Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2017

 TOPIK RANDAU | CHARA BULIH MAYUH AGI PENGUNTUNG ARI MACHA BUP KUDUS

Nama Kebuah Macha Bup Kudus?

Nama Kebuah Macha Bup Kudus?

“Aku ngumbai Bup Kudus nya tusah dimeretika.”—Jovy

“Aku ngasaika macha Bup Kudus enda ngerinduka ati.”—Queennie

“Lebuh aku beratika penebal Bup Kudus, aku nadai agi ati deka macha iya.”—Ezekiel

Kala nuan berunding deka macha Bup Kudus tang nadai agi ati laban ngasaika utai ti sama baka sida ba atas? Mayuh orang ngasaika macha Bup Kudus nya enda senang. Tang baka ni enti nuan nyau nemu Bup Kudus ulih nulung nuan ngembuan pengidup ti ngelantang sereta ngemuaska ati? Lalu baka ni enti nuan nyau nemu bisi sekeda chara ke ulih ngasuh nuan rindu agi deka macha Bup Kudus? Kati nuan deka nemu utai manah ke dipadah dalam Bup Kudus?

Peratika sekeda komen ari orang ke udah bulih penguntung lebuh sida berengkah macha Bup Kudus.

Ezekiel, ke baru 20 lebih taun madahka: “Suba, aku baka orang ke deriba kerita ke nadai tuju. Tang macha Bup Kudus udah nulung aku ngembuan pengidup ti bisi reti. Bup Kudus ngundan jaku ajar ke ulih dikena aku besehari-hari.”

Frieda mega ke beumur urung 20 taun, madahka: “Suba, aku jampat ringat. Tang ketegal aku bisi macha Bup Kudus, aku belajar nagang diri empu. Tu udah nulung aku senang agi enggau begulai, nya alai aku bisi mayuh pangan diatu.”

Ku seiku indu ke benama Eunice ke beumur urung 50 taun madah pasal Bup Kudus, “Bup Kudus nulung aku nyadi orang ke manah agi, ngubah tebiat aku ke enda entu manah.”

Baka ke udah ditemu bala pemacha nya sereta bejuta iku ke bukai, macha Bup Kudus ulih nulung nuan ngembuan pengidup ti lantang agi. (Isaiah 48:17, 18) Kelimpah ari nya, Bup Kudus ulih nulung nuan (1) ngaga pemutus ti manah, (2) bulih pangan ti bendar, (3) mutarka pengirau, sereta (4) keberat agi, belajarka pemendar pasal Petara. Jaku ajar ba Bup Kudus datai ari Petara, nya alai nuan enda rugi nitihka jaku ajar nya. Petara enda kala meri jaku ajar ti enda manah.

Tang iya ke beguna nya, deka berengkah macha. Nama chara ke ulih ngasuh pengawa berengkah macha Bup Kudus nya senang agi sereta ngerinduka ati?