Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 TOPIK RANDAU | LEBUH ORANG TI DIKESAYAUKA MATI

Lebuh Orang ti Dikesayauka Mati

Lebuh Orang ti Dikesayauka Mati

“Petara nemu agi, endu. . . . Anang . . . nyabak . . . agi.”

Jaku tu ditelai ngagai seiku indu ke benama Bebe. Iya bisi enggau maya nguburka bangkai apai iya, ke bebadi ba jalai raya.

Bebe rapat amat enggau apai iya. Jaku telai nya datai ari seiku kawan ke semak enggau sida sebilik, tang Bebe ngasaika jaku nya balat agi ngenusahka ati ari ke ngelantangka ati. “Iya enda patut mati,” ku iya nandu jaku nya ngagai diri empu. Betaun udah nya, lebuh Bebe nulis pasal utai ke nyadi nya dalam bup, iya agi tusah ati ngenang utai nya.

Baka ke diperatika Bebe, orang begunaka awak ti lama kena mutarka asai ati ti tusah, kelebih agi enti orang ke tusah ati nya rapat amat enggau orang ke udah mati. Dalam Bup Kudus, pemati dikumbai “munsuh ti pemadu dudi.” (1 Korint 15:26) Pemati nyadi sereta ngachau pengidup kitai, lalu nadai utai ke ulih nagang iya, kesuah agi lebuh kitai enda ngadang, pemati datai nabanka orang ti dikesayauka kitai. Nadai seiku orang ulih nyeliahka diri ari penusah ketegal pemati. Nya alai, kitai enda tekenyit ati enti kitai berasai nadai daya lebuh napi pemati sereta ngasaika penusah ketegal pemati.

Nuan engka kala berunding: ‘Ni pengelama dikena muai asai ati ti tusah nya? Baka ni orang ulih mutarka asai ati ti tusah? Baka ni aku ulih ngelantangka ati orang bukai ke lenyau orang ti dikesayau? Kati bisi pengadang ngagai orang ti dikesayauka kitai ke udah mati?’