Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Februari 2017

Sapa Ke Ngiring Nembiak Petara Kemaya Hari Tu?

Sapa Ke Ngiring Nembiak Petara Kemaya Hari Tu?

“Kingatka bala tuai kita.” —HEB 13:7.

LAGU: 125, 43

1, 2. Pengudah Jesus niki ke serega, nama engka diperunding bala rasul?

BALA rasul Jesus bediri ba Bukit Kana, lalu nengkilaka tuan sereta pangan sida, Jesus, niki ke serega, lalu dilindung remang. (SKR. 1:9, 10) Kira-kira dua taun, Jesus udah ngajar, meransang sereta ngiring sida. Tang diatu iya nadai agi enggau sida. Nama deka digaga sida?

2 Sebedau niki ke serega, Jesus madah ngagai bala murid iya: ‘Kita deka nyadi saksi aku di Jerusalem, di serata menua Judea enggau Samaria, enggau ngagai ujung dunya.’ (SKR. 1:8) Baka ni sida ulih ngereja pengawa nya? Jesus udah besemaya, roh kudus Petara deka nulung sida. (SKR. 1:5) Tang sapa ke deka ngiring sida sereta ngatur pengawa nginjil di serata dunya? Bala rasul nemu, Jehovah udah ngena mensia ngiring orang Israel menya. Nya alai, sida engka berunding sekalika Jehovah diatu deka milih seiku tuai ti baru.

3. (a) Pengudah Jesus niki ke serega, nama pemutus besai ke digaga bala rasul ti tetap ati? (b) Nama tanya ke deka disaut kitai ba artikel tu?

 3 Enda lama pengudah Jesus niki ke serega, bala murid iya ngiga iring ari Bup Kudus, besampi minta tulung ari Petara, lalu milih Matias nganti Judas Iskariot nyadi rasul ke-12. (SKR. 1:15-26) Nama kebuah pengawa milih tu beguna bendar ba sida enggau ba Jehovah? Bala murid nemu, bala rasul patut 12 iku. * (Peda nota kaki.) Jesus udah milih bala rasul nya sereta ngelatih sida ke siti pengawa ti besai ba bala nembiak Petara. Nama pengawa nya, lalu baka ni Jehovah enggau Jesus nyikap sida ke pengawa nya? Nama atur ti sama ke bisi kemaya hari tu? Lalu baka ni kitai ‘ingatka bala tuai [kitai],’ kelebih agi “ulun ke tetap ati sereta bepenemu-dalam”?—Heb. 13:7; Mat. 24:45.

JESUS NGIRING RABAN TI MEGAI

4. Nama pengawa ke dikereja bala rasul enggau bala tuai gempuru ke bukai ba Jerusalem?

4 Bala rasul berengkah ngiring eklisia Kristian kena Pentikos ba taun 33. Bup Kudus madahka, ‘Peter bediri enggau sida ke sebelas iku,’ lalu ngajar pemendar ti nyelamatka nyawa ngagai orang mayuh. (SKR. 2:14, 15) Mayuh ari orang nya nyadi orang Kristian. Pengudah nya, orang Kristian ke baru nya “angkun belajar ari sida rasul.” (SKR. 2:42) Bala rasul betanggungjawap ngatur belanja ke eklisia. (SKR. 4:34, 35) Sida mega ngajar sereta besampi ke nembiak Petara, ku sida: “Kami empu deka ngemeranka pengawa besampi enggau nusui Berita Manah.” (SKR. 6:4) Lalu sida nganjung orang Kristian ti bepeneleba nginjil ba endur ti baru. (SKR. 8:14, 15) Udah nya, bala tuai gempuru ke bukai ti diiri ngena roh kudus sama enggau bala rasul ngiring eklisia. Ketegal nyadi raban ti megai, sida meri iring ngagai semua eklisia.—SKR. 15:2.

Orang Kristian ba kurun keterubah nemu, Jehovah ke ngiring raban ti megai nengah Jesus

5, 6. (a) Baka ni roh kudus bekuasa ba raban ti megai? (Peda gambar ba pun artikel.) (b) Baka ni bala melikat nulung raban ti megai? (c) Baka ni Jaku Petara ngiring raban ti megai?

5 Orang Kristian ba kurun keterubah nemu, Jehovah ke ngiring raban ti megai nengah Jesus. Baka ni sida nemu? Kesatu, roh kudus bekuasa ba raban ti megai. (Jhn. 16:13) Semua orang Kristian ke diiri ngena roh kudus nerima roh kudus, tang kelebih agi roh kudus bekuasa ba bala rasul sereta ba bala tuai gempuru ba Jerusalem ngambika sida ulih bejalaika pengawa nyadi tuai ti ngemataka. Ngambika chunto, ba taun 49, roh kudus ngiring raban ti megai ngaga pemutus bekaul enggau betutus.  Eklisia nitihka atur tu. Asil iya, sida “dikeringka dalam pengarap, lalu pemayuh tubuh sida nambah-menambah tiap hari.” (SKR. 16:4, 5) Ari surat ke dituju ngagai eklisia ke bekaul enggau betutus, kitai ulih nemu, raban ti megai bisi roh kudus Petara sereta ngayanka kualiti baka pengerindu sereta pengarap.—SKR. 15:11, 25-29; Gal. 5:22, 23.

6 Kedua, bala melikat nulung raban ti megai. Ngambika chunto, seiku melikat ngasuh Kornelius ngiga rasul Peter. Pengudah Peter nginjil ngagai Kornelius sereta kaban belayan iya, sida nerima roh kudus, taja pan sida bedau ditutus. Nya alai, Kornelius nyadi orang bansa bukai ti keterubah ke enda ditutus nyadi orang Kristian. Lebuh bala rasul enggau bala menyadi Kristian ke bukai ninga pasal nya, sida nerima peneka Petara sereta ngelaluka orang bansa bukai ke enda ditutus ngagai eklisia Kristian. (SKR. 11:13-18) Ari tu kitai ulih nemu, bala melikat sama nyukung pengawa nginjil ke dipejalaika raban ti megai. (SKR. 5:19, 20) Ketiga, Jaku Petara ngiring orang ti megai. Sida ngena Bup Kudus ngambika ulih nulung sida ngaga pemutus ti besai pasal utai ti dipechaya orang Kristian sereta ngiring eklisia.—SKR. 1:20-22; 15:15-20.

7. Nama kebuah kitai ulih ngumbai Jesus ke ngiring orang Kristian ba kurun keterubah?

7 Taja pan raban ti megai bekuasa ba eklisia, tang sida nemu Jesus Kristus nya Kepala sida. Baka ni kitai nemu? Rasul Paul madahka, Kristus ke milih “sekeda nyadi rasul.” Iya mega madahka Kristus nya “kepala” ba eklisia. (Eps. 4:11, 15) Lalu ari ke ngena nama seiku-seiku rasul, bala murid ke diiring Petara dikumbai orang Kristian. (SKR. 11:26) Paul nemu, endang beguna nitihka ajar ti bepelasarka Bup Kudus ke diberi bala rasul enggau bala menyadi lelaki ke ngiring. Taja pia, Paul madahka: “Tang aku deka ngasuh kita nemu, Kristus nyadi kepala semua lelaki.” Tu nyengkaum tiap iku orang dalam raban ti megai. Udah nya ku Paul agi: ‘Petara nyadi kepala Kristus.’ (1 Kor. 11:2, 3) Amat, Jehovah udah milih Anak Iya, Jesus Kristus, ngiring eklisia.

“TU UKAI PENGAWA KE DATAI ARI MENSIA, TANG ARI PETARA”

8, 9. Nama pengawa besai ti dipejalaika Menyadi Russell?

8 Ba taun 1870, Charles Taze Russell enggau sekeda bala pangan iya berengkah deka nyembah Petara nitihka ajar Bup Kudus sereta nulung orang bukai ngereja utai ti sama. Tu nyengkaum nulung orang ke bejaku ngena mayuh bengkah bansa jaku. Nya alai, Zion’s Watch Tower Tract Society udah ditumbuh nitihka undang-undang ba taun 1884, lalu Menyadi Russell nyadi presiden. * (Peda nota kaki.) Iya belajarka Bup Kudus enggau bejimat sereta enda takut madah ngagai orang bukai pasal ajar ari gerija baka Triniti enggau semengat ke enda nemu mati nya nadai dalam Bup Kudus. Iya nemu, penatai Kristus enda ulih dipeda, lalu “timpuh orang bansa bukai” deka abis ba taun 1914. (Luk. 21:24) Menyadi Russell udah  ngena jam, pengering enggau duit iya ngajar pemendar tu ngagai orang bukai. Amat, Jehovah enggau Jesus ngena Menyadi Russell ngiring eklisia ba maya ti beguna bendar dalam sejarah.

9 Menyadi Russell enda ngiga mulia ari mensia. Ba taun 1896, iya nulis, iya enggau sida bukai ke betanggungjawap enggai dimuliaka. Sida enggai diberi gelar ti spesial, lalu sida enggai siti-siti raban dikangau ngena nama sida. Udah nya, iya madahka: “Tu ukai pengawa ke datai ari mensia.”

“Ulun ke tetap ati sereta bepenemu-dalam” nya seraban mit bala menyadi Kristian lelaki ke diiri ngena roh kudus, ke nyadi Raban ti Megai

10. (a) Ni maya Jesus milih “ulun ke tetap ati sereta bepenemu-dalam”? (b) Terangka baka ni Raban ti Megai nya bebida ari Watch Tower Society.

10 Ba taun 1919, tiga taun pengudah Menyadi Russell mati, Jesus milih “ulun ke tetap ati sereta bepenemu-dalam.” Nama tuju iya? Kena meri bala murid iya “pemakai ba maya ti patut.” (Mat. 24:45) Indah ba timpuh nya, seraban mit bala menyadi Kristian lelaki ke diiri ngena roh kudus ba indu opis di Brooklyn, New York, nyediaka pemakai beroh ke bala murid Jesus. Rambai jaku “raban ti megai” berengkah ayan ba litaricha kitai pengudah taun 1940. Maya nya, raban ti megai bisi kaul enggau bala pengarah ba Watch Tower Bible and Tract Society. Taja pia, ba taun 1971, udah diterangka Raban ti Megai bebida ari Watch Tower Society, ke betanggungjawap ngaduka pekara ke bekaul enggau undang-undang aja. Kenyau ari nya, bala menyadi Kristian lelaki ke diiri ngena roh kudus ulih nyadi Raban ti Megai, lalu enda ibuh nyadi pengarah ba Society. Apin lama ti udah, bala menyadi Kristian lelaki ari “bedus ti bukai” udah dipilih nyadi pengarah ba Society sereta ba pertubuhan bukai ke dikena nembiak Petara. Asil iya, Raban ti Megai ulih betumpu ba nyediaka ajar sereta iring ari Bup Kudus. (Jhn. 10:16; SKR. 6:4) Kena 15 Julai 2013, majalah Menara Pengawal madahka, “ulun ke tetap ati sereta bepenemu-dalam” nya seraban mit bala menyadi Kristian lelaki ke diiri ngena roh kudus, ke nyadi Raban ti Megai.

Raban ti megai ba taun 1950-an

11. Baka ni Raban ti Megai ngaga pemutus?

11 Raban ti Megai sama ngaga pemutus ti besai lebuh sida baum ninting minggu. Aum ke baka tu nulung sida bisi kaul ti rapat sereta mengkang beserakup enggau pangan diri. (J-lam. 20:18) Nadai seiku ari Raban ti Megai nya ngasaika diri besai agi ari sida ke bukai. Nya alai ninting taun, menyadi Kristian lelaki ke enda sama ngulu ba aum nya. (1 Pet. 5:1) Tu mega utai ke nyadi ba tiap-tiap enam iti komiti Raban ti Megai. Nadai seiku ari Raban ti Megai nya ngumbai diri nyadi tuai atas sida ke  bukai. Tiap iku ari sida nya mega seiku ari semua ulun ti bukai, lalu nerima pemakai beroh ari ulun ke tetap ati sereta nitihka iring ari sida.

Pengudah ulun ke tetap ati dipilih ba taun 1919, sida nyediaka pemakai beroh ke nembiak Petara (Peda genteran 10, 11)

“SAPA ULUN KE TETAP ATI SERETA BEPENEMU-DALAM?”

12. Nama tanya ke deka disaut kitai?

12 Raban ti Megai enda nerima pemandang ari Petara, lalu sida mega kekadang ngereja utai ti salah. Sida engka ngereja utai ti salah lebuh nerangka reti utai dalam Bup Kudus tauka ngiring gerempung. Ngambika chunto, Watch Tower Publications Index bisi subjek “Beliefs Clarified,” ke ngembuan penemu Bup Kudus ti udah diaduka baru kenyau ari taun 1870. Jesus nadai madahka pemakai beroh ke disediaka ulun ke tetap ati nya deka seruran betul. Nya alai, baka ni kitai ulih nyaut tanya Jesus: “Sapa ulun ke tetap ati sereta bepenemu-dalam?” (Mat. 24:45) Nama bukti ke nunjukka Raban ti Megai nya ulun ke tetap ati? Aram kitai berandauka tiga iti pekara ti  sama ke nulung raban ti megai maya jeman bala rasul.

13. Baka ni roh kudus nulung Raban ti Megai?

13 Roh kudus nulung Raban ti Megai. Roh kudus udah nulung Raban ti Megai meretika pemendar ari Bup Kudus ke enda ulih dimeretika sebedau tu. Ngambika chunto, perundingka penemu Bup Kudus ti udah diaduka baru ke udah disebut tadi. Nadai mensia ulih meretika sereta nerangka ‘utai ti dalam buntut runding Petara’ kediri empu! (Bacha 1 Korint 2:10.) Raban ti Megai ngasaika utai ti diasaika rasul Paul ke nulis: ‘Lalu kami bejakuka utai nya ukai ngena leka jaku ti diajar penemu-dalam mensia, tang ngena leka jaku ti diajar roh kudus.’ (1 Kor. 2:13) Pengudah beratus taun ajar ti pelesu sereta nadai iring ti terang, nama kebuah penemu Bup Kudus majak nambah kenyau ari taun 1919? Kebuah iya, laban Petara udah nulung ngena roh kudus Iya!

14. Nitihka Pemandang 14:6, 7, baka ni bala melikat nulung Raban ti Megai sereta nembiak Petara kemaya hari tu?

14 Bala melikat nulung Raban ti Megai. Raban ti Megai ngembuan tanggung pengawa ti besai ngiring lebih lapan juta iku bala penginjil bejalaika pengawa nginjil di serata dunya. Nama kebuah pengawa tu ulih mujur? Siti kebuah iya, laban sukung ari bala melikat. (Bacha Pemandang 14:6, 7.) Ba mayuh pekara, bala melikat udah ngiring bala penginjil ngagai orang ke baru besampi minta tulung ari Petara! * (Peda nota kaki.) Pengawa nginjil enggau ngajar majak mansang indah ba endur ke balat disakal. Tu mega ulih mujur ketegal sukung ari bala melikat.

15. Baka ni Raban ti Megai bebida ari bala tuai pengarap ari gerija? Beri siti chunto.

15 Jaku Petara ngiring Raban ti Megai. (Bacha John 17:17.) Peratika utai ke nyadi ba taun 1973. Majalah The Watchtower kena 1 Jun nanya sekalika “orang ke enda badu nginsap tau dibaptisa tauka enda.” Saut ke diberi ngagai tanya tu bepelasarka prinsip Bup Kudus, lalu saut iya enda! The Watchtower ngambi beberapa iti ayat Bup Kudus, lalu nerangka kebuah orang ke enda badu nginsap patut dibuai ari gerempung. (1 Kor. 5:7; 2 Kor. 7:1) Majalah nya mega madahka, standard ke terit tu ukai datai ari mensia, tang datai “ari Petara, ke madah pasal Diri Empu nengah Jaku Iya.” Nadai gerempung pengarap bukai ke amat bepanggai ba Jaku Petara, indah lebuh ngereja tu engka tusah ba sekeda raban gerempung nya. Siti bup baru ke bekaul enggau jalai pengarap ba Amerika Serikat madahka: “Bala tuai pengarap Kristian selalu ngubah ajar sida ngambika sejalai enggau utai ti dipechaya sereta penemu kena ngulihka sukung ari raban sida enggau mensia mayuh.” Tang, Raban ti Megai enda nitihka penemu mensia mayuh. Sida nitihka iring ari Jaku Petara, ke nunjukka Jehovah ti ngiring nembiak Iya kemaya hari tu.

“KINGATKA BALA TUAI KITA”

16. Nama siti chara kena ingatka Raban ti Megai?

16 Bacha Hebrew 13:7. Bup Kudus  madahka “kingatka bala tuai kita.” Siti chara kitai ulih ngereja tu iya nya enggau nyebut Raban ti Megai dalam sampi kitai. (Eps. 6:18) Sida bisi mayuh tanggung pengawa ke nyengkaum nyediaka pemakai beroh, ngiring pengawa nginjil di serata dunya, sereta ngatur pemeri ke diberi ngagai gerempung. Nya alai, sida amat begunaka sampi ti tetap ari kitai!

17, 18. (a) Baka ni kitai nitihka iring ari Raban ti Megai? (b) Baka ni pengawa nginjil kitai nyukung Raban ti Megai sereta Jesus?

17 Kitai mega ulih ingatka Raban ti Megai enti nitihka atur sereta iring ari sida. Raban ti Megai meri kitai iring nengah litaricha, pengawa begempuru, gempuru besai sereta konvensyen. Sida mega milih tuai ti ngabas, ke udah nya milih bala tuai gempuru. Bala tuai ti ngabas enggau bala tuai gempuru ngayanka diri ingatka Raban ti Megai enti sida bejimat nitihka iring ti diberi ngagai sida. Lalu semua kitai ngayanka basa ngagai Kepala kitai, Jesus, enti ngasika bala tuai ti dikena iya kemaya hari tu.—Heb. 13:17.

18 Siti agi chara kitai ulih ingatka Raban ti Megai, iya nya enggau naka ulih ba pengawa nginjil. Hebrew 13:7 meransang orang Kristian neladan pengarap bala tuai. Raban ti Megai udah ngayanka pengarap ti besai nengah pengawa sida ke ransing nginjil sereta ngemansangka berita manah. Kati kitai bisi nulung bala menyadi Kristian lelaki nya ba pengawa ti besai tu? Enti bisi, kitai deka berasai lantang ati lebuh ninga Jesus ke madah ngagai kitai: ‘Lebuh kita ngereja utai tu ngagai siku ari menyadi aku ti pemadu mit tu, kita ngereja nya ngagai aku!’—Mat. 25:34-40.

19. Nama kebuah nuan keran nitihka Kepala kitai, Jesus?

19 Lebuh Jesus pulai ke serega, iya enda ninggalka bala murid iya. (Mat. 28:20) Iya nemu roh kudus, bala melikat, sereta Jaku Petara udah nulung iya ngiring lebuh iya ba dunya. Iya meri tulung ti sama ngagai ulun ke tetap ati kemaya hari tu. Raban ti Megai terus “nitihka Anak Domba,” iya nya Jesus, ‘ngagai sebarang endur iya bejalai.’ (Pem. 14:4) Nya alai, lebuh kitai nitihka iring ari Raban ti Megai, kitai nitihka Kepala kitai, Jesus. Enda lama da agi, Jesus deka ngiring kitai ngagai pengidup ti meruan belama iya. (Pem. 7:14-17) Lalu nadai mensia ke nyadi ketuai ulih besemayaka nya!

^ per. 3 Ari tu kitai nemu Jehovah deka 12 iku bala rasul dudi hari nyadi “dua belas igi batu pemun” Jerusalem ti Baru. (Pem. 21:14) Nya kebuah 12 iku bala rasul ke tetap ati nya enda ibuh diganti pengudah sida mati.

^ per. 8 Kenyau ari taun 1955, nama ke dikena iya nya Watch Tower Bible and Tract Society of Pennsylvania.

^ per. 14 Peda ‘Memberikan Kesaksian yang Saksama tentang Kerajaan Tuhan’-IN, lambar 58-59.