Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 9

Chara Jehovah Ngayanka Pengerindu enggau Pengelurus Maya Jeman Orang Israel

Chara Jehovah Ngayanka Pengerindu enggau Pengelurus Maya Jeman Orang Israel

‘Jehovah rinduka atur ti lurus sereta betul. Dunya penuh laban pengerindu Iya ti meruan belama iya.’—MAS. 33:5.

LAGU 3 Nuan Pengering, Pengadang enggau Pengibun Kami

DALAM ARTIKEL TU *

1-2. (a) Nama utai ke dikinginka semua kitai? (b) Nama utai ke ulih dipechaya kitai?

SEMUA kitai deka dikesayau sereta deka orang ngereja utai ti lurus ngagai kitai. Enti enda, kitai engka ngasaika diri enda beguna sereta enda dikeibuhka.

2 Jehovah nemu kitai ingin deka dikesayau sereta keranka utai ti lurus. (Mas. 33:5) Kitai pechaya Iya rinduka kitai lalu Iya deka orang ngereja utai ti lurus ngagai kitai. Tu ulih dipeda ari Adat ke diberi Iya ngagai orang Israel nengah Moses. Enti nuan keran deka dikesayau orang tauka ati nuan asa ketegal utai ti enda lurus, peratika baka ni Adat Moses * nunjukka Jehovah ibuhka nembiak Iya.

3. (a) Nitihka Rome 13:8-10, nama ulih ditemu kitai lebuh belajar pasal Adat Moses? (b) Nama sekeda tanya ke deka disaut kitai?

3 Lebuh kitai belajarka Adat Moses, kitai ulih nemu pasal pengerindu Jehovah. (Bacha Rome 13:8-10.) Ba artikel tu, kitai deka mansik beberapa iti adat ke diberi Jehovah ngagai orang Israel lalu nyaut tanya tu: Nama kebuah kitai ulih ngumbai Adat Moses bepelasarka pengerindu? Nama kebuah kitai ulih ngumbai Adat nya meransang orang ngereja utai ti lurus? Baka ni orang ke diberi kuasa bejalaika Adat nya? Lalu sapa kelebih agi dilindung Adat nya? Saut ngagai semua tanya  nya ulih meri pengelantang, pengadang, sereta nulung kitai semak agi ngagai Jehovah.—SKR. 17:27; Rom. 15:4.

ADAT MOSES BEPELASARKA PENGERINDU

4. (a) Nama kebuah kitai ulih ngumbai Adat Moses bepelasarka pengerindu? (b) Nitihka Matthew 22:36-40, nama pesan ti dikemeratka Jesus?

4 Adat Moses bepelasarka pengerindu laban pengerindu ke meransang Jehovah ngereja semua utai. (1 Jhn. 4:8) 600 iti adat sereta adat ke bukai ba Adat Moses bepelasarka dua iti pesan, iya nya pengerindu ke Petara, sereta pengerindu ke orang bukai. (Lew. 19:18; U-dat. 6:5; bacha Matthew 22:36-40.) Nya kebuah, kitai ulih beratika tiap iti adat nya ngajar kitai pasal pengerindu Jehovah. Aram kitai berandauka sekeda adat nya.

5-6. (a) Nama utai ti dikemeratka Jehovah ba laki bini? (b) Nama diperatika Jehovah lebuh bisi penanggul ti besai ba tikah? Beri siti chunto.

5 Taluk ngagai kaling pengidup sereta jaga anak nuan. Jehovah dekaka laki bini mengkang rinduka pangan diri. (P-kal. 2:24; Mat. 19:3-6) Pengawa butang nya siti ari utai ti pemadu jai ke digaga orang ke udah nikah. Ketegal nya, pesan ketujuh dalam Sepuluh iti Pesan enda ngasuh orang butang. (U-dat. 5:18) Pengawa tu ‘ngelaban Petara’ lalu ngasuh kaling pengidup ke enda salah balat merinsa. (P-kal. 39:7-9) Sida ulih ngasaika pemedis nya betaun-taun.

6 Jehovah beberatka chara laki bini begulai enggau pangan diri. Maya jeman orang Israel, Jehovah dekaka bala laki manah enggau bini sida. Laki ke bebasaka Adat rinduka bini sereta enda nyarak bini sida ngapa. (U-dat. 24:1-4; Mat. 19:3, 8) Tang enti bisi penanggul ti besai ba tikah lalu laki deka nyarak bini, iya patut meri surat sarak ngagai bini. Surat sarak tu dikena ngelindung orang ke indu ari dituduh ngereja ulah seks ti kamah. Nambahka nya, sebedau laki meri surat sarak ngagai bini, laki patut betemu enggau bala tuai. Enggau chara nya, bala tuai ulih nulung laki bini nya mutarka penanggul ba tikah. Lebuh laki deka nyarak bini iya enggau nadai kebuah, kadang-kadang Jehovah enda masuk champur. Ambika chunto, Iya enda meri tulung nengah bala tuai tauka bala nabi. Taja pia, Iya meda pemerinsa enggau pemedis ke diasaika bini maya nya.—Mal. 2:13-16.

Jehovah deka bala anak berasai likun sereta selamat lebuh sida dibesai sereta diajar apai indai (Peda genteran 7-8) *

7-8. (a) Nama diasuh Jehovah gaga apai indai? (Peda gambar ba kulit majalah.) (b) Nama utai ti dipelajarka kitai?

7 Adat Moses mega madahka Jehovah dekaka bala anak gaga ati sereta likun. Jehovah ukai semina ngasuh apai indai nyediaka utai ti diguna anak, tang mega ngasuh apai indai nulung anak ngembuan kaul ti manah enggau Jehovah. Apai indai patut ngena tiap iti peluang nulung anak meretika Adat Jehovah sereta belajar rinduka Jehovah. (U-dat. 6:6-9; 7:13) Siti ari kebuah orang Israel diukum Jehovah laban sida nunu anak nyadika pemeri ngagai petara pelesu. (Jer. 7:31, 33) Apai indai patut ngumbai anak nya pemeri ari Petara ti patut dijaga. Nya alai, sida patut ibuh sereta manah enggau anak sida.—Mas. 127:3.

8 Utai ti dipelajar: Jehovah amat ngemeratka chara laki bini begulai enggau pangan diri. Iya deka apai indai sayauka anak sida. Iya enda rindu enti apai indai jai enggau anak sida.

9-11. Nama kebuah Jehovah meri adat pasal anang inginka utai orang?

9 Anang inginka utai orang. Pesan ti kepenudi dalam Sepuluh iti Pesan nya, anang  inginka utai orang. (U-dat. 5:21; Rom. 7:7) Jehovah meri adat tu kena ngajar nembiak Iya ngambika sida nyaga ati, runding, sereta asai ati sida. Jehovah nemu, ulah ti jai berengkah ari runding sereta pengingin ti salah. (J-lam. 4:23) Enti orang Israel ngelakka pengingin ti salah tumbuh ba ati, iya tentu enda ulih begulai manah enggau orang bukai. Tu meh utai ke nyadi ba Raja David. Iya orang ti manah. Tang bisi sekali, iya ngereja dosa ti besai ketegal inginka bini orang. (Jas. 1:14, 15) David ngereja pengawa butang, bula ngagai laki indu nya, lalu udah nya munuh laki indu nya.—2 Sam. 11:2-4; 12:7-11.

10 Jehovah ulih nemu enti bisi orang Israel ke inginka utai orang. Iya nemu runding enggau pengingin sida. (1 Ban. 28:9) Adat tu ngasuh nembiak Iya nyeliah ari ngembuan runding ke tau ngujungka sida ngereja ulah ti enda manah. Tu nunjukka Jehovah nya Apai ti ngembuan pengerindu sereta bepenemu.

11 Utai ti dipelajar: Jehovah ulih meda ati kitai. Iya ngelala sapa kitai ke bendar. (1 Sam. 16:7) Nadai utai ke ulih dipelalaika ari Iya nyengkaum runding, asai ati, sereta pengawa kitai. Iya meda pemanah ke bisi ba kitai lalu meransang kitai ngemansangka pemanah nya. Tang Iya deka kitai nemu bagi runding ti enda manah lalu nagang runding ke baka nya ngambika kitai enda ngereja pengawa ti salah.—2 Ban. 16:9; Mat. 5:27-30.

ADAT MOSES MERANSANG ORANG NGEREJA UTAI TI LURUS

12. Nama utai ke diajar Adat Moses?

12 Adat Moses mega madahka Jehovah rinduka utai ti lurus. (Mas. 37:28; Isa. 61:8) Jehovah Empu nyadi teladan ti manah. Iya ngereja utai ti lurus ngagai orang bukai. Enti orang Israel ngasika adat nya, Jehovah deka merekatka sida. Enti sida enda ngasika standard Iya ti lurus, sida deka tusah. Peratika dua iti adat ke bukai ari Sepuluh iti Pesan.

13-14. Nama dipadah ba dua iti pesan ti keterubah dalam Sepuluh iti Pesan? Nama penguntung ngagai orang Israel enti sida ngasika adat tu?

13 Nyembah Jehovah seiku aja. Dua iti pesan ti keterubah dalam Sepuluh iti Pesan ngasuh orang Israel nyembah Jehovah seiku aja. Pesan nya mega nangkan sida ari nyembah engkeramba. (P-sut. 20:3-6) Dua iti pesan tu meri penguntung ke nembiak Jehovah. Enti nembiak Iya mengkang taluk, pengidup sida lantang. Tang enti sida nyembah petara ari bansa bukai, pengidup sida tusah.

14 Pikirka pasal orang Kanaan. Sida nyembah engkeramba, ukai Jehovah. Ketegal nya, sida ngereja utai ti balat jai. (Mas. 115:4-8) Lebuh sida nyembah engkeramba, sida ngereja ulah seks ti kamah lalu sanggup munuh anak diri nyadika pemeri. Pia mega enggau orang Israel. Lebuh sida enggai ngasika Jehovah lalu milih nyembah engkeramba, sida ngereja utai ti balat jai sereta ngemediska diri sebilik. (2 Ban. 28:1-4) Sida ke bisi kuasa enggai nitihka standard Jehovah ti lurus. Sida ngena kuasa sida nekan orang ke lemi. (Esk. 34:1-4) Jehovah madah ngagai orang Israel pasal Iya ti deka ngukum orang ke merinsa sida ke indu sereta bala anak. (U-dat. 10:17, 18; 27:19) Tang, Jehovah deka merekatka nembiak Iya ti taluk sereta sida ke ngereja utai ti lurus ngagai pangan diri.—1 Raj. 10:4-9.

Jehovah rinduka kitai lalu Iya mega meda pemerinsa ke ditapi kitai ketegal utai ti enda lurus (Peda genteran 15)

15. Nama utai ti dipelajar kitai pasal Jehovah?

15 Utai ti dipelajar: Jehovah enda patut disalahka enti orang ke ngaku diri nyembah Iya enggai nitihka standard Iya, lalu ngemediska  nembiak Iya. Taja pia, Jehovah rinduka kitai lalu Iya mega meda pemerinsa ke ditapi kitai ketegal utai ti enda lurus. Iya ulih ngasaika pemedis kitai lebih ari pemedis ke diasaika indai lebuh meda anak iya merinsa. (Isa. 49:15) Taja pan Iya enda mutarka penanggul tekala nya, tang Iya deka ngukum sida ke enda nesal ati ba maya ti ngena.

BAKA NI ORANG KE DIBERI KUASA BEJALAIKA ADAT MOSES?

16-18. Baka ni Adat Moses dikena ba pengidup orang Israel besehari-sehari? Nama ulih dipelajarka kitai?

16 Adat Moses ulih dikena ba mayuh pekara dalam pengidup orang Israel besehari-sehari. Nya alai, bala tuai patut ngakim nembiak Jehovah enggau lurus. Sida ukai semina ngakim ba pekara ke bekaul enggau sembah ngagai Jehovah aja, tang mega ngakim pasal laya sereta penyalah bukai. Peratika chunto tu.

17 Enti orang Israel munuh orang, iya enda diukum bunuh tekala nya. Bala tuai ba nengeri nya patut mansik dulu utai ke nyadi sebedau mutus sekalika orang nya patut diukum bunuh tauka enda. (U-dat. 19:2-7, 11-13) Bala tuai mega ngatur pechara ti bekaul enggau bebagika utai sereta penanggul ba rumah tangga. (P-sut. 21:35; U-dat. 22:13-19) Enti bala tuai lurus lalu orang Israel ngasika Adat, semua orang deka bulih penguntung lalu tu meri mulia ngagai Jehovah.—Lew. 20:7, 8; Isa. 48:17, 18.

18 Utai ti dipelajar: Semua utai ba pengidup kitai amat beguna ba Jehovah. Iya deka kitai ngayanka pengelurus sereta pengerindu lebuh begulai enggau orang bukai. Lalu Iya nemu utai ke disebut sereta digaga kitai, indah lebuh kitai kediri aja ba rumah.—Heb. 4:13.

19-21. (a) Baka ni bala tuai enggau bala hakim ngatur pechara nembiak Petara? (b) Baka ni Adat Moses ngelindung orang? Nama ulih dipelajarka kitai?

19 Jehovah deka ngelindung nembiak Iya ari nitihka runding orang ari bansa bukai ti enda manah. Nya alai, Iya ngasuh bala tuai sereta hakim nitihka Adat lalu enda bepilih mata. Taja pia, orang ke ngakim enda patut kasar sereta kelalu terit enggau nembiak Jehovah. Sida patut rinduka utai ti lurus.—U-dat. 1:13-17; 16:18-20.

20 Jehovah kasihka nembiak Iya. Nya alai, Iya meri Adat Moses ngambika sida enda napi utai ti enda lurus. Ambika chunto, Adat ngelindung orang ari dipetenah. Orang ke dipetenah bisi hak nemu sapa ke betenah iya. (U-dat. 19:16-19; 25:1) Sebedau orang ke dipetenah ditetapka salah, iya abis kurang bisi dua iku saksi ke besaksi pasal iya. (U-dat. 17:6; 19:15) Baka ni enggau orang ke betenah ti semina bisi seiku aja saksi? Iya enda tau ngumbai diri ulih lepas ari penyalah ke digaga. Jehovah meda utai ke digaga iya.  Ba ruang bilik, apai nyadi tuai bilik. Taja pia, kuasa iya bisi tatak. Lebuh bisi laya ba ruang bilik, bala tuai ba nengeri nya ulih nulung mutarka laya nya sereta ngaga pemutus.—U-dat. 21:18-21.

21 Utai ti dipelajar: Jehovah nya teladan ti pemadu badas. Semua utai ke dikereja Iya lurus magang. (Mas. 89:14) Iya merekatka orang ke nitihka standard Iya, tang ngukum orang ke salah nguna kuasa. (2 Sam. 22:21-23; Esk. 9:9, 10) Sekeda orang ngereja utai ti jai lalu lepas ari diukum. Tang, Jehovah deka nentuka sida diukum ba maya ti ngena. (J-lam. 28:13) Enti sida enda nesal ati, sida deka balat takut laban sida ‘labuh ngagai jari Petara ti idup.’—Heb. 10:30, 31.

SAPA KELEBIH AGI DILINDUNG ADAT MOSES?

Lebuh ngatur pechara, bala tuai neladan pengerindu Jehovah sereta atur Iya ti lurus (Peda genteran 22) *

22-24. (a) Sapa kelebih agi dilindung Adat Moses? Nama ulih dipelajarka kitai pasal Jehovah? (b) Nama jaku tangkan ke bisi ba Pemansut 22:22-24?

22 Adat Moses kelebih agi ngelindung orang ke nadai apai indai, indu ke balu, sereta orang kampar. Sida nya orang ke enda ulih nyaga diri empu. Bala hakim ba menua Israel diasuh: “Anang ngerampas hak orang kampar, tauka hak orang ke nadai apai indai, lalu anang ngambi kain ari indu ke balu nyadika gadai utai ti dijali.” (U-dat. 24:17) Jehovah ngayanka diri ibuhka sida ke lemi. Lalu Iya deka ngukum orang ke jai ngagai sida ke lemi nya.—Bacha Pemansut 22:22-24.

 23 Adat Moses mega ngelindung diri sebilik ari penyalah beleman enggau diri sebilik. (Lew. 18:6-30) Orang ari bansa bukai nerima pengawa ke salah tu. Tang nembiak Jehovah patut begedika pengawa nya laban nya utai ti dipegedika Jehovah.

24 Utai ti dipelajar: Jehovah dekaka orang ke diberi tanggung pengawa mandangka pengibuh lebuh ngemataka orang ke dijaga sida, kelebih agi ngagai sida ke lemi. Jehovah begedika ulah seks ti kamah. Nya alai, sida ke lemi patut dilindung. Orang ke ngereja ulah seks ti kamah deka betanggungjawap ngagai Jehovah.

ADAT “SEMINA AYUK UTAI TI BADAS TI DEKA DATAI”

25-26. (a) Nama kebuah kitai ulih ngumbai pengerindu enggau pengelurus nya baka seput enggau nyawa? (b) Nama deka dipejuraika kitai ba begian kedua ari empat iti artikel tu?

25 Pengerindu enggau pengelurus nya baka seput enggau nyawa. Dua iti utai tu bekaul enggau pangan diri. Enti kitai andal Jehovah ngereja utai ti lurus ngagai kitai, pengerindu kitai ke Iya deka nambah. Lalu enti kitai rinduka Jehovah sereta standard Iya ti lurus, kitai deka rindu agi ke orang sereta ngereja utai ti lurus ngagai sida.

26 Adat Moses nulung orang Israel ngembuan kaul ti rapat enggau Jehovah. Taja pia, Adat nya nadai agi dikena pengudah Jesus meri diri nyadi genselan tebus, lalu Adat nya diganti enggau utai ti badas agi. (Rom. 10:4) Rasul Paul madahka Adat nya “semina ayuk utai ti badas ti deka datai.” (Heb. 10:1) Ba begian kedua ari empat iti artikel tu, kitai deka bejuraika sekeda utai ti badas nya sereta kebuah pengerindu enggau pengelurus beguna bendar ba eklisia Kristian.

LAGU 109 Rinduka Pangan Diri enggau Pengabis Ati

^ per. 5 Tu begian kesatu ari empat iti artikel ke deka berandauka kebuah kitai andal Jehovah ibuhka kitai. Tiga iti artikel ke bukai deka dikeluarka ba Menara Jaga, kena bulan Mei 2019. Artikel nya ila deka berandauka baka ni Jehovah ngayanka pengerindu enggau pengelurus ba eklisia, baka ni apai indai enggau tuai gempuru ulih ngelindung bala anak ari nyadi mansa seksual, sereta baka ni kitai ulih meri pengelantang ngagai sida ke kala nyadi mansa seksual lebuh sida agi mit.

^ per. 2 PENERANG JAKU: 600 iti adat sereta adat ke bukai ti diberi Jehovah ngagai orang Israel nengah Moses dikumbai “Adat,” “Adat Moses,” enggau “pesan.”

^ per. 60 PENERANG PASAL GAMBAR: Lebuh nyediaka pemakai, seiku indai ke bansa Israel bejaku enggau anak indu iya. Ba belakang sida, seiku apai ngajar anak lelaki chara ngibun bedus.

^ per. 64 PENERANG PASAL GAMBAR: Bala tuai maya jeman orang Israel nulung seiku indu balu enggau anak iya ke dipejai seiku lelaki ke bejual.