Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2017

‘Panggaika Pengarap Kita ba Jehovah, lalu Kereja Utai ti Badas’

‘Panggaika Pengarap Kita ba Jehovah, lalu Kereja Utai ti Badas’

‘Panggaika pengarap kita ba Jehovah, lalu kereja utai ti badas.’—MAS. 37:3.

LAGU: 133, 63

1. Jehovah nempa mensia ngambika ngembuan penau ke baka ni?

JEHOVAH nempa mensia ngambika ngembuan penau ti spesial. Iya meri kitai penau ulih berunding ke nulung kitai mutarka penusah sereta merambu ke jemah ila. (J-lam. 2:11) Iya meri kitai pengering ngambika kitai ulih ngereja utai ke udah diperambu sereta nyapai juluk ati kitai. (Plp. 2:13) Jehovah mega meri kitai pengasai ati, iya nya pengasai nemu utai ke betul enggau ke salah ti bisi dalam kitai. Pengasai ati nulung kitai nyeliahka diri ari ngereja dosa sereta ngemetulka penyalah kitai.—Rom. 2:15.

2. Baka ni Jehovah dekaka kitai ngena penau kitai?

2 Jehovah dekaka kitai ngena penau kitai enggau chara ti manah. Nama kebuah? Laban Iya rinduka kitai sereta nemu kitai deka lantang ati enti kitai ngena pemeri ke udah diberi Iya. Ngambika chunto, dalam Bup Kudus jaku Hebrew, kitai macha: “Bejimat lebuh nuan ngaga pelan, nya baru nuan deka bulih mayuh utai,” sereta “kereja enggau bebendar sebarang pengawa ti dikereja nuan.” (J-lam. 21:5; P-jar. 9:10) Dalam Bup Kudus jaku Gerika, kitai macha: “Genap kali kitai bisi peluang, kereja pengawa ti badas ngagai semua orang,” lalu “genap iku  [kitai] udah nerima pemeri, kena meh pemeri nya nulung pangan diri.” (Gal. 6:10; 1 Pet. 4:10, NW) Endang amat, Jehovah dekaka kitai enggau naka ulih ngereja utai ke tau mai penguntung ke kitai sereta orang bukai.

3. Nama tatak ke dikembuan mensia?

3 Jehovah dekaka kitai ngena penau kitai, tang Iya nemu kitai bisi tatak. Ngambika chunto, kitai enda ulih muai pengurang, dosa sereta pemati. (1 Raj. 8:46) Pia mega, kitai enda ulih ngaga pemutus ke orang bukai sereta nentuka baka ni sida patut ngatur pengidup diri. Lalu enda ngira ni pemayuh penemu tauka peneleba ke dikembuan kitai, kitai enda ulih telabanka enggi Jehovah.—Isa. 55:9.

Lebuh nuan napi penanggul, panggaika pengarap ba Jehovah, lalu kereja utai ti badas

4. Nama deka diperatika kitai ba artikel tu?

4 Kitai patut seruran ngawakka Jehovah ngiring kitai, ngarapka Iya deka ngintu kitai sereta ngereja utai ke enda ulih dikereja kitai ke kitai empu. Taja pia, Jehovah mega dekaka kitai berundingka utai ke ulih dikereja kitai kena mutarka penusah sereta nulung orang bukai. (Mas. 37:3) Kitai patut ‘manggaika pengarap [kitai] ba Jehovah, lalu ngereja utai ti badas.’ Baka ni kitai ulih ngereja tu? Aram kitai beratika teladan Noah, David sereta nembiak Petara ti tetap ati ke bukai ke bepanggai ba Jehovah. Kitai deka beratika, bisi utai ke enda ulih dikereja sida tang sida milih betumpu ba utai ke ulih dikereja sida.

LEBUH KITAI DIKELINGI PENYAI

5. Terangka utai ke ditapi Noah.

5 Noah idup ba dunya ke penuh enggau “penyai” sereta ulah ti kamah. (P-kal. 6:4, 9-13) Taja pan Noah nemu Jehovah ngemunaska dunya ke jai nya, tang iya mega enggai meda pengawa ke dikereja orang maya nya. Ba pekara tu, Noah nemu bisi utai ke enda ulih sereta ke ulih dikereja iya.

Pengawa nginjil kitai dilaban (Peda genteran 6-9)

6, 7. (a) Nama utai ke enda ulih dikereja Noah? (b) Baka ni utai ke ditapi kitai sama baka ke ditapi Noah?

 6 Utai ke enda ulih dikereja Noah: Noah enggau tetap ati nusui jaku tangkan ari Jehovah, tang iya enda ulih ngansak orang nerima jaku tangkan nya. Lalu iya enda ulih ngasuh Bah Besai tumu agi datai. Noah patut arapka Jehovah deka ngamatka semaya Iya ngujungka penyai, lalu pechaya Jehovah deka ngereja nya ba maya ti ngena.—P-kal. 6:17.

7 Kitai mega idup ba dunya ti penuh enggau penyai, lalu kitai nemu Jehovah deka ngemunaska dunya ke jai nya. (1 Jhn. 2:17) Pia mega, kitai enda ulih ngansak orang bukai nerima ‘Berita Manah pasal Perintah Petara.’ Lalu kitai enda ulih ngasuh “penusah ti besai” berengkah tumu agi. (Mat. 24:14, 21) Baka Noah, kitai patut ngembuan pengarap ti kering, arapka Petara deka ngujungka semua penyai enda lama da agi. (Mas. 37:10, 11) Kitai pechaya, Jehovah enda ngelakka dunya ke jai tu mengkang bisi ngelui ari sehari.—Hab. 2:3.

8. Noah betumpu ba utai nama? (Peda gambar ba pun artikel.)

8 Utai ke ulih dikereja Noah: Ari ke lemi semengat ketegal utai ke enda ulih dikereja iya, Noah betumpu ba utai ke ulih dikereja iya. Noah enggau tetap ati nusui jaku tangkan ari Jehovah. (2 Pet. 2:5) Pengawa tu engka udah nulung iya ngeringka pengarap diri. Kelimpah ari nginjil, iya nitihka utai ti diasuh Jehovah lebuh ngaga bandung.—Bacha Hebrew 11:7.

9. Baka ni kitai ulih nunda teladan Noah?

9 Baka Noah, kitai mengkang kisuk ‘gawa ke Tuan.’ (1 Kor. 15:58) Ngambika chunto, kitai ulih nulung enggau pengawa nirika bengunan sereta nyaga Palan Gempuru enggau Palan Gempuru Besai kitai, sukarela ba gempuru besai sereta konvensyen, gawa ba pampang  opis tauka ba opis penyalin. Keberat agi, kitai mengkang kisuk ba pengawa nginjil ke ngeringka pengadang kitai ke jemah ila. Seiku menyadi Kristian indu ke tetap ati madahka, lebuh iya berandau enggau orang bukai pasal berekat ke dibai Perintah Petara, iya nemu orang amat nadai pengadang lalu sida ngumbai penanggul sida enda ulih diputarka belama iya. Baka ke dipadah iya, kitai bisi pengadang lalu pengadang nya majak kering enti kitai madahka pengadang nya ngagai orang bukai. Pengadang tu nulung kitai mengkang ba lumba ke nuju ngagai pengidup ti meruan belama iya!—1 Kor. 9:24.

LEBUH KITAI BEDOSA

10. Terangka utai ke ditapi David.

10 Raja David nya orang ke tetap ati, lalu Jehovah balat rinduka iya. (SKR. 13:22) Taja pia, David udah beleman enggau Batseba. Nya dosa ti besai. Tang ke besai agi, iya nguji ngelalaika dosa iya enggau merambu deka munuh Uriah, laki Batseba, ba perang. David indah ngasuh Uriah nganjung surat ke ngembuan pesan ke bekaul enggau pemati diri! (2 Sam. 11:1-21) Nyau kelama, dosa David ditemu orang. (Mrk. 4:22) Nama digaga David lebuh dosa iya ditemu orang?

Dosa lama (Peda genteran 11-14)

11, 12. (a) Nama utai ke enda ulih dikereja David pengudah iya bedosa? (b) Nama deka digaga Jehovah ke kitai enti kitai nesal ati?

11 Utai ke enda ulih dikereja David: David enda ulih muai utai ke udah dikereja iya. Indah iya deka merinsa ketegal sekeda penusah ke datai ari dosa iya nyentukka iya mati. (2 Sam. 12:10-12, 14) Nya alai, iya begunaka pengarap. Iya patut arap, enti iya amat udah nesal ati, Jehovah deka ngampun sereta nulung iya tan natka penusah ke datai ari pengawa iya.

12 Ketegal enda sempurna, semua kitai bedosa. Tang sekeda penyalah nya besai agi ari ke bukai, lalu ba sekeda pekara, kitai engka enda ulih muai penyalah kitai. Kitai mega engka merinsa ketegal pengawa ke dikereja kitai. (Gal. 6:7) Tang kitai arapka semaya Petara iya nya enti kitai nesal ati, Iya deka ngibun kitai lebuh napi maya ti tusah, taja pan penusah nya ketegal kitai empu.—Bacha Isaiah 1:18,19; Kereja Rasul 3:19.

13. Baka ni David ngemanahka kaul iya enggau Jehovah?

13 Utai ke ulih dikereja David: David deka ngemanahka kaul iya enggau Jehovah. Baka ni iya ngereja nya? David ngawakka Jehovah nulung iya. Ngambika chunto, iya nerima jaku lalau ari Natan, nabi Jehovah. (2 Sam. 12:13) David mega besampi ngagai Jehovah sereta ngaku dosa diri. Tu nunjukka iya amat deka Jehovah nerima iya baru. (Mas. 51:1-17) Ari ke berasai ditekan enggau penyalah diri, David belajar ari penyalah diri. Iya enda ngulang dosa ti besai nya. Betaun udah nya, David mati enggau tetap ati, lalu nya meh chara Jehovah ngenang iya.—Heb. 11:32-34.

14. Nama ulih dipelajarka kitai ari teladan David?

14 Nama ulih dipelajarka kitai ari teladan David? Enti kitai ngereja dosa ti besai, kitai patut nesal ari ati, ngaku dosa diri ngagai Jehovah, sereta minta ampun ari Iya. (1 Jhn. 1:9) Kitai mega patut berandau enggau tuai gempuru laban sida ulih nulung kitai ngemanahka kaul enggau Jehovah. (Bacha James 5:14-16.) Enti kitai nerima tulung ari Jehovah, kitai nunjukka diri arapka semaya Iya ti deka ngampun kitai. Nambahka nya, kitai patut belajar ari penyalah diri sereta terus nyembah Jehovah enggau ati ti andal.—Heb. 12:12, 13.

MAYA NAPI PENUSAH BUKAI

Penanggul ba pengerai (Peda genteran 15)

15. Nama dipelajarka kitai ari teladan Hanah?

15 Nuan engka ulih berundingka pasal nembiak ti tetap ati ke bukai dalam Bup Kudus, ke arapka Jehovah sereta ngereja utai  ke ulih dikereja sida maya napi penusah. Ngambika chunto, Hanah enda ulih beranak. Iya enda ulih ngubah penanggul nya. Tang iya arapka Jehovah deka ngelantangka ati iya. Nya alai, iya mengkang nyembah Jehovah ba langkau sembiang sereta besampi madahka utai ti diasai iya ngagai Jehovah. (1 Sam. 1:9-11) Endang teladan ti manah ke kitai! Lebuh napi penanggul ba pengerai tauka penanggul bukai ke enda ulih diubah kitai, kitai nyerahka semua pengirau kitai ngagai Jehovah sereta arapka Iya deka ngibun kitai. (1 Pet. 5:6, 7) Lalu kitai bebendar deka bulih penguntung ari pengawa begempuru Kristian sereta program bukai ti disediaka gerempung Jehovah.—Heb. 10:24, 25.

Bala anak ke udah ngetu nyembah Jehovah (Peda genteran 16)

16. Nama ulih dipelajarka apai indai ari Samuel?

16 Baka ni enggau apai indai ke tetap ati ti ngembuan anak ke udah ngetu nyembah Jehovah? Nabi Samuel enda ulih ngansak dua iku anak lelaki iya ke udah besai mengkang taluk ngagai Petara. (1 Sam. 8:1-3) Iya nyerahka pekara nya ngagai Jehovah. Taja pia, Samuel enggau naka ulih mengkang taluk ngagai Jehovah sereta ngelantangka ati Apai iya ti di serega. (J-lam 27:11) Kemaya hari tu, mayuh apai indai ke Kristian napi penusah ti sama. Sida pechaya, baka apai ba sempama pasal anak ke tesat ti dipadah Jesus, Jehovah endang seruran sedia nyambut orang bedosa ke nesal ati pulai baru. (Luk. 15:20) Pia mega, apai indai patut terus mengkang taluk ngagai Jehovah, ngambika teladan sida ulih meransang bala anak sida pulai baru ngagai Jehovah.

Penanggul ba duit (Peda genteran 17)

17. Nama kebuah teladan indu ke balu sereta seranta nya meransang ati?

17 Siti agi teladan manah iya nya indu ke balu sereta seranta maya jeman Jesus. (Bacha Luke 21:1-4.) Iya enda ulih mutarka pengawa ke enda lurus ke nyadi ba Rumah Sembiang tauka ngubah fakta iya endang seranta. (Mat. 21:12, 13) Tang pengarap iya ba Jehovah meransang iya nyukung sembah ti bendar. Iya gerah jari lalu meri “dua singkap duit engkeraju,” kengka duit ti dikemisi iya. Indu balu ke tetap ati nya nunjukka diri arapka Jehovah enggau pengabis ati. Iya nemu, enti iya ngenuluka sembah ngagai Jehovah, Jehovah deka nentuka iya bulih utai ti diguna iya. Pia mega, kitai pechaya Jehovah deka nentuka kitai bulih utai ti diguna kitai enti kitai ngenuluka Perintah Petara.—Mat. 6:33.

18. Beri siti chunto pasal seiku menyadi Kristian lelaki ke ngembuan runding ke betul.

18 Mayuh ari bala menyadi Kristian kitai kemaya hari tu ngayanka pengarap ti sama ngagai Jehovah enggau betumpu ba utai ke ulih dikereja sida, ukai betumpu ba utai ke enda ulih dikereja sida. Peratika seiku menyadi Kristian lelaki ke benama Malcom, ke mengkang tetap ati nyentuk ke iya mati ba taun 2015. Iya enggau bini iya udah betaun-taun nyembah Jehovah, lalu seduai iya bisi maya ti senang tauka tusah. Ku iya madahka: “Kekadang pengidup tusah dijangka, enda tentu, sereta tusah ditapi. Tang Jehovah merekatka orang ke bepanggai ba Iya.” Nama jaku ajar ari Malcom? “Besampi ngambika nuan ulih mengkang gawa ke Jehovah. Betumpu ba utai ke ulih dikereja nuan, ukai betumpu ba utai ke enda ulih dikereja nuan.” *—Peda nota kaki.

19. (a) Nama kebuah ayat taun 2017 kitai nya manah amat? (b) Baka ni nuan deka ngena ayat taun 2017 ba pengidup nuan?

19 Dunya ke jai tu deka majak “jai se-jai.” Nya alai kitai nemu, kitai deka napi mayuh agi penusah. (2 Tim 3:1, 13) Lebih ari ke udah, kitai enda tau ngelakka penusah ngalahka kitai. Tang kitai patut arap bendar ke Jehovah sereta betumpu ba utai ke ulih dikereja kitai. Nya kebuah ayat taun 2017 kitai nya manah amat: ‘Panggaika pengarap kita ba Jehovah, lalu kereja utai ti badas’!—Mas. 37:3.

^ per. 18 Peda Menara Pengawal, 15 Oktober 2013, lamb. 17- 20.

Ayat taun kitai kena 2017: ‘Panggaika pengarap kita ba Jehovah, lalu kereja utai ti badas.’—Masmur 37:3