Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mei 2016

Mutarka Penanggul Ngena Pengerindu

Mutarka Penanggul Ngena Pengerindu

“Diau bebaik enggau pangan diri.”—MRK. 9:50.

LAGU: 39, 77

1, 2. Nama penanggul mensia ke dipadah dalam bup Pemungkal, lalu nama kebuah kitai patut beratika tu?

KALA nuan berundingka pasal laya ke bisi dipadah dalam Bup Kudus? Ba beberapa bab keterubah aja dalam bup Pemungkal, kitai macha pasal Kain ke munuh Abel (P-kal. 4:3-8); Lamek munuh seiku lelaki ke ngemakalka iya (P-kal. 4:23); bala pengibun jelu Abraham belaya enggau bala pengibun jelu Lot (P-kal. 13:5-7); Hagar mechat Sarah, lalu Sarah ringat ngagai Abraham (P-kal. 16:3-6); Ismail deka ngelaban semua orang, lalu semua orang deka ngelaban iya.—P-kal. 16:12.

2 Nama kebuah laya ke baka nya dipadah dalam Bup Kudus? Laban kitai ulih belajar ari chunto orang ke enda sempurna ke napi penanggul nya. Kitai mega enda sempurna, lalu enti kitai napi penanggul ti sama ba pengidup, kitai ulih nitihka chunto manah ke bisi dalam Bup Kudus sereta nyeliahka chunto ti enda manah. (Rom. 15:4) Tu ulih nulung kitai nemu chara dikena terus bebaik enggau orang bukai.

3. Nama deka dikerandauka kitai ba artikel tu?

3 Ba artikel tu, kitai deka belajarka kebuah kitai patut mutarka penanggul tauka laya, sereta chara kitai ulih mutarka iya. Kitai mega  deka belajarka sekeda prinsip Bup Kudus ke ulih nulung kitai mutarka penanggul sereta ngetanka kaul ti manah enggau Jehovah sereta enggau orang bukai.

KEBUAH NEMBIAK PETARA PATUT MUTARKA PENANGGUL

4. Ulah ti baka ni ke bisi di serata dunya, lalu nama penyadi?

4 Sitan nya meh kebuah orang enda beserakup sereta napi mayuh penanggul. Nama kebuah? Ba Kebun Eden, Sitan madahka semua orang ulih sereta patut ngaga pemutus kediri empu bekaul enggau utai ti manah tauka utai ti jai, enda ibuh begunaka iring ari Petara. (P-kal. 3:1-5) Tang lebuh kitai beratika dunya kemaya hari tu, kitai ulih meda ulah ke baka tu semina ngenataika penusah. Mayuh orang ngasaika sida bisi hak ngaga pemutus kediri empu bekaul enggau utai ti manah tauka jai. Sida sumbung, berundingka diri empu aja, bepekit sereta enda beduli sekalika pemutus ke digaga sida ngemediska ati orang bukai tauka enda. Ulah ke baka tu ngasuh belaya. Bup Kudus nangkan kitai, enti kitai jampat ringat, kitai deka suah belaya enggau orang bukai sereta ngereja mayuh dosa.—J-lam. 29:22.

5. Baka ni Jesus ngajar orang mutarka laya?

5 Lebuh Jesus meri Ajar ba atas Bukit, iya ngajar bala murid chara bebaik sereta nyeliahka laya, taja pan nya baka ke nadai mai penguntung ke sida. Chunto, iya ngasuh sida baruh ati, bebaik enggau orang bukai, muai sebarang utai ti ulih ngasuh ringat, mutarka laya enggau jampat sereta rinduka munsuh sida.—Mat. 5:5, 9, 22, 25, 44.

6, 7. (a) Nama kebuah nya beguna mutarka penanggul enggau jampat? (b) Nama tanya ke patut ditanya semua nembiak Jehovah ngagai diri empu?

6 Kemaya hari tu, kitai nyembah Jehovah lebuh kitai besampi, nginjil sereta datai begempuru. Enti kitai enda bebaik enggau bala menyadi Kristian kitai, Jehovah enda nerima sembah ari kitai. (Mrk. 11:25) Ngambika ulih nyadi kawan Jehovah, kitai enda tau enda ngampunka orang bukai enti sida ngereja penyalah.—Bacha Luke 11:4; Epesus 4:32.

7 Jehovah ngarapka semua nembiak Iya ngampunka orang bukai sereta bisi kaul ti manah enggau orang bukai. Kitai ulih nanya diri empu: ‘Kati aku jampat ngampunka bala menyadi Kristian? Kati aku rindu begulai enggau sida?’ Enti nuan ngasaika diri patut agi ngampunka orang bukai, besampi ngagai Jehovah sereta minta Iya nulung nuan mansang ba pekara tu. Apai kitai ti di serega deka ninga sampi ke disebut enggau baruh ati, lalu nyaut sampi nya.—1 Jhn. 5:14, 15.

ULIH NUAN ENDA BEDULIKA PENYALAH?

8, 9. Nama patut digaga kitai enti orang bisi ngasuh kitai enda nyamai ati?

8 Semua kitai enda sempurna, nya alai kitai nemu orang deka nyebut tauka ngereja utai ke ulih ngasuh kitai enda nyamai ati. (P-jar. 7:20; Mat. 18:7) Baka ni nuan mutarka nya? Kitai ulih belajarka utai ti beguna ari peneleba tu: Seiku menyadi Kristian indu bejaku enggau dua iku menyadi Kristian lelaki. Tang seiku ari menyadi Kristian lelaki nya enda nyamai ati enggau chara iya bejaku. Lebuh dua iku menyadi Kristian lelaki nya kediri, iya ke enda nyamai ati nya berengkah mutap pasal menyadi Kristian indu nya. Taja pia, menyadi Kristian lelaki ke enda pedis ati madah ngagai iya pasal menyadi Kristian indu nya ke udah enggau taluk nyembah Jehovah pengelama 40 taun, taja pan napi mayuh penusah. Baka ni menyadi Kristian lelaki ke enda nyamai ati  nerima nya? Ku iya, “Amat ku nuan nya.” Udah nya, iya milih enggai ingatka utai ti udah nyadi. Iya pechaya menyadi Kristian indu nya enda sengaja ngasuh iya enda nyamai ati.

9 Nama dipelajarka kitai ari peneleba tu? Enti orang bisi ngasuh kitai enda nyamai ati, kitai ulih milih chara dikena mutarka pekara nya. Orang ke bepengerindu deka ngampunka orang. (Bacha Jaku-Dalam 10:12; 1 Peter 4:8.) Enti kitai “enda bedulika penyalah nya,” tu utai ti manah ba Jehovah. (J-lam. 19:11; P-jar. 7:9) Nya alai, enti sema orang bisi nyebut tauka ngereja utai ti ngasuh nuan enda nyamai ati dudi hari, tanya diri empu: ‘Ulih aku enda bedulika penyalah tu? Patut aku terus berundingka pekara tu?’

10. (a) Nama digaga seiku menyadi Kristian indu lebuh iya keterubah iya ninga jaku ti enda manah pasal iya? (b) Ni bagi ayat Bup Kudus ke ulih nulung iya ngetanka pemaik?

10 Lebuh orang bukai nyebut utai ti enda manah pasal kitai, kitai engka tusah deka enda bedulika utai ku sida. Peratika utai ti nyadi ba seiku menyadi Kristian indu ti nyadi pengerintis ti dikangau ngena nama Lucy. Sekeda orang ba gempuru nyebut utai ti enda manah pasal kualiti pengawa nginjil sereta chara iya ngena awak. Iya balat pedis ati lalu minta jaku lalau ari bala menyadi lelaki ke tegap ba pengarap. Nama penyadi? Iya madahka, sida ngena Bup Kudus nulung iya ngambika enda kelalu berunding pasal penemu orang bukai ke enda manah, lalu berengkah berunding mayuh agi pasal Jehovah. Lucy diperansang lebuh iya macha Matthew 6:1-4. (Bacha.) Ayat tu ngingatka iya, ngelantangka ati Jehovah nya utai ti pemadu beguna. Nya alai, iya milih enda bedulika jaku orang ke enda manah. Diatu, enti sema orang bukai bisi nyebut utai ti enda manah pasal pengawa nginjil iya, iya gaga ati laban iya nemu iya enggau naka ulih ngerinduka ati Jehovah.

LEBUH NUAN BEDULIKA PENYALAH

11, 12. (a) Nama patut digaga orang Kristian, enti sema iya ngasaika menyadi Kristian ke bukai “bisi enda nyamai ati ngagai” iya? (b) Nama ulih dipelajarka kitai ari chara Abraham mutarka laya? (Peda gambar ba pun artikel.)

11 “Semua kitai bela ngereja mayuh macham penyalah.” (Jas. 3:2) Enti sema nuan nemu seiku menyadi Kristian enda nyamai ati ketegal utai ti disebut tauka digaga nuan, nama patut digaga nuan? Jesus madahka enti “kita deka meri pemeri kita ba alta, lalu teingatka menyadi lelaki tauka menyadi indu kita bisi enda nyamai ati ngagai kita, tinggalka pemeri kita dia di mua alta, bebaik dulu enggau iya, udah nya baru kita mansang lalu meri pemeri kita.” (Mat. 5:23, 24) Nya alai, putarka utai nya enggau orang nya. Lebuh nuan ngereja tu, juluk ati nuan patut deka bebaik enggau iya. Nuan patut ngaku penyalah diri sereta enda nguji deka nyalahka iya. Bebaik enggau bala menyadi Kristian nya utai ti pemadu beguna.

12 Bup Kudus nunjukka chara nembiak Petara ulih terus bebaik enggau orang bukai lebuh bisi laya. Ngambika chunto, Abraham enggau anak menyadi iya Lot sama ngembuan mayuh jelu, lalu orang ke ngibun jelu seduai iya berengkah belaya ketegal enda chukup padang rumput ke semua sida. Ketegal Abraham deka bebaik, iya ngawakka Lot milih menua ti pemadu manah. (P-kal. 13:1, 2, 5-9) Endang chunto ti manah ke kitai! Kati Abraham rugi belama iya ketegal iya gerah jari? Enda. Enda lama udah nya, Jehovah besemaya deka ngenataika mayuh agi berekat ngagai Abraham ari pengerugi  ke ditapi iya. (P-kal. 13:14-17) Nama dipelajarka kitai? Taja pan kitai napi pengerugi, Jehovah deka merekatka kitai enti kitai mutarka laya ngena pengerindu. [1]—Peda nota penutup.

13. Baka ni seiku tuai ti ngatur mutarka jaku ti kasar, lalu nama ulih dipelajarka kitai ari chunto iya?

13 Peratika chunto kemaya hari tu. Seiku tuai ti ngatur ba opis gempuru besai betelefon ngagai seiku menyadi Kristian lelaki laban deka nemu sekalika iya ulih gawa ba opis nya tauka enda. Tang menyadi Kristian lelaki nya nyebut sekeda utai ke enda manah lalu nutup telefon ketegal iya agi ringat ngagai tuai ti ngatur opis nya ke dulu agi. Tuai ti ngatur ke baru enda pedis ati, tang iya enda ulih nejuka utai ke udah nyadi. Sejam udah nya, iya betelefon ngagai menyadi Kristian lelaki nya baru, lalu mai iya betemu. Minggu siti, seduai iya betemu ba Palan Gempuru, lalu pengudah besampi ngagai Jehovah, seduai iya berandau pengelama sejam. Menyadi Kristian lelaki nya nerangka utai ke udah nyadi bekaul enggau tuai ti ngatur ke sebedau tu. Tuai ti ngatur ke baru mendingka enggau manah sereta berandauka sekeda ayat Bup Kudus ke ulih dikena. Asil iya, seduai iya ulih bebaik lalu sama gawa ba gempuru besai. Menyadi Kristian lelaki nya beterima kasih ngagai tuai ti ngatur laban udah berandau enggau iya ngena chara ti siru sereta nelap.

PATUT NUAN NGASUH TUAI GEMPURU MUTARKA IYA?

14, 15. (a) Ni maya kitai patut ngena jaku ajar ba Matthew 18:15-17? (b) Nama tiga iti chara ke dipadahka Jesus, lalu nama tuju nuan ngena ajar nya?

14 Mayuh penanggul entara dua iku orang Kristian ulih tauka patut diputarka seduai iya kediri empu. Taja pia, kekadang enda  ulih. Sekeda penanggul engka begunaka tulung ari orang bukai baka ke udah dipadah ba Matthew 18:15-17. (Bacha.) “Bedosa” ke dipadah Jesus ba ayat nya ukai laya ti mit entara orang Kristian. Baka ni kitai nemu? Jesus madahka, enti orang ke bedosa enggai nesal ati pengudah berandau enggau iya kediri, enggau saksi sereta menyadi Kristian lelaki ke diasuh mutarka pekara nya, iya patut digaga “baka ke ngaga orang bansa bukai, tauka pengumpul chukai.” Kemaya hari tu, reti nya iya patut dibuai ari gerempung. “Bedosa” ulih nyengkaum nipu tauka betenah, tang iya enda nyengkaum dosa baka butang, homoseksual, limpang ari pengarap tauka nyembah engkeramba. Dosa ke baka tu patut diputarka bala tuai gempuru.

Kitai engka patut berandau beberapa kali enggau orang ke ngasuh kitai enda nyamai ati ngambika ulih bebaik (Peda genteran 15)

15 Juluk ati Jesus meri jaku ajar tu iya nya kena nunjukka ngagai kitai chara ke dikena nulung menyadi Kristian laban kitai rinduka iya. (Mat. 18:12-14) Baka ni kitai ulih nitihka jaku ajar tu? (1) Kitai patut nguji bebaik enggau menyadi Kristian kitai kediri empu. Kitai engka patut berandau enggau iya beberapa kali. Tang nama patut digaga kitai enti sema agi enda ulih bebaik? (2) Kitai patut berandau enggau iya sama enggau orang bukai ke nemu pasal penanggul nya tauka orang bukai ke nemu sekalika penyalah nya amat bisi digaga tauka enda. Enti penanggul nya ulih diputarka, nuan “udah ulih nguingka ati iya.” Tang enti nuan udah berandau enggau menyadi Kristian nya beberapa kali, lalu nuan enda ulih bebaik enggau iya, nya baru nuan (3) madahka penanggul nya ngagai bala tuai gempuru.

16. Nama kebuah nitihka jaku lalau Jesus nya chara ti mujur sereta bepengerindu?

16 Kesuah agi, kitai tau enda ibuh ngena tiga iti chara ke dipadah ba Matthew 18:15-17. Tu utai ti manah. Nama kebuah? Laban kesuah agi, orang ke bedosa nemu penyalah diri lalu mutarka penanggul nya, ngambika iya enda dibuai ari gerempung. Udah nya, orang ke enda nyamai ati patut ngampunka orang ke besalah ngambika ulih bebaik. Nya alai ari jaku ajar Jesus, kitai nemu kitai enda patut beguai betemu enggau bala tuai gempuru. Kitai patut madah ngagai bala tuai gempuru enti kitai udah nitihka dua iti chara ba jaku ajar Jesus tauka enti bisi bukti ti nunjukka penyalah nya amat udah digaga.

17. Nama berekat ti deka diasaika kitai enti kitai ‘ngiga pemaik’ enggau pangan diri?

17 Seagi-agi kitai enda sempurna, kitai mengkang deka ngasuh orang bukai enda nyamai ati. Murid ti benama James nulis: “Orang ke nadai kala nyebut utai ti salah lebuh iya bejaku, iya nya orang ke pemadu badas, ke ulih nagang semua tubuh diri.” (Jas. 3:2) Kena mutarka laya, kitai patut enggau naka ulih ‘ngiga pemaik enggau pengabis ati kita.’ (Mas. 34:14) Lebuh kitai terus bebaik enggau orang bukai, kitai deka bisi kaul ti manah enggau bala menyadi Kristian kitai, lalu tu deka ngasuh kitai mengkang beserakup. (Mas. 133:1-3) Ke pemadu beguna, kitai deka bisi kaul ti rapat enggau Jehovah, ‘Petara ke pun pemaik.’ (Rom. 15:33) Kitai deka ngasaika semua berekat tu enti kitai mutarka penanggul ngena pengerindu.

^ [1] (genteran 12) Orang bukai ke mutarka penanggul ngena pemaik nya Jakop seduai Esau (P-kal. 27:41-45; 33:1-11); Josep enggau bala menyadi iya (P-kal. 45:1-15); sereta Gideon enggau orang Epraim (P-ulu. 8:1-3). Nuan engka ulih berundingka chunto bukai ke bisi dalam Bup Kudus.