Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 15

Neladan Jesus lalu Bulih Pengelantang enggau Pemaik

Neladan Jesus lalu Bulih Pengelantang enggau Pemaik

‘Lalu pemaik Petara, ti ngelui peragam mensia, deka nyaga ati enggau runding kita dalam Jesus Kristus.’—PLP. 4:7.

LAGU 113 Kitai Bisi Pemaik

DALAM ARTIKEL TU *

1-2. Nama kebuah ati Jesus balat tusah?

BA HARI ke penudi Jesus ba bumi, ati iya balat tusah. Enda lama agi orang ke jai deka munuh iya ngena chara ti balat pedis. Tang bisi utai ti balat ngirauka ati Jesus. Iya amat sayau ke Apai iya lalu deka ngelantangka ati Iya. Enti iya mengkang taluk lebuh napi penguji ti besai nya, iya deka ngemuliaka nama Apai iya, Jehovah. Jesus mega rinduka orang. Iya mega nemu kitai tau bulih pengidup ti meruan belama iya enti iya mengkang taluk ngagai Jehovah nyentuk ke iya mati.

2 Taja pan ati Jesus balat tusah, tang iya bisi pengelantang enggau pemaik. Ku iya madah ngagai bala rasul iya: “Aku ninggalka pemaik ba kita.” (Jhn. 14:27) Iya bisi ‘pemaik Petara,’ iya nya pengelantang ke datai ari kaul ti rapat enggau Jehovah. Pemaik nya ngasuh ati Jesus lantang.—Plp. 4:6, 7.

3. Nama deka diperesa kitai ba artikel tu?

3 Nadai seiku ari kitai deka napi penanggul ti balat baka Jesus. Tang semua nembiak Jesus endang deka napi penanggul. (Mat. 16:24, 25; Jhn. 15:20) Lalu baka Jesus, kadang-kadang ati kitai balat tusah. Baka ni kitai ulih nyeliahka diri ari pengirau ke tau ngachau pengelantang enggau pemaik kitai? Aram kitai meresa tiga iti utai ke dikereja Jesus ba pengawa nginjil, lalu beratika baka ni kitai ulih neladan iya lebuh napi penanggul.

 JESUS SERURAN BESAMPI

Kitai tau bulih pengelantang enggau pemaik nengah sampi (Peda genteran 4-7)

4. Nama sekeda chunto ke nunjukka Jesus suah besampi ba hari ke penudi sebedau iya mati? Nama jaku lalau ke diberi ngagai orang Kristian ba 1 Tesalonika 5:17?

4 Bacha 1 Tesalonika 5:17. Jesus suah besampi ba hari ke penudi iya ba bumi. Iya besampi sebedau nyadung roti enggau wain kena nunjukka chara ngingatka pemati iya. (1 Kor. 11:23-25) Sebedau mupuk ari endur sida ngintu pengerami Paska, iya besampi enggau bala murid iya. (Jhn. 17:1-26) Lebuh sida datai ba Getsemani malam nya, Jesus enda ngetu besampi. (Mat. 26:36-39, 42, 44) Lalu utai ke penudi disebut Jesus sebedau iya mati mega siti sampi. (Luk. 23:46) Jesus besampi ngagai Jehovah pasal semua utai ke nyadi ba hari ke penudi iya ba bumi.

5. Nama kebuah pemerani bala rasul Jesus nyau kurang?

5 Siti kebuah Jesus ulih betan napi penanggul laban iya bepanggai ba Apai iya nengah sampi. Tang, ari ke mengkang bejaga sereta besampi, bala rasul Jesus nyau tinduk. Ketegal nya, pemerani sida nyau kurang lebuh penguji datai. (Mat. 26:40, 41, 43, 45, 56) Lebuh kitai napi penanggul, kitai ulih mengkang taluk enti kitai nitihka teladan Jesus lalu “seruran besampi.” Nama utai ke ulih disampi kitai?

6. Baka ni pengarap ulih nulung kitai ngembuan pengelantang enggau pemaik?

6 Kitai ulih besampi ngambika Jehovah nambahka pengarap kitai. (Luk. 17:5; Jhn. 14:1) Kitai begunaka pengarap laban Sitan  deka nguji semua nembiak Jesus. (Luk. 22:31) Baka ni pengarap ulih nulung kitai bulih pengelantang enggau pemaik taja pan napi penanggul betangkan-tangkan? Lebuh kitai udah enggau naka ulih nguji mutarka siti-siti penanggul ke ditapi, pengarap deka nulung kitai bepanggai ba Jehovah. Kitai mega enda kelalu irau laban nemu Iya deka nulung kitai mutarka penanggul nya ba maya ti ngena.—1 Pet. 5:6, 7.

7. Nama ulih dipelajar nuan ari jaku Robert?

7 Sampi nulung kitai mengkang bisi pengelantang ba ati enda ngira nama penanggul ke ditapi kitai. Uji peratika utai ke nyadi ba Robert, seiku tuai gempuru ti tetap ati ke beumur lebih ari 80 taun. Ku iya madah: “Jaku lalau ba Pilipi 4:6, 7 udah nulung aku mutarka mayuh penanggul ba pengidup. Aku kala napi penanggul ba penatai pemisi. Lalu bisi sekali aku enda ulih nyadi tuai gempuru agi.” Nama nulung Robert mengkang bisi pengelantang ba ati? Ku iya agi: “Lebuh aku berasai irau, aku lalu tekala nya besampi. Aku nemu enti aku suah lalu bebendar agi besampi, ati aku deka berasai lantang agi.”

JESUS NGINJIL ENGGAU RANSING

Kitai tau bulih pengelantang enggau pemaik lebuh nginjil (Peda genteran 8-10)

8. Nitihka John 8:29, nama siti agi kebuah Jesus bisi pengelantang ba ati?

8 Bacha John 8:29. Jesus bisi pengelantang ba ati indah lebuh iya diperinsa. Nya ketegal iya deka ngelantangka ati Apai iya, Jehovah, enti iya mengkang taluk. Iya mega mengkang ngasi taja pan nya tusah ba iya. Kelimpah ari nya, iya rinduka Apai  iya. Nya alai, Jesus ngenuluka sembah ngagai Jehovah ba pengidup iya. Ambika chunto, sebedau datai ke bumi, Jesus nya tukang ti landik ke Petara. (J-lam. 8:30) Lebuh ba bumi, iya ransing ngajar pasal Apai iya ngagai orang bukai. (Mat. 6:9; Jhn. 5:17) Pengawa nya ngagaka ati Jesus.—Jhn. 4:34-36.

9. Nama kebuah kisuk ba pengawa nginjil ulih nulung kitai bisi pengelantang ba ati?

9 Kitai ulih neladan Jesus enti kitai ngasika Jehovah sereta ‘seruran bebendar gawa ke Tuan.’ (1 Kor. 15:58) Lebuh kitai kisuk nginjil, kitai kurang agi berundingka penanggul ke ditapi kitai. (SKR. 18:5) Ambika chunto, mayuh orang ke ditemu kitai ba pengawa nginjil napi penanggul ti balat agi ari kitai. Tang, pengudah sida belajar rinduka Jehovah lalu nitihka jaku lalau Iya, pengidup sida majak manah lalu lantang agi. Tu ngasuh kitai andal agi ke Jehovah deka nyaga enggau ngibun kitai. Lalu tu, nulung kitai bulih pengelantang ba ati. Ambika chunto, seiku menyadi Kristian indu ngasaika diri nadai guna sereta napi penyakit depression (kemurungan) sepemanjai idup iya. Tang iya ngumbai kisuk ba pengawa nginjil udah nulung iya. Ku iya madah: “Lebuh aku ngereja mayuh utai ba pengawa nginjil, aku ulih nagang asai ati diri lalu berasai gaga agi. Nya meh maya aku ngasaika diri amat semak enggau Jehovah.”

10. Nama ulih dipelajarka nuan ari jaku Brenda?

10 Pikirka pasal seiku menyadi Kristian indu ke benama Brenda enggau anak indu iya. Seduai iya bela bisi penyakit ti raya. Tubuh Brenda lemi lalu iya enda ulih bejalai. Taja pia, iya nginjil ari rumah ke rumah, enti iya ulih. Tang kesuah agi iya nginjil nengah chara nulis surat. Ku Brenda madah: “Aku nemu, penyakit aku enda ulih digeraika diatu. Tang lebuh aku kisuk ba pengawa nginjil, aku enda berundingka penanggul diri. Aku ulih fokus nulung orang ba kandang alai aku nginjil. Pengawa nya mega nulung ngingatka aku pasal pengadang aku ke jemah ila.”

JESUS NERIMA TULUNG ARI BALA BAKIH IYA

Kitai tau bulih pengelantang enggau pemaik lebuh begulai enggau bala bakih ti manah (Peda genteran 11-15)

11-13. (a) Nama digaga bala rasul enggau bala bakih Jesus ke bukai kena nunjukka sida nya amat bakih iya? (b) Baka ni asai ati Jesus ketegal bisi bakih ke baka nya?

11 Ayat ba Jaku Dalam 18:24 madahka: “Sekeda pangan taluk agi ari menyadi diri.” Sekumbang Jesus bejalaika pengawa nginjil, bala rasul iya ke tetap ati ngamatka ayat Bup Kudus nya. Bakih ti baka nya amat berega ba Jesus. Lebuh Jesus bejalaika pengawa nginjil, nadai seiku ari menyadi iya empu arapka iya. (Jhn. 7:3-5) Bisi sekali, indah kaban belayan iya ngumbai iya gila. (Mrk. 3:21) Tang bala rasul iya ke tetap ati enda baka nya. Sida bakih Jesus ti manah. Ba malam sebedau Jesus mati, iya madah ngagai sida: ‘Kita udah begulai enggau aku lebuh aku natka semua pemerinsa aku.’—Luk. 22:28.

12 Kadang-kadang bala rasul Jesus ngelebuka ati iya. Tang iya enda beratika penyalah sida. Iya beratika penaluk sida ngagai iya. (Mat. 26:40; Mrk. 10:13, 14; Jhn. 6:66-69) Ba malam ke penudi sebedau Jesus dibunuh, iya madah ngagai sida ke taluk nya: ‘Aku udah ngumbai kita pangan, laban aku udah madah ngagai kita semua utai ti didinga aku ari Apai.’ (Jhn. 15:15) Nya alai Jesus amat bulih mayuh peransang ari bala bakih iya. Bantu ke diberi sida ba pengawa nginjil ngasuh Jesus berasai gaga.—Luk. 10:17, 21.

13 Bakih Jesus ukai semina bala rasul iya aja. Iya mega bisi bakih bukai ke nyengkaum lelaki enggau indu ti nulung iya ba pengawa nginjil. Sekeda ari sida mai iya diau ba rumah  sida sereta bekunsika pemakai. (Luk. 10:38-42; Jhn. 12:1, 2) Bisi sekeda bakih ke bukai sama bejalai enggau iya sereta bekunsika utai. (Luk. 8:3) Jesus bisi bakih ti manah laban iya empu nyadi bakih ti manah. Iya ngereja utai ti manah ngagai sida lalu enda ngarapka lebih ari sida. Taja pan Jesus sempurna, tang iya beterima kasih ke sukung ari bakih iya ti enda sempurna. Sida nya meh ke nulung Jesus bulih pengelantang ba ati.

14-15. Baka ni kitai ulih ngiga bakih ti manah? Baka ni sida ulih nulung kitai?

14 Bakih ti manah nulung kitai mengkang taluk ngagai Jehovah. Lalu chara ti pemadu manah kitai tau bulih bakih ti manah iya nya, kitai empu patut nyadi bakih ti manah. (Mat. 7:12) Ambika chunto, Bup Kudus meransang kitai ngena awak enggau pengering nulung orang bukai kelebih agi ngagai “orang ke suntuk.” (Eps. 4:28) Ulih nuan mikirka sapa ba eklisia nuan ke begunaka bantu? Ulih nuan nulung meli utai ke menyadi Kristian ti tuai tauka sakit? Ulih nuan nyediaka pemakai ke ruang bilik ke bisi penanggul ba penatai pemisi? Enti nuan nemu chara ngena laman web jw.org® enggau aplikasi JW Library®, ulih nuan nulung ngajar sida ke bukai chara ngena perengka nya? Lebuh kitai bebendar nulung orang bukai, kitai deka gaga agi.—SKR. 20:35.

15 Bakih ti manah deka nyukung kitai lebuh kitai bisi penanggul. Sida mega nulung kitai ngetanka pengelantang ba ati. Uji peratika chunto Elihu enggau Jop. Lebuh Jop besebana pasal penanggul ke ditapi diri, Elihu mendingka iya. Pia mega enggau kitai,  lebuh orang besebana pasal penanggul diri, kitai ulih mendingka sida enggau manah. (Jop 32:4) Tang kitai anang ngarapka bala bakih ngaga pemutus ke kitai. Manah agi enti kitai nitihka jaku ajar ari Bup Kudus. (J-lam. 15:22) Raja David enggau ati ti baruh nerima tulung ari bala bakih. Nya alai kitai anang sumbung nyentukka kitai enggai nerima tulung ari sida. (2 Sam. 17:27-29) Endang berekat ari Jehovah enti kitai bisi bala bakih ti manah.—Jas. 1:17.

CHARA TERUS BISI PEMAIK

16. Nitihka Pilipi 4:6, 7, nama siti aja chara kitai tau bulih pengelantang enggau pemaik? Terangka.

16 Bacha Pilipi 4:6, 7. Nama kebuah Jehovah madahka kitai bulih pemaik “dalam [‘nengah,’ NW] Jesus Kristus”? Laban kitai semina bulih pemaik ti meruan belama iya ba runding enggau ati enti kitai mereti lalu arapka ungkup Jesus ba tuju Petara. Ambika chunto, nengah genselan tebus Jesus, semua dosa kitai ulih diampun. (1 Jhn. 2:12) Ati kitai berasai lantang amat lebuh berundingka tu! Jesus ke nyadi Raja ba Perintah Petara deka munaska semua penusah ke dibai Sitan enggau dunya iya. (Isa. 65:17; 1 Jhn. 3:8; Pem. 21:3, 4) Tu endang pengadang ti diandalka kitai! Lalu taja pan Jesus udah meri kitai pengawa ti berat, tang iya seruran enggau kitai, nyukung kitai nyentuk ngagai pengujung dunya. (Mat. 28:19, 20) Tu meri kitai pemerani! Pengelantang, pengadang, enggau pemerani nya utai ti beguna bendar kena kitai ngulihka pemaik.

17. (a) Baka ni orang Kristian ulih ngetanka pengelantang enggau pemaik sida? (b) Baka ke disemaya ba John 16:33, nama utai ke ulih dikereja kitai?

17 Baka ni nuan tau ngetanka pengelantang enggau pemaik nuan lebuh napi penanggul ti balat? Nuan ulih neladan Jesus. Kesatu, besampi, lalu bejarit ngereja nya. Kedua, ngasika Jehovah sereta nginjil enggau ransing, taja pan kadang-kadang enda senang. Lalu ketiga, ngiga bantu ari bala bakih ti bendar lebuh napi penanggul. Enggau nya, pemaik Petara deka nyaga ati enggau runding kitai. Lalu baka Jesus, kitai ulih ngalahka semua macham penanggul ke ninggang kitai.—Bacha John 16:33.

LAGU 41 Dingaka Sampi Aku

^ per. 5 Semua kitai napi penanggul ke ngasuh kitai enda lantang ati lalu nadai pemaik. Artikel tu deka berandauka tiga iti utai ke dikereja Jesus, lalu baka ni kitai tau bulih pengelantang enggau pemaik taja pan napi penusah ti balat.