Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Mac 2016

Jehovah Ngiring Nembiak Iya ngagai Jalai ti Nuju Pengidup

Jehovah Ngiring Nembiak Iya ngagai Jalai ti Nuju Pengidup

“Tu jalai. Titi jalai tu.”—ISA. 30:21.

LAGU: 65, 48

1, 2. (a) Nama tangkan ke udah nyelamatka mayuh nyawa? (Peda gambar ba pun artikel.) (b) Nama iring ke ulih nyelamatka nyawa nembiak Petara?

“NGETU, PEDA, DINGA.” Lebih ari 100 taun, leka jaku tu udah ayan ba papan tanda jalai ti besai ba endur meraka jalai kerita api di sekeda menua. Nama kebuah? Ngambika perengka pengangkut enda kena lantak kerita api ke laju mansa nengah jalai nya. Beratika papan tanda jalai tu udah nyelamatka mayuh nyawa orang.

2 Jehovah ngereja utai ti manah agi ari ke meri kitai papan tanda dikena nyaga pengelikun. Iya ngiring nembiak Iya ngambika sida tau bulih pengidup ti meruan belama iya sereta nyeliahka utai ti tau ngemediska. Jehovah nya baka seiku pengibun bedus ti bepengerindu ke ngiring sereta nyaga bala bedus iya ngambika bala bedus nya enda ngagai jalai ti tau ngemediska.—Bacha Isaiah 30:20, 21.

JEHOVAH SERURAN NGIRING NEMBIAK IYA

3. Baka ni mensia niti jalai ti nuju ngagai pemati?

3 Kenyau ari sejarah mensia berengkah, Jehovah udah meri orang iring tauka atur ti nyemetak. Chunto, ba Kebun Eden, Jehovah udah meri iring ti terang ke ulih ngiring mensia ngagai  pengidup ti meruan belama iya sereta ngelantangka ati. (P-kal. 2:15-17) Tang Adam seduai Hawa nulak iring ari Apai seduai iya ti bepengerindu. Hawa mendingka jaku ke datai ari seiku ular, lalu udah nya Adam mendingka jaku bini iya. Nama penyadi? Seduai iya idup merinsa, lalu mati sereta nadai pengadang. Pia mega, ketegal seduai iya enda ngasi, semua mensia niti jalai ti nuju ngagai pemati.

4. (a) Nama kebuah iring ke bukai beguna pengudah Bah Besai? (b) Nama dipadah pekara baru nya pasal runding Petara?

4 Petara meri Noah iring ke ulih nyelamatka nyawa. Pengudah Bah Besai, Jehovah enda ngasuh orang makai tauka ngirup darah. Nama kebuah? Diatu Jehovah ngemendarka mensia makai dagin. Ketegal tu pekara ti baru, sida begunaka iring ti baru: “Tang kita enda tau makai dagin ti agi bedarah, laban darah ngundan seput [nyawa].” (P-kal. 9:1-4) Ari pesan tu, kitai nemu runding Petara pasal nyawa ke enggi Iya. Iya nya Penempa sereta meri kitai nyawa, nya alai Iya bisi hak ngaga atur pasal nyawa. Ngambika chunto, Iya enda ngasuh mensia munuh orang bukai. Ba mata Petara, nyawa enggau darah nya tuchi, lalu Iya deka ngukum sebarang orang ke ngelanggar atur nya.—P-kal. 9:5, 6.

5. Nama deka dikerandauka kitai diatu, lalu nama kebuah?

5 Pengudah jeman Noah, Petara terus ngiring nembiak Iya. Ba artikel tu, kitai deka meda sekeda chara Iya ngiring sida. Tu deka neguhka pengeran kitai nitihka iring ari Jehovah ngagai dunya baru.

BANSA KE BARU, IRING TI BARU

6. Nama kebuah Petara patut meri adat ngagai orang Israel, lalu nama patut digaga sida?

6 Maya jeman Moses, Jehovah meri nembiak Iya iring ti terang bekaul enggau ulah sereta sembah sida. Nama kebuah? Sekali agi, gaya nembiak Iya udah berubah. Lebih ari dua ratus taun, orang Israel nyadi ulun ba menua Ejip. Orang ke diau dia nyembah orang ke udah mati, ngena engkeramba, sereta mayuh agi utai bukai ke enda ngemuliaka Petara. Lebuh nembiak Petara dilepaska ari menua Ejip, sida begunaka iring ti baru. Sida deka nyadi siti bansa ke semina nitihka Adat ari Jehovah. Sekeda bup penerang madahka, leka jaku “adat” dalam Hebrew reti iya “atur, iring, ajar.” Adat nyaga orang Israel ari ulah ti kamah sereta ari pengarap pelesu orang bansa bukai ke ngelingi sida. Lebuh orang Israel mendingka Petara, sida diberekat Iya. Lebuh sida enda mendingka Iya, sida napi penusah.—Bacha Ulang Adat 28:1, 2, 15.

7. (a) Padahka kebuah bukai Jehovah meri iring ngagai nembiak Iya. (b) Baka ni Adat nya nyaga orang Israel?

7 Iring ti baru nya beguna ketegal kebuah ti bukai. Adat nyediaka orang Israel ke siti pengawa ti beguna bekaul enggau tuju Jehovah, iya nya penatai Messiah, Jesus Kristus. Adat madahka orang Israel nya enda sempurna. Adat mega nulung sida nemu, sida begunaka tebus iya nya genselan ti sempurna ke deka muai dosa sida belama iya. (Gal. 3:19; Heb. 10:1-10) Nambahka nya, Adat nyaga bala peturun Messiah sereta nulung orang Israel ngelala Messiah lebuh iya datai. Amat, Adat “deka nyaga” orang Israel nyentuk ngagai maya penatai Kristus.—Gal. 3:23, 24.

8. Nama kebuah kitai patut diiring ulih prinsip ba Adat Moses?

8 Kitai mega bulih penguntung ari iring ke diberi Jehovah dalam Adat. Baka ni? Kitai ulih ngetu sereta meda prinsip ke bisi ba Adat. Taja pan kitai enda agi di baruh adat nya, kitai agi bepanggai ba sekeda adat nya nyadika iring ba pengidup ninting hari sereta  sembah ngagai Jehovah. Iya udah ngasuh adat nya ditulis ba Bup Kudus ngambika kitai ulih nemu adat nya, diiring prinsip adat nya sereta beterima kasih ngagai Jesus ke udah ngajar kitai pasal utai ti besai agi ari Adat. Dingaka utai ku Jesus: “Kita udah ninga jaku ti munyi tu, ‘Anang butang.’ Tang aku madah ngagai kita, barang sapa merening ngagai indu enggau ati ti kamah, udah butang enggau indu nya dalam ati iya.” Nya alai, kitai ukai semina nyeliahka pengawa butang, tang kitai mega patut nulak sebarang runding enggau pengingin ti kamah.—Mat. 5:27, 28.

9. Nama pekara baru ke ngasuh Petara patut meri iring ti baru?

9 Pengudah Jesus nyadi Messiah, Jehovah meri iring ti baru sereta nerangka mayuh agi pasal tuju Iya. Nama kebuah tu beguna? Ba taun 33, Jehovah nulak bansa Israel, lalu milih gempuru Kristian nyadika nembiak Iya. Nya alai, gaya nembiak Petara sekali da agi berubah baru.

IRING KE ORANG ISRAEL KE NEMBIAK PETARA

10. Nama kebuah adat ti baru diberi ngagai gempuru Kristian, lalu baka ni adat nya bebida ari iya ke diberi ngagai orang Israel?

10 Jehovah udah meri orang Israel Adat Moses kena ngajar sida chara idup sereta nyembah Iya. Berengkah ari kurun keterubah, nembiak Petara enda agi datai ari siti bansa, tang datai ari mayuh bansa sereta chara pengidup, lalu sida dikumbai Israel ke nembiak Petara. Sida numbuhka gempuru Kristian lalu di baruh sempekat ti baru. Jehovah meri sida iring ti baru pasal chara idup sereta nyembah Iya. Endang amat, Petara “enda bepilih mata, tang dalam semua bansa, barang sapa nangika Iya, lalu ngereja utai ti ngena sigi dikerinduka Iya.” (SKR. 10:34, 35) Sida nitihka “adat Kristus” ke bepelasarka prinsip ti udah ditulis, ukai ba batu tang ba ati sida. Adat tu deka ngiring sereta meri penguntung ke orang Kristian enda ngira dini alai sida diau.—Gal. 6:2.

11. Nama dua iti chara idup orang Kristian ke bekaul enggau “adat Kristus”?

11 Orang Israel ke nembiak Petara bulih mayuh penguntung ari iring ti diberi Jehovah nengah Jesus. Sebedau Jesus madahka pasal sempekat ti baru, iya meri dua iti pesan ti besai. Siti pesan pasal pengawa nginjil. Siti da agi pasal chara orang Kristian patut begulai enggau pangan diri. Iring tu diberi ngagai semua orang Kristian, nya alai iring nya patut dititihka semua kitai kemaya hari tu, enda ngira kitai bisi peluang idup belama iya di serega tauka ba dunya.

12. Nama utai ti baru ke bekaul enggau pengawa nginjil?

12 Kelia, orang bansa bukai patut datai ngagai menua Israel nyembah Jehovah. (1 Raj. 8:41-43) Tang udah nya, Jesus meri pesan ke ulih dipeda kitai ba Matthew 28:19, 20. (Bacha.) Jesus ngasuh bala murid iya “bejalai” ngagai semua bansa. Maya Pentikos kena taun 33, Jehovah madahka Iya dekaka berita manah ditusui ke serata dunya. Sehari nya, kira-kira 120 iku orang ari gempuru ke baru dipenuhka enggau roh kudus sereta belabuh bejaku ngena jaku orang bansa bukai ngagai orang Judah sereta orang bansa bukai ke udah masuk pengarap orang Judah. (SKR. 2:4-11) Udah nya, sida nginjil ngagai orang Samaria. Ba taun 36, berita manah ditusui ngagai orang bansa bukai ke enda ditutus. Reti nya orang Kristian patut nginjil ngagai semua orang ba dunya!

13, 14. (a) Nama disengkaum dalam “pesan ti baru” ari Jesus? (b) Nama dipelajarka kitai ari teladan ke ditetapka Jesus?

13 Jesus mega meri “pesan ti baru” pasal chara begulai enggau bala menyadi  Kristian kitai. (Bacha John 13:34, 35.) Kitai ukai semina ngayanka pengerindu ngagai sida ninting hari, tang kitai mega patut sanggup nyerahka nyawa diri ketegal sida. Tu nadai ditetapka dalam Adat.—Mat. 22:39; 1 Jhn. 3:16.

14 Jesus nya teladan ti pemadu manah ngagai orang ke ngayanka pengerindu ke baka nya. Iya balat rinduka bala murid iya nyentukka iya sanggup mati ketegal sida. Lalu iya ngarapka semua murid iya ngereja utai ti sama. Nya alai kitai patut sanggup natka penusah, indah mati ketegal bala menyadi Kristian kitai.—1 Tes. 2:8.

IRING KE KEMAYA HARI TU SERETA KE JEMAH ILA

15, 16. Nama pekara baru ke ditapi nembiak Petara, lalu baka ni Iya ngiring kitai?

15 Jesus udah milih “ulun ke tetap ati sereta bepenemu-dalam” ngambika meri bala murid iya “pemakai ba maya ti patut.” (Mat. 24:45-47) Pemakai rohani tu nyengkaum iring ti beguna ngagai nembiak Petara lebuh bisi pekara ke berubah. Nama pekara baru ke ditapi kitai?

16 Kitai idup ba “hari ti penudi,” lalu enda lama da agi kitai deka napi penusah besai ti nadai kala nyadi baka ke udah. (2 Tim. 3:1; Mrk. 13:19) Pia mega, Sitan enggau bala antu iya udah dibuai ari serega ke dunya, lalu ngasuh pemerinsa balat nyadi ba mensia. (Pem. 12:9, 12) Nambahka nya, kitai ngasika pesan Jesus enggau nginjil ke serata dunya ngagai mayuh agi orang sereta ngena mayuh agi bansa jaku ari ke udah!

17, 18. Nama patut digaga kitai enggau iring ke diberi?

17 Gerempung Petara nyediaka mayuh perengka kena nulung kitai ba pengawa nginjil. Kati nuan bisi ngena perengka nya? Ba gempuru, kitai nerima iring chara ngena  perengka nya enggau pemadu manah. Kati nuan ngumbai tu iring ke datai ari Petara?

18 Ngambika bulih berekat ari Petara, kitai patut beratika semua iring ke diberi Iya ngagai kitai nengah gempuru Kristian. Enti kitai ngasi ari diatu, tu deka ngenyenangka kitai nitihka iring maya “penusah ti besai,” lebuh dunya Sitan ke jai dipunaska. (Mat. 24:21) Udah nya, kitai deka begunaka iring ti baru kena idup ba dunya baru ti bisi pengelurus, ke bibas ari kuasa Sitan.

Ba dunya baru, kitai deka nerima gulung surat ke ngembuan iring ti baru pasal pengidup ba Paradais (Peda genteran 19, 20)

19, 20. Nama gulung surat ti deka dibuka, lalu nama patut digaga kitai?

19 Maya jeman Moses, bansa Israel begunaka iring ti baru, nya alai Petara meri sida Adat. Udah nya, gempuru Kristian patut nitihka “adat Kristus.” Pia mega, Bup Kudus madah ngagai kitai, ba dunya baru kitai deka nerima gulung surat tauka bup ke ngembuan iring ti baru. (Bacha Pemandang 20:12.) Gulung surat nya deka nerangka utai ti dikedekaka Jehovah ari mensia lebuh maya nya. Enggau belajarka surat nya, semua orang, nyengkaum sida ke diangkatka idup baru, deka nemu utai ti dikedekaka Petara ari sida. Surat nya deka nulung kitai belajar mayuh agi pasal chara Jehovah berunding. Kitai mega deka meretika Bup Kudus enggau manah agi, nya alai ba Paradais kitai deka rinduka sereta bebasaka pangan diri. (Isa. 26:9) Uji gambarka pemayuh utai ti deka dipelajarka kitai sereta diajar kitai ngagai orang bukai di baruh iring Raja kitai, Jesus Kristus!

20 Enti kitai nitihka iring “munyi ti ditulis dalam bup [gulung surat] nya” sereta mengkang tetap ati ngagai Jehovah maya penguji ke penudi, Iya deka nulis nama kitai dalam “bup [gulung surat] pengidup” belama iya. Kitai tau bulih pengidup ti meruan belama iya! Nya alai, kitai patut NGETU ngambika macha utai ti dipadah Bup Kudus, MEDA ngambika nemu reti nya, lalu DINGA enggau ngasika iring ari Petara diatu. Enti kitai ngereja tu, kitai ulih selamat ari penusah ti besai sereta rindu belajar pasal Jehovah, Petara kitai ti bepenemu-dalam sereta bepengerindu, belama iya.—P-jar. 3:11; Rom. 11:33.