Terus ngagai penerang

Terus ngagai laman kedua

Terus ngagai Ripih Isi

Saksi-Saksi Jehovah

Iban

Utai ke Ulih Dipelajar Nuan Ari Bup Kudus

 PELAJAR 40

David enggau Goliat

David enggau Goliat

Ku Jehovah bejaku enggau Samuel: ‘Mansang ngagai rumah Jesi. Seiku ari anak lelaki iya deka nyadi raja baru menua Israel.’ Samuel lalu mansang ngagai rumah Jesi. Lebuh iya meda anak ke tuai, iya ngumbai: ‘Tu meh nembiak lelaki ke dipilih.’ Tang Jehovah madahka Samuel, ukai nembiak lelaki nya ke dipilih. Ku Jehovah: ‘Aku meda ati seiku-seiku orang, ukai semina meda penyigat gamal aja.’

Jesi mai enam iku da agi anak lelaki iya ngagai Samuel. Tang Samuel madah: ‘Jehovah enda milih sida tu. Kati nuan agi bisi anak lelaki bukai?’ Jesi nyaut: ‘Bisi. Seiku ke bunsu, David. Iya benung ngibun bedus.’ Lebuh David datai, Jehovah madah ngagai Samuel: ‘Nya meh iya!’ Samuel nuang minyak ngagai pala David, nata iya nyadi raja baru menua Israel.

Nyau kelama, orang Israel beperang enggau orang Pilistin ke bisi soldadu gerasi benama Goliat ke belaban ngarika sida. Ninting hari, Goliat ngeleseka orang Israel. Iya manjung: ‘Anjung seiku lelaki belaban enggau aku. Enti iya menang, kami deka nyadi ulun kita. Tang enti aku menang, kita deka nyadi ulun kami.’

David datai ngagai kem soldadu Israel, mai pemakai ke bala menyadi iya ke nyadi soldadu. Iya ninga jaku Goliat lalu madah: ‘Aku deka ngelaban iya!’ Raja Saul nyaut: ‘Tang nuan semina nembiak aja.’ Saut David: ‘Jehovah deka nulung aku.’

 Saul nguji ngasuh David ngena perengka perang iya, tang ku David: ‘Aku enda ulih belaban ngena perengka tu.’ David ngambi pangwang iya lalu mupuk ngagai sungai. Iya milih lima igi batu ti alus lalu nyimpan nya dalam kambut iya. David lalu belanda ngagai Goliat. Gerasi nya manjung: ‘Mansang kitu, ngambika aku ulih nyerahka bangkai nuan ngagai burung enggau jelu.’ David enda takut. Iya nyaut pulai: ‘Nuan mansang ngelaban aku ngena pedang enggau sangkuh, tang aku mansang ngelaban nuan dalam nama Jehovah. Nuan ukai ngelaban kami; nuan ngelaban Petara. Genap iku orang ditu deka meda Jehovah bekuasa agi ari pedang tauka sangkuh. Iya deka nyerahka kita ngagai kami.’

David nyimpan sigi batu ba pangwang lalu ngayunka pangwang nya enggau naka ulih. Enggau tulung ari Jehovah, batu nya kena ba kening Goliat. Gerasi nya mati lalu rebah ba tanah. Udah nya, orang Pilistin ngerarika diri. Kati nuan arapka Jehovah, baka David?

‘Ba mensia, utai tu enda ulih, tang ba Petara utai tu enda baka nya, laban ba Petara semua utai ulih magang.’—Mark 10:27

Belajar Lebih Agi

AJAR MEH ANAK NUAN

David Enda Takut

Bacha cherita Bup Kudus tu ngambika nemu nama kebuah David berani.