bala menyadi Kristian ke diperinsa ketegal pengarap. Kadang-kadang sida dijil. Nya alai kitai enggau naka ulih nulung sida. Tu nyengkaum besampi ke sida, ngarika sida bejaku lebuh betemu enggau pegawai perintah sereta ba kot. (Plp. 1:14; Heb. 13:19) Siti agi chara kitai ngayanka pemerani iya nya terus nginjil “enggau berani.” (SKR. 14:3) Baka Jesus, kitai keran deka nusui pesan pasal Perintah Petara, taja pan disakal sereta diperinsa orang. Bisi maya nya, kitai enda tentu berani. Nya alai nama patut digaga kitai?

10. Beberapa minggu sebedau Ngingatka Pemati Jesus, nama patut digaga kitai? Nama kebuah kitai patut ngereja nya?

10 Kitai ulih berani enti kitai berunding pasal berekat ke diulih ari genselan tebus. (Jhn. 3:16; Eps. 1:7) Beberapa minggu sebedau Ngingatka Pemati Jesus, kitai bisi peluang ngemansangka ati ti beterima kasih ke tebus. Maya nya, kitai ulih macha ayat Bup Kudus ke ditetapka ba minggu kena Ngingatka Pemati Jesus. Kitai mega belematika utai ke  nyadi ba Jesus sebedau iya mati. Lebuh begempuru maya Makai Malam Tuan, kitai deka nemu agi utai ti digambarka roti, wain, sereta genselan. Enti kitai beterima kasih ke Jesus enggau Jehovah lalu nemu penguntung ke diulih semua kitai ari genselan, pengadang kitai tegap agi, lalu kitai ulih berani nyentuk ke ujung.—Heb. 12:3.

11-12. Naka ke diatu, nama udah dipelajarka kitai?

11 Ari pengawa Makai Malam Tuan kitai nemu, tebus nya berega, lalu kualiti Jesus ti nyulut nya baruh ati sereta berani. Kitai gaga ati laban Jesus agi ngayanka kualiti nya lebuh iya nyadi Imam Besai kitai di serega, lalu bejaku ngarika kitai ngambika kitai ulih selamat! (Heb. 7:24, 25) Kena nunjukka diri beterima kasih, kitai patut ngingatka pemati Jesus, baka ke diasuh iya. (Luk. 22:19, 20) Kitai ngintu nya kena 14 Nisan ninting taun.

12 Ari pengawa Makai Malam Tuan ke senang diintu, kitai belajar pasal siti agi kualiti Jesus. Ketegal kualiti nya, Jesus sanggup mati ke kitai. Lebuh nyadi mensia ba bumi, iya tebilang ketegal kualiti nya. Nama kualiti nya?

JESUS NGEMBUAN PENGERINDU

13. Baka ni John 15:9 enggau 1 John 4:8-10 nerangka pengerindu ti diayanka Jehovah enggau Jesus? Sapa bulih penguntung ari pengerindu seduai iya?

13 Jesus mandangka pengerindu Jehovah ari semua utai ti digaga iya. (Bacha John 15:9; 1 John 4:8-10.) Kelebih agi, Jesus sanggup meri nyawa diri kena nebus kitai. Sekalika kitai nya orang ti dipilih ke serega tauka “bedus ti bukai” ke bisi peluang idup belama iya ba bumi, semua kitai bela bulih penguntung ari pengerindu Jehovah enggau Jesus nengah genselan. (Jhn. 10:16; 1 Jhn. 2:2) Pikirka mega utai ti dikena ba pengawa Makai Malam Tuan. Utai nya mandangka pengerindu enggau pengibuh Jesus ke bala murid iya. Nama kebuah?

Enggau pengerindu Jesus ngepunka pengawa ngingatka pemati iya ke nadai ngena mayuh utai ngambika senang diintu nyentuk ke diatu, taja pan napi penanggul

(Peda genteran 14-16) *

14. Baka ni chara Jesus mandangka pengerindu ngagai bala murid iya?

14 Jesus mandangka pengerindu ngagai bala murid iya ti dipilih ke serega. Iya ngepunka pengawa Makai Malam Tuan ke senang diintu. Sida patut ngingatka pemati Jesus ninting taun, enda ngira nama utai ti ditapi sida, nyengkaum maya sida dijil. (Pem. 2:10) Ulih sida ngasika Jesus? Ulih!

15-16. Nama kebuah sekeda bala menyadi kitai ulih ngatur pengawa Makai Malam Tuan taja pan napi penanggul?

15 Kenyau ari abad keterubah nyentuk ke diatu, orang Kristian ke nyembah Jehovah bebendar ngingatka pemati Jesus. Sida enggau naka ulih ngatur pengawa Makai Malam Tuan nitihka chara ti udah ditetapka, taja pan napi penanggul. Peratika sekeda chunto. Lebuh Menyadi Harold King dijil ba menua China, iya mikirka chara kena ngingatka pemati Jesus. Iya belalai nyediaka roti enggau wain ngena utai ti dikemisi iya. Iya mega bejimat nentuka haribulan. Lebuh maya nya datai, taja pan kediri aja dalam bilik jil, iya belagu, besampi, sereta meri cheramah.

16 Peratika siti agi chunto. Seraban menyadi Kristian indu ditan ba kem alai ngetan orang tangkap maya Perang Dunya II. Sida berambunka nyawa ngambika ulih ngatur pengawa Makai Malam Tuan. Ketegal utai ti dikena enda mayuh, nya alai sida ulih ngatur pengawa nya belalai.  Ku sida madahka: “Kami bediri semak pangan diri ngelingi bangku ke diselap ngena kain burak alai ngengkahka roti enggau wain. Siti aja api dian dikena. Enti ngena lampu karan pengawa kami ditemu orang. . . . Sekali agi kami ngaga semaya enggau Apai kami. Kami deka ngena semua pengering kami nguduska nama Iya.” Sida mandangka pengarap ti amat besai! Lalu ketegal pengerindu ke dipandangka Jesus, kitai ulih ngatur pengawa ngingatka pemati iya taja pan napi penanggul!

17. Nama sekeda tanya ke engka ditanya kitai?

17 Seraya pengawa Ngingatka Pemati Jesus nyau majak semak, kitai ulih nanya diri empu: ‘Baka ni aku ulih neladan pengerindu Jesus? Kati aku ngenuluka utai ti diguna bala menyadi Kristian? Kati aku ngarapka bala menyadi Kristian ngereja mayuh agi ari ke ulih digaga sida? Tauka kati aku nemu pengurang sida?’ Arapka kitai seruran neladan Jesus lalu mandangka diri “siruka pangan diri.”—1 Pet. 3:8.

SERURAN INGATKA UTAI TI DIPELAJAR

18-19. (a) Nama deka digaga nembiak Jehovah? (b) Nama utai ke keran deka digaga kitai?

18 Timpuh alai kitai ngintu pengawa Ngingatka Pemati Jesus nyau deka abis. Lebuh Jesus “datai” maya penusah ti besai, iya deka ngempuruka semua ‘orang ke udah dipilih Petara’ ke agi ba dunya niki ke serega, lalu udah nya kitai enda agi ngintu pengawa Ngingatka Pemati Jesus.—1 Kor. 11:26; Mat. 24:31.

19 Taja pan pengawa Makai Malam Tuan nadai agi diintu, tang nembiak Jehovah deka seruran ngenang pemaruh ati, pemerani, sereta pengerindu Jesus lebuh iya ba bumi. Maya nya ila, orang ke kala enggau pengawa Makai Malam Tuan tentu madah pasal pengawa nya ngagai orang ke rebak nya ngambika sida bulih penguntung. Tang ngambika bulih penguntung diatu, kitai patut keran deka neladan pemaruh ati, pemerani, sereta pengerindu Jesus. Enti kitai ngereja tu, kitai deka bulih berekat ari Jehovah.—2 Pet. 1:10, 11.

LAGU 13 Kristus, Teladan Kitai

^ per. 5 Enda lama agi, kitai deka datai ngagai Makai Malam Tuan kena Ngingatka Pemati Jesus. Pengawa nya ngajar kitai pasal kualiti Jesus baka baruh ati, berani, enggau pengerindu. Ba artikel tu, kitai deka berandauka chara kitai ulih neladan kualiti Jesus nya.

^ per. 2 PENERANG JAKU: Ngingatka reti iya ngereja siti-siti utai kena ngenang sereta bebasaka siti-siti pengawa tauka orang ke tebilang.

^ per. 5 Pilipi 2:5-8, NW: “Gaga runding kita sebaka enggau runding Jesus Kristus: Taja pen iya baka Petara tang iya enda ngumbai diri sebaka enggau Petara, tang iya ngelengkaka semua nya, lalu ngaga diri nyadi ulun, ada ngena gamal mensia. Iya ngemaruhka diri, lalu ngasi nyentuk ke mati, indah mati ba tiang kayu.”

^ per. 58 PENERANG PASAL GAMBAR: Pengawa Ngingatka Pemati Jesus ke dilakun baru bala nembiak Jehovah ke tetap ati: ba abad keterubah; ba ujung taun 1800; ba kem alai ngetan orang tangkap maya jeman Nazi; sereta kemayaharitu ba Palan Gempuru ke enda bedinding di menua Amerika Selatan ti angat.