Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Menara Jaga (Edisi Dikena Belajar)  |  Januari 2017

 TOPIK RANDAU | CHARA BULIH MAYUH AGI PENGUNTUNG ARI MACHA BUP KUDUS

Nama Ulih Ngasuh Pengawa Macha Bup Kudus Ngerinduka Ati?

Nama Ulih Ngasuh Pengawa Macha Bup Kudus Ngerinduka Ati?

Enda ngerinduka ati? Tauka meransang? Nama runding nuan pasal macha Bup Kudus? Kesuah agi bepanggai ba chara nuan macha iya. Aram kitai beratika utai ke ulih nambah minat sereta pengerindu nuan macha Bup Kudus.

Milih salin Bup Kudus ke tau diandalka sereta ke ngena bansa jaku kemaya hari tu. Enti nuan macha utai ke ngundan mayuh leka jaku ke tusah tauka leka jaku ke lama ti enda ditemu nuan, nuan tentu enda rindu macha iya. Nya alai, giga Bup Kudus ke ngena bansa jaku ti senang dimereti ngambika negu ati nuan. Taja pia, Bup Kudus nya patut disalin enggau bejimat sereta betul. *

Ngena teknologi moden. Kemaya hari tu, Bup Kudus ukai semina bisi dichelak nyadi bup, tang mega bisi digaga nyadi bup dalam format digital. Sekeda Bup Kudus ulih dibacha nengah online tauka di download ke dibacha diri empu ba komputer, tablet tauka telefon binching. Sekeda versi Bup Kudus ngembuan begian ke ulih nulung nuan meresa ayat Bup Kudus ke bekaul enggau topik ti sama, tauka mandingka sekeda salin Bup Kudus enggau jampat. Enti nuan rindu agi mending ari ke macha, Bup Kudus ke udah dirikut mega bisi disediaka dalam sekeda bansa jaku. Mayuh orang rindu mendingka iya lebuh sida berundang ngena perengka pengangkut ke orang mayuh, ngereja pengawa ba rumah, tauka ngereja sekeda pengawa bukai ke agi ulih ngasuh sida mendingka iya. Nama kebuah enda nguji ngiga siti chara ke engkeman ba nuan?

Ngena perengka ke dikena belajarka Bup Kudus. Perengka tu ulih nulung nuan bulih mayuh agi penguntung ari utai ke dibacha nuan. Bisi peta ke madahka menua maya jeman Bup Kudus, ke ulih nulung nuan ngiga dini alai tempat ke dibacha nuan lalu nemu utai ke bisi nyadi enggau terang agi. Artikel baka ke bisi dalam majalah  tu tauka ba laman web jw.org, ulih nulung nuan nemu reti mayuh begian ke bisi ba Bup Kudus.

Ngena mayuh macham chara. Enti macha Bup Kudus ari siti lambar ke siti lambar enda ngerinduka ati, nama kebuah enda macha iya enggau berengkah milih begian ke ngerinduka ati nuan? Enti nuan deka nemu pasal orang ke tebilang dalam Bup Kudus, nuan tau nguji macha begian ke bisi bekaul enggau sida. Chunto tu bisi ba kutak, “ Mansik Bup Kudus enggau Ngelala Orang ke Bisi Dalam Bup Kudus.” Tauka nuan engka deka macha Bup Kudus nitihka topik tauka tusun utai ke bisi nyadi dalam Bup Kudus. Nama kebuah enda nguji siti ari chara tu?

^ per. 4 Mayuh orang ngasaika New World Translation of the Holy Scriptures nya betul, tau dikeandalka, sereta senang dibacha. Bup Kudus tu, ke dikeluarka Saksi-Saksi Jehovah udah bisi dalam lebih 130 bansa jaku. Nuan ulih download Bup Kudus nya ke bisi dalam bansa jaku bukai ari laman web jw.org tauka download applikasi JW Library. Tauka enti nuan deka, Saksi-Saksi Jehovah ulih ngirumka Bup Kudus nya ngagai rumah nuan.