Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 50

Jehovah Ngelindung Jehosapat

Jehovah Ngelindung Jehosapat

Jehosapat, raja menua Judah, ngerusak alta Baal enggau patung ba menua nya. Iya deka rayat nemu adat Jehovah. Nya alai, iya nganjung bala pemesai sereta orang Lewi ngagai serata menua Judah ngambika ngajar adat Jehovah ngagai rayat.

Bansa ke semak enda berani nyerang menua Judah laban sida nemu Jehovah bisi enggau nembiak Iya. Indah sida meri hadiah ngagai Raja Jehosapat. Tang udah nya orang Moap, orang Amon sereta bansa bukai ari Edom datai deka nyerang menua Judah. Jehosapat nemu iya begunaka tulung ari Jehovah. Iya ngasuh semua lelaki, indu sereta bala anak begempuru ba Jerusalem. Ba mua sida, iya besampi: ‘Jehovah, kami enda ulih menang enti nadai tulung ari Nuan. Padah meh nama patut digaga kami.’

Jehovah nyaut sampi iya: ‘Anang takut. Aku deka nulung kita. Belatur aja, lalu diau jenuh meda baka ni Aku deka nyelamatka kita.’ Baka ni Jehovah nyelamatka sida?

Pagi hari siti, Jehosapat milih orang ke belagu lalu ngasuh sida bejalai dulu ba mua soldadu. Sida bejalai ari Jerusalem pansut ngagai endur beperang ke dikumbai Tekoa.

Lebuh orang ke belagu muji Jehovah ngena nyawa ti inggar enggau gaga ati, Jehovah beperang ngarika nembiak Iya. Iya ngasuh orang Amon enggau orang Moap charut lalu sida berengkah nyerang pangan diri nyentukka nadai seiku ari sida selamat. Tang Jehovah ngelindung orang Judah, bala soldadu enggau bala imam. Semua bansa ke semak dia ninga pasal utai ke udah digaga Jehovah, lalu sida nemu Jehovah agi ngelindung nembiak Iya. Baka ni Jehovah nyelamatka nembiak Iya? Enggau mayuh chara. Iya enda begunaka tulung ari mensia lebuh ngereja nya.

“Perang tu ukai perang kita. Belatur aja, lalu diau jenuh nengkilaka TUHAN [Jehovah] menang beperang ngarika kita.”—2 Bansa Israel 20:17