Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mei 2016

Kati Bup Kudus Agi Ulih Ngubah Ulah Nuan?

Kati Bup Kudus Agi Ulih Ngubah Ulah Nuan?

“Ngubah chara kita berunding.”—ROM. 12:2.

LAGU: 61, 52

1-3. (a) Nama ubah ke engka tusah digaga kitai pengudah kitai dibaptisa? (b) Enti ngaga pemansang nya tusah agi ari ke dijangka kitai, nama tanya ke ulih ditanya kitai empu? (Peda gambar ba pun artikel.)

BETAUN-TAUN, Kevin bejudi, nginsap, kelalu balat ngirup sereta makai dadah. [1] (Peda nota kaki.) Udah nya iya belajar pasal Jehovah, lalu deka nyadi kawan Iya. Tang kena ngereja tu, Kevin patut ngaga ubah ti besai ba ulah iya. Iya ulih berubah enggau bantu ari Jehovah sereta ari kuasa Jaku Petara, Bup Kudus.—Heb. 4:12.

2 Pengudah Kevin dibaptisa, iya agi ngaga ubah ba ulah ngambika iya ulih nyadi orang Kristian ti manah agi. (Eps. 4:31, 32) Ngambika chunto, suba iya jampat ringat. Iya tekenyit ati lebuh iya ngasaika pemedis deka nagang diri ari jampat ringat. Kevin madahka, belajar nagang pengeringat tusah agi ari ngetu ngereja penyai ke digaga sebedau iya dibaptisa! Tang iya ulih ngaga ubah enggau minta Jehovah mantu iya sereta belajarka Bup Kudus enggau dalam agi.

 3 Sebedau kitai dibaptisa, mayuh ari kitai udah ngaga ubah ti besai ba ulah ngambika ulih idup sejalai enggau utai ti dipadah Bup Kudus. Tang indah diatu, kitai nemu bisi ubah ke mit agi ti patut digaga ngambika ulih neladan Petara enggau Kristus. (Eps. 5:1, 2; 1 Pet. 2:21) Ngambika chunto, kitai engka ngasaika diri udu mutap tauka suah bejakuka orang sereta nyebut utai ti enda manah pasal orang bukai. Tauka kekadang kitai engka balat irauka utai ti diperundingka orang tauka jaku orang ke madahka kitai enda ngereja utai ti ngena. Kitai engka udah betaun-taun nguji berubah, tang kitai agi terus ngereja penyalah ti sama. Nya alai, kitai engka berunding: ‘Nama kebuah aku tusah amat deka ngaga ubah ke mit agi tu? Nama patut digaga aku ngambika ulih ngena utai ti dipadahka Bup Kudus ngambika aku ulih terus ngemanahka ulah aku?’

NUAN ULIH NGERINDUKA ATI JEHOVAH

4. Nama kebuah kitai enda ulih ngerinduka ati Jehovah ba semua utai ti dikereja kitai?

4 Kitai rinduka Jehovah, lalu kitai keran deka ngerinduka ati Iya. Tang sayau amat, kitai enda ulih seruran ngerinduka ati Iya, laban kitai enda sempurna. Kitai suah ngasaika utai ti diasaika rasul Paul ke madahka: “Aku keran deka ngereja utai ti ngena, tang aku enda ulih ngereja utai nya.”—Rom. 7:18; Jas. 3:2.

5. Nama ubah ke patut digaga kitai sebedau dibaptisa, tang nama pengelemi ke agi ngenusahka kitai?

5 Sebedau kitai ulih enggau gerempung Jehovah, kitai patut badu ngereja utai ti dipegedika Jehovah. (1 Kor. 6:9, 10) Tang kitai agi enda sempurna. (Kol. 3:9, 10) Nya alai kitai terus ngereja penyalah taja pan kitai udah dibaptisa betaun-taun. Kekadang kitai engka bisi pengingin enggau asai ati ti salah, tauka kitai engka ngasaika diri tusah deka nagang pengelemi diri ba pengidup. Iya ke amat, kitai engka patut ngelaban pengelemi ti sama betaun-taun.

6, 7. (a) Nama ke ulih ngasuh kitai nyadi kawan Jehovah taja pan kitai enda sempurna? (b) Nama kebuah kitai enda patut nagang diri minta ampun ngagai Jehovah?

6 Taja pan kitai enda sempurna, kitai agi ulih bisi kaul enggau Jehovah sereta nyembah Iya. Seruran ingatka baka ni nuan keterubah iya nyadi kawan Jehovah. Iya meda pemanah ba nuan sereta deka nuan ngelala Iya. (Jhn. 6:44) Iya mega nemu nuan bisi penyalah sereta pengelemi, lalu nemu nuan agi deka ngereja penyalah. Tang Jehovah agi dekaka nuan nyadi kawan Iya.

7 Jehovah balat rinduka kitai nyentukka Iya meri kitai pemeri ti berega. Iya ngirumka Anak Iya, Jesus, ke dunya ngambika ulih meri nyawa diri nyadika tebus ke dosa kitai. (Jhn. 3:16) Lebuh kitai ngereja penyalah, kitai ulih minta ampun ari Jehovah. Lalu ketegal tebus nya, kitai ulih pechaya Iya deka ngampunka kitai, lalu kitai agi ulih nyadi kawan Iya. (Rom. 7:24, 25; 1 Jhn. 2:1, 2) Kingatka, Jesus mati ngarika mensia ti nesal ati ke dosa sida. Nya alai, taja pan kitai ngasaika utai ti digaga kitai nya balat jai, kitai anang ngetu besampi minta ampun ngagai Jehovah. Enti kitai enda minta ampun ari Iya, tu baka ke enggai nuchi jari kitai ti kamah. Kitai amat beterima kasih laban Jehovah udah muka jalai ngambika kitai ulih nyadi kawan Iya, taja pan kitai enda sempurna!—Bacha 1 Timoti 1:15.

8. Nama kebuah kitai patut beratika pengelemi diri?

8 Endang amat, kitai enda ulih enda ibuhka pengelemi diri tauka terus begigaka tegal ke pengelemi diri. Jehovah udah madah ngagai kitai bansa orang ke dikedekaka Iya nyadi kawan Iya. (Mas. 15:1-5) Nya alai enti kitai deka semak agi ngagai Iya, kitai enda  tau enda terus nguji neladan Iya enggau Anak Iya. Kitai mega enda tau enda nguji nagang pengingin kitai ti salah, lalu kitai engka ulih muai sekeda ari pengingin ti salah nya. Enda ngira ni pengelama kitai udah dibaptisa, kitai enda tau enda terus ngemanahka ulah kitai.—2 Kor. 13:11.

9. Baka ni kitai nemu kitai ulih terus nyadi mensia ti baru?

9 Rasul Paul ngasuh orang Kristian: ‘Kita udah ngelengkaka pengidup [ulah] ti lama, enggau semua pengawa iya, lalu udah nyadi mensia ti baru, ke majak diubah nyadi baru belama dalam penemu neladan gamal Petara Empu.’ (Kol. 3:9, 10) Reti nya, kitai patut terus ngaga ubah sereta “nyadi mensia ti baru.” Nya alai, enda ngira ni pengelama kitai udah nyembah Jehovah, kitai seruran ulih belajar pasal kualiti Iya enggau mayuh agi. Lalu Bup Kudus ulih mantu kitai terus ngaga ubah ba ulah ngambika ulih neladan Iya.

NAMA KEBUAH NYA TUSAH AMAT?

10. Nama patut digaga kitai ngambika terus ngaga ubah enggau bantu ari Bup Kudus, lalu nama tanya ke patut ditanya kitai?

10 Semua kitai deka nitihka utai ti dipadahka Bup Kudus. Tang kitai patut bebendar enti kitai deka terus ngubah diri. Nama kebuah kitai patut bebendar ngubah diri? Kati Jehovah enda ulih ngasuh kitai muntang ngereja utai ti ngena?

11-13. Nama kebuah Jehovah ngarapka kitai enggau naka ulih mutarka pengelemi diri?

11 Lebuh kitai berundingka dunya raya enggau semua utai ke bisi dia, kitai pechaya Jehovah bisi kuasa ngereja sebarang utai. Ngambika chunto, Iya ngaga matahari ke balat bekuasa. Tiap sikin, matahari ngasilka penampak sereta pengangat ti balat. Tang semina mimit aja kuasa ke dikena nyukung utai ti idup ba bumi. (Mas. 74:16; Isa.  40:26) Jehovah mega meri pengering ngagai bala nembiak Iya ba dunya lebuh sida begunaka iya. (Isa. 40:29) Endang amat, enti Jehovah deka, Iya ulih ngasuh kitai senang ngelaban pengelemi diri sereta badu ngembuan pengingin ti salah. Tang nama kebuah Iya enda ngereja nya?

12 Jehovah udah meri kitai peluang bibas milih. Iya ngemendarka kitai milih kediri empu sekalika kitai deka ngasika Iya tauka enggai. Lebuh kitai milih ngasika Iya sereta bebendar ngereja peneka Iya, kitai nunjukka diri rinduka Iya sereta deka ngerinduka ati Iya. Sitan madahka, Jehovah nadai hak merintah. Tang lebuh kitai ngasika Jehovah, kitai nunjukka diri dekaka Iya nyadi Pemerintah kitai. Lalu kitai ulih pechaya Apai kitai ti bepengerindu ingatka semua utai ti digaga kitai kena ngasika Iya. (Jop 2:3-5; J-lam. 27:11) Lebuh kitai bebendar mutarka pengelemi diri taja pan enda senang, kitai taluk ngagai Jehovah sereta nunjukka diri dekaka Iya nyadi Pemerintah kitai.

13 Jehovah madahka, kitai patut bebendar neladan kualiti Iya. (Kol. 3:12; bacha 2 Peter 1:5-7.) Iya mega ngarapka kitai bebendar nagang runding sereta asai ati kitai. (Rom. 8:5; 12:9) Tiap kali kitai bebendar ngaga ubah lalu kitai mujur, kitai berasai balat gaga ati.

AWAKKA JAKU PETARA TERUS NGUBAH NUAN

14, 15. Nama ulih digaga kitai kena ngemansangka kualiti ti dikerinduka Jehovah? (Peda kutak “ Bup Kudus enggau Sampi Ngubah Ulah Sida.”)

14 Nama patut digaga kitai kena ngemansangka kualiti ti dikerinduka Jehovah? Ari ke ngaga pemutus kediri empu bekaul enggau utai ti patut diubah, kitai patut ngawakka Petara ngiring kitai. Rome 12:2 madahka: ‘Anang nitihka chara dunya, tang awakka Petara ngubah chara kita berunding, ngambika kita nemu peneka Iya—iya nya utai ti badas, ti ngerinduka ati Iya, ti pemadu menyana.’ Nya alai, kena nemu utai ti dikedekaka Jehovah, kitai patut bepanggai ba bantu ke udah disediaka Iya. Kitai enda tau enda macha Bup Kudus ninting hari, belematika utai ti udah dibacha, lalu besampi minta Jehovah meri kitai roh kudus. (Luk. 11:13; Gal. 5:22, 23) Enggau chara tu, Jehovah ulih nulung kitai meretika utai ti ngerinduka ati Iya, lalu kitai ulih belajar berunding nitihka chara Iya. Asil iya, utai ti diperunding, disebut, sereta digaga kitai deka agi ngerinduka ati Jehovah, lalu kitai deka belajar chara ngelaban pengelemi diri. Tang taja pia, kitai patut terus ngelaban pengelemi diri.—J-lam. 4:23.

Gumpul artikel ari litaricha kitai tauka ayat ari Bup Kudus ke nulung nuan ngelaban pengelemi diri, lalu macha sida baru ba maya bukai (Peda genteran 15)

15 Kelimpah ari macha Bup Kudus ninting hari, kitai patut belajarka Bup Kudus enggau  litaricha kitai, baka The Watchtower enggau Awake! Mayuh artikel dalam majalah tu ngajar kitai chara kitai ulih neladan kualiti Jehovah sereta chara ngelaban pengelemi kitai. Kitai engka ngasaika sekeda artikel tauka ayat Bup Kudus ulih nulung kitai. Kitai ulih ngumpul ayat Bup Kudus sereta artikel nya ngambika kitai ulih macha sida baru ba maya bukai.

16. Nama kebuah kitai enda patut lemi semengat enti kitai enda ulih ngaga ubah enggau jampat?

16 Endang begunaka awak belajar neladan kualiti Jehovah. Nya alai enti nuan ngasaika diri bedau ngaga mayuh ubah baka ke dikedekaka nuan, sabar meh. Terubah iya, nuan engka mejal diri ngereja utai ti dipadah Bup Kudus. Tang suah agi nuan berunding sereta ngereja utai baka ke dikedekaka Jehovah ari nuan, senang agi nuan deka nitihka chara Iya berunding sereta ngereja utai ti ngena.—Mas. 37:31; J-lam. 23:12; Gal. 5:16, 17.

PERUNDINGKA PEMANAH PENGIDUP JEMAH ILA

17. Enti kitai taluk ngagai Jehovah, pengidup manah ke baka ni ti deka diulih kitai jemah ila?

17 Kitai nganti maya kitai deka nyadi sempurna sereta nyembah Jehovah belama iya. Maya nya, kitai enda ibuh ngelaban sebarang pengelemi, lalu kitai deka senang agi neladan Jehovah. Tang indah diatu, kitai ulih nyembah Jehovah laban Iya udah meri kitai tebus nyadika pemeri. Taja pan kitai enda sempurna, kitai ulih ngerinduka ati Iya enti kitai terus bebendar ngaga ubah sereta nitihka utai ti diajar Iya dalam Bup Kudus.

18, 19. Baka ni kitai nemu Bup Kudus bisi kuasa ke ulih terus ngubah ulah kitai?

18 Kevin enggau naka ulih belajar nagang pengeringat iya. Iya belamatika utai ti dibacha iya dalam Bup Kudus, lalu bebendar ngaga ubah ba ulah iya. Iya mega nitihka jaku ajar ke diberi bala menyadi Kristian. Taja pan Kevin begunaka beberapa taun kena ngemansangka diri, tang nyau kelama, iya ulih nyadi penulung gempuru. Lalu 20 taun ti udah, iya nyadi tuai gempuru. Tang indah diatu, iya nemu iya patut terus ngelaban pengelemi diri.

19 Baka Kevin, kitai ulih terus ngemansangka ulah diri. Enti kitai ngereja tu, kitai deka terus semak agi ngagai Jehovah. (Mas. 25:14) Lalu lebuh kitai enggau naka ulih ngaga ubah ti ngerinduka ati Iya, Iya deka nulung kitai mujur. Kitai ulih pechaya enggau bantu ari Bup Kudus, kitai ulih terus ngaga ubah ba ulah kitai.—Mas. 34:8.

^ [1] (genteran 1) Nama udah ditukar.