Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 47

Jehovah Ngeringka Elijah

Jehovah Ngeringka Elijah

Jesebel ninga utai ke nyadi ngagai bala nabi Baal, lalu iya amat ringat. Iya ngirum pesan ngagai Elijah: ‘Pagila, nuan deka mati baka bala nabi Baal.’ Elijah nyadi amat takut lalu rari ngagai menua puang. Iya besampi: ‘Jehovah, utai tu kelalu balat. Manah agi aku mati.’ Ketegal kelalu lelak, Elijah tinduk ba baruh kayu.

Seiku melikat ngerak iya lalu madah: ‘Dani, lalu makai.’ Elijah meda siti tuku roti ba batu ti angat enggau kebuk ai. Iya makai enggau ngirup lalu tinduk baru. Melikat nya ngerak iya baru lalu madah: ‘Makai meh. Nuan begunaka pengering ngambika ulih neruska pejalai nuan.’ Nyadi, Elijah makai baru. Udah nya iya bejalai 40 hari 40 malam, nyentukka iya datai ba Bukit Sinai. Dia, Elijah tama ngagai siti lubang gua lalu tinduk. Tang, Jehovah bejaku enggau iya: ‘Nama pengawa nuan ditu Elijah?’ Saut Elijah: ‘Orang Israel udah ngelanggar sempekat sida enggau Nuan. Sida udah ngerusakka alta Nuan, lalu udah munuh bala nabi Nuan. Diatu sida deka munuh aku!’

Jehovah madah ngagai iya: ‘Pansut lalu bediri ba atas bukit.’ Keterubah, ribut ti balat muput mansa gua. Udah nya, tanah berenyang lalu bisi api. Pengujung iya, Elijah ninga munyi nyawa baka betelai. Iya nutup mua diri ngena baju panjai lalu bediri ba mua lubang gua nya. Jehovah nanya iya kebuah iya rari. Ku Elijah: ‘Semina aku aja agi tinggal.’ Tang, Jehovah madah ngagai iya: ‘Nuan enda kediri. Bisi 7,000 iku orang ba Israel ke agi nyembah Aku. Mupuk meh lalu pilih Elisa nganti nuan nyadi nabi.’ Tekala nya, Elijah mupuk ngereja pengawa ke diasuh Jehovah. Ba runding nuan, kati Jehovah mega deka mantu nuan lebuh nuan ngereja utai ke diasuh Iya? Au, Iya deka. Aram kitai meda utai ke nyadi maya kemarau.

‘Anang irauka utai, tang dalam semua utai, bantaika semua peminta kita ngagai Petara ngena sampi, sampi peminta, enggau sampi terima kasih.’—Pilipi 4:6