Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mei 2016

Baka Ni Nuan Ngaga Pemutus Kediri Empu?

Baka Ni Nuan Ngaga Pemutus Kediri Empu?

‘Giga semua peneka Jehovah.’—EPS. 5:17.

LAGU: 69, 57

1. Nama sekeda chunto pesan ari Bup Kudus, lalu baka ni ngasika pesan nya mai penguntung ke kitai?

DALAM Bup Kudus, Jehovah udah meri kitai pesan ti terang pasal utai ti dikedekaka Iya ari kitai. Ngambika chunto, Iya enda ngasuh kitai nyembah engkaramba, ngenchuri, mabuk, tauka ngereja ulah seks ti kamah. (1 Kor. 6:9, 10) Lalu Anak Jehovah, Jesus, meri pesan ti nyemetak tu ngagai bala murid iya: ‘Ngagai semua bansa lalu gaga sida nyadi murid aku, maptisa sida dalam nama Apai, Anak enggau roh kudus, lalu ajar sida ngasika semua pesan ti udah diberi aku ngagai kita. Lalu ingat, aku deka seruran enggau kita nyentuk ngagai pengujung dunya.’ (Mat. 28:19, 20) Semua pesan ke diasuh Jehovah enggau Jesus kereja kitai nya pulai ke pemanah kitai empu. Pesan Jehovah ngajar kitai chara nyaga diri enggau diri sebilik sereta nulung kitai ngembuan pengerai ti manah agi sereta lantang ati. Keberat agi, lebuh kitai ngasika pesan Jehovah, nyengkaum pesan ke ngasuh nginjil, Iya gaga ati sereta merekatka kitai.

2, 3. (a) Nama kebuah Bup Kudus enda meri kitai iring ba tiap iti pekara bekaul enggau pengidup? (b) Nama tanya ke deka dikerandauka kitai ba artikel tu? (Peda gambar ba pun artikel.)

2 Taja pia, Bup Kudus enda meri kitai iring pasal tiap iti pekara ba pengidup. Ngambika chunto, kitai nadai tetemuka iring ti nyemetak dalam Bup Kudus pasal gari ke patut dikena kitai. Tu nunjukka Jehovah  bepenemu-dalam. Taja pan pisin gari seruran berubah, lalu orang di dunya ngena stail gari ti bebida, tang Bup Kudus enda berubah. Iya mega nadai ngundan mayuh iring pasal kereja tauka pemerindang ke patut dipilih tauka utai ke patut digaga ngambika mengkang bepengerai. Jehovah ngemendarka seiku-seiku orang tauka tuai bilik ngaga pemutus pasal pekara tu.

3 Nya alai lebuh kitai patut ngaga siti-siti pemutus ti berat ke deka bekaul enggau pengidup kitai, lalu kitai nadai tetemuka iring pasal pekara nya dalam Bup Kudus, kitai patut berunding: ‘Kati Jehovah nerima pemutus ke digaga aku? Kati Iya deka lantang ati enggau sebarang pemutus ke dipilih aku seagi-agi aku enda ngelanggar iring dalam Bup Kudus? Baka ni aku ulih nentuka Iya deka lantang ati enggau pemutus ti digaga aku?’

PEMUTUS KITAI BEKAUL ENGGAU DIRI EMPU SERETA ORANG BUKAI

4, 5. Baka ni pemutus kitai bekaul enggau kitai empu sereta orang bukai?

4 Sekeda orang ngumbai sida ulih ngereja sebarang utai nitihka peneka ati sida. Tang kitai deka ngereja utai ti ngelantangka ati Jehovah. Nya alai sebedau kitai ngaga siti-siti pemutus, kitai patut berundingka pasal utai ti dipadah Bup Kudus, lalu udah nya nitihka iya. Ngambika chunto, Bup Kudus madah ngagai kitai pasal penemu Jehovah bekaul enggau chara ngena darah, nya alai kitai nitihka utai ti dipadah iya. (P-kal. 9:4; SKR. 15:28, 29) Kitai ulih besampi ngagai Jehovah kena nulung kitai ngaga pemutus ke deka ngelantangka ati Iya.

5 Pemutus kitai bekaul enggau kitai empu. Pemutus ti manah ulih nulung kitai semak agi ngagai Jehovah. Pemutus ti enda manah ulih ngerusak kaul kitai enggau Iya. Pemutus kitai mega bekaul enggau orang bukai. Kitai enggai ngereja sebarang utai ke ulih ngenusahka ati bala menyadi Kristian tauka ngelemika pengarap sida. Kitai mega enggai ngenataika penanggul entara bala menyadi Kristian ba gempuru. Nya alai, endang beguna kitai ngaga pemutus ti manah.—Bacha Rome 14:19; Galatia 6:7.

6. Nama patut ngiring pemutus ke digaga kitai?

6 Lebuh Bup Kudus nadai madahka enggau nyemetak utai ti patut digaga kitai, baka ni kitai ulih ngaga pemutus ti manah? Ari ke ngereja utai ti dikedekaka kitai, kitai enda tau enda berunding enggau bejimat pasal pekara ke nyadi ba kitai empu, lalu ngaga pemutus ti deka ngelantangka ati Jehovah. Udah nya kitai ulih pechaya, Iya deka nulung kitai bulih asil ti manah.—Bacha Masmur 37:5.

NAMA DIKEDEKAKA JEHOVAH ARI AKU?

7. Lebuh Bup Kudus nadai madahka siti-siti pesan enggau nyemetak, baka ni kitai nemu utai ti dikedekaka Jehovah ari kitai?

7 Tang baka ni kitai ulih nemu utai ti deka ngelantangka ati Jehovah? Epesus 5:17 madahka: ‘Giga semua peneka Jehovah.’ Lebuh Bup Kudus nadai madahka siti-siti pesan enggau nyemetak, kitai patut ngiga, tauka meretika utai ti dikedekaka Jehovah ari kitai. Baka ni kitai ulih ngereja tu? Kitai patut besampi ngagai Iya sereta ngawakka roh kudus Iya ngiring kitai.

8. Baka ni Jesus ngiga utai ti dikedekaka Jehovah ari iya? Beri siti chunto.

8 Jesus seruran ngiga utai ti dikedekaka Jehovah ari iya. Ngambika chunto, bisi dua kali lebuh orang mayuh lapar, Jesus besampi, lalu udah nya nyediaka pemakai ngena kereja ajih. (Mat. 14:17-20; 15:34-37) Tang lebuh iya lapar ba menua puang, lalu Sitan deka iya ngasuh batu nyadi roti, Jesus enggai. (Bacha Matthew 4:2-4.) Iya nemu utai ti dikedekaka Apai iya, nya alai iya nemu Apai iya enggai iya ngena roh kudus ke penguntung iya empu. Iya pechaya Apai iya deka ngiring iya sereta meri pemakai lebuh iya begunaka pemakai.

9, 10. Nama deka nulung kitai ngaga pemutus ti manah? Terangka.

 9 Baka Jesus, kitai ulih ngaga pemutus ti manah enti kitai bepanggai ba Jehovah ngambika ngiring kitai. Ku Bup Kudus madahka: ‘Panggaika diri ba Jehovah enggau pengabis ati nuan. Anang manggaika diri ba penemu diri empu. Awakka Jehovah seruran ngiring nuan, nya baru Iya deka nunjukka jalai ti ngena ngagai nuan. Anang ngumbai diri pintar. Nangika Jehovah, lalu anang ngereja penyai.’ (J-lam. 3:5-7) Enti kitai belajarka Bup Kudus sereta nemu pasal chara Jehovah berunding, kitai deka meretika utai ti dikedekaka Iya ari kitai ba siti-siti pekara. Lalu mayuh agi utai ti ditemu kitai pasal chara Jehovah berunding, senang agi kitai deka ngaga pemutus ti deka ngelantangka ati Iya. Enggau chara tu, kitai deka “ngasi” agi ke iring ari Iya.—Esk. 11:19.

10 Uji gambarka, seiku indu ke udah belaki benung bebelika utai, lalu tepedaka sepasang kasut ti manah. Tang kasut nya kelalu mar. Taja pan laki iya nadai enggau, iya nemu utai ti diperundingka laki iya enti iya kelalu mayuh ngena duit. Baka ni iya nemu? Iya udah lama jadi enggau laki iya, nya alai iya nemu chara laki iya dekaka seduai iya ngena duit. Pia mega, enti kitai nemu pasal chara Jehovah berunding sereta utai ke udah digaga Iya suba, kitai deka nemu utai ti dikedekaka Iya ari kitai ba pekara ti bebida.

BAKA NI NUAN ULIH NEMU UTAI TI DIPERUNDINGKA JEHOVAH?

11. Nama tanya ke ulih ditanya kitai empu lebuh macha tauka belajarka Bup Kudus? (Peda kutak “ Lebuh Nuan Belajarka Bup Kudus, Tanya Diri Empu.”)

11 Baka ni kitai ulih nemu utai ti diperundingka Jehovah? Utai ti pemadu beguna ke ulih digaga kitai iya nya macha sereta belajarka Bup Kudus enggau tetap. Lebuh kitai ngereja tu, kitai ulih nanya diri empu: ‘Nama dipelajarka  aku pasal Jehovah ari utai tu? Nama kebuah iya baka nya?’ Lalu baka David, kitai mega patut minta Jehovah nulung kitai ngelala Iya enggau manah agi. David nulis: ‘Ajar aku jalai Nuan, O Jehovah. Awakka aku nemu jalai Nuan. Ajar meh aku diau nitihka pemendar Nuan, laban Nuan endang Petara aku, ke ngelepaska aku. Aku endang seruran arapka Nuan.’ (Mas. 25:4, 5) Lebuh kitai belajarka siti-siti utai pasal Jehovah, kitai ulih berundingka ba pekara ni kitai tau ngena penerang nya. Ulih kitai ngena iya ba ruang bilik, ba endur kereja, ba sekula, tauka ba pengawa nginjil? Lebuh kitai berundingka siti-siti pekara, kitai deka senang agi nemu chara kitai ulih ngena penerang nya baka ke dikedekaka Jehovah.

12. Baka ni litaricha kitai enggau pengawa begempuru ulih nulung kitai nemu utai ti diperundingka Jehovah pasal mayuh bengkah pekara?

12 Siti agi chara kena nemu utai ti diperundingka Jehovah iya nya enggau beratika utai ari Bup Kudus ti diajar gerempung Iya ngagai kitai. Ngambika chunto, lebuh kitai patut ngaga siti-siti pemutus, Bup Dikena Saksi-Saksi Jehovah Ngiga Pansik sereta perengka bukai ke dikena mansik ulih nulung kitai nemu utai ti diperundingka Jehovah. Kitai mega tau bulih penguntung ari pengawa begempuru Kristian kitai lebuh kitai bejimat mending sereta meri komen, lalu lebuh kitai belematika utai ti benung diajar. Tu deka nulung kitai nemu berunding baka Jehovah. Asil iya, kitai ulih ngaga pemutus ti deka ngelantangka ati Iya sereta deka diberekatka Iya.

BELEMATIKA UTAI TI DIPERUNDINGKA JEHOVAH SEBEDAU NUAN NGAGA PEMUTUS

13. Padahka siti chunto chara kitai ulih ngaga pemutus ti manah lebuh beratika utai ti diperundingka Jehovah.

13 Aram kitai meda siti chunto chara kitai ulih ngaga pemutus ti manah lebuh kitai beratika utai ti diperundingka Jehovah. Nuan engka deka nyadi pengerintis. Nuan udah ngaga sekeda ubah ba pengidup ngambika nuan ulih ngena mayuh agi awak ba pengawa nginjil. Tang nuan agi irau sekalika nuan amat ulih lantang ati enggau duit sereta utai ti mimit. Endang amat, Bup Kudus nadai madahka kitai patut nyadi pengerintis ngambika ulih nyembah Jehovah. Kitai ulih terus tetap ati nyembah Iya enggau nyadi penginjil. Taja pia Jesus madahka, Jehovah merekatka orang ke ngelengkaka sekeda utai ketegal Perintah Petara. (Bacha Luke 18:29, 30.) Bup Kudus mega madahka, Jehovah lantang ati lebuh kitai enggau naka ulih muji Iya, lalu Iya deka kitai lantang ati nyembah Iya. (Mas. 119:108; 2 Kor. 9:7) Enggau besampika sereta belematika semua utai tu, kitai ulih ngaga pemutus ke ulih dikena kitai sereta iya ke deka diberekatka Jehovah.

14. Baka ni nuan ulih nentu sekalika siti-siti stail gari nya ngelantangka ati Jehovah?

14 Siti agi chunto: Nuan amat rinduka siti-siti stail gari, tang nuan nemu sekeda orang ba gempuru engka enda nyamai ati enti nuan ngena gari ke baka nya. Bup Kudus nadai madah pasal sesebengkah stail enggau nyemetak. Nya alai, baka ni nuan ulih nemu utai ti diperundingka Jehovah? Bup Kudus madahka kitai: ‘Aku mega dekaka sida ke indu begari penumbas iya sereta menyana, ngena gari ti patut, ukai ngena buk ti kelalu balat gaya, tauka bekenaka perengka emas, tauka batu mutiara, tauka bekenaka gari ti mar rega, tang ngereja pengawa ti badas, baka ti patut dikereja indu ke nangika Petara.’ (1 Tim. 2:9, 10) Endang amat, semua nembiak Jehovah nyengkaum sida ke lelaki ulih belajar ari jaku tu. Lebuh kitai begari enggau pengumbas iya, kitai ngira utai ke engka diperundingka orang bukai pasal gari ke dikena kitai. Lalu ketegal kitai rinduka bala menyadi Kristian kitai, kitai enggai ngenusahka ati sida tauka ngasuh sida enda nyamai ati. (1 Kor. 10:23, 24; Plp. 3:17) Enti kitai  beratika utai ti dipadah Bup Kudus sereta chara Jehovah berunding, kitai ulih ngaga pemutus ti deka ngelantangka ati Iya.

15, 16. (a) Baka ni asai ati Jehovah enti kitai terus berunding pasal ulah seks ti kamah? (b) Lebuh kitai milih pemerindang, baka ni kitai ulih nemu utai ti ngelantangka ati Jehovah? (c) Baka ni pemutus ti berat patut digaga?

15 Ari Bup Kudus, kitai nemu Jehovah balat pedis ati tauka tusah ati lebuh orang ngereja penyai sereta lebuh orang berunding pasal utai ti jai. (Bacha Pemungkal 6:5, 6.) Endang amat, Jehovah enggai kitai ngambarka ulah seks ti kamah. Enti kitai terus berunding pasal pekara nya, tu ulih ngujungka kitai ngereja iya. Tang, Jehovah deka kitai berunding pasal utai ti tuchi sereta manah. Murid ke benama James nulis, penemu-dalam ari Jehovah nya “lumur satu, tuchi, mai pemaik, nelap, siru, penuh laban pengasih enggau buah ti manah, enda bepilih mata tauka pura-pura ngapa.” (Jas. 3:17) Nya alai Bup Kudus ngajar, kitai enda tau enda nyeliahka sebarang pemerindang ke ulih ngasuh kitai ngambarka tauka inginka utai ti enda tuchi sereta jai. Lalu enti kitai nemu utai ti dikerinduka sereta utai ti dipegedika Jehovah, kitai deka senang agi nemu bagi bup, cherita wayang, tauka game ke dipilih. Kitai enda ibuh nanya orang bukai pasal utai ke patut digaga kitai.

16 Lebuh kitai bisi pemutus ti deka digaga, kesuah agi kitai bisi pemutus bukai ke ulih dipilih ari semua pemutus ke deka ngelantangka ati Jehovah. Tang lebuh kitai patut ngaga pemutus ti besai, endang manah enti ulih nanya seiku tuai gempuru tauka menyadi Kristian lelaki tauka indu bukai ke bepeneleba ngambika ulih meri kitai sekeda jaku ajar. (Tit. 2:3-5; Jas. 5:13-15) Endang amat, kitai enda patut minta orang nya ngaga pemutus ke kitai. Tang, kitai patut berunding enggau dalam pasal utai ti ditemu kitai ari Bup Kudus, lalu udah nya ngaga pemutus kediri empu. (Heb. 5:14) Rasul Paul madahka: “Genap iku kita enda tau enda mai ma diri empu.”—Gal. 6:5.

17. Baka ni kitai bulih penguntung ari ngaga pemutus ti ngelantangka ati Jehovah?

17 Lebuh kitai ngaga pemutus ti ngelantangka ati Jehovah, kitai semak agi ngagai Iya, lalu diterima sereta diberekatka Iya. (Jas. 4:8) Udah nya pengarap kitai ngagai Jehovah deka tegap agi. Nya alai, aram meh kitai belematika utai ke dibacha kitai dalam Bup Kudus ngambika kitai ulih meretika chara Iya berunding. Endang amat, kitai seruran deka belajarka utai ti baru pasal Jehovah. (Jop 26:14) Tang enti kitai bebendar belajar pasal Iya diatu, kitai deka bepenemu-dalam sereta ulih ngaga pemutus ti manah. (J-lam. 2:1-5) Runding enggau utai ti deka digaga mensia berubah, tang Jehovah enda berubah. Pemasmur madahka: “Tang pelan Iya Empu tan belama iya. Juluk ati Iya meruan belama iya.” (Mas. 33:11) Endang amat, kitai ulih ngaga pemutus ti pemadu manah enti kitai belajar berunding nitihka chara Jehovah berunding, lalu udah nya ngereja utai ti ngelantangka ati Iya.