Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mei 2016

 TOPIK RANDAU | LEBUH ORANG TI DIKESAYAUKA MATI

Kati Nya Salah Tusah Ati?

Kati Nya Salah Tusah Ati?

Kala nuan kena balat sakit enda lama? Nuan engka jampat gerai, nya alai nuan enda ingatka pemedis nya. Tang, tusah ati enda baka nya. Dalam bup Healing a Spouse’s Grieving Heart, Dr. Alan Wolfelt nulis: “Asai ati ti tusah ukai utai ti ulih dibuai.” Taja pia, ku iya nambah: “Nyau kelama sereta sukung ari orang bukai, asai ati nuan ti tusah deka kurang.”

Ngambika chunto, peratika utai ke nyadi ba Abraham lebuh bini iya mati. Bup Kudus madahka “Abraham berengkah tusah ati lalu nyabakka Sarah.” (Pemungkal 23:2, NW) Leka jaku “berengkah” nunjukka iya begunaka awak ti lama kena mutarka asai ati iya ti tusah. * Siti agi chunto iya nya Jakop, ke dikemulaka lalu pechaya anak iya Josep udah diempa jelu babas. Iya “lama amat” tusah ati, lalu sida sebilik enda ulih merindang iya. Beberapa taun udah nya, pemati Josep agi dikenang iya.—Pemungkal 37:34, 35; 42:36; 45:28.

Sama mega kemaya hari tu. Mayuh orang agi tusah ati ke pemati orang ke rapat enggau sida. Peratika dua iti chunto tu.

  • “Laki aku, Robert, mati kena 9 Julai 2008. Pagi iya belantak, nadai bida enggau hari bukai. Pengudah makai pagi, baka ke seruran digaga kami duai sebedau iya mupuk ngagai endur gawa, kami nyium sereta merap pangan diri, lalu nyebut ‘Aku sayauka nuan.’ Enam taun udah nya, aku agi ngasaika pemerinsa nya dalam ati aku. Aku engka enda ulih muai asai ati ti tusah ketegal ditinggalka Rob.”—Gail, beumur 60.

  • “Taja pan bini ke dikesayauka aku udah nadai lebih ari 18 taun, aku agi ngenang iya sereta tusah ati ke pemati iya. Tiap kali aku meda utai ba alam ti ngerinduka ati, aku ngenang iya, lalu aku enda ulih ngetu berundingka iya rinduka utai ti dipeda aku.”—Etienne, beumur 84.

Endang amat, lama napi pemerinsa sereta asai ati ti balat tusah nya sigi bisi nyadi. Chara tiap iku orang ngayanka penusah ati diri enda sama, lalu kitai enda patut ngakim chara orang bukai napi penusah ke ninggang sida. Pia mega, kitai engka patut nyeliah ari nyalahka diri empu enti chara kitai napi penusah nya baka ke tekelalu. Baka ni kitai ulih mutarka asai ati ti tusah?

^ per. 4 Anak Abraham, Isak, agi tusah ati taja pan indai iya, Sarah, udah mati tiga taun.—Pemungkal 24:67

 

Belajar Lebih Agi

MENARA JAGA (EDISI DIKENA BELAJAR)

Mutarka Asai Ati Ti Tusah

Bup Kudus nyediaka chara ti ulih dikena.