Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2017

Beterima Kasih ke Pemeri Bibas Milih

Beterima Kasih ke Pemeri Bibas Milih

‘Dia alai roh Jehovah, dia meh pengelepas.’—2 KOR. 3:17.

LAGU: 62, 65

1, 2. (a) Nama runding ti bebida ke dikembuan orang pasal bibas milih? (b) Nama dipadah Bup Kudus pasal bibas milih, lalu nama tanya ti deka dikerandauka kitai?

LEBUH kitai patut milih siti-siti utai ke diri empu, seiku indu madah ngagai pangan iya: “Anang ngasuh aku berunding; padahka aja utai ke patut digaga aku. Nya senang agi.” Indu nya deka orang madahka utai ti patut digaga iya ari ke ngena pemeri bibas milih ti berega ke diberi Penempa ngagai iya. Baka ni enggau nuan? Kati nuan rindu ngaga pemutus ke diri empu, tauka kati nuan deka orang bukai ngaga pemutus ke nuan? Nama runding nuan pasal bibas milih?

2 Orang bisi runding ti bebida pasal bibas milih. Sekeda orang madahka, kitai enda ulih bibas milih laban Petara udah netapka semua pengawa kitai. Sekeda da agi ngumbai kitai ulih bibas milih enti kitai bisi pengelepas ke nadai tatak. Taja pia, Bup Kudus madahka, kitai ditempa ngambika ngembuan penau sereta pengelepas kena ngaga pemutus ti manah ke diri empu. (Bacha Josua 24:15.) Ba Bup Kudus, kitai mega bulih saut ngagai tanya tu: Kati bibas milih ke dikembuan kitai bisi tatak? Baka ni kitai patut ngena pengelepas kitai ngaga pemutus? Baka ni pemutus ke digaga kitai nunjukka penalam pengerindu kitai ke Jehovah? Baka ni kitai ulih nunjukka diri bebasaka pemutus ke digaga orang bukai?

 NAMA ULIH DIPELAJARKA KITAI ARI JEHOVAH ENGGAU JESUS?

3. Baka ni Jehovah ngena pengelepas Iya ti nadai tatak?

3 Jehovah ngembuan pengelepas ti nadai tatak, lalu kitai ulih belajar ari chara Iya ngena pengelepas Iya. Ngambika chunto, Jehovah milih bansa Israel nyadika “nembiak Iya” ti spesial. (U-dat 7:6-8) Iya bisi kebuah deka milih sida. Jehovah deka ngamatka semaya ti udah digaga Iya enggau pangan Iya, Abraham. (P-kal 22:15-18) Nambahka nya, Jehovah seruran bisi pengerindu sereta enda bechiping lebuh Iya ngena pengelepas Iya. Kitai ulih meda tu ari chara Iya disiplin orang Israel lebuh sida enda ngasika Iya. Lebuh sida amat nesal ati ke utai ti udah dikereja sida, Jehovah ngayanka pengerindu sereta pengasih ngagai sida. Iya madahka: “Aku deka mai bala nembiak Aku pulai baru ngagai Aku. Aku deka rinduka sida enggau pengabis ati Aku.” (Hos. 14:4) Jehovah netapka teladan ti manah ke kitai enggau ngena pengelepas Iya nulung orang bukai!

4, 5. (a) Sapa ti keterubah iya nerima pemeri bibas milih ari Petara, lalu baka ni iya ngena pemeri nya? (b) Nama tanya ke patut ditanya tiap iku kitai?

4 Jehovah nempa bala melikat sereta mensia ngambika ngembuan pemeri bibas milih. Utai ti keterubah ditempa Jehovah nya, Jesus. Jesus ditempa neladan gamal Petara sereta ngembuan pemeri bibas milih. (Kol. 1:15) Baka ni Jesus ngena pengelepas iya? Sebedau datai ke dunya, Jesus milih deka mengkang taluk ngagai Petara, lalu enggai enggau Sitan ngelaban Petara. Lebuh Jesus datai ke dunya, iya milih deka nulak penguji ari Sitan. (Mat. 4:10) Udah nya, ba malam sebedau Jesus mati, iya madahka diri deka ngereja peneka Apai iya. Ku Jesus madah ngagai Apai iya: ‘Apai, enti Nuan deka, ambi mangkuk tu ari aku; ukai nitihka peneka aku, tang awakka peneka Nuan nyadi.’ (Luk. 22:42) Kati kitai amat ulih neladan Jesus lalu ngena pemeri bibas milih kitai ngemuliaka Jehovah sereta ngereja peneka Iya?

5 Amat, kitai ulih neladan Jesus laban kitai mega ditempa neladan gamal Petara. (P-kal. 1:26) Taja pia, pengelepas ke dikembuan kitai bisi tatak. Bup Kudus madahka, Jehovah udah netapka tatak ba pengelepas ke dikembuan kitai, lalu Iya ngarapka kitai nerima tatak nya. Ngambika chunto, ba ruang bilik, bala bini patut nunduk ngagai laki sida, lalu bala anak patut ngasika apai indai sida. (Eps. 5:22; 6:1) Baka ni tatak nya bekaul enggau chara kitai ngena pemeri bibas milih? Saut ngagai tanya nya deka nentuka pengidup ti meruan belama iya ke jemah ila.

GUNA SERETA NYALAH GUNA PEMERI BIBAS MILIH

6. Beri siti chunto ke nunjukka pengelepas ke bisi tatak nya beguna.

6 Kati pengelepas ke bisi tatak ulih nyadi pengelepas ti bendar? Au, ulih! Nama kebuah? Laban tatak ulih nyaga kitai. Ngambika chunto, kitai deka deriba ngagai nengeri ke jauh. Tang uji gambarka, ba jalai nya nadai undang-undang, lalu semua orang ulih mutuska pengelaju sereta bagi jalai ke deka ditengah sida. Kati nuan deka berasai likun ba jalai nya? Tentu enda. Tatak beguna ngambika semua orang tau bulih penguntung ari pengelepas ti bendar. Aram kitai berandauka sekeda chunto ari Bup Kudus ke nunjukka tatak ti ditetapka Jehovah ulih mai penguntung ke kitai.

7. (a) Nama bida entara Adam enggau bala jelu? (b) Terangka siti chara Adam ngena pemeri bibas milih.

7 Lebuh Jehovah nempa mensia ti keterubah, Adam, Jehovah meri iya pemeri ti sama baka ke diberi Iya ngagai bala  melikat, iya nya pemeri bibas milih. Tang Petara enda meri bala jelu pemeri bibas milih. Baka ni Adam ngena pemeri bibas milih enggau chara ti manah? Adam rindu meri nama ngagai bala jelu. Petara “mai sida ngagai orang nya, ngambika iya meri sida nama.” Pengudah Adam beratika tiap iku jelu, iya meri nama ke bisi reti ngagai jelu nya. Jehovah enda ngubah nama jelu ke dipilih Adam. Tang, “nya meh jalai sida [jelu] bulih nama.”—P-kal. 2:19.

8. Baka ni Adam udah nyalah guna pemeri bibas milih ke dikembuan iya, lalu nama nyadi?

8 Jehovah meri Adam tanggung pengawa ngaga dunya nyadi paradais enggau ngasuh iya: “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.” (P-kal. 1:28) Tang Adam milih deka makai buah ke ditagang, lalu enggau ngereja nya iya enda bedulika tatak ke udah ditetapka Jehovah. Ketegal Adam udah nyalah guna pemeri bibas milih ke dikembuan iya, mensia nyau merinsa beribu taun. (Rom. 5:12) Kitai patut ingatka penusah besai ke datai ari pemutus ke digaga Adam. Tu deka meransang kitai ngena pengelepas kitai enggau chara ti manah sereta nerima tatak ke udah diberi Jehovah.

9. Nama pilih ke diberi Jehovah ngagai nembiak Iya, Israel, lalu nama disemaya sida?

9 Semua mensia bulih tubuh ti enda sempurna sereta pemati ari Adam seduai Hawa. Taja pia, kitai agi bisi hak ngena pemeri bibas milih. Kitai ulih meda tu ari chara Jehovah ngintu bansa Israel. Jehovah ngasuh sida milih sekalika deka nyadi nembiak Iya tauka enggai. (P-sut. 19:3-6) Bansa nya milih deka nyadi nembiak Petara sereta nerima tatak ke ditetapka Iya. Ku sida: ‘Kami deka ngereja semua utai ti udah disebut Jehovah.’ (P-sut. 19:8) Sayau amat, sida udah nya milih mungkir ari semaya sida enggau Jehovah. Kitai ulih belajarka utai ti beguna ari chunto nya. Aram kitai seruran beterima kasih ke pemeri bibas milih sereta terus semak ngagai Jehovah sereta ngasika adat Iya.—1 Kor. 10:11.

10. Nama chunto ba Hebrew bab 11 ke nunjukka mensia ti enda sempurna ulih ngena pemeri bibas milih ngemuliaka Petara? (Peda gambar ba pun artikel.)

10 Ba Hebrew bab 11, kitai ulih meda nama 16 iku lelaki enggau indu ke tetap ati ti milih deka bebasaka tatak ke ditetapka Jehovah. Asil iya, sida nerima mayuh berekat sereta pengadang ti ngerinduka ati ke jemah ila. Ngambika chunto, Noah ngembuan pengarap ti besai sereta milih deka ngasika atur ti diberi Petara kena ngaga bandung ke ulih nyelamatka ruang bilik iya sereta serak ke dudi hari. (Heb. 11:7) Abraham seduai Sarah sanggup ngasika Petara lalu mupuk ke menua ti deka diberi Iya ngagai seduai iya. Taja pan seduai iya bisi “peluang mulaika diri” ngagai nengeri Ur, seduai iya betumpu ba semaya Petara ke jemah ila. Bup Kudus madahka, seduai iya “inginka menua ti manah agi.” (Heb. 11:8, 13, 15, 16) Moses nulak semua pengaya menua Ejip sereta milih deka natka pemerinsa sama enggau bala nembiak Petara, lalu enggai ngelantangka diri enda lama ngereja utai ti tau ngasuh bedosa. (Heb. 11:24-26) Aram kitai neladan pengarap sida sereta beterima kasih ke pemeri bibas milih, iya nya ngena pemeri tu ngereja peneka Petara.

11. (a) Nama siti ari berekat ti pemadu besai ke datai ari pemeri bibas milih? (b) Nama meransang nuan deka ngena pemeri bibas milih enggau chara ti manah?

11 Kitai engka baka ke senang agi ngaga pemutus enti orang bukai nulung kitai ngaga pemutus. Tang tu enda ulih ngasuh kitai ngasaika siti ari berekat ti pemadu besai ke datai ari pemeri bibas milih. Nama berekat  nya? Bup Kudus madahka berekat nya ba Ulang Adat 30:19, 20. (Bacha.) Ba ayat 19, kitai macha, Petara meri orang Israel peluang milih. Ba ayat 20, kitai nemu, Jehovah meri sida peluang nunjukka penalam pengerindu sida ke Iya. Kitai mega ulih milih sekalika deka nyembah Jehovah tauka enggai. Lalu kitai mega bisi peluang ti badas ngena pemeri bibas milih ngemuliaka Jehovah sereta nunjukka penalam pengerindu kitai ke Iya!

ANANG NYALAH GUNA PEMERI BIBAS MILIH

12. Nama utai ke enda tau digaga kitai enggau pemeri bibas milih?

12 Uji gambarka, nuan meri siti pemeri ti berega ngagai seiku pangan. Baka ni asai ati nuan enti iya muai pemeri nya ngagai sampah tauka ngena pemeri nya ngenusahka orang bukai? Nuan tentu pedis ati. Jehovah udah meri kitai pemeri bibas milih. Nya alai, Iya tentu berasai pedis ati enti Iya meda orang nyalah guna pengelepas sida, sereta ngaga pemutus ti enda manah tauka ngenusahka orang bukai. Bup Kudus madahka, ba “hari ti penudi,” orang “enda nemu meri terima kasih.” (2 Tim. 3:1, 2) Nya alai, baka ni kitai ulih nunjukka diri beterima kasih ke pemeri kitai ti berega ari Jehovah? Lalu baka ni kitai ulih nyeliah ari nyalah guna pemeri nya?

13. Nama siti chara kitai ulih nyeliah ari nyalah guna pengelepas ke dikembuan kitai?

13 Semua kitai ulih bibas milih pangan, gari enggau chara ngintu diri, sereta pemerindang. Taja pia, kitai engka ngena pengelepas ke dikembuan kitai nyadika tegal deka milih utai ke enda dikerinduka Petara tauka deka nitihka stail orang ba dunya tu. (Bacha 1 Peter 2:16.) Ari ke ngena pengelepas nya nyadika peluang ngereja utai ti salah, kitai patut ngena peluang nya ‘ngereja semua utai nya ke mulia Petara.’—1 Kor. 10:31; Gal. 5:13.

14. Nama kebuah kitai patut arapka Jehovah lebuh ngena pemeri bibas milih?

 14 Ku Jehovah: ‘Aku tu Jehovah Petara kita, ti deka ngajar kita utai ke penguntung kita lalu nunjukka jalai ti patut ditengah kita.’ (Isa. 48:17) Kitai patut arapka Jehovah sereta nerima tatak ke udah ditetapka Iya ngambika kitai ulih milih enggau manah. Kitai enggau baruh ati ngaku “nadai siku [kitai] bisi kuasa ngatur pengidup diri. Nadai siku [kitai] bisi kuasa atas seput diri empu.” (Jer. 10:23) Adam enggau orang Israel ke enda tetap ati milih nulak tatak ke udah ditetapka Jehovah, lalu sida bepanggai ba diri empu. Aram kitai belajar ari chunto sida ke enda manah nya. Ari ke bepanggai ba diri empu, aram kitai manggaika pengarap ba Jehovah enggau pengabis ati kitai.—J-lam. 3:5.

BEBASAKA PEMERI BIBAS MILIH KE DIKEMBUAN ORANG BUKAI

15. Nama ulih dipelajarka kitai ari prinsip ke bisi ba Galatia 6:5?

15 Kitai mega patut bebasaka pengelepas ke dikembuan orang bukai ke patut ngaga pemutus ke diri empu ba pengidup sida. Nama kebuah? Laban semua kitai ngembuan pemeri bibas milih, nadai dua iku orang Kristian ke deka ngaga pemutus ti sama. Tu nyengkaum pemutus pasal ulah sereta sembah kitai. Kingatka prinsip ba Galatia 6:5. (Bacha.) Lebuh kitai nemu tiap iku orang Kristian betanggungjawapka pemutus diri empu, kitai deka bebasaka pengelepas ke dikembuan orang bukai iya nya sida patut ngena pemeri bibas milih.

Kitai ulih ngaga pemutus ke diri empu enggau enda ngansak orang bukai ngaga pemutus ti sama (Peda genteran 15)

16, 17. (a) Baka ni pemeri bibas milih nyau nyadi penanggul di Korint? (b) Baka ni Paul nulung orang Kristian di Korint, lalu nama ulih dipelajarka kitai?

16 Aram kitai meda siti chunto Bup Kudus ke nunjukka kebuah kitai patut bebasaka pemeri bibas milih ke dikembuan bala menyadi Kristian kitai. Orang Kristian ba eklisia di Korint bekelikuh pasal makai dagin ke udah diberi ngagai engkeramba, tang udah nya dijual ba kedai dagin. Pengasai ati sekeda orang Kristian ngemendarka sida makai dagin nya laban sida nemu engkeramba ukai utai idup. Taja pia, sida ke kala nyembah engkeramba ngasaika makai dagin nya sama baka ke nyembah engkeramba. (1 Kor. 8:4, 7) Tu penanggul besai ke engka udah ngasuh eklisia bepechah-belah. Baka ni Paul nulung orang Kristian di Korint mutarka penanggul ti berat nya?

17 Keterubah, Paul ngingatka dua iti raban nya, utai dempa enda ulih ngeringka kaul sida enggau Petara. (1 Kor. 8:8) Udah nya, Paul enda ngasuh sida ngena hak ulih milih ngenusahka pengasai ati orang ke lemi. (1 Kor. 8:9) Nangkan ke nya, iya enda ngasuh sida ke ngembuan pengasai ati ti lemi ngakim orang ke milih deka makai dagin nya. (1 Kor. 10:25, 29, 30) Nya alai, ba pekara besai ke bekaul enggau sembah, tiap iku orang Kristian patut ngaga pemutus ke diri empu. Enda ke kitai mega patut bebasaka pengelepas ke dikembuan bala menyadi Kristian ngaga pemutus ke diri empu indah ba pekara ke mit agi?—1 Kor. 10:32, 33.

18. Baka ni nuan deka nunjukka diri beterima kasih ke pemeri bibas milih?

18 Jehovah udah meri kitai pemeri bibas milih ke ngenataika pengelepas ti bendar ngagai kitai. (2 Kor. 3:17) Kitai beterima kasih ke pemeri tu laban pemeri tu nulung kitai ngaga pemutus ke nunjukka penalam pengerindu kitai ke Jehovah. Nya alai, aram meh kitai terus ngaga pemutus ti ngemuliaka Iya, sereta bebasaka hak orang bukai milih chara sida deka ngena pemeri bibas milih ti berega nya.