Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 1

“Anang Irau, Laban Aku tu Petara Kita”

“Anang Irau, Laban Aku tu Petara Kita”

“Anang takut, laban Aku bisi enggau kita. Anang irau, laban Aku tu Petara kita. Aku deka ngasuh kita kering lalu nulung kita.”—ISA. 41:10, NW.

LAGU 7 Jehovah Pengering Aku!

DALAM ARTIKEL TU *

1-2. (a) Baka ni jaku ba Isaiah 41:10 nulung menyadi Kristian indu ke benama Yoshiko? (b) Sapa tau bulih penguntung ari jaku ke diasuh Jehovah tulis ba Isaiah 41:10?

SEIKU menyadi Kristian indu ke benama Yoshiko ninga berita ti enda manah. Lutur madahka iya semina ulih idup beberapa bulan aja. Nama digaga Yoshiko? Iya ingatka ayat Bup Kudus ti dikerinduka iya ba Isaiah 41:10. * (Bacha ari nota kaki.) Lebuh berandau enggau lutur, iya madahka diri enda takut laban Jehovah bisi enggau iya. * Jaku ti ngelantangka ati ba ayat nya nulung iya arapka Jehovah enggau pengabis ati. Ayat ti sama mega ulih nulung kitai mengkang lantang ati lebuh napi penguji ti besai. Baka ni ayat nya ulih nulung kitai? Aram kitai mansik dulu kebuah Jehovah meri jaku nya ngagai Isaiah.

2 Terubah-rubah, Jehovah ngasuh Isaiah nulis jaku nya kena merindang orang Judah ke deka ditaban ngagai menua Babilon. Tang, Jehovah mega deka jaku nya meri penguntung ngagai semua nembiak Iya ke bukai. (Isa. 40:8; Rom. 15:4) Kemayaharitu, kitai diau ba maya ke “mayuh macham penusah,” lalu lebih ari ke udah, kitai begunaka jaku peransang ba bup Isaiah.—2 Tim. 3:1.

3. (a) Nama sekeda semaya ke bisi ba Isaiah 41:10? (b) Nama kebuah kitai begunaka semaya tu?

3 Ba artikel tu, kitai deka berandauka tiga iti semaya ba Isaiah 41:10, ke dipilih nyadi ayat taun 2019: (1) Jehovah deka enggau kitai, (2) Iya Petara kitai, lalu (3) Iya deka  nulung kitai. Semaya nya deka ngemansangka pengarap kitai. Kitai begunaka semaya ari Jehovah * laban, baka Yoshiko, kitai napi penguji ba pengidup. Kitai mega napi penanggul ketegal utai ti enda manah ke nyadi ba dunya. Sekeda ari kitai indah patut natka diri diperinsa bala perintah ti bekuasa. Aram kitai berandauka tiga iti semaya nya.

“AKU BISI ENGGAU KITA”

4. (a) Nama semaya ti keterubah ke deka dikerandauka kitai? (Peda mega nota kaki.) (b) Baka ni chara Jehovah ngayanka asai ati Iya ngagai kitai? (c) Baka ni asai ati nuan pengudah ninga semaya Iya?

4 Semaya Jehovah ti keterubah nya: “Anang takut, laban Aku bisi enggau kita.” * Jehovah nunjukka Diri bisi enggau kitai lebuh Iya ngayanka pengibuh sereta pengerindu ke kitai. Peratika baka ni asai ati Jehovah ke kitai. Ku Iya madahka: “Laban Aku sayauka kita enggau laban Aku rinduka kita lalu meri kita basa.” (Isa. 43:4) Nadai utai ba dunya raya ke ulih nagang Jehovah rinduka orang ke nyembah Iya. Iya mengkang taluk ngagai kitai. (Isa. 54:10) Kitai berani laban nemu Iya rinduka kitai lalu Iya deka nyadi Pangan kitai. Iya deka nyaga kitai kemayaharitu, sama baka Iya ke nyaga pangan Iya, Abram (Abraham). Ku Jehovah madah ngagai iya: “Anang takut, Abram. Aku deka nyaga nuan.”—P-kal. 15:1.

Enggau saup ari Jehovah, kitai ulih “bejalai nengah” penguji ke baka ai ti dalam tauka api (Peda genteran 5-6) *

5-6. (a) Baka ni kitai nemu Jehovah keran deka nulung kitai mutarka penguji ke ditapi kitai? (b) Nama ulih dipelajarka kitai ari teladan Yoshiko?

5 Kitai nemu, Jehovah keran deka nulung kitai mutarka penguji ke ditapi kitai. Iya besemaya ngagai nembiak Iya: “Lebuh kita bejalai nengah ai ti dalam, Aku deka meruan enggau kita. Penusah ti nuntung kita enda ulih ngalahka kita. Lebuh kita bejalai ngerenchah api, kita enda betu. Penguji ti besai ti deka datai, enda ulih ngemediska kita.” (Isa. 43:2) Nama reti semua jaku tu?

 6 Jehovah nadai madahka Diri deka muai penanggul ke ngasuh pengidup kitai tusah. Tang Iya enda nejuka penanggul ke baka “ai ti dalam” ngasuh kitai lemas, tauka penguji ke baka “api” mai pengerusak ti belama iya ngagai kitai. Iya besemaya deka enggau kitai, nulung kitai “bejalai nengah” penanggul nya. Nama deka digaga Jehovah? Iya deka nulung kitai berani ngambika kitai ulih mengkang taluk ngagai Iya, indah lebuh kitai napi pemati. (Isa. 41:13) Yoshiko, ke disebut ba pun tadi ngasaika nya amat. Anak indu iya madahka: “Kami alit ati laban indai enda irau. Jehovah amat udah meri iya pengelantang ba ati. Nyentuk ngagai hari kepenudi sebedau indai nadai, indai berandau pasal Jehovah sereta semaya Iya, ngagai bala misi sereta orang sakit ke bukai.” Nama dipelajarka kitai ari teladan Yoshiko? Enti kitai arapka semaya Petara ke madahka “Aku deka meruan enggau kita,” kitai mega deka berani sereta tan natka penguji.

“AKU TU PETARA KITA”

7-8. (a) Nama semaya kedua ti deka dikerandauka kitai, lalu nama reti semaya nya? (b) Nama kebuah Jehovah madah ngagai orang Judah ke dibuai ngagai Babilon: “Anang irau”? (c) Nama sekeda jaku ba Isaiah 46:3, 4 ke udah nulung nembiak Petara enda agi takut?

7 Peratika semaya kedua ke ditulis Isaiah: “Anang irau, laban Aku tu Petara kita.” Nama reti leka jaku irau ke dipadah ba ayat tu? Dalam jaku asal, “irau” mai reti “selalu malik ke belakang laban takutka utai tauka orang ke tau ngemedis” tauka “kesal ati laban napi utai ti tau nganu.”

8 Orang Judah deka dibuai ngagai menua Babilon. Tang nama kebuah Jehovah enda ngasuh sida “irau”? Laban Iya nemu orang Babilon deka nyadi takut. Nama utai ke ngasuh sida takut? Semak pengujung timpuh 70 taun pengudah orang Judah dibuai ngagai Babilon, bala soldadu Media-Persia deka nyerang menua nya. Jehovah deka ngena raban soldadu tu ngelepaska nembiak Iya ari Babilon. (Isa. 41:2-4) Lebuh orang Babilon sereta orang ari bansa bukai nemu munsuh sida nyau semak, sida nguji ngetanka pemerani sida enggau “meransang pangan diri.” Sida mega ngaga mayuh agi engkeramba, ngichaka engkeramba nya nyaga sida. (Isa. 41:5-7) Tang Jehovah ngelantangka ati orang Judah. Ku Iya madahka: “Kita orang Israel [enda baka orang ke diau semak kita] ti nembiak Aku . . . Anang irau, laban Aku tu Petara kita.” (Isa. 41:8-10) Peratika utai ku Jehovah: “Aku tu Petara kita.” Ari jaku tu, Jehovah nulung bala penyembah Iya ti taluk badu irau. Iya madahka Diri agi nyadi Petara sida, lalu sida agi nyadi nembiak Iya. Ku Iya madah ngagai sida: “Aku deka ngibun kita . . . lalu ngelepaska kita.” Jaku semaya nya tentu ngeringka orang Judah.—Bacha Isaiah 46:3, 4.

9-10. Nama kebuah kitai enda patut takut? Terangka.

9 Kelebih agi diatu, mayuh orang irau laban utai ba dunya majak jai. Amat, kitai mega napi utai ti sama. Tang kitai enda ibuh takut. Jehovah madahka: “Aku tu Petara kita.” Nama kebuah jaku nya amat ulih ngelantangka ati kitai?

10 Peratika chunto tu: Jim enggau Ben benung nepan bilun ke dipangkaka ribut ti balat. Lebuh bilun nya begunchang terebai ke atas ke baruh, bala penumpang  ninga nyawa pansut ari sepika: “Kena belulang pengelikun kita. Kitai deka terebai ngelaban kabut enda lama.” Jim balat irau. Tang udah nya ku pilot agi: “Aku pilot kita. Anang irau.” Maya nya, Jim ngilikka pala lalu bejaku, “Amat utai ku iya nya?” Tang iya meda Ben enda irau. Jim nanya iya: “Nama kebuah nuan enda irau?” Ben tuchum lalu nyaut: “Laban aku ngelala orang ke nerebaika bilun tu. Iya apai aku!” Udah nya Ben madahka: “Aku deka madah pasal apai aku. Enti nuan ngelala iya sereta nemu baka ni iya nerebaika bilun, nuan mega tentu enda irau.”

11. Nama ulih dipelajarka kitai ari chunto Jim enggau Ben?

11 Nama ulih dipelajarka kitai ari chunto nya? Baka Ben, kitai enda irau laban kitai amat ngelala Apai ti di serega, Jehovah. Kitai nemu Iya deka nulung kitai tan napi penanggul ke baka kabut ti ditapi kitai ba hari ti penudi tu. (Isa. 35:4) Kitai arapka Jehovah, nya alai kitai enda kelalu irau enti dibandingka enggau orang ba dunya tu. (Isa. 30:15) Baka Ben, kitai mega deka bekunsi enggau orang bukai pasal kebuah kitai andalka Petara. Lalu sida mega ulih pechaya, Jehovah deka nulung sida enda ngira nama penanggul ke ditapi sida.

“AKU DEKA NGASUH KITA KERING LALU NULUNG KITA”

12. (a) Nama semaya ketiga ti deka dikerandauka kitai? (b) Nama ulih ditemu kitai pasal “kuasa” Jehovah?

12 Pikirka semaya ketiga ke ditulis Isaiah: “Aku deka ngasuh kita kering lalu nulung kita.” Isaiah udah nerangka baka ni Jehovah deka ngeringka nembiak Iya. Ku Isaiah madahka: ‘Petara Jehovah deka datai lalu merintah ngena kuasa.’ (Isa. 40:10) Ayat nya ngingatka kitai, Jehovah nya Raja ti bekuasa.  Iya ngena pengering Iya ti nadai banding nulung sereta nyaga nembiak Iya kelia, lalu Iya terus ngering sereta ngelindung orang ke arapka Iya kemayaharitu.—U-dat. 1:30, 31; Isa. 43:10.

Nadai senyata ulih ngemediska kitai enti kitai dilindung Jehovah (Peda genteran 12-16) *

13. (a) Ni maya Jehovah deka ngeringka kitai? (b) Nama semaya ti deka meri kitai pengering sereta ati ti andal?

13 Kelebih agi lebuh munsuh merinsaka kitai, Jehovah ngamatka semaya Iya: “Aku deka ngasuh kita kering.” Ba sekeda menua kemayaharitu, munsuh kitai bebendar nagang pengawa nginjil tauka gerempung kitai. Taja pia, kitai enda kelalu irau pasal utai tu. Jehovah udah besemaya deka meri kitai pengering sereta ati ti andal. Iya besemaya: “Nadai senyata ti digaga ulih ngemediska nuan.” (Isa. 54:17) Semaya nya ngingatka kitai pasal tiga iti utai ti beguna bendar.

14. Nama kebuah kitai enda tekenyit enti munsuh Petara nyerang kitai?

14 Kesatu, ketegal kitai nyadi murid Jesus, orang deka begedika kitai. (Mat. 10:22) Jesus madahka bala murid iya deka balat diperinsa ba hari ti penudi. (Mat. 24:9; Jhn. 15:20) Kedua, nabi Isaiah kala madahka, munsuh ukai semina begedika kitai. Sida deka ngena bemacham-macham senyata ngelaban kitai. Sida engka ngena jaku bula, jaku petenah, tauka balat merinsaka kitai. (Mat. 5:11) Jehovah enda nagang munsuh kitai ngena semua senyata nya lebuh sida beperang ngelaban kitai. (Eps. 6:12; Pem. 12:17) Tang kitai enda ibuh takut. Nama kebuah?

15-16. (a) Nama utai ketiga ti patut dikingatka kitai? Baka ni Isaiah 25:4, 5 nunjukka utai nya amat? (b) Nitihka Isaiah 41:11, 12, nama pengujung ngagai munsuh kitai?

15 Peratika utai ketiga ti patut dikingatka kitai. Jehovah madahka “nadai senyata” ke dikena ngelaban kitai “ulih ngemediska” kitai. Sama baka dinding ke ngelindung kitai ari kabut ti mai pengerusak,  Jehovah ngelindung kitai ari “munsuh ti jai.” (Bacha Isaiah 25:4, 5.) Munsuh kitai enda ulih ngemediska kitai belama iya.—Isa. 65:17.

16 Jehovah mega nulung kitai arap agi ke Iya enggau nerangka utai ti deka nyadi ngagai orang ke “ringat ngagai” kitai. (Bacha Isaiah 41:11, 12.) Enda ngira ni pemalat munsuh ngelaban tauka nyerang kitai, pengujung iya tetap sama: Semua munsuh nembiak Petara “deka mati.”

CHARA KITAI ARAP AGI KE JEHOVAH

Kitai ulih arap agi ke Jehovah enti kitai selalu macha pasal Iya ba Bup Kudus (Peda genteran 17-18) *

17-18. (a) Nama kebuah macha Bup Kudus ulih nulung nuan arap agi ke Petara? Padahka siti chunto. (b) Nama penguntung ke diulih kitai lebuh belematika ayat taun 2019?

17 Kitai arap agi ke Jehovah enti kitai ngelala Iya enggau dalam. Lalu chara kitai ulih ngelala Jehovah, iya nya macha Bup Kudus lalu belematika utai ti dibacha kitai. Bup Kudus madahka chara Jehovah ngelindung nembiak Iya kelia. Nya ngasuh kitai pechaya, Iya deka nyaga kitai diatu.

18 Peratika jaku sempama ti dikena Isaiah ngambarka chara Jehovah ngelindung kitai. Iya ngambarka Jehovah nya baka pengibun bedus, lalu nembiak Iya baka bedus. Ku Isaiah madah pasal Jehovah: “Iya deka ngempuruka sida lalu ngerendut sida, lalu mai sida.” (Isa. 40:11) Lebuh kitai nemu diri dilindung Jehovah, kitai berasai likun sereta lantang ati. Ngambika kitai meruan lantang ati maya napi penanggul, ulun ke tetap ati sereta bepenemu-dalam udah milih Isaiah 41:10 nyadika ayat taun 2019, “Anang irau, laban Aku tu Petara kita.” Pikirka ayat nya enggau dalam. Nya deka ngeringka nuan lebuh napi penanggul ti deka datai.

LAGU 38 Iya Deka Ngeringka Nuan

^ per. 5 Ayat taun ti dipilih kena 2019 meri kitai tiga iti kebuah ulih meruan lantang ati, taja pan utai ti enda manah bisi nyadi ba dunya tauka ba pengidup kitai. Artikel tu deka mansik kebuah nya, lalu nulung kitai arap agi ke Jehovah sereta enda kelalu irau. Pikirka ayat taun nya enggau dalam. Ingatka iya. Nya deka ngeringka nuan lebuh napi penanggul dudi hari ila.

^ per. 1 Isaiah 41:10, NW: “Anang takut, laban Aku bisi enggau kita. Anang irau, laban Aku tu Petara kita. Aku deka ngasuh kita kering lalu nulung kita. Aku deka nyaga kita lalu ngelepaska kita.”

^ per. 1 Peda Menara Pengawal, Julai 2016, lamb. 18 dalam jaku Melayu.

^ per. 3 PENERANG JAKU: Semaya ari Jehovah nya jaku ke madahka siti-siti utai amat deka nyadi. Semaya ke diberi Jehovah ngagai kitai ulih ngasuh kitai enda kelalu irauka penanggul ti deka nyadi ba pengidup.

^ per. 4 Rambai jaku “Anang takut” disebut dua kali, lalu “Enda tau takut” disebut sekali ba Isaiah 41:10, 13, enggau 14. Ayat ti sama mega suah ngena leka jaku “Aku” (ke dituju ngagai Jehovah). Nama kebuah Jehovah ngasuh Isaiah suah ngena leka jaku “Aku”? Tu kena madahka utai ti beguna bendar—kitai ulih nyadi berani enti kitai arapka Jehovah.

^ per. 53 PENERANG PASAL GAMBAR: Diri sebilik napi penguji ba endur kereja, ba pengerai, ba pengawa nginjil, sereta ba sekula.

^ per. 55 PENERANG PASAL GAMBAR: Bala polis datai maya Saksi-Saksi Jehovah begempuru ba rumah, tang bala menyadi Kristian enda takut.

^ per. 57 PENERANG PASAL GAMBAR: Belajarka Bup Kudus ba Diri Sebilik enggau tetap nulung kitai betan.