Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 8

Nama Kebuah Beterima Kasih?

Nama Kebuah Beterima Kasih?

“Seruran beterima kasih.”—KOL. 3:15.

LAGU 46 Terima Kasih Jehovah

DALAM ARTIKEL TU *

1. Nama digaga seiku orang Samaria ke udah digeraika Jesus?

SEPULUH iku orang ke kena sakit lan balat tusah laban sida ngumbai diri enda ulih gerai. Tang bisi sekali, sida meda Jesus ari jauh. Lebuh sida ninga pasal Jesus ke ulih ngeraika semua macham penyakit, sida arapka iya ulih ngeraika sida. Nya alai, semua sida ngangauka iya enggau nyawa ti inggar: “Jesus! Pengajar! Kasihka kami!” Udah nya, semua sida digeraika magang. Sida tentu berasai beterima kasih. Tang seiku ari sida, orang Samaria, ukai semina berasai beterima kasih. Iya ngayanka diri beterima kasih ngagai Jesus. Meda diri udah gerai, iya muji Petara “enggau nyawa ti inggar.”—Luk. 17:12-19.

2-3. (a) Nama kebuah kitai enda ingat beterima kasih? (b) Nama deka dikerandauka kitai ba artikel tu?

2 Baka orang Samaria nya, kitai deka ngayanka terima kasih ngagai orang ke manah enggau kitai. Tang kadang-kadang, kitai engka enda ingat beterima kasih.

3 Ba artikel tu, kitai deka berandauka kebuah patut ngayanka terima kasih ari jaku enggau pengawa. Kitai mega deka belajar pasal orang ke beterima kasih sereta orang ke enda. Kelimpah ari nya, kitai deka berandauka chara kitai ulih ngayanka terima kasih.

NAMA KEBUAH KITAI BETERIMA KASIH?

4-5. Nama kebuah kitai patut beterima kasih?

4 Jehovah nyadi teladan ke kitai. Siti chara Iya ngayanka terima kasih iya nya, lebuh Iya merekatka orang ti ngagaka  ati Iya. (2 Sam. 22:21; Mas. 13:6; Mat. 10:40, 41) Indah Bup Kudus meransang kitai ‘nunda teladan Petara, laban kitai tu anak ke dikesayauka Iya.’ (Eps. 5:1) Nya kebuah kitai deka beterima kasih.

5 Peratika siti agi kebuah kitai beterima kasih. Lebuh kitai nemu orang beterima kasih ke utai ti udah digaga kitai, kitai gaga ati. Lebuh kitai beterima kasih ke utai ti udah digaga orang ke kitai, sida gaga ati. Orang ke alai kitai beterima kasih ulih beratika, bantu ke diberi sida amat beguna ba kitai. Asil iya, kaul kitai enggau sida deka rapat agi.

6. Nama utai ke sama entara jaku terima kasih enggau emas?

6 Ulah kitai ti nemu beterima kasih nya utai ti manah. Bup Kudus madahka: “Penemu ti terang disebut sebaka enggau emas ti disangkumka enggau pirak.” (J-lam. 25:11) Uji gambarka, emas endang utai ti manah, tang iya engka manah agi enti disangkumka enggau pirak! Nyadi tu tentu utai ti manah! Baka ni asai ati nuan lebuh nerima pemeri ke baka nya? Jaku terima kasih ke disebut nuan tentu utai ti manah. Lalu pikirka tu, emas nya utai ke ulih tan lama. Pia mega, jaku terima kasih ke disebut nuan deka seruran dikingat sereta dikenang orang.

SIDA NGAYANKA TERIMA KASIH

7. Nitihka Masmur 27:4, baka ni David enggau penulis masmur ke bukai ngayanka terima kasih?

7 Mayuh nembiak Jehovah kelia ngayanka terima kasih. Seiku ari sida nya David. (Bacha Masmur 27:4.) David ngumbai sembah ti tuchi nya beguna bendar lalu  iya nunjukka nya ari utai ti digaga iya. Iya mega meri mayuh utai ti berega kena ngaga Rumah Sembiang Jehovah. Peturun Asap mega ngayanka terima kasih. Chara iya, sida nulis Masmur, tauka lagu puji. Siti ari lagu puji nya, meri terima kasih ngagai Jehovah sereta muji “utai ti badas ti udah dikereja” Jehovah. (Mas. 75:1) David enggau peturun Asap keran ngayanka terima kasih ke semua berekat ti diulih sida ari Jehovah. Kati enggau nuan? Ulih nuan mikirka chara deka neladan sida?

Ari surat Paul ke nuju bala menyadi Kristian ba Rome, nama ulih dipelajarka kitai pasal ngayanka terima kasih? (Peda genteran 8-9) *

8-9. Baka ni rasul Paul ngayanka terima kasih ngagai bala menyadi Kristian? Nama asil iya?

8 Rasul Paul ngayanka terima kasih ngagai bala menyadi Kristian ari utai ti disebut iya. Ari sampi enggau surat ke ditulis iya, iya madahka diri beterima kasih ngagai sida. Ba lima belas iti ayat ti keterubah dalam bup Rome bagi 16, Paul nyebut nama 27 iku menyadi Kristian. Iya nyebut pasal Prisila enggau Akuila “ke berambunka nyawa” ketegal iya, sereta nyebut pasal Poebe ke “udah nulung mayuh orang,” nyengkaum Paul empu. Paul mega muji bala menyadi Kristian ke bagas.—Rom. 16:1-15.

9 Paul nemu bala menyadi Kristian enda sempurna. Tang ba pengujung surat ke nuju bala menyadi ba Rome, iya muji kualiti manah ke dikembuan sida. Nama asil iya? Bala menyadi berasai diperansang lebuh ninga jaku puji nya dibacha ba eklisia. Lalu kaul sida enggau Paul majak rapat. Baka ni enggau nuan? Kati nuan beterima kasih ke utai manah ti disebut sereta digaga bala menyadi Kristian?

10. Nama ulih dipelajar kitai ari Jesus ke beterima kasih ngagai bala murid iya?

10 Ba pesan ke dituju Jesus ngagai bala murid iya di Asia Minor (diatu dikumbai Turki), iya madahka terima kasih ngagai sida. Ku Jesus ngepunka pesan ngagai bala murid iya ba Tiatira: “Aku nemu utai ti dikereja nuan, pengerindu nuan, pengarap nuan, pengawa ti dikereja nuan, pasal ati nuan ti liat sereta tan. Aku nemu utai ti dikereja nuan diatu besai agi ari utai ti udah dikereja nuan terubah iya suba.” (Pem. 2:19) Jesus muji sida laban sida ransing gawa ke Petara sereta ngembuan kualiti ti manah. Taja pan pesan Jesus bisi ngembuan jaku tangkan, tang ba pun sereta ujung pesan nya, iya meri jaku peransang ngagai sida. (Pem. 2:25-28) Jesus nya kepala eklisia. Enti nitihka, Jesus tau enda ibuh beterima kasih ke pengawa kitai. Tang iya deka beterima kasih. Tu teladan ti manah ke tuai gempuru!

SIDA ENDA BETERIMA KASIH

11. Nitihka Hebrew 12:16, nama digaga Esau bekaul enggau utai ti kudus?

11 Sayau amat, sekeda orang ke bisi disebut ba Bup Kudus enda nemu beterima kasih. Ambika chunto, Esau. Iya dibesaika apai indai ke rindu sereta bebasaka Jehovah. Tang Esau “enda beterima kasih ke utai ti kudus.” (Bacha Hebrew 12:16 ari nota kaki.) * Nama digaga iya? Iya nyual hak iya ti nyadi anak tuai ngagai menyadi iya, Jakop, ketegal semangkuk bubur kachang. (P-kal. 25:30-34) Udah nya, Esau balat tusah ati ke pengawa ti udah digaga iya. Tang laban iya udah enda beterima kasih ke hak iya ti nyadi anak tuai, iya enda patut mutap enti nadai bulih hak nya baru.

12-13. Baka ni orang Israel nunjukka diri enda beterima kasih? Nama nyadi ngagai sida?

 12 Bisi mayuh utai ke ngasuh orang Israel beterima kasih. Sida dilepaska ari nyadi ulun pengudah Jehovah ngena Sepuluh Tulah nyerang menua Ejip. Udah nya Iya nyelamatka sida lebuh Iya munaska semua soldadu Ejip ba Tasik Mirah. Ketegal balat beterima kasih, orang Israel belagu muji Jehovah. Kati sida mengkang beterima kasih?

13 Lebuh orang Israel napi penanggul ti baru, sida enda ingatka utai ti manah ke udah digaga Jehovah ke sida. Sida ngayanka diri enda beterima kasih. (Mas. 106:7) Baka ni? “Semua sida mutap ngelaban Moses seduai Aron.” Tang kebendar iya, sida ngelaban Jehovah. (P-sut. 16:2, 8) Jehovah tusah ati laban sida enda beterima kasih. Udah nya Iya madahka, semua orang Israel ke bukai deka mati magang di menua puang, kelimpah ari Josua seduai Kalep. (P-pau. 14:22-24; 26:65) Aram kitai beratika baka ni kitai ulih nyeliahka chunto ti enda manah nya, tang nitihka teladan ti manah.

NGAYANKA TERIMA KASIH KEMAYAHARITU

14-15. (a) Baka ni laki bini ulih ngayanka terima kasih ngagai pangan diri? (b) Baka ni apai indai ulih ngajar anak beterima kasih?

14 Ba ruang bilik. Diri sebilik bulih penguntung enti genap iku orang ba ruang bilik beterima kasih. Laki bini ke selalu beterima kasih ngagai pangan diri, bisi kaul ti rapat agi. Seduai iya mega senang ngampun penyalah pangan diri. Laki ke beterima kasih meda utai ti manah ke disebut sereta digaga bini. Laki mega “muji iya.” (J-lam. 31:10, 28) Lalu bini ke badas, madahka utai ke ngasuh iya beterima kasih ngagai laki.

15 Kita ke apai indai, baka ni kita ulih ngajar anak beterima kasih? Kingatka, anak nunda utai ti disebut sereta digaga kita. Nya alai, kita patut nyadi teladan ti manah ke anak. Kita nyebut terima kasih ngagai anak lebuh sida ngereja utai ke kita. Ajar anak nyebut terima kasih lebuh orang nulung sida. Padah ngagai anak, jaku terima kasih patut ari ati laban nya ulih ngagaka  ati orang. Ambika chunto, seiku indu benama Clary madahka: “Lebuh indai beumur 32 taun, iya kediri aja ngemesaika kami tiga menyadi. Lebuh aku beumur 32 taun, aku ulih ngasaika penusah indai maya nya. Nya alai aku madahka diri balat beterima kasih ke utai ti udah digaga iya suba. Bedau lama ti udah, indai madahka jaku aku nya besai reti ba iya, lalu iya selalu ngenang jaku aku. Nya ngagaka ati iya.”

Ajar anak nuan ngayanka terima kasih (Peda genteran 15) *

16. Padahka siti chunto pasal baka ni ulah ke beterima kasih ulih meransang orang bukai.

16 Ba eklisia. Kitai meransang ati bala menyadi Kristian lebuh kitai nyebut terima kasih ngagai sida. Ambika chunto, Jorge, seiku tuai gempuru ke beumur 28 taun, udah balat sakit. Sebulan iya enda ulih datai begempuru. Lebuh datai begempuru baru, iya agi enda ulih ngambi bagi ba gempuru. Ku Jorge: “Aku berasai enda beguna laban enda ulih bejalaika tanggung pengawa ba eklisia. Tang bisi sekali pengudah begempuru, seiku menyadi lelaki madah ngagai aku: ‘Aku deka beterima kasih ngagai nuan laban udah meri teladan ti manah ngagai kami sebilik. Kami rindu ninga cheramah ke udah diberi nuan suba. Cheramah nya nulung kami mansang ba pengarap.’ Pengudah ninga jaku iya, ati aku berasai ditegu lalu enda berasai ai mata aku labuh. Nya meh jaku peransang ti deka didinga aku.”

17. Nitihka Kolosi 3:15, baka ni kitai ngayanka terima kasih ngagai Jehovah?

17 Beterima kasih ngagai Petara kitai ti gerah jari. Jehovah udah meri mayuh utai ti beguna ke pengarap kitai. Ambika chunto, kitai nerima iring ari gempuru, majalah, sereta laman web kitai. Lebuh nuan ninga cheramah, macha artikel, tauka meda Berita JW, nuan engka kala ngasaika, nya meh utai ti diguna nuan. Baka ni kitai ngayanka terima kasih ngagai Jehovah? (Bacha Kolosi 3:15.) Siti chara nya, kitai ulih seruran nyebut terima kasih ngagai Jehovah dalam sampi.—Jas. 1:17.

Nulung ba pengawa meresi Palan Gempuru nya chara ti pemadu manah kena ngayanka terima kasih (Peda genteran 18)

18. Baka ni chara kitai ngayanka terima kasih bekaul enggau Palan Gempuru kitai?

18 Kitai mega ngayanka terima kasih ngagai Jehovah lebuh kitai nyaga Palan Gempuru ngambika beresi sereta kemas. Kitai deka meresi sereta nyaga endur nya enggau tetap. Pia mega, bala menyadi ke bisi pengawa ba  begian audio enggau video, bejimat lebuh ngena perengka nya. Enti kitai nyaga Palan Gempuru enggau manah, palan kitai ulih tan lama lalu pengawa nyeruri pan kurang. Enggau nya, kitai ulih ngelimat duit lalu duit nya ulih dikena nirika sereta nyeruri Palan Gempuru ba serata dunya.

19. Nama ulih dipelajar nuan ari utai ke nyadi ba seiku tuai ti ngabas enggau bini iya?

19 Beterima kasih ngagai sida ke bebendar gawa ke kitai. Jaku terima kasih kitai mega ulih ngubah runding orang pasal utai ke ditapi sida. Peratika utai ke nyadi ba seiku tuai ti ngabas enggau bini iya. Pengudah sepemanjai hari ba pengawa nginjil lebuh musin chelap, seduai iya pulai ngagai endur alai diau. Seduai iya berasai lelak. Maya nya amat chelap nyentukka bini iya terus tinduk ngena baju tebal ke dikena iya pulai nginjil. Lebuh dani pagi hari siti, bini iya madahka diri enda ulih agi neruska pengawa seduai iya. Lalu pagi nya mega, bisi surat datai ari pampang opis nuju bini iya. Dalam surat nya, bala menyadi ari pampang opis muji pengawa nginjil sereta pengeliat ati iya. Sida nemu nya enda senang, laban ninting minggu patut mindah ngagai endur bukai. Laki iya madahka: “Jaku puji nya amat negu ati bini aku. Iya nadai agi nyebut pasal deka badu. Indah lebuh aku berunding deka badu, iya meransang aku neruska pengawa kami.” Seduai iya terus ba pengawa ngabas eklisia kira-kira 40 taun.

20. Nama utai ke patut digaga kitai ninting hari? Nama kebuah kitai patut ngereja nya?

20 Aram meh kitai terus ngayanka terima kasih ari jaku sereta pengawa kitai ninting hari. Nya ulih nulung orang napi penanggul ba pengidup, laban kitai diau ba dunya ke alai semina mimit aja orang ke nemu beterima kasih. Ulah ti beterima kasih mega ngerapatka kaul kitai enggau orang bukai. Tang keberat agi, kitai neladan Apai kitai, Jehovah, ti gerah jari sereta nemu beterima kasih.

LAGU 20 Nuan Meri Anak ti Dikerinduka

^ per. 5 Nama ulih dipelajarka kitai pasal ngayanka terima kasih ari Jehovah, Jesus, enggau orang Samaria ke sakit lan? Ba artikel tu, kitai deka beratika teladan sida sereta chunto ke bukai. Kitai mega deka berandauka kebuah patut beterima kasih sereta chara kitai nunjukka nya.

^ per. 11 Hebrew 12:16, NW: “Bejimat meh ngambika nadai seiku ari kita ngereja ulah seks ti kamah tauka enda beterima kasih ke utai ti kudus baka Esau. Iya ngelepaska hak iya ti nyadi anak tuai ketegal pemakai ti mimit.”

^ per. 55 PENERANG PASAL GAMBAR: Surat Paul dibacha ngagai bala menyadi Kristian ba Rome; Akuila, Prisila, Poebe, enggau sida ke bukai gaga ati lebuh ninga nama sida bisi disebut.

^ per. 57 PENERANG PASAL GAMBAR: Seiku indai ngajar anak iya chara ngayanka terima kasih ngagai seiku menyadi Kristian indu ke tuai ke nunjukka teladan ti manah.