Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 45

Perintah Bansa Israel Bebagi

Perintah Bansa Israel Bebagi

Seagi-agi Solomon nyembah Jehovah, menua Israel bisi pemaik. Tang Solomon jadi enggau mayuh indu ari bansa bukai lalu bala bini iya nyembah patung. Belubah-lubah Solomon berubah lalu iya berengkah nyembah patung mega. Jehovah nyadi ringat. Iya madahka Solomon: ‘Israel deka dirampas ari nuan lalu dibagi dua. Aku deka meri begian ti besai ngagai seiku ari bala pemesai nuan, lalu peturun nuan deka merintah begian ti mit.’

Jehovah enggau terang nunjukka pemutus Iya enggau chara bukai. Seiku ari bala pemesai Solomon ke benama Jeroboam benung bejalai ba rantau jalai lebuh iya betemu enggau nabi Ahijah. Ahijah nyarikka baju panjai iya ngagai 12 chebik lalu madahka Jeroboam: ‘Jehovah deka ngerampas menua ke diperintah Solomon lalu magi dua. Ambi sepuluh chebik kain tu laban nuan deka nyadi raja sepuluh bengkah raban bansa.’ Raja Solomon ninga pasal tu lalu deka munuh Jeroboam! Nya alai, Jeroboam ngerarika diri ngagai menua Ejip. Nyau kelama, Solomon mati lalu anak iya Rehoboam nyadi raja. Udah nya, Jeroboam ngasaika diri ulih pulai baru ngagai Israel enggau selamat.

 Bala tuai orang Israel madahka Rehoboam: ‘Enti nuan manah enggau rayat, sida deka taluk enggau nuan.’ Tang bala pangan Rehoboam ke biak madah: ‘Nuan enda patut manah enggau rayat! Asuh sida bekereja enggau bebendar agi!’ Rehoboam nitihka jaku bala pangan iya ke biak nya. Iya amat jai enggau rayat. Nya alai sepuluh bengkah raban bansa Israel ngelaban iya. Sida ngasuh Jeroboam nyadi raja sepuluh bengkah raban bansa Israel, ke dikumbai perintah menua Israel. Dua iti da bengkah raban bansa Israel dikumbai perintah menua Judah, lalu sida mengkang taluk ngagai Rehoboam. 12 iti bengkah raban bansa Israel diatu bebagi.

Jeroboam enggai rayat iya ngaga sembah ba Jerusalem, endur alai perintah Rehoboam. Nemu nuan nama kebuah? Jeroboam takut sida ngelaban iya lalu nyukung Rehoboam. Nya alai, iya ngaga dua iku anak sapi emas lalu madah ngagai rayat iya: ‘Jerusalem kelalu jauh. Kita ulih ngaga sembah ba ditu.’ Rayat berengkah nyembah anak sapi emas lalu enda ingatka Jehovah agi.

“Anang besulu enggau orang ke enda arap. Laban baka ni ku pengelurus ulih begulai enggau penyai? . . . Tauka orang ke arap tau sebaka enggau orang ke enda arap?”—2 Korint 6:14, 15