Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 46

Jehovah Nunjukka Iya Petara ti Bendar

Jehovah Nunjukka Iya Petara ti Bendar

Perintah sepuluh bengkah raban bansa menua Israel bisi mayuh raja ti jai, lalu Ahap seiku raja ti pemadu jai. Iya jadi enggau seiku indu jai ke nyembah Baal. Nama iya Jesebel. Ahap enggau Jesebel ngemenuhka menua nya enggau sembah Baal lalu munuh mayuh nabi Jehovah. Nama digaga Jehovah? Iya nganjung nabi Elijah mai pesan ngagai Ahap.

Elijah madah ngagai Raja Ahap, menua Israel deka nadai ujan ketegal penyai raja nya. Lebih ari tiga taun, utai ke ditanam enda tumbuh lalu lapar pungkang nyadi. Udah nya, Jehovah nganjung Elijah ngagai Ahap baru. Ku raja nya: ‘Nuan tu pengachau! Semua utai ke nyadi salah nuan.’ Saut Elijah: ‘Ukai aku ke ngasuh kemarau tu nyadi. Tang tu nyadi ketegal nuan nyembah Baal. Kitai deka meda sapa Petara ti bendar. Gempuruka semua orang lalu bai bala nabi Baal betemu ba atas Bukit Karmel.’

Semua orang begempuru ba bukit nya. Ku Elijah: ‘Gaga pemutus kita. Enti Jehovah nya Petara ti bendar, sembah meh Iya. Tang enti Baal nya petara, sembah meh iya! Kitai deka meda sapa Petara ti bendar enggau chara tu. 450 iku bala nabi Baal patut nyediaka pemeri lalu besampi ngagai petara sida, lalu aku deka nyediaka pemeri lalu besampi ngagai Jehovah. Ni bagi Petara ke nyaut ngena api, nya meh Petara ti bendar.’ Semua orang setuju.

Bala nabi Baal nyediaka pemeri. Sepemanjai hari sida besampi ngagai petara sida: ‘Saut kami, Baal!’ Tang, lebuh Baal nadai nyaut, Elijah ngeleseka Baal. Ku iya: ‘Besampi inggar agi. Engka iya udah tinduk lalu kita patut ngerakka iya.’ Sida rauh-rauh besampi nyentuk ngagai lemai hari. Tang, Baal nadai nyaut sida.

Elijah ngengkahka pemeri iya ba atas alta lalu nuangka ai ba pemeri nya. Udah nya, iya besampi: ‘O Jehovah, beri meh tanda kena mandangka Nuan endang Petara ti bendar.’ Tekala nya, Jehovah ngasuh api nurun ari langit  lalu nunu pemeri nya. Orang mayuh manjung: ‘Jehovah Petara ti bendar!’ Ku Elijah: ‘Tangkap bala nabi Baal. Anang nejuka sida rari!’ Ba maya nya, 450 iku nabi Baal dibunuh.

Lebuh remang ti mit ayan ba tasik, Elijah madah ngagai Ahap: ‘Kabut deka datai. Tepan kerita perang nuan lalu pulai.’ Mua hari nyau chelum, ribut belabuh muput lalu hari bangat amat ujan. Pengujung iya, kemarau nyau nadai agi. Ahap nepan kerita perang iya enggau naka penyampat. Enggau tulung ari Jehovah, Elijah belanda jampat agi ari kerita perang nya! Kati penanggul Elijah udah abis? Aram kitai meda.

“Awakka sida nemu Nuan siku aja ti TUHAN [Jehovah], Raja ti Pemadu Tinggi ke serata dunya.”—Masmur 83:18