Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2017

 TOPIK RANDAU | CHARA BULIH MAYUH AGI PENGUNTUNG ARI MACHA BUP KUDUS

Baka Ni Bup Kudus Ulih Ngemanahka Pengidup Aku?

Baka Ni Bup Kudus Ulih Ngemanahka Pengidup Aku?

Bup Kudus enda sebaka enggau bup bukai. Iya ngundan jaku ajar ari Penempa kitai. (2 Timoti 3:16) Pesan dalam Bup Kudus ulih ngubah pengidup kitai. Indah Bup Kudus madahka: ‘Jaku Petara idup sereta bekuasa.’ (Hebrew 4:12) Iya ulih ngemanahka pengidup kitai dalam dua iti chara—meri iring ba pengidup besehari-hari diatu sereta nulung kitai ngelala Petara enggau nemu semaya Iya.—1 Timoti 4:8; James 4:8.

Ngemanahka pengidup nuan diatu. Bup Kudus ulih nulung mutarka penanggul ke ditapi diri. Bup Kudus meri jaku ajar ke ulih dikena ba

  • Kaul enggau orang bukai. —Epesus 4:31, 32; 5:22, 25, 28, 33.

  •   Asai ati sereta pengerai tubuh. —Masmur 37:8; Jaku Dalam 17:22.

  • Ulah.—1 Korint 6:9, 10.

  • Penatai pemisi.—Jaku Dalam 10:4; 28:19; Epesus 4:28. *

Sepasang melaki-bini ke agi biak ba menua Asia amat beterima kasih ke jaku ajar ari Bup Kudus. Baka mayuh melaki-bini ke baru kawin, seduai iya tusah deka beterus terang sereta nelebaka diri enggau personaliti pangan diri. Tang seduai iya berengkah nitihka utai ti dibacha seduai iya dalam Bup Kudus. Lalu nama asil iya? Ku Vicent madahka: “Utai ke dibacha aku dalam Bup Kudus nulung aku mutarka penanggul dalam rumah tangga enggau chara ti bisi pengerindu. Idup sejalai enggau Bup Kudus udah mai pengelantang ba pengidup kami duai.” Ku bini iya, Annalou, madahka: “Macha teladan ke bisi dalam Bup Kudus nulung kami duai. Aku diatu berasai lantang sereta puas ati enggau rumah tangga sereta juluk ati kami duai ba pengidup.”

Ngelala Petara. Kelimpah ari bejaku pasal rumah tangga, Vicent mega madahka: “Ari macha Bup Kudus, aku diatu ngasaika diri semak agi ngagai Jehovah ari ke udah.” Vicent beratika utai ti beguna—Bup Kudus ulih nulung nuan ngelala Petara. Enggau ngereja tu, nuan ukai semina deka bulih penguntung ari jaku ajar Iya tang nuan mega ulih ngelala Iya lalu nyadika Iya pangan nuan. Lalu nuan ulih meda, Iya madahka penerang pasal utai ke manah agi bekaul enggau jemah ila, iya nya maya nuan ulih ngasaika “pengidup ti bendar”—ke deka meruan belama iya. (1 Timoti 6:19) Pengidup ke baka tu, nadai dipadah ba bup bukai.

Enti nuan ulih berengkah lalu enda ngetu macha Bup Kudus, nuan mega tau bulih penguntung nya—ngemanahka pengidup nuan diatu sereta ngelala Petara. Taja pia, seraya nuan macha Bup Kudus, nuan tentu berundingka mayuh tanya. Enti pia, kingatka chunto manah seiku pemesai ari Etiopia ke idup 2,000 taun menya. Iya bisi mayuh tanya pasal Bup Kudus. Lebuh ditanya sekalika iya meretika utai ke dibacha iya, ku iya nyaut: “Baka ni ku aku ulih mereti, enti orang nadai nerangka utai nya ngagai aku?” Udah nya, iya gaga ati nerima tulung ari orang ke ulih ngajar Bup Kudus, iya nya Philip, seiku ari murid Jesus ti dulu. (Kereja Rasul 8:30, 31, 34) Pia mega, enti nuan deka nemu mayuh agi pasal Bup Kudus, kami minta nuan nganjung peminta nengah online ba www.jw.org tauka nulis surat ngagai alamat ke bisi ba majalah tu. Nuan mega ulih ngiga Saksi-Saksi Jehovah ke semak endur nuan diau tauka ngelawa Palan Gempuru ba kandang endur nuan diau. Nama kebuah enda berengkah macha Bup Kudus diatu, lalu ngawakka iya ngiring nuan bulih pengidup ti manah agi?

Enti nuan deka nemu sekalika nuan ulih pechayaka Bup Kudus, peda meh video pandak Baka Ni Kitai Nemu Utai Ba Bup Kudus Nya Amat? Nuan ulih ngiga iya enggau ngelawa jw.org, sereta peda ba UTAI DIKELUARKA KAMI > VIDEO

^ per. 8 Kena nemu mayuh agi chunto ke bekaul enggau jaku ajar ari Bup Kudus ke ulih dikena, peda laman web kami, jw.org. Peda ba UTAI DIKELUARKA KAMI.

Belajar Lebih Agi

BERITA MANAH ARI PETARA!

Baka Ni Jaku Ajar ari Bup Kudus Ulih Nguntungka Kitai?

Jesus nerangka kebuah kitai begunaka iring sereta dua iti prinsip ari Bup Kudus ke beguna bendar.

BERITA MANAH ARI PETARA!

Kati Petara Bisi Nama?

Petara bisi mayuh gelar, nyengkaum Pemadu Tinggi, Penempa, enggau Tuan. Tang, nama Petara Empu bisi dikena kira-kira 7,000 kali ba Bup Kudus.