Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mac 2016

Beratika Utai Ti Dipadah Tumu Ulih Nyelamatka Nyawa Nuan!

Beratika Utai Ti Dipadah Tumu Ulih Nyelamatka Nyawa Nuan!

KENA 26 Disember 2004, tanah berenyang ke beskala 9.1-magnitud udah ngelinggangka pulau Simeulue, ti muak ke barat laut Sumatra, Indonesia. Semua orang malik ke tasik. Ai jauh surut ari ke selama. Tekala nya semua orang berengkah beterauh rari ke bukit, nyebut, “Smong! Smong!” leka jaku ke dikena orang dia nyebut tsunami. Dalam timpuh 30 minit, gelumbang ti besai datai mangkaka tebing, nyauka ngerusakka semua rumah enggau kampung.

Pulau Simeulue nya endur ti keterubah kena pangka tsunami. Tang, ari 78,000 iku orang ke diau dia, semina 7 iku aja ke mati. Nama kebuah semina mimit aja ke mati? * Orang ba pulau nya madahka: ‘Enti tanah berenyang balat nyadi, lalu ai tasik balat surut, rari ke bukit, laban ai tasik deka jampat mangkaka tebing. Ari peneleba ke udah, orang ba Simeulue udah nemu tanda penatai tsunami ari beratika utai ke nyadi ba tasik. Beratika utai ke nyadi udah nyelamatka nyawa sida.

Bup Kudus madahka “penusah ti besai deka nyadi, baka ti nadai udah kala nyadi kenyau ari penumbuh dunya nyentuk ngagai sehari tu, tauka jemah ila.” (Matthew 24:21) Tang tu ukai penusah ke ngujungka planet Bumi rusak ketegal pengawa mensia ke enda betanggungjawap tauka ketegal sekeda penusah besai ke datai ari kuasa alam, laban endang tuju Petara ke dekaka dunya mengkang enda berubah. (Pengajar 1:4) Tang penusah besai ti deka datai nya chara ke dikena Petara “ngerusak sida ke nyadi pengerusak dunya!” Tu deka ngujungka semua penyai enggau pemerinsa. (Pemandang 11:18; Jaku-Dalam 2:22) Naka meh pemanah berekat nya!

Agi mega, enda baka tsunami, tanah berenyang, tauka gunung berapi ke meletup, pengerusak ti deka datai nya enda nganu nyawa orang ke lurus. ‘Petara endang pengerindu,’ ku Bup Kudus, lalu Petara, ke benama Jehovah, besemaya “orang ke lurus deka bempu menua tu lalu diau ditu belama iya.” (1 John 4:8; Masmur 37:29) Tang baka ni nuan ulih selamat  ari penusah ti besai nya, lalu tau bulih berekat ti disemaya Petara? Chara iya: Ngasika tangkan ke dipadah tumu!

BEJAGA ENGGAU SEMUA UTAI KE BERUBAH

Kitai enda nemu enggau nyemetak ni maya semua penyai enggau pemerinsa deka nadai agi, laban Jesus madahka: “Tang nadai orang nemu hari tauka jam utai tu deka nyadi. Melikat ke di serega enda nemu, lalu Anak Mensia pen enda mega nemu. Semina Apai aja nemu.” Nambahka nya, Jesus ngasuh kitai “bejaga.” (Matthew 24:36; 25:13) Nama kebuah? Bup Kudus madah ngagai kitai pasal gaya dunya sebedau Petara ngujungka penyai enggau pemerinsa. Sama baka ai ke surut ngenyit udah ngasuh orang ke diau ba  Simeulue bejaga enggau penatai tsunami, pekara ke nyadi ngenyit ba dunya deka nyadika tanda pengujung nya nyau semak. Sekeda utai ke berubah ti dipadah Bup Kudus ulih dipeda ba kutak dalam artikel tu.

Endang amat, tiap iti utai ti dipadah ba kutak nya udah nyadi. Tang Jesus madahka, lebuh kita meda “semua utai tu,” kitai nemu pengujung nya nyau semak. (Matthew 24:33) Tanya diri empu, ‘Ni maya dalam sejarah semua utai ti dipadah nya (1) nyadi di serata dunya, (2) nyadi ba maya ti sama, sereta (3) majak jai-sejai?’ Endang amat, kitai benung idup ba timpuh nya.

CHARA PETARA NGAYANKA PENGERINDU

“Sistem kena nemu tsunami . . . amat ulih  nyelamatka nyawa,” ku seiku lelaki ke kala nyadi presiden U.S. Pengudah tsunami taun 2004, sistem kena nemu tsunami udah diengkahka ba endur ke bisi kena tsunami ngambika enda mayuh nyawa lenyau enti sema penusah ti sama nyadi baru dudi hari. Pia mega, Petara udah meri tangkan enggau tumu sebedau pengujung datai. Bup Kudus madahka: ‘Berita Manah pasal Perintah Petara deka ditusui di serata dunya, nyadika saksi ngagai semua bansa. Udah nya baru pengujung datai.’—Matthew 24:14.

Taun tu kemari aja, Saksi-Saksi Jehovah udah ngena lebih 1.9 biliun jam nusui berita manah ba 240 buah menua sereta ngena lebih ari 700 bengkah bansa jaku. Utai ke nyadi kemaya hari tu enggau terang nunjukka pengujung nyau semak. Ketegal rinduka orang bukai, Saksi-Saksi Jehovah enggau naka ulih nangkan orang bukai pasal Hari Pechara Petara ke nyau semak deka datai. (Matthew 22:39) Penguntung ke diulih nuan ari penerang tu nunjukka pengerindu Jehovah ngagai nuan. Kingatka “[Petara] enggai nejuka indah siku kita dirusak, tang semua nesal ati.” (2 Peter 3:9) Kati nuan deka nyambut pengerindu Petara sereta ngasika tangkan ti dipadah Iya tumu?

RARI NGAGAI ENDUR TI SELAMAT!

Kingatka, orang Simeulue ke diau ba kampung semak pantai rari ngagai endur ke tinggi lebuh sida meda ai jauh surut; sida enda nganti ai nya mansang baru. Sida ke jampat ngerarika diri ulih selamat. Ngambika ulih selamat maya penusah datai, nuan mega patut rari ngagai endur ke tinggi. Baka ni? Nabi Isaiah diasuh Petara nulis pasal pengawa ngelaluka orang ke deka digaga “jemah ila,” iya nya ba maya kitai idup diatu. Ku iya nulis: ‘Aram kitai niki ngagai bukit Jehovah . . . Ngambika Iya ngajar kitai pasal utai ti deka dikereja kitai. Kitai deka bejalai nengah jalai ti udah dipilih Iya.’—Isaiah 2:2, 3.

Niki ngagai tuchung bukit ulih nulung nuan meda utai enggau terang sereta nyadi endur ti selamat. Pia mega, nemu jalai Petara ke bisi dalam Bup Kudus udah nulung bejuta iku orang di sereta dunya kemaya hari tu ngaga ubah ke mai penguntung ba pengidup sida. (2 Timoti 3:16, 17) Enggau ngereja nya, sida berengkah “bejalai nengah jalai ti udah dipilih [Petara],” lalu ngasaika diri diterima sereta dijaga Iya.

Kati nuan deka nyaut kangau nya sereta nerima jaga ari Petara ti bepengerindu ba maya ti bisi mayuh macham penusah tu? Kami meransang nuan bejimat meresa ayat Bup Kudus ke bekaul enggau “hari ti penudi” ke bisi ba kutak dalam artikel tu. Saksi-Saksi Jehovah ba kandang endur nuan diau deka gaga ati nulung nuan meretika ayat Bup Kudus nya sereta nulung nuan ngena ayat nya. Tauka nuan ulih ngiga saut ngagai tanya nuan enggau ngelawa laman web kami, www.jw.org.

^ per. 3 Tsunami taun 2004 tu udah munuh lebih 220,000 iku orang. Nya tsunami ke pemadu balat nyadi dalam sejarah.

Belajar Lebih Agi

Nama Utai ti Bendar Diajar Bup Kudus?

Kati Kitai Benung Idup ba “Hari ti Penudi”?

Peratika baka ni pengawa enggau ulah orang ke semak kitai nunjukka kitai diatu benung idup ba “hari ti penudi” baka ke dipadah ba Bup Kudus.