Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mac 2016

Kita ke Nembiak—Baka Ni Kita Ulih Nyediaka Diri Deka Dibaptisa?

Kita ke Nembiak—Baka Ni Kita Ulih Nyediaka Diri Deka Dibaptisa?

Naka meh pengerindu ati aku ngereja peneka Nuan, O Petara aku!’—MAS. 40:8.

LAGU: 51, 58

1, 2. (a) Terangka kebuah deka dibaptisa nya pengawa ti beguna. (b) Nama patut ditentuka orang sebedau iya dibaptisa, lalu nama kebuah?

KATI nuan nya orang ke nembiak ti deka dibaptisa? Enti pia, tu endang basa ti pemadu besai ke kala dikembuan nuan. Baka ke dipadah ba artikel sebedau tu, deka dibaptisa nya pemutus ti berat. Lebuh nuan dibaptisa, sida ke bukai nemu nuan udah nyerahka diri ngagai Jehovah, iya nya nuan udah besemaya enggau Iya deka nyembah Iya belama iya, lalu ngereja peneka Iya nya utai ti pemadu beguna ba pengidup nuan. Ketegal semaya enggau Jehovah tu patut dikeamatka, nuan semina ulih dibaptisa lebuh nuan udah nemu ngaga pemutus, nuan empu bisi pengeran deka nyembah Jehovah belama iya, sereta nemu reti nyerahka diri ngagai Iya.

2 Taja pia, nuan engka ngasaika diri bedau sedia deka dibaptisa. Tauka nuan engka ngasaika diri udah sedia, tang apai indai ngumbai nuan patut nganti nyentuk ke nuan udah chukup umur sereta bisi mayuh peneleba ba pengidup. Nama patut digaga nuan? Anang lemi semengat. Tang, kena meh awak tu ngaga pemansang ngambika nuan jampat ulih dibaptisa. Enggau ngingatka tu, nuan ulih netapka juluk ati ba tiga iti pekara tu: (1) bepegai teguh ba utai ti dikearapka nuan,  (2) pengawa nuan, sereta (3) terima kasih ari nuan.

BEPEGAI TEGUH BA UTAI TI DIKEARAPKA NUAN

3, 4. Nama ulih dipelajarka sida ke nembiak ari teladan Timoti?

3 Perundingka chara nuan deka nyaut tanya tu: Nama kebuah aku pechaya Petara nya bisi? Nama kebuah aku pechaya Bup Kudus nya datai ari Petara? Nama kebuah aku ngasika pesan Petara tang enda nitihka standard moral dunya? Tanya ke baka tu ulih nulung nuan nitihka jaku lalau ari rasul Paul: “Ngambika kita nemu nemu peneka Iya—iya nya utai ti badas, ti ngerinduka ati Iya, ti pemadu menyana.” (Rom. 12:2) Nama kebuah nuan patut ngereja nya?

4 Teladan Timoti ulih nulung nuan. Iya ngelala Bup Kudus enggau manah laban indai enggau ini iya udah ngajar iya ngena Bup Kudus. Taja pia, Paul ngasuh Timoti: “Majak bepegai ba utai ti udah dipelajar sereta dikarapka nuan.” (2 Tim. 3:14, 15) Nya alai Timoti patut pechaya, pemendar nya ulih ditemu dalam Bup Kudus. Iya nerima pemendar nya, ukai ketegal indai enggau ini iya ke ngasuh iya ngereja nya, tang ketegal iya udah matihka diri ngelala bida entara utai ti badas enggau utai ti jai.—Bacha Hebrew 5:14.

5, 6. Nama kebuah nya beguna nuan belajar matihka diri ngelala bida entara utai ti badas enggau utai ti jai kenyau ari agi mit?

5 Baka ni enggau nuan? Nuan engka udah lama nemu pemendar. Enti pia, gaga nya nyadika juluk ati nuan ngambika nemu kebuah nuan arapka pemendar. Tu ulih nulung nuan ngeringka pengarap sereta nyeliahka diri ari ngaga pemutus ti salah ketegal diansak bala kawan, runding dunya tauka asai ati diri empu.

6 Enti nuan belajar matihka diri ngelala bida entara utai ti badas enggau utai ti jai lebuh nuan agi biak, nuan ulih nyaut tanya ari bala kawan ke baka tu: ‘Nama kebuah nuan pechaya Petara nya amat bisi? Enti Petara rinduka kitai, nama kebuah Iya ngemendarka utai ti jai nyadi? Enti Petara ngaga semua utai, sapa ke ngaga Petara?’ Enti nuan udah besedia dulu, tanya ke baka tu enda ngasuh nuan kakang ati, tang deka meransang nuan belajarka Bup Kudus enggau mayuh agi.

7-9. Baka ni nuan ulih neguhka utai ti dikearapka nuan?

7 Bejimat belajarka Bup Kudus ulih nulung nuan nyaut tanya, muai ati ti kakang  sereta neguhka utai ti dikearapka nuan. (SKR. 17:11) Kitai bisi beberapa iti litaricha ke ulih nulung nuan. Mayuh orang ngasaika mansik litaricha kitai ke nerang pasal Penempa enggau utai ti ditempa Iya amat ulih nulung. Pia mega, mayuh sida ke nembiak rindu sereta bulih penguntung ngena bup “Nama Utai ti Bendar Diajar Bup Kudus?” ba jw.org. Bup tu mega ulih dipeda nuan ba begian AJARAN ALKITAB. Bup tu endang digaga kena nulung neguhka utai ti dikearapka nuan.

8 Laban nuan pelajar Bup Kudus, nya alai nuan engka udah nemu saut ngagai sekeda tanya pasal batang ajar Bup Kudus. Tang, nama utai ti ulih nyukung saut nuan? Nuan ulih belajar kediri empu enggau ngiga pansik dalam litaricha kitai ke ulih nulung nuan neguhka utai ti dikearapka nuan. Tu mega ulih nulung nuan nemu chara nerangka utai ti dipechaya nuan ngagai orang bukai.

9 Nuan empu patut nemu nya meh pemendar. Tu ulih nulung nuan nyediaka diri dibaptisa. Seiku menyadi Kristian indu ke nembiak madahka: “Sebedau aku mutuska runding deka dibaptisa, aku belajar Bup Kudus, lalu nemu tu meh pengarap ti bendar. Ninting hari, utai ti dikearapka aku majak teguh.”

PENGAWA NUAN

10. Nama kebuah kitai ngarapka orang Kristian ke dibaptisa deka ngembuan pengawa ke sejalai enggau pengarap iya?

10 Bup Kudus madahka: “Pengarap mati enti iya nadai pengawa.” (Jas. 2:17) Enti nuan amat bepegai teguh ba utai ti dikearapka nuan, nuan deka nunjukka iya ari pengawa nuan. Nuan deka ngembuan utai ti dikumbai Bup Kudus ‘diau kudus sereta nangika Petara.’—Bacha 2 Peter 3:11.

11. Padahka reti “diau kudus.”

11 Nama reti “diau kudus”? Enti pengawa nuan manah, moral nuan tuchi. Chunto, perundingka pasal enam bulan ti udah. Lebuh nuan bisi pengingin deka ngereja utai ti salah, kati nuan bisi berundingka pasal utai ti badas enggau utai ti jai? (Heb. 5:14) Kati nuan agi ingatka maya nuan enda lemi semengat lebuh kena uji tauka diansak bala kawan? Kati nuan nya teladan ti manah ngagai orang bukai ba sekula? Kati nuan mengkang tetap ati ngagai Jehovah, tauka kati nuan nguji deka baka bala ke sekelas enggau nuan ngambika enda dikeduan sida? (1 Pet. 4:3, 4) Endang amat, semua orang enda sempurna. Kekadang, indah sida ke udah nyembah Jehovah betaun-taun engka berasai malu sereta tusah deka nginjil ngagai orang bukai. Tang orang ke nyerahka diri ngagai Petara deka temegah nyadi Saksi-Saksi Jehovah, lalu nunjukka tu ari ulah iya ti tuchi.

12. Baka ni diau ‘nangika Petara,’ lalu nama runding nuan pasal pengawa nya?

12 Nama reti diau ‘nangika Petara’? Tu nyengkaum pengawa ke dikereja nuan ba gempuru, baka datai ke gempuru sereta nginjil. Tu mega nyengkaum pengawa ke enda dipeda orang bukai, baka besampi kediri ngagai Jehovah sereta belajarka Bup Kudus kediri empu. Orang ke udah nyerahka pengidup diri ngagai Jehovah enda ngumbai pengawa tu utai ti ngenusahka iya. Iya deka ngasaika utai ti sama baka Raja David, ke madahka: ‘Naka meh pengerindu ati aku ngereja peneka Nuan, O Petara aku! Aku nyimpan ajar Nuan dalam ati aku.’—Mas. 40:8.

13, 14. Nama ulih nulung nuan diau ‘nangika Petara,’ lalu baka ni sekeda sida ke biak tau bulih penguntung?

13 Ngambika ulih diau ‘nangika Petara,’ peratika sekeda tanya ke ulih nulung nuan, baka: “Kati sampi nuan nyemetak, lalu nama ditunjukka sampi pasal pengerindu nuan ngagai Jehovah?” “Nama utai bukai  ke bisi digaga nuan maya belajarka Bup Kudus kediri empu?” “Kati nuan bisi enggau nginjil, taja pan apai indai nuan enda enggau nginjil?” [1] (Peda nota penutup.) Tuliska saut ngagai tanya tu. Saut iya ulih nulung nuan netapka juluk ati ke ulih ngemansangka sampi nuan, pengawa belajarka Bup Kudus kediri empu sereta pengawa nginjil.

14 Nuliska saut ngagai tanya ke baka nya, endang ulih nulung sekeda sida ke nembiak ti bisi ati deka dibaptisa. Seiku menyadi Kristian indu ke biak benama Tilda madahka, nuliska saut ngagai tanya ke baka nya nulung iya netapka juluk ati. Iya ulih ngulihka juluk ati iya betangkan-tangkan, lalu iya sedia dibaptisa setaun udah nya. Seiku menyadi Kristian lelaki ke biak benama Patrick bulih pemujur ti sama. Ku iya madahka: “Aku udah nemu juluk ati aku, tang nuliska semua juluk ati nya nulung aku bebendar agi ngulihka semua nya.”

Kati nuan deka terus nyembah Jehovah taja pan apai indai enda agi nyembah Iya? (Peda genteran 15)

15. Terangka kebuah nyerahka diri ngagai Petara nya patut digaga nuan empu.

15 Siti tanya ti pemadu beguna iya nya: “Kati nuan deka nyembah Jehovah taja pan apai indai enggau bala kawan nuan enda agi nyembah Iya?” Enti nuan nyerahka pengidup diri ngagai Jehovah sereta dibaptisa, nuan empu deka bisi kaul enggau Iya. Nya alai, utai ti digaga nuan ke Jehovah enda patut bepanggai ba apai indai nuan tauka orang bukai. Ulah nuan ti tuchi sereta nangika Petara nunjukka nuan arap bendar nuan ngembuan pemendar sereta deka nitihka standard Petara. Enda lama udah nya nuan udah tau dibaptisa.

TERIMA KASIH ARI KITA

16, 17. (a) Nama ulih meransang orang ngambika deka nyadi orang Kristian? (b) Baka ni pengawa beterima kasih ke tebus ulih diterangka?

16 Bisi sekali, seiku lelaki ke landik pasal Adat Moses nanya Jesus: “Ni pesan ti pemadu besai dalam Adat?” Ku Jesus nyaut, ‘Rinduka Jehovah Petara nuan enggau pengabis ati nuan, enggau pengabis semengat nuan, enggau pengabis runding nuan.’ (Mat. 22:35-37) Jesus nerangka, pengerindu ngagai Jehovah patut nyadika kebuah orang deka dibaptisa sereta nyadi orang Kristian. Siti chara ti pemadu manah kena neguhka pengerindu nuan ngagai Jehovah iya nya berundingka enggau dalam pasal tebus, pemeri Petara ti pemadu besai ngagai mensia. (Bacha 2 Korint 5:14, 15; 1 John 4:9, 19.) Enti nuan ngereja nya, nuan deka ngayanka terima kasih nuan ke pemeri ti manah nya.

17 Terima kasih nuan ke tebus ulih diterangka ngena chara tu: Uji pikirka, nuan nyau deka lemas ba ai, lalu orang datai nyelamatka nuan. Kati nuan terus pulai ke rumah, begari, lalu enda ingatka utai ti udah digaga orang nya ke nuan? Enda! Nuan seruran deka berasai beterima kasih ngagai orang ke udah nyelamatka nyawa nuan! Pia mega, kitai patut beterima kasih ngagai Jehovah enggau Jesus ke udah meri tebus. Kitai berutang pengidup ba seduai iya! Seduai iya udah nyelamatka kitai ari dosa enggau pemati. Ketegal pengerindu seduai iya ke kitai, kitai diatu bisi peluang idup belama iya ba Paradais di dunya!

18, 19. (a) Nama kebuah nuan enda patut takut nyadi enggi Jehovah? (b) Baka ni nyembah Jehovah tau ngasuh pengidup nuan manah agi?

18 Kati nuan beterima kasih ke utai ti udah digaga Jehovah ke nuan? Enti pia, nyerahka diri ngagai Iya lalu dibaptisa nya utai ti patut dikereja. Pengawa nuan ke nyerahka diri ngagai Petara nya semaya nuan ngagai Iya ke deka ngereja peneka Iya belama iya. Patut nuan takut ngaga semaya ke baka nya? Enda! Jehovah dekaka utai ti pemadu manah ke nuan, lalu Iya deka merekat  sida ke ngereja peneka Iya. (Heb. 11:6) Lebuh nuan nyerahka pengidup diri ngagai Petara, lalu dibaptisa, pengidup nuan deka lantang sereta likun! Seiku menyadi Kristian lelaki ke beumur 24 taun ke udah dibaptisa sebedau iya manggai umur bebelas taun madahka, “Aku engka ngembuan penemu ti dalam agi enti umur aku nyau tuai agi, tang ngaga pemutus deka nyerahka diri ngagai Jehovah nyaga aku ari nitihka pengingin dunya.”

19 Jehovah dekaka utai ti pemadu manah ke nuan. Taja pia, Sitan nya berundingka diri empu aja sereta enda ibuhka nuan. Iya enda ulih meri nuan utai ti manah enti nuan nitihka iya. Baka ni iya ulih meri nuan utai ti nadai dikembuan iya? Iya nadai ngembuan berita manah, lalu iya nadai ngembuan sebarang pengadang. Iya semina ulih meri nuan utai ti enda manah, laban nya meh utai ti dikembuan iya!—Pem. 20:10.

20. Nama ulih digaga orang ke nembiak ngambika ulih nyerahka diri ngagai Petara sereta dibaptisa? (Peda mega kutak “Kena Nulung Nuan Ngaga Pemansang.”)

20 Nyerahka pengidup diri ngagai Jehovah nya pemutus ti pemadu manah ke kala digaga nuan. Kati nuan udah sedia ngereja nya? Enti udah, anang takut ngaga semaya nya. Tang enti nuan ngasaika diri bedau sedia, kena meh chara dalam artikel tu ngambika ulih terus ngaga pemansang. Paul ngasuh bala menyadi Kristian ba Pilipi terus ngaga pemansang. (Plp. 3:16) Enti nuan nitihka jaku lalau nya, nuan deka jampat agi nyerahka pengidup nuan ngagai Jehovah, lalu dibaptisa.

^ [1] (genteran 13) Sekeda sida ke biak udah bulih penguntung ari keretas kereja ba lambar 308 enggau 309 ari bup Pertanyaan Kaum Muda—Jawaban Yang Praktis, Jilid 2.-IN