Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 3

Jaga Meh Ati Nuan

Jaga Meh Ati Nuan

“Ari semua utai ti patut dijaga, jaga meh ati nuan.”—J-LAM. 4:23, NW.

LAGU 36 Jaga meh Ati Kitai

DALAM ARTIKEL TU *

1-3. (a) Nama kebuah Jehovah rinduka Solomon? Nama berekat ke diterima Solomon? (b) Nama tanya ti deka disaut kitai ba artikel tu?

LEBUH Raja Solomon agi biak, Jehovah nanya iya nengah mimpi. Ku Jehovah: “Nama utai ti dipinta nuan ari Aku?” Solomon lalu nyaut: “Aku tu agi biak, lalu enda nemu chara merintah. . . . Beri aku [‘ati ti ngasi,’ NW] kena aku merintah bala nembiak Nuan enggau lurus.” (1 Raj. 3:5-10) Jehovah gaga sereta rinduka Solomon laban iya baruh ati! (2 Sam. 12:24) Nya alai Jehovah meri iya “penemu-dalam enggau pemereti ati.”—1 Raj. 3:12.

2 Seagi-agi Solomon tetap ati, Jehovah deka meri iya mayuh berekat. Sekeda ari berekat nya, iya nirika Rumah Sembiang alai nyembah Jehovah. (1 Raj. 8:20) Iya nyadi tebilang ketegal ngembuan penemu-dalam ari Jehovah. Utai ke disebut iya datai ari Jehovah, lalu ditulis ba tiga iti bup mit dalam Bup Kudus. Siti ari nya bup Jaku Dalam.

3 Ba bup Jaku Dalam, ati suah disebut. Ambika chunto, ba Jaku Dalam 4:23, NW: “Ari semua utai ti patut dijaga, jaga meh ati nuan.” Nama reti “ati” ba ayat tu? Kelimpah ari nyaut tanya nya, kitai mega deka nyaut dua iti agi tanya: Baka ni Sitan ngerusak ati kitai? Lalu baka ni chara kitai nyaga ati? Saut ngagai semua tanya nya ulih nulung kitai mengkang tetap ati ngagai Jehovah.

NAMA RETI “ATI”?

4-5. (a) Nitihka Bup Kudus, nama reti “ati”? (b) Baka ni kitai ulih mandingka pengerai tubuh enggau sapa kitai kebendar?

4 Ba Jaku Dalam 4:23, leka jaku “ati” mai reti runding,  asai ati, pengingin, enggau pengeran. Semua tu nunjukka sapa orang nya kebendar, ukai semina meda gamal iya aja.

5 Enti deka nemu sapa kitai kebendar, kitai ulih mandingka tu enggau pengerai tubuh. Kesatu, enti deka gerai, kitai patut milih pemakai ti manah ke pengerai. Nya alai, enti deka tegap ba pengarap, kitai patut ngisi runding kitai enggau penemu pasal Jehovah. Lalu kitai mega patut suah besenam ngambika gerai. Reti nya kitai patut suah ngereja utai ke nunjukka pengarap kitai tegap. Tu nyengkaum nitihka utai ti dipelajar ari Bup Kudus sereta bekunsika pengarap kitai enggau orang bukai. (Rom. 10:8-10; Jas. 2:26) Kedua, ari gamal sereta tubuh kitai, kitai engka ngumbai diri gerai. Tang kebendar iya kitai bisi penyakit dalam tubuh. Pia mega, kitai engka ngumbai diri tegap ba pengarap laban ngereja mayuh utai ke Jehovah. Tang kitai engka bisi pengingin ti salah. (1 Kor. 10:12; Jas. 1:14, 15) Anang enda ingat, Sitan deka kitai berunding baka iya. Baka ni chara Sitan ngasuh kitai berunding baka iya? Lalu baka ni chara kitai ulih nyaga diri empu?

CHARA SITAN NGERUSAK ATI KITAI

6. Nama utai ti dikedekaka Sitan? Baka ni chara iya narit kitai?

6 Sitan deka kitai baka iya. Iya deka kitai ngelaban standard Jehovah sereta berundingka diri empu. Sitan enda ulih mejal kitai berunding sereta ngereja utai baka iya. Nya alai iya ngena mayuh chara narit kitai. Siti ari chara nya, iya ngena orang ke udah dilimpangka iya. (1 Jhn. 5:19) Sitan deka kitai begulai enggau sida, taja pan kitai nemu nya ulih “ngerusak” ulah sereta runding kitai. (1 Kor. 15:33) Tu meh utai ke nyadi ba Raja Solomon. Iya jadi enggau mayuh indu ke enda nyembah Jehovah. Sida belubah-lubah “nyungkak iya ninggalka” Jehovah.—1 Raj. 11:3.

Baka ni nuan ulih nyaga ati ari runding Sitan? (Peda genteran 7) *

7. Nama chara bukai ke dikena Sitan ngerembaika runding iya? Nama kebuah kitai patut bejimat?

 7 Sitan ngena cherita ba wayang enggau ba TV ngerembaika runding iya. Iya nemu cherita ulih ngerinduka ati. Cherita mega ngajar kitai berunding, mansutka asai ati, sereta utai ke patut dikereja. Jesus empu ngena cherita lebuh ngajar orang. Ambika chunto, iya nusui sempama pasal seiku orang Samaria ti manah ati sereta pasal seiku anak ke tesat. (Mat. 13:34; Luk. 10:29-37; 15:11-32) Orang ke ngembuan runding Sitan engka ngena cherita ngerusak runding kitai. Nya alai kitai patut nemu milih. Sekeda cherita ba wayang tauka ba TV amat ulih ngajar sereta ngerinduka ati, lalu enda ngerusak runding. Tang kitai patut bejimat. Tanya diri empu, ‘Kati cherita tu madahka aku tau nitihka pengingin diri?’ (Gal. 5:19-21; Eps. 2:1-3) Nama patut digaga nuan enti cherita nya bisi kaul enggau runding Sitan? Seliahka meh iya baka nuan ke nyeliahka penyakit ti tau nganu nyawa!

8. Baka ni apai indai ulih nulung anak nyaga ati?

8 Apai indai, kita bisi tanggungjawap ti besai. Jaga meh ati anak kita ari dirusak Sitan. Kita tentu bebendar nyaga anak ari penyakit. Nya kebuah kita meresi rumah tauka muai utai ke tau ngasuh sida sakit. Pia mega, kita deka nyaga anak ari runding Sitan. Nya kebuah kita nyaga sida ari cherita ba wayang tauka ba TV, game elektronik, sereta laman web ke enda patut. Jehovah ngasuh kita nulung sida nyadi pangan Iya. (J-lam. 1:8; Eps. 6:1, 4) Nya alai kita ke apai indai, anang takut netapka atur nitihka standard Jehovah ke kita sebilik. Padah ngagai  anak bagi cherita ke tau sereta ke enda tau dipeda. Padahka mega kebuah kita netapka atur ke baka nya. (Mat. 5:37) Enti anak udah besai, latih sida nentuka kediri empu utai ti betul enggau utai ti salah, nitihka standard Jehovah. (Heb. 5:14) Lalu kingatka, anak belajar mayuh agi ari utai ti digaga kita enti dibanding enggau utai ti disebut kita.—U-dat. 6:6, 7; Rom. 2:21.

9. Nama penemu mensia ke dikena Sitan? Nama kebuah nya tau ngenusahka?

9 Sitan mega nguji ngerusak ati kitai ngambika arapka penemu mensia. (Kol. 2:8) Siti penemu mensia ke dikena Sitan, iya nya nyadi kaya utai ti patut dikenuluka ba pengidup. Enda ngira orang amat nyadi kaya tauka enda, ngembuan runding ke baka nya deka mai penusah. Nama kebuah? Ketegal keran deka nyadi kaya, sida enda nyaga pengerai diri, kaul enggau diri sebilik, sereta kaul enggau Jehovah. (1 Tim. 6:10) Tang kitai beterima kasih ngagai Jehovah. Iya nulung kitai ngembuan runding ke betul pasal duit.—P-jar. 7:12; Luk. 12:15.

BAKA NI KITAI ULIH NYAGA ATI?

Baka bala jejaga enggau orang ke nyaga pintu penama kuta kelia menya, kitai patut mengkang bejaga sereta nyaga ati ari utai ke ulih ngerusak ati kitai (Peda genteran 10-11) *

10-11. (a) Nama patut digaga kitai kena nyaga diri empu? (b) Kelia menya, nama pengawa jejaga? (c) Baka ni ati kitai nya baka jejaga?

10 Ngambika ulih nyaga ati, kitai patut nemu utai ke tau nganu lalu jampat-jampat nyaga diri empu. Leka jaku “jaga” ke bisi ba Jaku Dalam 4:23 ngingatka kitai pasal pengawa jejaga. Kelia menya, jejaga nyaga dinding kuta lalu megau orang lebuh iya meda munsuh datai. Enti kitai ngambarka utai tu, nya nulung kitai nemu utai ke patut digaga kena nyaga runding kitai.

11 Kelia menya, jejaga sama bekereja enggau orang ke nyaga pintu penama kuta. (2 Sam. 18:24-26) Sida nentuka pintu penama ditutup lebuh munsuh majak semak. (Neh. 7:1-3) Pia mega, ati ti dilatih ngena Bup Kudus * baka jejaga. Iya nangkan kitai lebuh Sitan nguji nyerang ati kitai, iya nya lebuh Sitan nguji nguasa runding, asai ati, pengingin, tauka pengeran kitai. Nya alai, lebuh ati ti dilatih nangkan kitai, kitai patut ngasika iya lalu nyaga ati kitai.

12-13. Kitai engka bisi ati deka ngereja nama? Tang nama patut digaga kitai?

12 Peratika siti chara kitai ulih nyaga diri ari runding Sitan. Jehovah madahka, “pengawa bambai, enggau semua ulah ti kamah, tauka pengamu enda patut nyadi ba bala [kitai].” (Eps. 5:3) Nama patut digaga kitai enti orang ke gawa enggau kitai tauka sama sekula berandau pasal ulah seks ti kamah? Kitai nemu kitai patut “muai semua ulah ti jai, enggau semua pengingin dunya.” (Tit. 2:12) Ati kitai ke baka jejaga, engka nangkan kitai. (Rom. 2:15) Kati kitai deka mendingka iya? Kitai engka bisi ati deka ningaka randau sida tauka meda gambar ke dipandangka sida. Tang tu meh maya kitai patut nyeliahka utai nya. Chara iya, kitai nukar topik randau tauka ninggalka sida.

13 Kitai patut berani ngelaban runding enggau pengawa sida ti salah nya. Jehovah meda enti kitai bebendar ngelaban  runding Sitan nya. Nya alai Iya meri kitai pengering sereta penemu-dalam. (2 Ban. 16:9; Isa. 40:29; Jas. 1:5) Nama utai bukai ke ulih digaga kitai kena nyaga ati?

MENGKANG BEJAGA

14-15. (a) Nama utai ke patut diterima ati kitai? Baka ni kitai ulih ngereja nya? (b) Baka ni Jaku Dalam 4:20-22 nulung kitai bulih penguntung ari macha Bup Kudus? (Peda mega kutak “ Chara Belemati.”)

14 Ngambika ulih nyaga ati, kitai ukai semina nulak utai ke ngerusak ati tang mega nerima utai ke ngelindung ati. Kingatka pasal kuta ke bedinding tadi. Pintu penama ditutup ngambika kuta enda diserang munsuh. Pintu nya dibuka lebuh pemakai enggau utai bukai ke diguna dibai tama ngagai kuta. Enti pintu enda dibuka, orang ba kuta nya deka lapar. Pia mega, kitai patut muka ati ngambika runding Petara ulih seruran ngiring kitai.

15 Bup Kudus ngundan runding Jehovah. Nya alai lebuh kitai macha Bup Kudus, kitai ngawakka runding Jehovah ngiring runding, asai ati, sereta pengawa kitai. Baka ni kitai tau bulih penguntung ari macha Bup Kudus? Kitai patut besampi. Seiku menyadi Kristian indu madahka: “Sebedau macha Bup Kudus, aku besampi minta Jehovah nulung aku ‘meda utai ti badas’ dalam Jaku Iya.” (Mas. 119:18) Kitai mega patut belematika utai ti dibacha. Lebuh kitai besampi, macha, sereta belemati, Jaku Petara ulih tama “dalam ati [kitai],” lalu kitai pan rinduka runding Jehovah.—Bacha Jaku Dalam 4:20-22; Mas. 119:97.

16. Nama penguntung ke diulih orang ke meda Berita JW?

16 Chara bukai kitai ulih ngawakka runding Jehovah ngiring kitai, iya nya meda program ba Berita JW®. Sepasang laki bini madahka: “Program ninting bulan amat nyaut sampi kami! Program nya ngering sereta meransang kami lebuh ati kami berasai tusah sereta sunyi. Kami selalu masang lagu asal ke bisi ba Berita JW lebuh berapi, meresi rumah, tauka ngirup te.” Semua program ba Berita JW nulung kitai nyaga ati. Program nya mega ngajar kitai berunding baka Jehovah sereta nyeliah ari ngembuan runding Sitan.

17-18. (a) Baka ke dipadah ba 1 Raja 8:61, nama penguntung enti kitai nitihka utai ti dipelajar ari Jehovah? (b) Nama ulih dipelajarka kitai ari Raja Hesekiah? (c) Ngambika sejalai enggau sampi David ba Masmur 139:23, 24, nama utai ke ulih disampika kitai?

17 Tiap kali kitai meda asil ti manah lebuh ngereja utai ti ngena, nya ngeringka agi pengarap kitai. (Jas. 1:2, 3) Kitai gaga laban Jehovah temegah ati ngangauka kitai anak Iya. Lalu kitai keran agi deka ngelantangka ati Iya. (J-lam. 27:11) Nyadika tiap iti penguji nya peluang kena ngayanka diri bebendar deka nyembah Apai kitai. (Mas. 119:113) Kitai nunjukka diri rinduka Iya enggau pengabis ati, lebuh kitai ngasika pesan Iya sereta ngereja peneka Iya.—Bacha 1 Raja 8:61.

18 Semua kitai ngereja penyalah ketegal kitai enda sempurna. Kelia menya, Raja Hesekiah mega ngereja penyalah. Tang iya nesal ati lalu terus nyembah Jehovah enggau pengabis ati. (Isa. 38:3-6; 2 Ban. 29:1, 2; 32:25, 26) Aram  meh kitai nyeliahka diri ari runding Sitan. Kitai mega patut besampi ngambika ngembuan “ati ti ngasi.” (1 Raj. 3:9; bacha Masmur 139:23, 24.) Kitai ulih mengkang tetap ati ngagai Jehovah enti kitai nyaga ati.

LAGU 54 ‘Tu meh Jalai’

^ per. 5 Kati kitai deka mengkang tetap ati ngagai Jehovah, tauka deka Sitan narit kitai? Tu bepanggai ba sekalika kitai nyaga ati taja pan kitai napi mayuh penguji. Nama reti “ati”? Baka ni Sitan ngerusak ati kitai? Baka ni kitai nyaga ati? Saut iya bisi ba artikel tu.

^ per. 11 PENERANG JAKU: Bup Kudus madahka, Jehovah meri kitai penau kena nentuka runding, asai ati, sereta pengawa kitai nya betul tauka salah. (Rom. 2:15; 9:1) Ati ti dilatih ngena Bup Kudus nya ati ti bepelasarka standard Jehovah. Iya nulung kitai nentuka runding, pengawa, sereta jaku kitai nya manah tauka enda.

^ per. 56 PENERANG PASAL GAMBAR: Seiku menyadi Kristian lelaki ke udah dibaptisa benung meda TV lalu cherita ke ngembuan ulah seks ti kamah ayan ba TV. Iya enda tau enda nentuka utai ke patut digaga.

^ per. 58 PENERANG PASAL GAMBAR: Kelia menya, seiku jejaga meda munsuh ba luar kuta. Iya ngangauka sida ke nyaga pintu penama, lalu sida jampat-jampat nutup sereta ngunchi pintu nya ari dalam kuta.