Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

Nama Reti Ngembuan Runding Petara?

Nama Reti Ngembuan Runding Petara?

“Gaga runding kita sebaka enggau runding Jesus Kristus.”—PLP. 2:5.

LAGU: 17, 13

1, 2. (a) Nama asai ati bala menyadi Kristian pasal ngembuan runding Petara? (b) Nama sekeda tanya ti deka dikerandauka kitai dalam artikel tu?

SEIKU menyadi indu di Kanada madahka, ngembuan runding Petara ngasuh iya gaga ati sereta nulung iya mutarka penanggul ba pengidup. Seiku menyadi lelaki di Brazil madah, “Kami udah kawin sepengelama 23 taun. Kami bulih pengelantang laban bebendar nguji berunding baka Petara.” Seiku menyadi lelaki di Filipina madahka ngembuan runding Petara ngasuh iya berasai puas ati sereta nulung iya ulih begulai enggau bala menyadi ke datai ari gaya pengidup ti bebida.

2 Ari peneleba sida, kitai ulih meda mayuh penguntung enti berunding nitihka chara Petara. Baka ni kitai ulih nyadi orang ke ngembuan runding Petara lalu bulih penguntung baka sida? Keterubah, kitai patut meretika ajar Bup Kudus pasal orang ke berunding baka Jehovah sereta diiring roh kudus Iya. Dalam artikel tu, kitai deka nyaut tiga iti tanya.  (1) Nama reti nyadi orang ke ngembuan runding Petara? (2) Nama teladan ke ulih negapka kaul kitai enggau Petara? (3) Baka ni ngembuan “runding Kristus” ulih nulung kitai ngembuan runding Petara?

NAMA RETI ORANG KE NGEMBUAN RUNDING PETARA?

3. Baka ni Bup Kudus nerangka bida entara orang ke ngembuan runding dunya enggau orang ke diiring roh kudus?

3 Rasul Paul nerangka bida entara “orang ke diiring roh kudus” enggau “orang ke ngembuan runding dunya.” (Bacha 1 Korint 2:14-16. *) Orang ke ngembuan runding dunya “enda ulih nerima pemeri ti diberi roh kudus Petara, laban utai nya baka ke beli ba iya, lalu iya enda ulih meretika utai nya.” Tang orang ke diiring roh kudus “meresa semua utai” sereta ngembuan “runding Kristus.” Reti nya, iya bebendar berunding baka Kristus. Paul meransang kitai ngambika diiring roh kudus. Nama bida bukai entara orang ke ngembuan runding dunya enggau orang ke diiring roh kudus?

4, 5. Baka ni kitai ulih ngelala orang ke ngembuan runding dunya?

4 Orang ke ngembuan runding dunya suah nitihka ulah dunya ti beberatka pengingin diri. Paul madahka ulah tu baka ‘roh ti benung bekereja ba orang ke enda ngasika Petara.’ (Eps. 2:2) Nya kebuah mayuh orang betundaka ulah pangan diri. Sida ngereja utai ti dikumbai sida betul, lalu enda ibuhka standard Petara. Kelebih agi sida ngenuluka utai ba dunya lalu ngasaika penuduk, duit, tauka hak sida berat agi ari utai bukai.

5 Runding dunya mega ngasuh orang ngereja pengingin ti bedosa. (Gal. 5:19-21) Dalam surat Paul ti keterubah ngagai orang Kristian ba Korint, iya nyebut pasal utai bukai ti dikereja orang ke ngembuan runding dunya. Sida nyukung orang belaya, nguji mechah-belahka orang, meransang orang ngelaban, mai pangan diri ngagai kot, enda bebasaka ketuai, sereta beberatka pemakai enggau ai irup ba pengidup. Sida enda ngelaban lebuh diuji ngereja utai ti salah. (J-lam. 7:21, 22) Jude madahka sida kelalu beberatka runding dunya nyentukka sida lenyau roh kudus Jehovah.—Jud. 18, 19.

6. Baka ni kitai ulih ngelala orang ke ngembuan runding Petara?

6 Orang ke ngembuan runding Petara bebida enggau orang ke ngembuan runding dunya. Iya beberatka kaul enggau Petara, nitihka iring roh kudus, lalu bebendar deka neladan Jehovah. (Eps. 5:1) Iya enggau naka ulih deka nemu chara Jehovah berunding sereta beratika siti-siti utai. Ba iya, Petara nya nyata. Enda baka orang ke ngembuan runding dunya, orang ke ngembuan runding Petara bebasaka standard Jehovah dalam pengidup. (Mas. 119:33; 143:10) Iya enda ngereja pengingin ti bedosa tang ngayanka ‘buah roh kudus.’ (Gal. 5:22, 23) Kena nerangka tu, uji perundingka: Orang ke landik ba dagang dikumbai pedagang, lalu orang ke amat ibuhka sembah iya  ngagai Petara dikumbai orang ke ngembuan runding Petara.

7. Nama dipadah Bup Kudus pasal orang ke ngembuan runding Petara?

7 Jesus madahka, orang ke ngembuan runding Petara nya orang ke lantang ati. Ku Matthew 5:3, NW madahka: “Lantang meh orang ke nemu diri begunaka Petara.” Rome 8:6 nerangka kebuah kitai patut ngembuan runding Petara: ‘Runding ti ditumpuka ngagai peneka mensia, nuju ngagai pemati, tang runding ti ditumpuka ngagai peneka roh kudus, nuju ngagai pengidup enggau pemaik.’ Enti kitai beberatka utai ke bekaul enggau Petara, kitai deka rapat agi enggau Iya, berasai puas ati sereta bisi pengadang idup meruan belama iya.

8. Nama kebuah kitai tusah deka mengkang ngembuan runding Petara?

8 Taja pia, kitai benung idup ba dunya ti charut. Kitai dikelingi orang ke enda berunding baka Petara. Nya kebuah kitai patut bebendar nyaga runding diri. Enti kitai enda bebendar negapka diri ba pengarap, dunya deka ngelimpangka ulah enggau runding kitai. Baka ni kitai ulih nyeliahka nya? Baka ni kitai ulih negapka kaul enggau Petara?

BELAJAR ARI TELADAN TI MANAH

9. (a) Nama ulih nulung kitai ngembuan runding Petara? (b) Nama teladan manah ti deka dikerandauka kitai?

9 Anak mit suah belajar ari apai indai sereta nitihka teladan sida. Pia mega, kitai ulih belajar sereta neladan orang ke bisi kaul ti rapat enggau Jehovah. Tu ulih ngajar kitai ngambika berunding baka Petara. Tang lebuh beratika ulah orang ba dunya, kitai ulih nemu bagi utai ti enda patut digaga kitai. (1 Kor. 3:1-4) Dalam Bup Kudus bisi teladan ti manah  enggau enda manah. Aram kitai meda sekeda teladan ti manah ari Jakop, Maria, enggau Jesus.

Nama ulih dipelajarka kitai ari teladan Jakop? (Peda genteran 10)

10. Baka ni Jakop nunjukka diri ngembuan runding Petara?

10 Baka kitai, pengidup Jakop enda senang. Menyadi iya, Esau, deka munuh iya. Entua lelaki iya bebendar nguji deka ngakal sereta ngambi ulih ba iya. Tang pengarap Jakop ba semaya Jehovah ngagai Abraham semampai teguh. Jakop nemu ruang bilik iya bisi ungkup ba ngamatka semaya tu, nya alai iya ngintu sida enggau manah. (P-kal. 28:10-15) Jakop enda ngelakka ulah orang ngelimpangka runding iya ari semaya Jehovah. Ambika chunto, Jakop minta Jehovah nyelamatka iya lebuh iya ngasaika Esau deka ngemediska iya. Ku iya besampi: Nuan udah “besemaya deka ngasuh aku mujur dalam semua utai, lalu deka meri aku peturun ngemayuh igi pasir ti ba tebing tasik.” (P-kal. 32:6-12) Jakop amat arapka semaya Jehovah lalu idup sejalai enggau peneka sereta tuju Iya.

Nama ulih dipelajarka kitai ari teladan Maria? (Peda genteran 11)

11. Baka ni kitai nemu Maria ngembuan runding Jehovah?

11 Diatu uji perundingka teladan Maria. Iya dipilih nyadi indai Jesus laban iya ngembuan runding Jehovah. Uji bacha utai ti dipadah Maria lebuh iya ngelawa kaban belayan iya, Sekariah enggau Elisabet. (Bacha Luke 1:46-55.) Jaku Maria ba ayat nya nunjukka iya rinduka Jaku Petara lalu iya nemu Bup Kudus jaku Hebrew enggau manah. (P-kal. 30:13; 1 Sam. 2:1-10; Mal. 3:12) Indah pengudah Maria jadi enggau Josep, iya enda beleman enggau Josep sebedau Jesus ada. Pengawa ke diberi Petara berat agi ari pengingin seduai iya empu.  (Mat. 1:25) Maria mega beratika semua utai ke nyadi lebuh Jesus mansang besai lalu ningaka utai ke diajar Jesus. Maria “nyimpan semua utai nya dalam ati diri.” (Luk. 2:51) Tu nunjukka Maria rindu deka nemu semaya Petara pasal Messiah. Kati ulih kitai neladan Maria lalu bebendar deka ngereja peneka Petara?

12. (a) Baka ni Jesus neladan Apai iya? (b) Baka ni kitai ulih neladan Jesus? (Peda gambar ba pun artikel.)

12 Entara semua orang, Jesus nya teladan ti pemadu manah. Lebuh iya di bumi, iya ngayanka diri deka neladan Apai iya, Jehovah. Runding, asai ati, sereta ulah Jesus sebaka enggau enggi Jehovah. Iya mega ngereja peneka sereta nitihka standard Jehovah. (Jhn. 8:29; 14:9; 15:10) Ambika chunto, uji bandingka utai ti dipadah Isaiah pasal penyiru Jehovah enggau utai ti dipadah Mark pasal asai ati Jesus. (Bacha Isaiah 63:9; Mark 6:34.) Ulih kitai neladan Jesus lalu seruran ngayanka penyiru ngagai orang bukai? Baka Jesus, kati kitai ngenuluka pengawa nginjil sereta ngajar orang pasal berita manah? (Luk. 4:43) Orang ke ngembuan runding Jehovah bisi penyiru lalu deka nulung orang bukai.

13, 14. (a) Nama ulih dipelajarka kitai ari orang ke ngembuan runding Petara kemayaharitu? (b) Beri siti chunto.

13 Kelimpah ari teladan ba Bup Kudus, kemayaharitu kitai bisi mayuh bala menyadi Kristian ke bebendar deka neladan Jesus. Nuan engka beratika sida ransing nginjil, gerah jari, lalu siruka orang bukai. Taja pan sida enda sempurna, sida enggau naka ulih nguji ngemansangka kualiti ti manah sereta ngereja utai ti dikedekaka Jehovah. Rachel, seiku menyadi indu di Brazil madah: “Aku rindu nitihka pisin dunya. Tu ngasuh aku enda begari nitihka standard Jehovah. Tang pemendar meransang aku ngaga ubah ngambika ulih ngembuan runding Jehovah. Ngaga ubah tu enda senang, tang nya ngasuh aku gaga agi lalu bisi tuju ba pengidup.”

14 Reylene, seiku menyadi indu di Filipina, bisi penanggul bukai. Taja pan dalam pemendar, iya deka besekula tinggi lalu ngulihka kereja ti begaji besai. Nyau kelama, runding Reylene limpang ari juluk ati iya ba pengarap. Ku iya madah, “Aku ngasaika bisi utai kurang ba pengidup aku, iya nya utai ke beguna agi ari kereja aku.” Reylene ngubah runding diri lalu ngenuluka pengawa Jehovah ba pengidup. Diatu iya pechayaka semaya Jehovah ba Matthew 6:33, 34 lalu madah, “Aku nemu Jehovah tentu ngibun aku!” Nuan engka nemu bagi bala menyadi Kristian kitai ke ngaga ubah baka Reylene. Lebuh kitai meda sida neladan Kristus, enda ke kitai diperansang deka nitihka singkang sida?—1 Kor. 11:1; 2 Tes. 3:7.

NGEMBUAN “RUNDING KRISTUS”

15, 16. (a) Baka ni kitai ulih neladan Jesus? (b) Baka ni kitai ulih belajar berunding baka Jesus?

15 Baka ni kitai ulih neladan Jesus? Ayat Bup Kudus ba 1 Korint 2:16 madahka kitai patut ngembuan “runding Kristus.” Lalu ayat ba Pilipi 2:5 meransang kitai ‘ngaga runding kitai sebaka enggau runding Jesus Kristus.’ Nyadi enti deka neladan Jesus, kitai patut belajar pasal runding, asai ati, sereta ulah iya. Jesus  ngemeratka kaul iya enggau Petara lebih agi ari utai bukai. Enti kitai neladan Jesus, reti nya kitai neladan Jehovah. Nya kebuah kitai patut belajar berunding baka Jesus.

16 Baka ni chara iya? Bala murid Jesus meda iya ngaga kereja ajih, mendingka iya ngajar orang mayuh, beratika chara iya begulai enggau orang, sereta beratika iya nitihka prinsip Jehovah. Sida madahka: ‘Kami udah meda semua utai ti udah dikereja iya.’ (SKR. 10:39) Seharitu, kitai enda ulih meda Jesus. Tang kitai bisi bup Injil ti nyebut pasal iya. Lebuh kitai macha sereta belematika utai ba bup Matthew, Mark, Luke, enggau John, kitai ulih belajarka chara Jesus berunding. Tu nulung kitai ‘nitihka singkang iya’ enggau semak agi ngambika ulih ngembuan runding ti “sebaka enggau runding Kristus.”—1 Pet. 2:21; 4:1.

17. Nama penguntung enti kitai berunding baka Jesus?

17 Nama penguntung enti kitai berunding baka Jesus? Pemakai ti manah ke pengerai ngeringka tubuh kitai. Pia mega, runding Jesus ulih nulung kitai rapat enggau Jehovah. Seraya kitai belematika teladan Jesus, kitai ulih nemu utai ti digaga iya lebuh napi siti-siti pekara. Nya ulih nulung kitai ngaga pemutus manah ti ngelantangka ati Petara sereta meri kitai ati ti beresi. Tu kebuah ti manah kitai patut neladan Tuan kitai Jesus Kristus. Kati nuan setuju?—Rom. 13:14.

18. Nama udah dipelajarka nuan pasal ngembuan runding Petara?

18 Artikel tu udah nerangka reti ngembuan runding Petara. Kitai mega udah berandauka teladan manah orang ke diiring roh kudus Petara. Kelimpah ari nya, kitai bisi belajar pasal “runding Kristus” ti ngajar kitai berunding baka Jehovah lalu ngerapatka kaul enggau Iya. Tang agi bisi mayuh utai ke ulih dipelajarka kitai. Ambika chunto: Baka ni kitai nemu sekalika kaul kitai enggau Jehovah tegap tauka enda? Nama ulih digaga kitai ngambika tegap ba pengarap? Lalu nama penguntung enti kitai bisi kaul ti rapat enggau Jehovah? Aram meh kitai meda saut iya ba artikel pengudah tu.

^ per. 3 1 Korint 2:14-16, NW: “Orang ke ngembuan runding dunya enda ulih nerima pemeri ti diberi roh kudus Petara, laban utai nya baka ke beli ba iya, lalu iya enda ulih meretika utai nya, laban utai nya semina ulih ditemu ari tulung roh kudus. Orang ke diiring roh kudus meresa semua utai, tang iya empu enda ulih diperagam orang ke ngembuan runding dunya. ‘Laban sapa nemu runding Jehovah, datai ke orang nya ulih ngajar Iya?’ Tang kitai bisi runding Kristus.”