Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 5

Kualiti ke Meransang Kitai Datai Begempuru

Kualiti ke Meransang Kitai Datai Begempuru

“Madahka pemati [Tuan], nyentuk ngagai iya datai baru.”—1 KOR. 11:26.

LAGU 18 Terima Kasih ke Tebus

DALAM ARTIKEL TU *

1-2. (a) Nama dipeda Jehovah lebuh bejuta-juta iku orang datai ngagai pengawa Makai Malam Tuan? (Peda gambar ba kulit majalah.) (b) Nama deka dikerandauka kitai ba artikel tu?

JEHOVAH meda bejuta-juta iku orang ke datai ngagai pengawa Makai Malam Tuan. Iya ukai semina meda pemayuh orang ke datai, tang Iya meda kitai seiku-seiku. Iya meda orang ke seruran datai ninting taun. Sekeda ari sida nya datai taja pan diperinsa. Bisi nya jarang datai begempuru, tang sida selalu datai ngagai pengawa Makai Malam Tuan. Bisi mega orang ke baru keterubah iya datai ngagai pengawa nya laban sida deka nemu pasal utai ke digaga maya nya. Jehovah meda semua sida tu.

2 Jehovah tentu gaga ati meda mayuh orang datai Ngingatka Pemati Jesus. (Luk. 22:19) Iya ukai semina beberatka penyampau orang ke datai, tang Iya mega beberatka kebuah sida datai. Ba artikel tu, kitai deka berandauka siti tanya ti beguna bendar: Nama kebuah kitai datai Ngingatka Pemati Jesus sereta mega datai ngagai gempuru ninting minggu ke disediaka Jehovah?

Bejuta-juta iku orang di serata dunya dibai datai ngagai Makai Malam Tuan (Peda genteran 1-2)

PEMARUH ATI MERANSANG KITAI DATAI BEGEMPURU

3-4. (a) Nama kebuah kitai datai begempuru? (b) Nama kualiti ke diayanka kitai enti datai begempuru? (c) Nitihka 1 Korint 11:23-26, nama kebuah kitai patut datai Ngingatka Pemati Jesus ninting taun?

3 Siti kebuah kitai datai begempuru laban nya sebagi ari sembah kitai ngagai Petara. Kitai mega datai laban deka diajar Jehovah. Orang ke sumbung ngumbai diri enda ibuh diajar. (3 Jhn. 9) Tang kitai keran deka diajar Jehovah sereta gerempung Iya.—Isa. 30:20; Jhn. 6:45.

4 Enti kitai datai ngagai gempuru, kitai nunjukka diri baruh ati. Reti nya, kitai sedia sereta deka diajar. Kitai  datai Ngingatka Pemati Jesus laban nya pengawa ti besai reti ba kitai. Kitai mega datai ketegal ngasika pesan Jesus ti ngasuh kitai: ‘Kereja tu kena ngingatka aku.’ (Bacha 1 Korint 11:23-26.) Gempuru nya negapka agi pengadang kitai pasal jemah ila. Gempuru nya mega ngingatka kitai pasal pengerindu Jehovah ti besai. Tang Jehovah nemu, kitai begunaka pemerani enggau peransang lebih ari sekali dalam setaun. Nya alai, Iya nyediaka gempuru ninting minggu lalu ngasuh kitai datai. Pemaruh ati meransang kitai ngasika pesan Jehovah tu. Ninting minggu, kitai ngena mayuh jam nyediaka utai dikena begempuru sereta ngagai gempuru nya.

5. Nama kebuah orang ke baruh ati deka datai begempuru?

5 Ninting taun, mayuh orang ke baruh ati deka datai begempuru ngambika diajar Jehovah. (Isa. 50:4) Sida rindu datai Ngingatka Pemati Jesus. Lalu udah nya, sida berengkah datai begempuru ninting minggu. (Sek. 8:20-23) Semua kitai rindu diajar sereta diiring Jehovah, ke nyadi “Penebus” kitai. (Mas. 40:17) Ulih diajar Jehovah enggau Jesus, tentu amat ngagaka ati kitai. Lalu nya meri penguntung ngagai kitai.—Mat. 17:5; 18:20; 28:20.

6. Nama nyadi ngagai seiku lelaki ke baruh ati ti datai ngagai Ngingatka Pemati Jesus?

6 Ninting taun, kitai enggau naka ulih mai mayuh orang datai Ngingatka Pemati Jesus. Mayuh orang ke baruh ati ti datai bulih penguntung. Peratika siti chunto. Beberapa taun suba, seiku lelaki nerima surat mai datai kena Ngingatka Pemati Jesus. Iya madahka diri enda ulih datai. Tang ba malam Ngingatka Pemati Jesus, menyadi Kristian lelaki ke meri iya surat mai datai tekenyit meda iya datai ngagai Palan Gempuru. Lelaki nya gaga ati laban semua orang ngelaluka penatai iya. Tu ngasuh iya deka datai begempuru ninting minggu. Dalam kandang setaun nya, iya semina tiga kali enda ulih datai begempuru. Nama nulung iya deka seruran datai? Nya ketegal iya baruh ati deka ngubah runding diri. Menyadi Kristian lelaki ke meri iya surat mai datai madahka, “Iya orang ke baruh ati.” Jehovah tentu udah narit lelaki nya nyadi penyembah Iya. Diatu, lelaki nya udah dibaptisa.—2 Sam. 22:28; Jhn. 6:44.

7. Baka ni utai ti dipelajar ba gempuru sereta dibacha ba Bup Kudus meransang kitai baruh ati?

7 Utai ti dipelajar ba gempuru sereta utai ti dibacha ba Bup Kudus nulung kitai baruh ati. Beberapa minggu sebedau Ngingatka Pemati Jesus, gempuru kitai suah berandauka teladan sereta pemaruh ati Jesus ke nyadi tebus kitai. Beberapa hari sebedau Ngingatka Pemati Jesus, kitai diperansang macha ayat Bup Kudus ke bekaul enggau pemati sereta pengangkat Jesus ari mati. Utai ti dipelajar ba gempuru sereta dibacha ba Bup Kudus nulung kitai beterima kasih agi ke genselan Jesus. Kitai diperansang neladan pemaruh ati Jesus lalu ngereja peneka Jehovah taja pan napi penusah.—Luk. 22:41, 42.

PEMERANI MERANSANG KITAI DATAI BEGEMPURU

8. Baka ni Jesus mandangka pemerani?

8 Kitai mega neladan Jesus lebuh mandangka pemerani. Jesus mandangka pemerani beberapa hari sebedau iya mati. Iya nemu, munsuh deka ngemalu,  malu, sereta munuh iya. (Mat. 20:17-19) Tang, Jesus berani napi pemati. Sebedau mati, Jesus bejaku enggau bala rasul iya lebuh sida ba Getsemani: ‘Angkat, aram kitai mupuk. Peda kita, orang ke nyual aku udah datai!’ (Mat. 26:36, 46) Lebuh seraban orang ke mai senyata datai nangkap iya, iya mansang ke mua, madahka sapa diri, sereta ngasuh bala soldadu ngelepaska bala rasul iya. (Jhn. 18:3-8) Jesus amat berani! Kemayaharitu, orang Kristian ti dipilih ke serega enggau bedus ti bukai bebendar neladan pemerani Jesus. Baka ni?

Pemerani ke dipandangka nuan lebuh datai begempuru ngeringka pengarap orang bukai (Peda genteran 9) *

9. (a) Nama kebuah kitai patut berani ngambika ulih datai begempuru enggau tetap? (b) Baka ni teladan kitai ulih meransang bala menyadi Kristian ke benung dijil ketegal pengarap?

9 Ngambika ulih datai begempuru enggau tetap, kitai patut mandangka pemerani taja pan napi penusah. Sekeda bala menyadi Kristian datai begempuru taja pan sida tusah ati, lemi semengat, tauka sakit. Bisi nya berani datai begempuru taja pan balat disakal diri sebilik tauka perintah. Pikirka baka ni teladan kitai meransang bala menyadi Kristian ke benung dijil ketegal pengarap. (Heb. 13:3) Lebuh sida ninga kitai mengkang nyembah Jehovah taja pan napi penguji, sida diperansang ngetanka pengarap, pemerani, sereta penaluk sida. Rasul Paul mega napi utai ti sama. Lebuh iya ditan ba rumah iya di Rome, iya gaga ati lebuh ninga bala menyadi iya tetap ati nyembah Petara. (Plp. 1:3-5, 12-14) Enda lama sebedau tauka sepengudah Paul dilepaska, iya nulis surat ngagai orang Hebrew. Ba surat nya, iya meransang orang Kristian ke tetap ati nya “majak rinduka diri menyadi dalam Kristus” lalu enda ngelengkaka pengawa begempuru.—Heb. 10:24, 25; 13:1.

10-11. (a) Sapa patut dibai kitai datai ngagai pengawa Ngingatka Pemati Jesus? (b) Nitihka Epesus 1:7, nama kebuah kitai mai sida datai?

10 Kitai mandangka pemerani lebuh mai kaban belayan, orang ke sama kereja, sereta orang ke berimbai pendiau enggau kitai datai Ngingatka Pemati Jesus. Nama kebuah kitai keran deka mai sida datai? Laban kitai beterima kasih ke utai ti udah digaga Jehovah enggau Jesus. Kitai deka sida belajar baka ni sida tau bulih penguntung ari pengasih Jehovah nengah tebus Jesus.—Bacha Epesus 1:7; Pem. 22:17.

11 Kelimpah ari mandangka pemerani lebuh datai begempuru, kitai mega mandangka siti agi kualiti manah, ke dikembuan Jehovah enggau Jesus.

PENGERINDU MERANSANG KITAI DATAI BEGEMPURU

12. (a) Baka ni gempuru ngenalamka pengerindu kitai ke Jehovah enggau Jesus? (b) Nitihka 2 Korint 5:14, 15, baka ni kitai ulih neladan Jesus?

12 Pengerindu kitai ke Jehovah enggau Jesus meransang kitai datai begempuru.  Lalu utai ti dipelajar ba gempuru ngenalamka pengerindu kitai ke Jehovah enggau Jesus. Utai ti dipelajar mega ngingatka kitai pasal utai ti udah digaga seduai iya. (Rom. 5:8) Lebuh datai Ngingatka Pemati Jesus, kitai enggau orang ke bedau belajar pasal tebus diingatka pasal penalam pengerindu seduai iya ke semua kitai. Ketegal beterima kasih, kitai deka neladan Jesus ba pengidup ninting hari. (Bacha 2 Korint 5:14, 15.) Kelimpah ari nya, ati kitai diperansang muji Jehovah ke udah nyediaka tebus. Siti chara kitai muji Jehovah, iya nya meri saut ari ati ba gempuru.

13. Baka ni kitai ulih mandangka penalam pengerindu kitai ke Jehovah enggau Jesus? Terangka.

13 Kitai ulih mandangka penalam pengerindu kitai ke Jehovah enggau Jesus enti kitai enggau naka ulih datai begempuru. Ambika chunto, mayuh eklisia ngatur siti gempuru ba tengan minggu, pengudah orang abis kereja. Maya tu mayuh ari kitai lelak. Siti agi gempuru diatur ba ujung minggu. Maya nya mayuh orang belelak. Kati Jehovah beratika kitai datai begempuru taja pan kitai lelak? Au, Iya tentu meda! Bendar agi kitai datai begempuru, gaga agi ati Jehovah enggau pengerindu ke dipandangka kitai ngagai Iya.—Mrk. 12:41-44.

14. Baka ni Jesus mandangka pengerindu ke enda berundingka diri empu?

14 Jesus netapka teladan lebuh mandangka pengerindu ke enda berundingka diri empu. Iya ukai semina sanggup mati ke bala murid iya, tang iya mega ngenuluka utai ti diguna sida ba pengidup iya ninting hari. Ambika chunto, iya begulai sereta ngajar bala murid iya, taja pan iya lelak tauka berasai balat ditekan. (Luk. 22:39-46) Iya enda beberatka utai ke ulih diterima iya ari orang bukai. Tang iya beberatka utai ke ulih diberi iya ngagai orang bukai. (Mat. 20:28) Enti kitai bisi pengerindu ke dalam ngagai Jehovah sereta ngagai bala menyadi Kristian kitai, kitai tentu enggau naka ulih datai ngagai pengawa Makai Malam Tuan sereta datai begempuru ninting minggu.

15. Kelebih agi, sapa ke deka ditulung kitai?

15 Kitai enggau bala menyadi Kristian kitai baka diri sebilik. Lalu kitai rindu ngena mayuh jam mai orang ke baru,  datai begempuru enggau kitai. Tang, kitai rindu agi nulung orang ke “sama pengarap enggau kitai,” kelebih agi sida ke enda agi nginjil tauka datai begempuru. (Gal. 6:10) Kitai nunjukka pengerindu ngagai sida enti kitai meransang sida datai begempuru, kelebih agi datai ngagai Ngingatka Pemati Jesus. Baka Jehovah enggau Jesus, kitai amat gaga ati meda sida pulai baru ngagai Apai sereta Pengibun kitai, Jehovah.—Mat. 18:14.

16. (a) Baka ni kitai ulih meransang pangan diri? Nama penguntung ke diulih kitai ari gempuru? (b) Nama kebuah maya tu alai ti manah ngingatka jaku Jesus ba John 3:16?

16 Beberapa minggu ti deka datai, enggau naka ulih meh mai mayuh orang datai Ngingatka Pemati Jesus kena lemai Hari Lima, 19 April 2019. (Peda kutak “ Kati Nuan Deka Mai Sida Datai?”) Sepemanjai taun tu, aram meh kitai datai begempuru enggau tetap ngambika ulih meransang pangan diri. Seraya pengujung dunya majak semak, kitai begunaka gempuru ke ulih nulung kitai mengkang baruh ati, berani, sereta ngembuan pengerindu. (1 Tes. 5:8-11) Enggau pengabis ati, aram meh semua kitai mandangka asai ati ti beterima kasih ngagai Jehovah enggau Jesus, ke balat rinduka kitai!—Bacha John 3:16.

LAGU 126 Bejaga, Tegap, enggau Kering

^ per. 5 Pengawa Ngingatka Pemati Jesus kena lemai Hari Lima, 19 April 2019, deka nyadi gempuru ti pemadu besai reti ba taun tu. Nama meransang kitai deka datai ngagai gempuru nya? Laban kitai deka ngagaka ati Jehovah. Ba artikel tu, kitai deka berandauka kualiti ti meransang kitai datai Ngingatka Pemati Jesus sereta gempuru ninting minggu.

^ per. 52 PENERANG PASAL GAMBAR: Seiku menyadi Kristian lelaki ke dijil ketegal pengarap berasai diperansang lebuh macha surat ke dikirum ngagai iya. Iya nemu ruang bilik iya semampai ingatka iya. Iya gaga ati nemu sida sebilik mengkang tetap ati ngagai Jehovah taja pan napi penanggul ari perintah ba menua sida.