Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 48

Anak Lelaki Seiku Indu Balu Idup Baru

Anak Lelaki Seiku Indu Balu Idup Baru

Lebuh kemarau nyadi, Jehovah madahka Elijah: ‘Mupuk ngagai Sarepat. Seiku indu balu deka nyediaka nuan pemakai.’ Lebuh datai ba mua pintu nengeri nya, Elijah meda seiku indu balu ke seranta ngumpul kayu api. Elijah minta ai irup ari balu nya. Lebuh indu balu nya mansang deka ngambi ai, Elijah ngangauka iya: ‘Lalu bai mega roti ke aku.’ Tang ku indu balu nya: ‘Aku nadai roti deka diberi ngagai nuan. Aku semina bisi tepung enggau minyak ti chukup kena ke pemakai anak enggau aku empu aja.’ Elijah madahka iya: ‘Jehovah udah besemaya enti nuan ngaga roti ke aku, tepung enggau minyak nuan deka seruran bisi nyentukka ujan turun baru.’

Indu balu nya pulai ke rumah lalu ngaga roti ke Elijah. Baka ke udah disemaya Jehovah, indu balu enggau anak iya seruran bisi pemakai maya musin kemarau. Kebuk iya seruran bisi tepung enggau minyak.

Tang udah nya, utai ti jai nyadi. Anak indu balu nya balat sakit lalu mati. Balu nya minta tulung ari Elijah. Elijah ngambi nembiak nya ari  indai iya lalu mai iya ke sadau. Udah nya, Elijah ngalika nembiak nya ba katil lalu besampi: ‘Jehovah, asuh meh nembiak tu idup baru.’ Nemu nuan, nama kebuah kereja ajih ke digaga Jehovah tu ngalitka ati? Laban nadai kala bisi orang diangkat idup baru sebedau nya. Kelimpah ari nya, indu balu enggau anak lelaki iya ukai orang Israel.

Nembiak nya belabuh enseput baru, lalu idup! Elijah madah ngagai indu nya: ‘Peda! Anak nuan idup.’ Indu balu nya amat gaga ati lalu madahka Elijah: ‘Nuan endang nabi Petara ti bendar. Aku nemu tu laban nuan semina madah utai ke diasuh Jehovah.’

‘Peratika burung kak: sida nadai nanam utai, tauka ngetau, lalu sida nadai setor tauka pelabuh, tang taja pia, Petara nupi sida! Kita lebih agi berega ari burung!’—Luke 12:24