Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 ARTIKEL DIPELAJAR 14

Enggau Naka Ulih Bejalaika Pengawa ke Diberi Jehovah

Enggau Naka Ulih Bejalaika Pengawa ke Diberi Jehovah

“Bekereja nyadi penginjil, lalu ngereja semua pengawa nuan.”—2 TIM. 4:5.

LAGU 57 Nginjil Ngagai Semua Orang

DALAM ARTIKEL TU *

Pengudah Jesus diangkatka idup baru, iya betemu enggau bala murid iya lalu ngasuh bala murid iya “bejalai . . . lalu gaga sida nyadi murid” (Peda genteran 1)

1. Nama pengawa ke deka dikereja semua nembiak Petara? Nama kebuah sida deka ngereja pengawa nya? (Peda gambar ba kulit majalah.)

JESUS KRISTUS meri pesan ngagai bala murid iya, ‘bejalai kita ngagai semua bansa lalu gaga sida nyadi murid aku.’ (Mat. 28:19) Semua nembiak Petara ke tetap ati deka nemu baka ni sida ulih “ngereja semua pengawa tu.” (2 Tim. 4:5) Pengawa ke diberi Petara tu beguna agi ari pengawa bukai lalu patut dipejalaika enggau lengkas. Taja pan kitai deka, tang nya ulih nyadi penanggul laban ukai semua kitai ulih ngena mayuh awak ba pengawa tu.

2. Nama penanggul ke ditapi kitai seraya kitai enggau naka ulih bejalaika pengawa ke diberi Jehovah?

2 Bisi mega pengawa bukai ti beguna ke ngena jam enggau pengering kitai. Ambika chunto, ketegal deka nyediaka utai ke diguna diri sebilik, kitai patut bekereja, lalu tu begunaka mayuh jam. Kitai tauka diri sebilik engka enda bepengerai, balat tusah ati, tauka nyau tuai. Baka ni kitai ulih bejalaika pengawa ke diberi Jehovah enggau naka ulih taja pan bisi penanggul ke baka tu?

3. Nama ulih ditemu kitai ari jaku Jesus ke bisi ba Matthew 13:23?

3 Enti kitai enda ulih ngereja mayuh pengawa ke diberi Petara Jehovah ketegal penanggul ke ditapi kitai, anang lemi semengat. Jesus nemu ukai semua kitai ulih ngena awak enggau pengering ti sebaka lebuh nginjil. (Bacha Matthew 13:23.) Petara ingatka semua pengawa kitai seagi-agi kitai ngereja nya enggau pengabis ati. (Heb. 6:10-12) Kadang-kadang, kitai engka ngasaika kitai ulih ngereja  mayuh agi pengawa ke Jehovah. Nya alai, ba artikel tu kitai deka mansik chara kitai ulih ngenuluka pengawa ke diberi Jehovah, idup enggau pengumbas iya, sereta nyadi penginjil ti landik agi. Tang, keterubah, nama reti enggau naka ulih bejalaika pengawa ke diberi Petara?

4. Nama reti enggau naka ulih bejalaika pengawa ke diberi Petara?

4 Enggau naka ulih bejalaika pengawa ke diberi Petara reti iya, kitai enggau naka ulih nginjil sereta ngajar orang. Tu ukai semina bekaul enggau jam tang mega tuju ati, laban nya meh utai ke dikemeratka Jehovah. Enti kitai rinduka Jehovah enggau orang bukai, tu deka ngasuh kitai gawa enggau pengabis ati. * (Mrk. 12:30, 31; Kol. 3:23) Gawa enggau pengabis ati reti iya, kitai ngena pengering, sereta pengelandik kitai gawa ke Petara. Enti kitai beterima kasih ke peluang gawa ke Petara, kitai deka enggau naka ulih bekunsika berita manah enggau mayuh orang.

5-6. Kati ulih orang ke semina bisi mimit aja awak ngenuluka pengawa nginjil? Beri siti chunto.

5 Uji gambarka seiku lelaki ke rindu amat bemain gitar. Iya gaga ati lebuh iya ulih bemain gitar ba sebarang maya. Taja pia kena ngulihka belanja diri, iya berengkah bekereja penuh jam nyadi juruwang ba kedai. Taja pan mayuh jam dikena iya gawa ba kedai, iya agi rinduka musik. Iya keran deka ngemansangka pengelandik ba musik lalu deka gawa nyadi pemusik. Ketegal tu, iya gaga ati bemain gitar lebuh bisi peluang, enda ngira lama tauka enda.

6 Pia mega enggau kitai. Kitai engka nadai tentu mayuh awak ngereja pengawa nginjil. Tang nya meh utai ke rindu dikereja kitai. Kitai bebendar deka ngemansangka pengelandik ngambika ulih nyapai ati orang lebuh kitai nusui berita manah pasal Perintah Petara. Taja pan kitai bisi mayuh tanggung  pengawa, kitai agi ulih ngenuluka pengawa nginjil. Baka ni kitai ulih ngereja nya?

CHARA KITAI ULIH NGENULUKA PENGAWA NGINJIL

7-8. (a) Nama runding Jesus pasal pengawa nginjil? (b) Baka ni kitai ulih neladan runding Jesus pasal pengawa nginjil?

7 Jesus netapka teladan ti badas bekaul enggau pengawa nginjil. Bejaku pasal Perintah Petara nya pengawa ke dikemeratka iya ba pengidup. (Jhn. 4:34, 35) Iya bejalai beratus-ratus kilometer ngambika ulih nginjil ngagai mayuh orang. Iya ngena peluang ke dikemisi berandau enggau orang ba endur orang mayuh tauka ba rumah sida empu. Tu nunjukka Jesus ngenuluka pengawa nginjil ba pengidup iya.

8 Kitai ulih nunda teladan Jesus. Kitai deka ngiga peluang berandau pasal Perintah Petara, enda ngira alai tauka maya. Kitai sanggup ninggalka penyenang diri ngambika ulih nginjil. (Mrk. 6:31-34; 1 Pet. 2:21) Sekeda ari bala menyadi Kristian kitai nyadi pengerintis spesial, biasa, tauka sukung. Bisi nya belajarka bansa jaku bukai tauka pindah ngagai endur ke begunaka mayuh agi penginjil. Taja pia, kemayuh agi pengawa nginjil dipejalaika bala penginjil ke biasa. Enda ngira kitai ulih ngaga mayuh tauka mimit ba pengawa nginjil, Petara Jehovah enda ngarapka kitai ngereja utai ke enda ulih dikereja. Jehovah deka semua kitai gaga ati nusui berita manah pasal Iya, Petara ti gaga ati.—1 Tim. 1:11; U-dat. 30:11.

9. (a) Baka ni Paul ngenuluka pengawa nginjil taja pan iya patut bekereja sekular? (b) Ba Kereja Rasul 28:16, 30, 31, nama ditemu kitai pasal Paul bekaul enggau pengawa nginjil?

9 Rasul Paul mega netapka teladan ti manah. Iya ngenuluka pengawa nginjil ba pengidup. Lebuh kali kedua iya bejalaika pengawa nyadi pengerintis seberai tasik ba Korint, iya enda chukup duit kena ngintu diri. Nya alai iya bekereja ngaga langkau kain. Tang, nya ukai pengawa ke dikenuluka iya ba pengidup. Iya semina gawa ngulihka belanja ngambika ulih ngintu diri lalu “nadai minta bayar” lebuh nginjil. (2 Kor. 11:7) Taja pan Paul patut ngereja sekeda pengawa sekular, tang iya terus ngenuluka pengawa nginjil ba sebarang maya, indah ba Hari Sabat. Pengudah bulih chukup belanja, Paul ulih ngereja mayuh agi ba pengawa nginjil. Iya berengkah kisuk “madahka jaku Tuhan, besaksi ngagai orang Judah madahka Jesus nya Kristus.” (SKR. 18:3-5; 2 Kor. 11:9) Enda lama udah nya, lebuh Paul ditan ba rumah iya empu di Rome kira 2 taun, iya besaksi ngagai orang ke ngabas iya sereta nulis surat. (Bacha Kereja Rasul 28:16, 30, 31.) Paul enggai ngelakka sebarang utai nekul iya nginjil. Ku Paul nulis: ‘Laban kami udah diberi pengawa tu ulih pengasih Petara, kami enda mantul.’ (2 Kor. 4:1) Baka Paul, taja pan kitai ngena mayuh jam ba kereja sekular, tang kitai agi ulih ngenuluka pengawa nginjil ba pengidup.

Bisi mayuh chara kitai tau enggau naka ulih nembuka pengawa ke diberi Petara (Peda genteran 10-11)

10-11. Baka ni kitai ulih bejalaika pengawa ke diberi Petara taja pan kitai enda tentu bepengerai?

10 Enti sema kitai enda tentu ulih nginjil ari rumah ke rumah ketegal udah tuai tauka enda bepengerai, tang kitai agi ulih nginjil ngena chara bukai. Penginjil ba abad keterubah nginjil ngagai orang ba dini-dini endur. Sida ngena semua peluang ke dikemisi berandau pasal pemendar, sekalika nya ari rumah ke rumah, ba endur orang mayuh, tauka enda formal. Sida berandau enggau sapa-sapa ke ditemu sida. (SKR. 17:17; 20:20) Enti kitai enda tentu ulih bejalai, kitai engka ulih duduk ba endur ke bisi mayuh orang lalu nginjil ngagai orang ke mansa.  Tauka kitai ulih nginjil ngena chara enda formal, nulis surat, tauka ngena telefon. Mayuh penginjil enda ulih nginjil ari rumah ke rumah ketegal enda bepengerai tauka bisi penanggul bukai. Tang sida agi ulih gaga ati lebuh nginjil ngena chara tu.

11 Taja pan kitai enda tentu bepengerai, kitai agi ulih bejalaika pengawa ke diberi Petara. Peratika baru teladan rasul Paul. Ku iya madah: ‘Kuasa ti besai nya datai ari Petara, ukai datai ari kami.’ (2 Kor. 4:7) Bisi sekali, Paul begunaka pengering lebuh bejalaika pengawa nyadi pengerintis seberai tasik ketegal iya sakit. Iya madah ngagai orang Galatia, ketegal penyakit nya, iya bisi peluang keterubah alai nusui berita manah ngagai sida. (Gal. 4:13) Pia mega, enti kitai enda bepengerai kitai agi ulih nginjil ngagai bala lutur, bala misi, sereta orang bukai ke nulung ngintu kitai. Mayuh ari sida ke gawa tu nadai ba rumah lebuh penginjil datai ngagai rumah sida.

CHARA IDUP ENGGAU PENGUMBAS IYA

12. Nama reti enti mata kitai “fokus”?

12 Jesus madahka: “Mata nyadika lampu tubuh. Nya alai, enti mata kita menyana [‘fokus,’ NW], semua tubuh kita penuh laban penampak.” (Mat. 6:22) Nama reti ku Jesus? Iya madahka, kitai patut idup enggau pengumbas iya tauka fokus ba siti juluk ati, tauka tuju. Anang nejuka sebarang utai ngelimpangka kitai ari nyapai juluk ati tauka tuju kitai. Jesus empu netapka teladan. Iya ngenuluka pengawa ke diberi Petara ba pengidup. Iya mega ngajar bala  murid iya ngenuluka pengawa ke Petara sereta Perintah Petara. Enti kitai ngenuluka pengawa nginjil ba pengidup, kitai ‘ngiga dulu Perintah Petara enggau pengelurus Iya.’—Mat. 6:33.

13. Nama ulih nulung kitai fokus ba pengawa ke diberi Petara?

13 Siti chara kitai ulih fokus ba pengawa ke diberi Petara iya nya, ngurangka jam ba pengawa ke enda tentu beguna. Enggau nya kitai ulih ngena mayuh agi awak nulung orang ngelala sereta rinduka Jehovah. * Ambika chunto, ulih kitai ngatur jam ke dikena kitai ba kereja sekular ngambika bisi mayuh agi awak ba pengawa nginjil ninting minggu? Ulih kitai ngurangka sekeda pemerindang ke ngena mayuh jam?

14. Nama ubah ke digaga sepasang laki bini ngambika ulih ngena mayuh agi awak ba pengawa nginjil?

14 Tu meh utai ke digaga seiku tuai gempuru ke benama Elias, enggau bini iya. Ku Elias madah: “Kami duai enda ulih tekala nya berengkah nyadi pengerintis. Tang bisi utai ke ulih digaga kami ngambika ulih ngena mayuh agi awak ba pengawa nginjil. Ambika chunto, kami ngurangka belanja, ngurangka jam ke dikena ba pemerindang, sereta minta tuke ngubah jadual kereja kami. Asil iya, kami ulih nginjil maya lemai hari, ulih belajar Bup Kudus enggau mayuh agi orang, lalu ulih nginjil ba tengan minggu dua kali sebulan. Tu amat ngagaka ati kami duai!”

CHARA NYADI PENGINJIL TI LANDIK

Ngena utai ke dipelajar kitai ba gempuru tengan minggu ulih nulung kitai ngemansangka pengelandik ba pengawa nginjil (Peda genteran 15-16) *

15-16. (a) Sejalai enggau 1 Timoti 4:13, 15, nama siti agi chara kitai ulih bejalaika pengawa ke diberi Petara? (b) Baka ni kitai ulih ngemansangka pengelandik ba pengawa nginjil? (Peda mega kutak “ Juluk Ati ke Nulung Aku ba Pengawa Nginjil.”)

15 Siti agi chara kitai bejalaika pengawa ke  diberi Petara enggau naka ulih iya nya, ngemansangka pengelandik ba pengawa nginjil. Orang ke bejalaika sekeda pengawa patut seruran belajar sereta nerima latih ngambika bulih penemu sereta landik. Pia mega enggau bala penginjil Perintah Petara. Kitai patut terus belajar ngambika ulih nyadi penginjil ti landik.—J-lam. 1:5; bacha 1 Timoti 4:13, 15.

16 Tang, ulih kitai terus ngaga pemansang ba pengawa nginjil? Ulih, enti kitai nerima iring ari Gempuru Pengidup enggau Pengawa Kristian Kitai. Gempuru tu nyediaka latih kena nulung kitai landik ba pengawa nginjil. Ambika chunto, lebuh chairman meri jaku lalau ngagai pemelajar ke bisi bagi, kitai ulih belajar ari sekeda jaku lalau ke ulih nulung kitai ngaga pemansang ba pengawa nginjil. Kitai ulih ngena jaku lalau nya lebuh kitai nginjil. Kitai mega ulih minta tulung ari tuai raban nginjil tauka nginjil enggau iya, tauka nginjil enggau pengerintis, tuai ti ngabas, tauka penginjil ke bepeneleba. Enti kitai landik ngena utai ke bisi ba Perengka Ngajar, kitai deka rindu agi nginjil sereta ngajar.

17. Nama deka diulih nuan lebuh nuan enggau naka ulih nembuka pengawa ke diberi Jehovah?

17 Endang basa ti chukup besai ulih ‘sama bekereja enggau Petara’! (1 Kor. 3:9) Lebuh nuan “nemu milih utai ti pemadu badas” sereta ngenuluka pengawa ke diberi Jehovah, nuan deka nyembah Iya “enggau ati ti gaga.” (Plp. 1:10; Mas. 100:2) Ketegal gawa ke Petara, nuan ulih andalka Iya deka meri nuan pengering kena nembuka pengawa ke diberi Iya, enda ngira nama penanggul tauka pengurang ke ditapi nuan. (2 Kor. 4:1, 7; 6:4) Sekalika nuan ulih ngena mayuh awak nginjil tauka enda, nuan ulih “temegahka diri empu” lebuh nuan enggau naka ulih ngereja pengawa ke diberi Jehovah. (Gal. 6:4) Lebuh nuan enggau naka ulih ngereja pengawa nya, nuan mandangka diri rindu ke Iya sereta orang bukai. 1 Tim. 4:16 madahka: “Enti nuan ngereja nya, nuan deka nyelamatka diri empu enggau orang ke mendingka nuan.”

LAGU 58 Ngiga Orang ke Rinduka Pemaik

^ per. 5 Jesus udah ngasuh kitai nusui berita manah pasal Perintah Petara sereta ngaga orang nyadi murid. Artikel tu deka berandauka baka ni kitai ulih bejalaika pengawa ke diberi Petara Jehovah, taja pan napi penanggul. Kitai mega deka belajarka chara kitai ulih nyadi penginjil ti landik agi sereta gaga agi lebuh ngereja pengawa nginjil.

^ per. 4 PENERANG JAKU: Pengawa ke diberi Jehovah nyengkaum nginjil enggau ngajar, pengawa niri enggau ngaduka bengunan teokratik, sereta pengawa meri bantu maya penusah ngenyit nyadi.—2 Kor. 5:18, 19; 8:4.

^ per. 13 Peda tujuh iti chara ba kutak “Chara Nuan Ulih Idup enggau Pengumbas Iya” dalam Menara Jaga kena Julai 2016, lamb. 12.

^ per. 62 PENERANG PASAL GAMBAR: Seiku menyadi Kristian indu nunjukka chara datai ngabas ba gempuru tengan minggu. Pengudah nya, lebuh chairman meri jaku lalau, iya nulis jaku lalau nya ba brosur Ngajar. Udah nya, ba ujung minggu, iya ngena utai ke dipelajar iya ba gempuru tengan minggu lebuh nginjil.