Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mac 2016

 TOPIK RANDAU | NAMA KEBUAH JESUS MERINSA SERETA MATI?

Kati Nya Amat Nyadi?

Kati Nya Amat Nyadi?

Kena musin bungai 33 M., Jesus, orang Nasaret diukum bunuh. Iya udah dipetenah, balat dipalu, sereta dipantang ba tiang. Iya mati enggau merinsa. Tang Petara ngangkatka Jesus idup baru, lalu pengudah 40 hari, iya niki ke serega.

Cherita ke ngalitka ati tu datai ari empat iti bup Injil ke bisi dalam Bup Kudus Kristian Gerika, ke suah dikumbai Sempekat Baru. Kati cherita nya amat nyadi? Tu tanya ti berat sereta beguna bendar. Enti cherita nya enda amat, pengarap orang Kristian deka lebu ngapa, lalu peluang idup belama iya ba Paradais nya semina mimpi aja. (1 Korint 15:14) Tang enti cherita nya amat, mensia deka bisi peluang ti manah jemah ila. Nya alai, kati cherita dalam bup Injil nya amat tauka digaga ngapa?

NAMA UTAI TI AMAT

Enda baka ensera, utai ti ditulis dalam bup Injil nya betul sereta terang. Chunto, bup Injil nyebut pasal mayuh nama endur ke agi ulih dilawa kitai kemaya hari tu. Bup Injil mega nyebut pasal orang ke amat kala idup, lalu pekara tu disukung bala pakar sejarah.—Luke 3:1, 2, 23.

Bala penulis ba kurun keterubah enggau kedua  bisi nyebut pasal Jesus. * Chara iya mati sejalai enggau chara ke dikena orang Rome ngukum orang ke ngereja penyalah maya nya suba. Agi mega, utai ke nyadi dalam cherita nya dipadah enggau nyemetak—indah ngambarka bala murid Jesus enggau chara ti enda manah. (Matthew 26:56; Luke 22:24-26; John 18:10, 11) Semua tu enggau terang nunjukka bala penulis Bup Injil nya lurus sereta enda bula bekaul enggau utai ke ditulis sida pasal Jesus.

BAKA NI ENGGAU PENGANGKAT JESUS ARI MATI?

Mayuh orang pechaya Jesus kala idup sereta udah mati. Tang sekeda orang enda pechaya iya udah diangkatka idup baru. Terubah, bala rasul iya enda pechaya iya udah diangkatka idup baru. (Luke 24:11) Taja pia, lebuh sida enggau bala rasul ke bukai meda Jesus ke udah diangkatka baru ba endur ti enda sama, sida badu agi kakang ati. Bisi sekali, Jesus ngayanka diri ba mua lebih ari 500 iku saksi.—1 Korint 15:6.

Taja pan bala murid nemu diri deka ditangkap sereta dibunuh, sida enggau berani madahka pasal pengangkat Jesus ari mati ngagai semua orang, indah ngagai orang ke udah munuh iya. (Kereja Rasul 4:1-3, 10, 19, 20; 5:27-32) Kati bala murid Jesus deka berani baka nya enti sida enda amat pechayaka Jesus udah diangkatka idup baru? Iya ke amat, pengangkat Jesus ari mati udah meransang orang Kristian nyadi berani kenyau ari menya nyentuk ke diatu.

Cherita pasal pemati enggau pengangkat Jesus ari mati ke dipadah dalam bup Injil, ngembuan penerang ke nunjukka cherita nya amat sereta sejalai enggau sejarah. Macha bup Injil nya enggau bejimat ulih nulung nuan pechayaka utai ke disebut dalam cherita nya amat nyadi. Utai ti dipechaya nuan ulih teguh agi lebuh nuan meretika kebuah utai nya nyadi. Artikel pengudah tu deka nerangka iya.

^ per. 7 Tacitus ke ada kira-kira ba 55 M., nulis “Kristus, leka jaku asal nama [Kristian], diukum bunuh ulih Pontius Pilatus, seiku ari penawa kitai lebuh Tiberius merintah.” Jesus mega bisi disebut Suetonius (kurun keterubah); pakar sejarah orang Judah Josephus (kurun keterubah); enggau Pliny ke Biak, gabenor menua Bitinia (pun kurun kedua).