Terus ngagai penerang

Terus ngagai Ripih Isi

Saksi-Saksi Jehovah

Pilih bansa jaku Iban

 PELAJAR 36

Semaya Jeptah

Semaya Jeptah

Orang Israel sekali agi ninggalka Jehovah lalu berengkah nyembah petara pelesu. Lebuh orang Amon nyerang sereta ngelaban orang Israel, petara pelesu enda ulih nulung sida. Betaun-taun orang Israel merinsa. Ke pengujung iya, sida madah ngagai Jehovah: ‘Kami udah bedosa. Tulung meh ngelepaska kami ari munsuh kami.’ Orang Israel ngerusakka patung sida lalu berengkah nyembah Jehovah baru. Jehovah enggai meda orang Israel majak merinsa.

Seiku soldadu ti berani ke benama Jeptah dipilih nguluka orang Israel ngelaban orang Amon. Ku iya madah ngagai Jehovah: ‘Enti Nuan nulung kami menang ba perang tu, aku besemaya deka nyerahka orang ke terubah-rubah pansut ari rumah aku, ti ngambat aku lebuh aku pulai menang beperang.’ Jehovah ningaka sampi Jeptah lalu nulung iya menang ba perang nya.

 Lebuh Jeptah pulai ke rumah, orang ke dulu pansut ngambat iya, anak dara iya empu, anak tunggal iya. Anak indu iya betanda sereta nebah tamborin. Nama deka digaga Jeptah? Iya ingatka semaya iya lalu nyebut: ‘O anak! Nuan ngenusahka ati aku! Aku udah besemaya enggau Jehovah. Kena ngamatka nya, aku patut nganjung nuan gawaka Iya ba langkau sembiang ba Siloh.’ Tang ku anak dara iya: ‘Apai, enti nuan udah besemaya enggau Jehovah, kereja meh semaya nya. Aku semina deka minta diau enggau bala pangan ke indu ba bukit pengelama dua bulan. Udah nya aku mupuk.’ Anak dara Jeptah bekereja enggau tetap ati ba langkau sembiang sepemanjai idup iya. Ninting taun, bala pangan iya nemuai ngagai iya ba Siloh.

“Orang ke rinduka anak lelaki tauka anak indu sida lebih ari sida ke rinduka aku, enda tau nyadi murid aku.”—Matthew 10:37