Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 CHERITA PENGIDUP

Kami Tetemuka “Mutiara ti Berega Amat”

Kami Tetemuka “Mutiara ti Berega Amat”

WINSTON enggau Pamela (Pam) Payne gawa ba pampang opis Australasia. Seduai iya idup lantang taja pan bisi penanggul. Sekeda ari penanggul nya nyengkaum nelebaka diri enggau adat ti enda sebaka sereta Pam gugur anak dalam kandung. Taja pia, lebuh napi semua utai tu, seduai iya agi ngetanka pengerindu ke Jehovah, ke bala menyadi Kristian sereta pengaga ati seduai iya ba pengawa nginjil. Ba interbiu tu, kitai deka ningaka cherita seduai iya.

Winston, ulih nuan madahka baka ni nuan berengkah ngiga Petara?

Aku dibesaika ba siti ladang gandum di Queensland, Australia. Kami sebilik nadai pengarap. Ketegal kami diau jauh, aku jarang betemu enggau orang bukai kelimpah ari kaban belayan aku empu. Lebuh umur aku 12 taun, aku berengkah ngiga Petara. Aku besampi ngagai Iya, minta diri nemu pemendar pasal Iya. Nyau kelama, aku ninggalka ladang nya lalu bulih kereja ba Adelaide, Australia Selatan. Lebuh umur aku 21 taun, aku betemu enggau Pam maya aku raun ba Sydney. Pam madah ngagai aku pasal pengawa ke dipejalaika pengarap Israel-British. Raban pengarap tu ngumbai orang British nya peturun raban bansa Israel ke udah lenyau. Raban pengarap nya madahka sida tu ari Sepuluh Raban Bansa Perintah Utara ti nyadi orang tangkap ke ditaban ba abad kelapan S.M. Nya alai lebuh aku pulai baru ke Adelaide, aku betanyaka pekara tu ngagai seiku orang ke sama gawa enggau aku. Maya nya iya udah berengkah belajarka Bup Kudus enggau Saksi-Saksi Jehovah. Pengudah bejaku beberapa jam enggau iya pasal pengarap Saksi-Saksi Jehovah, aku nyau sedar sampi aku lebuh aku agi mit suba benung disaut. Aku belajarka pemendar pasal Petara aku enggau Perintah Iya! Aku udah tetemuka “mutiara ti berega amat.”—Mat. 13:45, 46.

Pam, nuan mega ngiga mutiara nya lebuh agi biak. Baka ni nuan tetemuka iya?

Aku dibesaika ba ruang bilik ke bisi pengarap ba siti bandar di Coffs Harbour, New South Wales. Apai indai enggau aki ini sepiak indai aku megai pengarap Israel-British nya. Aku, menyadi lelaki aku ke biak, menyadi indu aku ke tuai, enggau mayuh bala petunggal ari sepiak indai aku dibesaika nitihka pengarap Israel-British.  Sida pechaya peturun British nya orang ke diterima Petara. Taja pia, aku enda setuju enggau sida lalu ngasaika diri enda semak enggau Petara. Lebuh umur aku 14 taun, aku enggau mayuh bengkah gerija, nyengkaum Anglican, Baptist enggau Seventh-day Adventist. Tang gerija-gerija nya enda nulung aku ngelala Petara.

Udah nya, kami sebilik pindah ke Sydney. Dia aku betemu enggau Winston ke benung raun ba menua nya. Baka ke dipadah iya tadi, randau kami duai pasal pengarap ngujungka iya belajarka Bup Kudus enggau Saksi-Saksi Jehovah. Berengkah ari nya, semua surat ke dituju iya ngagai aku penuh enggau ayat Bup Kudus! Terubah-rubah aku berasai irau, indah pedis ati. Tang nyau kelama aku sedar utai ke ditulis Winston nya tentu pemendar pasal Petara.

Ba taun 1962, aku pindah ke Adelaide ngambika semak agi enggau Winston. Iya ngasuh aku diau enggau Thomas seduai Janice Sloman, sepasang laki bini ke Saksi. Seduai iya nyadi pengerintis seberai tasik ba Papua New Guinea. Seduai iya manah amat enggau aku. Maya nya aku baru beumur 18 taun, lalu seduai iya nulung aku nemu pasal Jehovah enggau mayuh agi. Nya alai, aku mega berengkah belajarka Bup Kudus, lalu enda lama udah nya, aku pan pechaya aku udah tetemuka pemendar. Pengudah kami duai Winston jadi, kami terus berengkah gawa penuh jam ke Jehovah. Taja pan napi penanggul, pengawa kami ke Jehovah ngenataika mayuh berekat. Lalu nya nambahka asai ati ti beterima kasih ke mutiara ti udah ditemu kami.

Winston, padah ngagai kami pasal taun-taun keterubah nuan gawa ke Jehovah.

A. Kar ke nunjukka pejalai kami lebuh ngabas eklisia

B. Setem ari sekeda pulau. Suba Kiribati enggau Tuvalu dikumbai Pulau Gilbert enggau Pulau Ellice

C. Pulau Funafuti ti manah dipeda ba Tuvalu. Siti ari pemayuh pulau ke dilawa kami sebedau pengerintis seberai tasik dianjung kia

Enda lama pengudah kami duai Pam jadi, Jehovah berengkah meri kami pengawa ti spesial. (1 Kor. 16:9) Pengawa spesial ti keterubah nya, nyadi pengerintis biasa. Menyadi Jack Porter enggau bini iya, Roslyn, meransang kami nyadi pengerintis. Iya ngabas eklisia kami ke mit lebuh iya nyadi tuai ti ngabas. Lalu diatu kami duai sama gawa ba Komiti Pampang Opis Australasia. Kami duai Pam rindu nyadi pengerintis sepengelama lima taun. Lebuh umur aku 29 taun, kami duai Pam diasuh bejalaika pengawa ngabas eklisia ba pulau-pulau sebelah Pasifik Selatan, ke udah nya dipegai pampang opis Fiji. Pulau-pulau nya nyengkaum Samoa Amerika, Samoa, Kiribati, Nauru, Niue, Tokelau, Tonga, Tuvalu, enggau Vanuatu.

Maya kami nemuai, orang ba sekeda pulau nya bisi nangi mimit ngagai Saksi-Saksi Jehovah. Nya alai kami patut bejimat. (Mat. 10:16) Eklisia ba pulau-pulau nya mit lalu sekeda ari eklisia nya enda ulih nyediaka endur alai kami diau. Nya alai kami nanya orang bukai ba endur nya sekalika kami ulih diau enggau sida, lalu sida seruran manah enggau kami.

Winston, nuan rindu lalu bisi minat enggau pengawa nyalin. Nama kebuah?

Ba Samoa: Ngajar siti sekula ke bala tuai gempuru

Maya nya, bala menyadi Kristian ba sebuah pulau di menua Tonga semina bisi beberapa iti surat mit enggau brosur dalam jaku Tonga. Lebuh nginjil sida ngena bup The Truth That Leads to Eternal Life dalam jaku English. Nya alai lebuh sekula ke tuai gempuru dipejalaika sepengelama empat minggu, tiga iku tuai gempuru ke nemu mimit aja jaku English setuju deka nyalin bup nya ngagai jaku Tonga. Pam naip manuskrip, lalu kami nganjung nya ngagai pampang opis Amerika Serikat ngambika dichelak. Pengawa nyalin nya sepengelama lapan minggu. Taja pan kualiti pengawa nyalin nya enda tentu berapa manah iga, tang bup nya udah nulung mayuh orang ke ngena jaku Tonga belajarka pemendar. Kami duai Pam ukai penyalin, tang pengawa nya nulung kami rindu lalu bisi minat enggau pengawa nyalin.

Pam, baka ni gaya pengidup ba pulau bebida ari ba Australia?

Perengka pengangkut ke nyadi endur alai kami duai diau lebuh bejalaika pengawa ngabas eklisia

Amat enda sama! Nya bepanggai ba dini alai kami diau. Ba sekeda endur bisi mayuh nyamuk, balat angat, mayuh chit, penyakit, lalu kadang-kadang kami enda chukup pemakai. Taja pia, maya lemai hari, lebuh kami pulai ke rumah kami ti dikumbai fale dalam jaku Samoa,  kami berasai nyamai lebuh meda tasik ari rumah kami. Rumah kami beatapka daun lalu nadai dinding. Bisi maya nya bulan terang nyentukka kami ulih meda pun nyiur lalu ayuk bulan nya ulih dipeda ba tasik. Maya ti ngerinduka ati nya meransang kami duai belemati sereta besampi, ngambika berunding utai ti positif.

Kami rinduka bala anak mit ke gaga ati lalu deka nemu pasal orang ke bekulit burak. Lebuh kami ba Niue, seiku nembiak lelaki murus lengan Winston ke bebulu lalu nyebut, “Aku rindu murus bulu ba lengan nuan.” Iya enda kala meda lengan ke balat bebulu lalu enda nemu baka ni deka nyebut nya!

Kami berasai tusah ati lebuh meda pengidup sida ke seranta, lalu pengidup sida amat tusah. Menua sida manah dipeda, tang kurang perengka kena ngintu pengerai lalu bisi mimit ai beresi ke diirup. Taja pia, bala menyadi Kristian kitai enda irau. Sida udah teleba enggau pengidup ke baka nya. Sida gaga ati ulih begulai enggau diri sebilik, bisi endur nyembah Jehovah, lalu bisi peluang muji Iya. Teladan sida nulung kami betatika utai ti pemadu beguna, lalu idup enggau pengumbas iya.

Pam, kadang-kadang nuan pan patut nyauk sereta berapi tang enda baka selama. Baka ni nuan ulih ngereja nya?

Ba Tonga: Pam masu gari kami duai

Aku beterima kasih ngagai apai ke udah ngajar aku mayuh utai, baka chara ngidupka api kena manduk utai. Iya mega ngajar aku chara ngidupka diri ngena mimit aja utai. Bisi sekali lebuh ngagai Kiribati, kami diau ba rumah ti mit ke beatapka daun, begeladakka batu karang ke udah diindik nyadi mit, sereta bedindingka buluh. Kena nyumai, aku numbak siti lubang ba geladak nyadika dapur lalu ngengkahka kulit nyiur ba lubang nya kena ngidupka api. Kena ngulihka ai, aku beratur ba telaga enggau bala indu ke bukai. Sida ngena kayu, panjai iya dua meter lalu bisi tali ba ujung kayu nya. Nya baka baur ginti. Ba ujung tali nya sida nanchangka beledi. Kami seiku-seiku ngauk ai. Sida nikauka tali nya ke dalam telaga lalu ba maya ti ngam sida jampat-jampat ngauk ai nya. Beledi nya singit lalu tama ai. Ba runding aku, pengawa nya baka ke senang. Tang maya aku nguji, ai nya enggai tama laban beledi aku majak melepung ba atas ai! Semua sida bendar amat ketawaka aku. Taja pia, seiku ari sida nulung aku. Bala indu nya seruran manah lalu deka nulung aku.

Seduai bela rinduka pengawa ke dipejalaika ba pulau-pulau nya. Ulih seduai bekunsika sekeda utai manah ke seruran dikenang seduai?

Winston: Lama ga kami duai nelebaka diri enggau sekeda adat ba endur nya. Ambika chunto, lebuh bala menyadi Kristian nyediaka pemakai ke kami duai, kesuah agi sida meri semua pemakai ke dikemisi sida sehari nya ngagai kami duai. Terubah-rubah, kami enda nemu kami patut ninggalka sekeda pemakai ke sida. Nya alai kami makai semua pemakai ke disediaka sida! Tang lebuh kami udah nemu pasal adat sida, kami ninggalka pemakai ke sida. Taja pan kami bisi pengurang, bala menyadi Kristian ulih meretika kami. Lalu sida gagit ati betemu enggau kami ninting enam bulan lebuh kami datai ngabas tauka lebuh kami datai ngelawa eklisia sida. Kelimpah ari kami duai Pam, nadai menyadi Kristian kitai ari endur bukai datai begulai enggau sida.

Ba Pulau Niue: Nguluka siti raban nginjil

Penatai kami duai mega mai asil ti manah. Mayuh orang ba endur nya ngumbai pengarap bala menyadi Kristian kitai ke diau dia digaga sida empu. Nya alai, lebuh sida meda kami duai Pam ke datai ari menua bukai ngabas bala menyadi nya, orang ke diau dia nyau nemu pengarap tu pengarap ti bendar lalu ibuhka pangan diri. Tu ngasuh sida alit ati.

Pam: Siti ari utai ke selalu dikenang aku iya nya, lebuh kami duai ba Kiribati. Eklisia ba endur nya semina bisi beberapa iku bala menyadi Kristian. Dia semina bisi seiku tuai gempuru ke benama Itinikai Matera. Iya enggau naka ulih nyaga semua kami. Bisi sekali iya datai mai bakul ke bisi sigi aja telu manuk. Ku iya madah, “Tu ke kita.” Maya nya, telu manuk utai ke jarang diempa tauka tusah deka diulih. Taja pan pemeri nya mit, tang pengerah jari iya negu ati kami duai.

 Pam, beberapa taun udah nya, nuan lenyau anak dalam kandung. Nama ulih nulung nuan napi utai tu?

Aku betubuh-bisi ba taun 1973 lebuh kami duai Winston ba Pasifik Selatan. Kami duai berunding deka pulai baru ngagai Australia. Tang empat bulan udah nya, anak dalam kandung aku gugur. Kami duai Winston balat tusah ati. Taja pan penusah ba ati majak kurang, tang kami duai agi berasai pedis. Lebuh kami duai nerima artikel ba Menara Jaga kena 15 April 2009, nya baru ati kami duai berasai nyamai sereta enda pedis agi. Majalah nya bisi siti begian “Tanya Ari Pemacha” ke betajuk: “Kati anak ke mati dalam kandung indai bisi pengadang diangkatka idup baru?” Artikel nya madahka, Jehovah deka nentuka utai ke patut digaga lalu Iya seruran ngereja utai ti ngena. Iya deka muai semua pemedis ke ditatka kitai ketegal diau ba dunya ti jai tu. Lebuh maya nya, Jesus deka “ngerusak pengawa Sitan.” (1 Jhn. 3:8) Artikel tu mega nulung kami duai bendar agi beterima kasih ke “mutiara” ti berega ke diulih ketegal kitai nembiak Jehovah! Enti nadai pengadang ari Perintah Petara, baka ni ku kami duai ulih napi semua penanggul ba dunya tu?

Pengudah kami duai napi penanggul ti besai nya, kami berengkah gawa penuh jam baru. Kami gawa beberapa bulan ba Betel Australia lalu udah nya kami nyambung baru pengawa ngabas eklisia. Ba taun 1981, pengudah empat taun gawa ba endur pesisir New South Wales enggau Sydney, kami dikangau gawa ba Betel Australia. Lalu agi gawa dia nyentuk ke diatu.

Winston, kati peneleba nuan lebuh ba Pulau-Pulau Pasifik Selatan nulung nuan ba pengawa nyadi seiku ari Komiti Pampang Opis Australasia?

Au, bisi. Pampang opis Australia diasuh ngemataka pengawa ba Samoa Amerika enggau Samoa. Udah nya, pampang opis New Zealand digabung enggau pampang opis Australia lalu nyadi pampang opis Australasia. Diatu kandang alai nginjil ke dipegai pampang opis Australasia nya nyengkaum, Australia, Samoa Amerika enggau Samoa, Pulau-Pulau Cook, New Zealand, Niue, Timor-Leste, Tokelau, sereta Tonga. Aku bepeluang nyadi pengari pampang opis ngabas mayuh ari endur nya. Peneleba sama gawa enggau bala menyadi Kristian ke tetap ati ba pulau-pulau nya nulung aku diatu lebuh aku gawa ari pampang opis.

Winston seduai Pam ba pampang opis Australasia

Kena ngujungka randau, aku deka madahka, kami duai Pam udah lama nemu ukai semina orang ke besai tuai aja ke ngiga Petara. Utai tu nyadi ba kami duai empu. Orang ke biak mega dekaka “mutiara ti berega amat,” taja pan diri sebilik nadai minat deka nemu pasal pemendar. (2 Raj. 5:2, 3; 2 Ban. 34:1-3) Endang amat, Jehovah nya Petara ti bepengerindu ke dekaka orang ke tuai enggau ke biak bela bulih pengidup ti meruan belama iya!

Lebuh kami duai Pam berengkah ngiga Petara lebih ari 50 taun ti udah, kami duai enda nyangka deka bisi mayuh peluang manah gawa ke Jehovah datai ke diatu. Sigi amat, pemendar pasal Perintah Petara baka mutiara ke besai amat rega! Kami duai keran deka enggau naka ulih bepegai teguh ba pemendar ke udah diulih!